Read luo 1 Samuel 29 Bible Online

1 Samuel 29 - luo bible

1 Samuel 29

¹Jo-Filistia nochoko jolweny duto kanyakla Afek, to jo-Israel nojot but thidhiya man Jezreel.

²Jodong jo-Filistia ne chano jogi e migepe matindo gi madongo, to Daudi gi joge, kaachiel gi jo-Akish, ne luwo bang’gi.

³Kane jotend jo-Filistia oneno kamano, ne gipenjo niya, “Jo-Hibraniagi to timo ang’o ka?” Akish nodwokogi niya, “Jali e Daudi, mane jatich Saulo ruodh Israel. Koro osedak koda moloyo higa achiel, to chakre ndalo mane obiroe ira, pok aneno rach moro kuome nyaka chil kawuono.”

⁴To jotend jo-Filistia nokecho kode, mi giwachone niya, “Kwer jali odog kuma niketee, kik odhi kodwa kedo, nimar dipo kolokore jasikwa e lweny, nikech kodwaro ni owinjre gi ruodhe, to doneg man jowa.

⁵ Donge en e Daudi mane ji miel ka wero ni, ‘Saulo onego ji gana, to Daudi onego ji gana gi gana’?”

⁶Omiyo Akish noluongo Daudi, mowachone niya, “Gi nying Ruoth Nyasaye, in jaadiera, kendo an to aneno ni owinjore wadhi kodi e lweny, nikech pok aneno rach moro kuomi, chakre ndalo mane ibiroe ira, nyaka chil kawuono. To kata kamano, jodongo ok oyie kodi.

⁷Emomiyo koro dogi, idhi gi kue, ma ok itimo gima diketh chunygi.”

⁸To Daudi nowacho ni Akish niya, “Ere gima asetimo? Wach ang’o miseyudo kuoma ndalo duto masebedogo kodi nyaka chil kawuono, ma dimona dhi kedo gi wasiki?”

⁹Akish nodwoke niya, “Ang’eyo ni isebedona jaadiera, mana kaka malaika mar Nyasaye, to kata kamano jotend jo-Filistia osedagi ni kik idhi kodgi e lweny.

¹⁰Emomiyo kiny ichiew gokinyi mang’ich, kaachiel gi jotich ruodhu ma nubirogo, kendo umondi ka piny dwaro ru, mondo udog e dala ma namiyou. To kik ibed gi chuny moro marach, nikech an to ageni chuth.”

¹¹Kamano Daudi gi joge nowuok gokinyi mang’ich, modok e piny jo-Filistia. Jo-Filistia to nodhi Jezreel.