Read luo 1 Samuel 27 Bible Online

1 Samuel 27 - luo bible

1 Samuel 27

¹Daudi noparo niya, “Chieng’ moro Saulo nonega. Onge gimoro maber ma datim, mak mana karingo adhi e piny jo-Filistia. Mano eka Saulo nowe lawa, nikech kata komanya machal nadi e piny Israel duto, to ok nonwang’a, kendo natony kaa e lwete.”

²Omiyo Daudi nowuok gi ji mia auchiel mane ni kode, modhi ir Akish, wuod Maok, ruodh Gath,

³mi gidak kode kuno. Ng’ato ka ng’ato ne ni kod joode. Daudi bende ne ni kod monde ariyo, Ahinoam nyar Jezeel, kod Abigail ma chi Nabal ja-Karmel.

⁴Kane onyis Saulo ni Daudi oseringo nyaka Gath, noweyo dware.

⁵Daudi nokwayo Akish niya, “Ruoth, ka koro iyie konya, to mondo imiya kamoro e mier maoko, adagie. Ok owinjore adag kodi e dalani.”

⁶Mi Akish nomiye Ziklag mana chieng’ono. Mano emomiyo Ziklag pod ni e bwo ruodh Juda nyaka chil kawuono.

⁷Daudi nodak e piny jo-Filistia kuom kinde ma dirom higa achiel kod dueche ang’wen.

⁸Ndalogo Daudi gi joge ne monjo jo-Geshur, gi jo-Girzi, kod jo-Amalek, nikech ogendnigo ema nodak e pinyno, chakre Telam kochomo yo Shur, nyaka piny Misri.

⁹Daudi ne ketho pinyno ma ok owe ng’ama dichwo kata ma dhako ka ngima. Nopeyo rombe, gi dhok gi kenje, kod ngamia, kendo noyako lewni, to bang’e nodokga ir Akish.

¹⁰To kane Akish openje ni, “Ia monjo kune kawuono?” Daudi ne dwoke niya, “Waa monjo yo milambo mar Juda,” kata, “Yo milambo mar piny jo-Jerameel,” kata, “Yo milambo mar piny jo-Keni.”

¹¹Daudi ne ok we ng’ama dichwo kata madhako kangima, mane dikel wach Gath, nikech noparo niya, “Dipo ka gidonjonwa, ka ginyiso gima watimo.” Kamano e kaka tim Daudi nobet ndalo duto mane odakie e piny jo-Filistia.

¹²To Akish nogeno Daudi, koparo niya, “Osemiyo jogi ma jo-Israel sin kode chuth, omiyo nobed ng’ata mosiko.”