Read luo 1 Samuel 28 Bible Online

1 Samuel 28 - luo bible

1 Samuel 28

¹Ndalogo jo-Filistia nochoko jolweny duto mondo giked gi jo-Israel. Akish nowacho ni Daudi niya, “Ng’e malong’o ni in kaachiel gi jogi nyaka udhi koda e lweny.”

²Daudi nodwoke ni, “Mano ber, kendo ibiro neno gima anyalo timo!” Mi Akish nowachone ni, “Ber! Abiro keti jaritna mosiko.”

³ Noyudo Samuel osetho, mi jo-Israel duto noywage, kendo ne giyike Rama, dalane owuon. To Saulo noseriembo jo-nyakalondo kod ajuoge duto oa e piny Israel.

⁴Jo-Filistia nochokore kanyakla Shunem, mi gijot kuno. Saulo bende nochoko jo-Israel duto, mojot Gilboa.

⁵Kane Saulo oneno jolweny jo-Filistia, luoro nomake, mokirni ahinya.

⁶ To kane okwayo Ruoth Nyasaye wach, Ruoth Nyasaye ne ok odwoke, kata e yor lek, kata e yor Urim[2] kata gi dho jonabi.

⁷Bang’e Saulo nowacho ni jotichne niya, “Dwarnauru dhako ma ja nyakalondo, mondo adhi ire, apenj wach.” Jotichne nodwoke ni, “Nitie dhako moro ma janyakalondo modak Endor.”

⁸Saulo no wako lewni mopogore gi mane ojarwako, mondo orweny ji. Eka nokawo ji ariyo, modhigo ir dhakono gotieno. Nowacho ni dhakono niya, “Korna wach gi nyakalondo, kendo igolna ng’at mabiro wachoni, kuom joma otho.”

⁹To dhakono nodwoke niya, “Donge ing’eyo gima Saulo osetimo? Oseriembo jo-nyakalondo gi ajuoge e pinywa. Marang’o ichika gi masira?”

¹⁰To Saulo nokuong’ore, kawachone ni, “Gi nying Ruoth Nyasaye, onge bura ma noyudi kuom wachnii.”

¹¹Eka dhakono nopenje niya, “Agolni ng’a?” Mi nodwoke ni, “Golna Samuel.”

¹²To kane dhakono oneno Samuel kawuok, nokok matek, kowacho ni Saulo niya, “Marang’o iwuonda? To kara in mana Saulo!”

¹³To ruoth nowachone ni, “Kik iluor. Ineno ang’o?” Nodwoko Saulo niya, “Aneno nyasaye moro kawuok ei lowo.”

¹⁴Mi Saulo nopenje ni, “Ochalo nadi?” Nodwoke niya, “Jaduong’ moti, moumore gi law abola ema owuok.” Eka Saulo nong’eyo ni en Samuel, mi nogoyo chonge pinyu, mokulore nyaka e lowo, komiye duong’.

¹⁵Samuel nopenjo Saulo niya, “Marang’o ichanda, kimiyo awuok oko e liel?” Saulo nodwoke niya,, “Adhier nono, nikech jo-Filistia kedo koda, to Nyasaye oseweya, ma dwok moro ok odwoka, kata gi dho jonabi, kata gi yor lek. Emomiyo aluongi ni mondo inyisa gima onego atim.”

¹⁶Samuel nowachone niya, “Marang’o ipenja, kobedo ni Ruoth Nyasaye oseweyi, modoko jasiki?

¹⁷ Ruoth Nyasaye osetimoni mana kaka nomiyo awacho. Osemayi loch, momiyo Daudi.

¹⁸ Osetimoni kamano nikech nidagi winje, kendo ne ok itimo ni jo-Amalek gima romre gi mirimbe mager.

¹⁹To bende Ruoth Nyasaye biro chiwi kaachiel gi jo-Israel e lwet jo-Filistia, kendo kiny inibed koda ka, kaachiel gi yawuoti. Adier, Ruoth Nyasaye biro chiwo oganda lweny mar Israel e lwet jo-Filistia.”

²⁰Kane Saulo owinjo weche Samuelgo, luoro nomake ahinya, mogore piny auma. Noonge gi teko chuth, nimar noyudo oseriyo kech odiechieng’ gotieno duto.

²¹Dhakono nosudo bute, kendo ka noneno ni luoro omake, nokone niya, “Nende awinjo wachni, kendo nayie tho kane atimo gima nikwaya.

²²Emomiyo koro in bende yie iwinj wachna. We amiyie chiemo moro matin, mondo icham, iyudgo teko mar chako wuoth.”

²³To nodagi ni ok ochiem, to jotichne kaachiel gi dhakono nomedo kwaye, moyie. Nochung’ koa e lowo, mobet e kitanda.

²⁴Dhakono ne nigi nyarwath machwe e ot kanyo. Noreto moyang’o nyarwadhno piyopiyo. Bende nokawo mogo, modwalo, kendo olosogo makati, ma ok oketie thowi.

²⁵Noketogi e nyim Saulo gi jotichne, mi ne gichiemo. Eka ne giwuok, mi gidhi mana gotienono.