Read luo 1 Samuel 20 Bible Online

1 Samuel 20 - luo bible

1 Samuel 20

¹Daudi noringo oa Nayoth e Rama. Nodhi ir Jonathan, nopenje niya, “Ang’o ma asetimo? Ere kethona? Ere gima rach ma wuoru oneno ni asetimo momiyo odwaro nega?”

²Jonathan nodwoke ni, “Ngang’! Ok odwar negi. Wuora ok tim gimoro amora, mak onyisa. Ere gimomiyo wuora dipanda wachni? Ok en kamano?”

³To Daudi nowachone, koramo niya, “Wuoru ong’eyo ni igena ahinya, omiyo ok odwar mondo ing’e wachni, nimar dipo ka obedoni malit. To adier, gi nying Ruoth Nyasaye, kendo gi nyingi iwuon, ondamo achiel kende ema nie kinda gi tho.”

⁴Eka Jonathan nopenjo Daudi niya, “Ere gima idwaro mondo atimni?”

⁵ Daudi nodwoke niya, “Kiny due nopor, kendo owinjore abed gi ruoth e chiemo. To we adhi apond e lek nyaka chop odhiambo mar chieng’ mar adek,

⁶kapo ni wuoru oneno ni aonge, to iwachne ni, ‘Daudi nokwaya ahinya mondo ayiene oring odhi dalagi Bethlehem, nikech ndalogi ema joodgi duto timoe misango mar higa.’

⁷Kowacho ni, ‘Mano ber,’ eka anayud kue. To ka mirima omake, eka ning’e ni odwaro timona gimoro marach.

⁸Emomiyo koro bedna jaadiera, nimar nikuong’orina e nyim Ruoth Nyasaye ni osiep manie kindwa ok norum. To ka aseketho, to nega in iwuon. Ang’o ma dimi itera ir wuoru?”

⁹Jonathan nodwoke niya, “We paro kamano! Ka da ang’eyo ni wuora dwaro timoni gimoro marach, donge danyisi?”

¹⁰Daudi nopenjo Jonathan niya, “To ere ng’ama nokelna wach, kapo ni wuoru odwoki gi gero?”

¹¹Jonathan nowachone niya, “Bi wadhi oko e pap.” Mi ne giwuok giduto, gidhi e pap.

¹²Eka Jonathan nowacho ni Daudi niya, “Akuong’ora e nying Ruoth Nyasaye ma Nyasach Israel ni kiny kata orucha, sa makama, nang’e gima wuora paro. Ka ayudo ni wach ber kuomi, to nanyisi.

¹³To ka wuora dwaro timoni marach, mi ok anyisi mondo itony, to Ruoth Nyasaye mondo okweda. Ruoth Nyasaye obed kodi, kaka yande obet gi wuora.

¹⁴Ka ok atho, to bedna jaadiera, kaka Ruoth Nyasaye dwaro. To ka atho,

¹⁵ to ibed jaadiera ni oda nyaka chieng’. Ka Ruoth Nyasaye otieko wasiki duto e piny,

¹⁶to kik nyinga bed kaachiel kodgi. Ruoth Nyasaye mondo ochul kuor mana ni wasiki.”

¹⁷Jonathan nochako okuong’ore ni Daudi kendo, nikech nohere mana kaka noherore owuon.

¹⁸Eka Jonathan nowacho ni Daudi niya, “Kiny due nopor, kendo kiny nong’ere ni ionge, nikech komi nobed nono.

¹⁹To kochopo orucha, to nong’ere ni ionge chuth. Omiyo chieng’no dhiyo kuma nipondoe chieng’ cha, ibed but pidh kite.

²⁰Eka naba kanyono gi aserni adek, ka ng’ama thoro,

²¹kendo naor rawera moro, mondo odhi omany asernigo. Ka awachone niya, ‘Aserni eko ni e bathi koni, kawgi,’ to mano nyiso ni mondo iwuog kama ipondoe, nikech wach ber kuomi. Akuong’ora gi nying Ruoth Nyasaye ni onge gima biro timi.

²²To ka awachone rawerano ni, ‘Aserni nie nyimi’, to mano nyiso ni Ruoth Nyasaye dwaro mondo idhi adhiya.

²³To Ruoth Nyasaye mondo obed janeno nyaka chieng’ kuom singruok mane watimo kodi.”

²⁴Kamano Daudi nodhi mopondo e pap kendo kane due opor, ruoth nodhi e sawo.

²⁵Nobet e kome man but kor ot, kaka nojatimo. Abner nobet bute, kendo Jonathan bende ne ni kanyo, to kom Daudi ne ni nono.

²⁶Saulo ne ok owacho gimoro chieng’ono, nikech noparo ni Daudi ok obiro nikech gimoro ogeng’one. Kamoro en gi chola, to pok ogude.

²⁷Kinyne, kane due osepor, kom Daudi ne pod ni nono, mi Saulo nopenjo Jonathan wuode niya, “Marang’o wuod Jesse ok osebiro e chiemo, nyoro kata kawuono?”

²⁸Jonatha nodwoke niya, “Daudi nohomba ahinya ni mondo ayiene odhi Bethlehem,

²⁹kowachona ni, ‘Asayi, yiena adhi, nikech joodwa timo misango dala, kendo owetena osechika mondo abedie. Emomiyo koro kiyiena, to we mondo adhi ane wetena.’ Mano emomiyo ok obiro mondo ochiem kodi.”

³⁰Saulo nokecho gi Jonathan, mowachone niya, “In wuod dhako ma wiye tek, kendo ma jajemo! Donge ang’eyo ni imako osiep gi wuod Jesse, ma biro keloni wichkuot, kendo ni meru monywoli bende?

³¹Ndalo duto ma wuod Jesse osiko ka ngima e piny, in ok nidongi. Emomiyo koro or wach, iomnago, nikech nyaka otho!”

³²To Jonathan nodwoko Saulo wuon mare niya, “Ere gimomiyo dotho? Ang’o mosetimo?”

³³To Saulo nobaye gi tong’ mondo ochwowe. Mano omiyo Jonathan nong’eyo ni wuon mare dwaro nego Daudi.

³⁴Jonathan noa e mesa ka mirima mager omake, mokuno chiemo chieng’ mar ariyo mar sawo. Chunye ne lit nikech wach Daudi, nimar wuon mare noseyanye.

³⁵Kinyne gokinyi, Jonathan nowuok gi rawera moro, modhi e pap, kaka ne gichikore gi Daudi.

³⁶Nowacho ni rawerano niya, “Ringi imany aserni madwaro dirogi.” E sa mane rawera ringo, Jonathan nodiro aserni mokadhe.

³⁷Kane ochopo kama aserni olwarie, Jonathan nokone niya “Aserni ero nie nyimi.

³⁸Ruri, kik ideki.” Omiyo rawerano nochoko aserni, moduogogi ni Jonathan ruodhe.

³⁹To nokiya gima timore, mak mana Jonathan gi Daudi kende ema nong’eyo tiend wachno.

⁴⁰Bang’e Jonathan nomiye gige mag lweny, kowachone ni mondo otergi dala.

⁴¹Kane rawera osedhi, Daudi noa kar pidh kite, mokulore didek, eka ne gimosore gi Jonathan, mi giywak giduto, to Daudi noywak moloyo.

⁴²Jonathan nowacho ni Daudi niya, “Dhiyo gi kue. Wasesingore e nying Ruoth Nyasaye mobedo janeno e kindwa kodi, kendo e kind nyikwaya gi nyikwayi nyaka chieng’.” Eka Daudi nochung’, modhi, to Jonathan nodok dala.