Read luo 1 Samuel 26 Bible Online

1 Samuel 26 - luo bible

1 Samuel 26

¹ Jo-Zif nobiro Gibea ir Saulo, mi giwachone niya, “Donge ing’eyo ni Daudi opondo e got Hakila, momanyore gi Jeshimon?”

²Mi Saulo nolor mowuok odhi nyaka thim Zif gi jo-Israel moyier alufu adek, mondo odwar Daudi e thimno.

³Nobworo but yo e got Hakila, momanyore gi Jeshimon, to Daudi ne nie thim. To kane Daudi ong’eyo ni Saulo obiro dware kuno,

⁴nooro jombetre, mofwenyo kama Saulo obworoe.

⁵Eka nowuok, modhi kanyono, moneno kama Saulo gi Abner wuod Ner, jatend jolweny, jonindoe e dier kambi, to joge noguro hembegi alwora.

⁶Daudi nowacho ni Ahimelek ja-Hiti, kod Abishai wuod Zeruya ma owadgi Joab niya, “Ere ng’ama didhi koda mwalo e kambi Saulo?” Abishai nodwoke ni, “Wadhi kodi.”

⁷Omiyo Daudi gi Abishai nodhi kuno gotieno, moyudo Saulo ka nindo e dier kambi, to tong’e ochwowo piny gi yo ka wiye. Abner gi jolweny bende ne nindo bute alwora.

⁸Abishai nowacho ni Daudi niya, “Nyasaye oseketo jasiki e lweti tinendeni. Yiena mondo achwowe dichiel gi tong’e, ariwe gi lowo, mak anwoyo lweta!”

⁹To Daudi nodwoke niya, “Kik inege, nimar onge ng’ama nyalo tero lwete kuom ruoth mowir ma Ruoth Nyasaye oyiero, mak doyud bura.”

¹⁰Eka nomedo wacho niya, “Gi nying Ruoth Nyasaye, Ruoth Nyasaye ema chieng’ notieke, kata ka chieng’ thone ochopo, kata kodhi e lweny.

¹¹ Kuero ngang’! Kik ater lweta kuom ruoth mowir ma Ruoth Nyasaye oyiero. To wakaw mana tong’ ma yo ka wiyeno, kod puga mar pino mondo wadhigo.”

¹²Kamano Daudi nokawo tong’ gi puk pi mane ni yo ka wi Saulo, mi ne gia, ma onge ng’at monenogi, kata mowinjogi, kata mochiew. Ne ginindo giduto, nikech Ruoth Nyasaye nosemiyo nindo ogoyogi ngoga.

¹³Daudi noidho loka machielo, mochung’ ewi got gi kuma bor, ka kindgi opogore malach.

¹⁴Eka noluongo jolweny kod Abner wuod Ner, kowacho niya, “Abner, dak idwoka wach?” Abner nodwoko niya “In ng’awa, ma luongo ruoth?”

¹⁵Mi Daudi nowachone niya, “Donge in dichwo? Bende nitie ng’ama romo kodi e Israel? To ka kamano, nende ok irito ruoth maber? Donge ing’eyo ni ng’at moro nobiro nege?

¹⁶Gima isetimo ok ber. Gi nying Ruoth Nyasaye, uwinjoru gi tho, nikech ne ok urito ruoth, ng’at mowir ma Ruoth Nyasaye oyiero. Koro neye kuma tong’ ruoth nitie, kod puk pi mane ni yo ka wiye.”

¹⁷Kane Saulo ochamo dwond Daudi, nopenje niya, “Daudi wuoda, mano dwondi koso?” Daudi nodwoke niya, “Ee, mano dwonda, ruoth.

¹⁸Marang’o ilawa, to an mana jatichni? En ang’o masetimo? Koso rach manadi miseneno kuoma?

¹⁹Koro yie iwinj wachna. Kapo ni Ruoth Nyasaye ema othuwi koda, to mondo oyie kawo misango. To ka ji ema othuwi koda, to mondo okuong’gi e nying Ruoth Nyasaye, nikech gisegola tinende ni kik abed e oganda mar jo-Ruoth Nyasaye, kendo giseriemba mondo adhi ati ni nyiseche mamoko.

²⁰Emomiyo koro kik iwe atho e pinyni, kuma bor gi Ruoth Nyasaye, nimar isewuok dwaro ngimana, mana ka ng’at ma dwaro ayuer e gode.”

²¹Eka Saulo nowacho niya, “Aseketho. Duogi, Daudi wuoda. Ok nachak atimni gima dihinyi, nikech nende iluoro ngimana. Awuoro, asefuwo, kendo alal marach.”

²²Mi Daudi nodwoke niya, “Ruoth, ne tong’i! Or jalweny moro mondo obi loka ku, oome.

²³Ruoth Nyasaye ema miyo ng’ato ka ng’ato pok mowinjore gi timne makare kod adierane. Ruoth Nyasaye nende oketi e lweta, to nadagi tero lweta kuom ruoth mowir ma Ruoth Nyasaye oyiero.

²⁴Kaka ngimani nende long’o e wang’a, e kaka ngimana bende mondo obed malong’o e wang’ Ruoth Nyasaye, kendo en ema mondo oresa e masiche duto.”

²⁵Eka Saulo nowacho ni Daudi niya, “Oguedhi, Daudi wuoda! Initim timbe madongo, kendo nilo.” Mi Daudi nodhi, to Saulo nodok dala.