Read luo 1 Samuel 23 Bible Online

1 Samuel 23 - luo bible

1 Samuel 23

¹Chieng’ moro nonyis Daudi ni jo-Filistia kedo gi jo-Keila, kendo yako cham mane ni kuonde dino.

²Omiyo nopenjo Ruoth Nyasaye wach niya, “Adhi aked gi jo-Filistia koso?” Ruoth Nyasaye nodwoke niya, “Dhiyo, iked kodgi, mondo ires jo-Keila.”

³To joma ne ni kod Daudi nowachone niya, “Ka luoro nyalo makowa mana e Juda kaeri, donge wanaluor moloyo kwadhi kedo gi jo-Filistia?”

⁴Kuom mano Daudi nochako openjo Ruoth Nyasaye wach, mi Ruoth Nyasaye nodwoke niya, “A malo idhi Keila, nimar abiro chiwo jo-Filistia e lweti.”

⁵Omiyo Daudi gi joge nodhi Keila, mokedo gi jo-Filistia. Ne giloyogi marach, kendo gipeyo jambgi, mi gireso jo-Keila.

⁶Kane Abiathar wuod Ahimelek oringo odhi Keila ir Daudi, nodhi koting’o law dolo miluongo ni efod e lwete.

⁷Saulo nowinjo ni Daudi odhi Keila, mi nowacho niya, “Nyasaye osechiwe e lweta nikech kosedonjo e dala man gi rangeye kod radedi, to osemakore owuon.”

⁸Omiyo Saulo nowako ji duto ni lweny, mondo gidhi Keila, gitim ageng’a ni Daudi gi joge.

⁹To kane Daudi owinjo ni Saulo dwaro timone marach, nowachone Abiathar niya, “Kelna law dolo.”

¹⁰Eka Daudi nokwayo Ruoth Nyasaye niya, “A Ruoth Nyasaye ma Nyasach Israel, asewinjo ni Saulo dwaro biro Keila ka, mondo oketh dala nikech an.

¹¹Obiro biro adier kaka asewinjono, koso? A Ruoth Nyasaye ma Nyasach Israel, asayi mondo inyisa wachno.” Mi Ruoth Nyasaye nodwoke niya, “Obiro biro.”

¹²Eka Daudi nopenjo kendo niya, “Jo-Keila nochiwa kaachiel gi joga e lwet Saulo koso?” Ruoth Nyasaye nodwoke ni, “Ginichiwi.”

¹³Omiyo Daudi nowuok gi joge duto mia auchiel, modhi kamoro amora mane ginyalo dhiye. Kane Saulo owinjo ni Daudi oseringo oa Keila, ne ok odhi kuno.

¹⁴Daudi nodak kuonde rogo e piny gode manie thim Zif. Saulo ne dware pile, to Nyasaye ne ok ochiwe e lwete.

¹⁵Luoro nomako Daudi nikech Saulo nosewuok mondo onege. To kane Daudi ni Horesh e thim Zif,

¹⁶Jonathan wuod Saulo nowuok, modhi ire kuno, mojiwe kotego chunye kuom Nyasaye.

¹⁷Nowachone niya, “Kik iluor, nimar Saulo wuora ok bi nwang’i. Inibed ruodh Israel, to anabed jalupni. Saulo wuora bende ong’eyo kamano.”

¹⁸ Mi ne gikuong’ore e nyim Ruoth Nyasaye ni osiep manie kindgi ok norum. Bang’ mano, Jonathan nodok dala, to Daudi nodong’ Horesh.

¹⁹ Jo-Zif nodhi Gibea ir saulo, mi giwacho niya, “Daudi opondo kuomwa Horesh, e got Hakila, yo milambo mar Jeshimon

²⁰Emomiyo ruoth, koro bi e kinde moro amora midwaro, mondo wachiwe e lweti.”

²¹Saulo nodwokogi niya, “Ruoth Nyasaye mondo oguedhu, nikech usetimona maber.

²²Koro dhiuru, unon mondo ung’e maber kama opondoe, bende ung’e joma osenene kanyo, nikech osenyisa ni ogalagala ahinya.

²³Ng’euru kuonde duto mopondoe, kendo uduogna wach madier. Eka anadhi kodu, kendo ka en e pinywa ka, to anadware kuom dhout Juda nyaka ayude.”

²⁴Kuom mano ne giwuok, mi gidok Zif, motelo ni Saulo. To Daudi gi joge ne nie thim Maon man Araba yo milambo mar Jeshimon.

²⁵Saulo gi joge nowuok dhi dware, to nonyis Daudi wach, mi nolor odhi nyaka e lwanda manie thim Maon. Kane Saulo owinjo kamano, nolawo Daudi nyaka thimno.

²⁶Saulo nodhi e bath got konchiel, to Daudi gi joge ne nie bathe komachielo. Daudi ne reto mondo oyomb Saulo, nikech Saulo gi joge ne ochako timonigi ageng’a koni gi koni, mondo omakgi.

²⁷To e sa nogono, jaote moro nobiro ir Saulo mowachone niya, “Reti, ibi piyo, nikech jo-Filistia osemonjo pinywa.”

²⁸Mi Saulo noweyo lawo Daudi, modok kedo gi jo-Filistia. Emomiyo iluongo kanyo ni, ‘Lwanda mar Pogruok’.

²⁹To Daudi noa kanyo, modhi odak kuonde rogo man Engedi.