Read luo 1 Samuel 31 Bible Online

1 Samuel 31 - luo bible

1 Samuel 31

¹Noyudo jo-Filistia kedo gi jo-Israel, kendo jo-Israel noringo, kinegogi e got Gilboa.

²Jo-Filistia nojuko Saulo kod yawuote ma Jonathan gi Abinadab kod Malkishua, kendo ne ginego yawuotego.

³Lweny nohingo Saulo, mi jodir-asere noyude, mochwowe kendo ohinye marach.

⁴Saulo nowacho ni jating’ne gi lweny niya, “Wuodh liganglani, inegago, nono to joma kia Nyasayegi biro chwowa, kendo nyiera.” To jalo nodagi, nikech noluor ahinya. Emomiyo Saulo nomako liganglane owuon, mochwoworee.

⁵To kane jating’ne gi lweny oneno ni Saulo osethoo, en bende nochwowore e liganglane, motho gi kanyo.

⁶Kamano, Saulo, kaachiel gi yawuote adek, gi jating’ne gi lweny, kod joge duto, notho chieng’no.

⁷Kane jo-Isreal mane odak e holo machielo, kaachiel gi joma nodak loka Jordan, oneno ni jolwenj Israel oseringo, kendo ni Saulo gi yawuote josetho, ne gibolo miechgi kanyo, mi gin bende ne giringo. Bang’e jo-Filistia nobiro, modak e miergo.

⁸Kinyne, kane jo-Filistia obiro dedo jomotho, ne giyudo ringre Saulo gi ringre yawuote adek, koriere e got Gilboa.

⁹Ne ging’ado wiye oko, kendo ne gikawo gige mag lweny. Eka ne gioro joote e piny jo-Filistia duto, mondo oter wach maberno ni nyisechegi kod jopinygi.

¹⁰Ne giketo gik Saulo mag lweny e od nyisechegi mamon, miluongo ni Ashtaroth, kendo ne gitueyo ringre e kor ohinga mar Bethshan.

¹¹To kane jo-Jabesh-gilead owinjo gima jo-Filistia osetimo ni Saulo,

¹²thuondi duto nowuok, mowuotho otieno duto. Ne gigolo ringre Saulo kod ringre yawuote e ohinga mar Bethshan, mi gikelogi Jabesh, kendo ne giwirogi gi gik mang’ue ng’ar kanyo.

¹³Eka ne gikawo chokegi, mi giyiko e tiend yath moro man Jabesh, kendo ne gitueyo chiemo ndalo abiriyo.