Read luo 1 Samuel 4 Bible Online

1 Samuel 4 - luo bible

1 Samuel 4

¹E ndalogo, jo-Filistia nochokore mondo omonj jo-Israel, kendo jo-Israel nowuok mondo oked kodgi. Jo-Israel nojot Ebenezer, to jo-Filistia nojot Afek.

²Jo-Filistia noyaro nii lweny momanyore gi jo-Israel, kendo kane girado, jo-Filistia noloyo jo-Israel, mi ginego jogi ma dirom alufu ang’wen e paw lweny.

³Kane jolweny oduogo e kambi, jodong Israel nopenjore niya, “Marang’o Ruoth Nyasaye omiyo jo-Filistia oloyowa kawuono? Wadhiuru Shilo waom Sandug Muma mar Ruoth Nyasaye wabedgo, mondo oreswa e lwet wasikwa.”

⁴ Omiyo ne gioro wach Shilo, mi gikelo Sandug Muma mar Ruoth Nyasaye Manyalo Gik Moko Duto, ma en Nyasaye mobet ewi kerubi. Hofni gi Finehas, ma yawuot Eli, ema nobiro gi Sandug Muma.

⁵Kane Sandug Muma mar Ruoth Nyasaye obiro e kambi, jo-Israel duto nokok matek, ma piny omor.

⁶Kane jo-Filistia owinjo kokono, ne gipenjore niya, “Mano koko manade matimore e kambi jo-Hibraniano?” To kane giwinjo ni Sanduk mar Ruoth Nyasaye osechopo e kambi,

⁷ne gidoko maluor mi giwacho niya, “Nyisechegi osebiro e kambigi!” Bende ne giwacho niya, “Yaye! Nyaka nene gima kama pok notimore.

⁸Yaye! Ng’ano ma noreswa e lwet nyiseche maratekegi? Gin nyiseche ma nosando jo-Misri gi masiche mayoreyore e thim.

⁹Jiwreuru ubed ka chwo, un jo-Filistia, mondo kik ubed ka wasumb jo-Hibrania, kaka gisebedonu. Beduru ka chwo, kendo keduru!”

¹⁰Jo-Filistia nokedo gi jo-Israel, mi giloyo, kendo jo-Israel duto noringo odok e miechgi. Ne ologi marach, kendo jogi ma dirom alufu adek notho.

¹¹Sanduk mar Nyasaye nokaw, kendo Hofni gi Finehas, ma yawuot Eli, bende nonegi.

¹²Ja-Benjamin moro noringo oa e lweny, mobiro Shilo chieng’onogo, koyiecho lepe, kendo obuko wiye buru.

¹³E sa ma nochopoe, Eli noyudo obet e kom e dir yo, kang’icho, nikech chunye ne ridore, koparo Sanduk mar Nyasaye. Kane jalo odonjo e dala, monyiso ji wach, dala duto noywak,

¹⁴Eli nowinjo ywak, mopenjo ni, “Mano koko manade?” Ng’atno nodhi ire kareto, monyise wach.

¹⁵Eli koro ne jahigni piero ochiko gaboro, kendo wang’e noyuso mane ok onyal neno.

¹⁶Jalo nowachone niya, “An ng’at moa e lweny. Aringo lweny mana kawuono.” Eli nopenje niya, “Wuoda, lweny dhi nadi?”

¹⁷Ng’atno nodwoke niya, “Jo-Israel oringo jo-Filistia, kendo oseneggi gi nek malich. Hofni gi Finehas yawuoti, bende josetho. Kendo Sanduk mar Nyasaye osekaw.”

¹⁸Kane Eli owinjo wach Sanduk mar Nyasaye, nogore piny ataro, koa e kom ma nobetie but rangach, mi ng’ute notur, motho nikech ne en jaduong’ moti, kendo nopek. Nosebedo jang’ad bura ni jo-Israel kuom higni piero ang’wen.

¹⁹Noyudo ka chi Finehas ma wuod Eli nigi ich, mogik nywol. To kane owinjo ni Sanduk mar Nyasaye osekaw, kendo kwar mare kod chwore josetho, nopo ka muoch kaye, mi nobet piny monywol.

²⁰To nohewore ahinya modwaro tho, mi mon mane chole nokone niya, “Kik iluor, isenywolo wuowi.” To ne ok odwoko wach, kata dewo ne ok odewo.

²¹Nochako nyathi ni Ikabod, (tiende ni, maonge duong’) kowacho niya, “Duong’ osea kuom Israel.” Nowacho kamano nikech Sanduk mar Nyasaye nosekaw, kendo kwar mare gi chwore ne josetho.

²²Mano emomiyo nowacho ni, “Duong’ osea kuom Israel, nikech Sanduk mar Nyasaye osekaw.”