Read luo 1 Samuel 6 Bible Online

1 Samuel 6 - luo bible

1 Samuel 6

¹Kane Sanduk Mar Ruoth Nyasaye osebedo e piny Filistia moromo dueche abiriyo,

²jo-Filistia noluongo jodolo kod ajuoke, mopenjogi niya, “Watim ang’o gi Sanduk mar Ruoth Nyasaye? Nyiswauru gima dwadwokego kuma ne entie.”

³Ne giwacho niya, “Kudwoko Sanduk mar Nyasach Israel, to kik udwoke nono, to chiwneuru mich mar pwodho richo, eka unukwo, kendo unung’e gimomiyo ok onyal weyo sandou.”

⁴To ne gimedo penjo niya, “En mich machal nadi monego wamiye?” Ne gidwoko niya, “Onego umiye gik moko abich mag dhahabu, maket gi buche mane okuodou, kaachiel gi oyieyo abich molos gi dhahabu, moromo kar kwan ruodhi mag jo-Filistia, nimar tho achiel ema nogoyou uduto, kaachiel gi ruodhi mau.

⁵Emomiyo mondo ulos gik maket gi buche mane okuodou, kendo ulos gik maket gi oyieyo ma kethonu piny, kumiyogo Nyasach Israel duong’, mi dipo koweyo sandou, kaachiel gi nyisecheu kod pinyu.

⁶Marang’o wiu tek, ka wi Farao gi wi jo-Misri? Donge Nyasaye nosandogi malich, nyaka ne giweyo jo-Israel oa?

⁷“Emomiyo koro uik gari manyien, kendo ukaw duesni ariyo madhodho, ma yandi pok otuenigi jok. Tueuru dhogo e garino, to ugol nyithindgi kuomgi, odong’ dala.

⁸Eka ukaw Sanduk mar Ruoth Nyasaye, uket e gari, to gik molos gi dhahabu muchiwo ni Ruoth Nyasaye ka mich mar pwodho richo, uket e sanduk moro but Sandugno. Eka uweye odhi adhiya,

⁹kung’iye. Kapo ni ochiko yo madhi thurgi nyaka Beth-shemesh, to wanang’e ni kara Ruoth Nyasaye ema osekelonwa masirani. To ka ok oluwo yorno, eka wanang’e ni ok en ema osandowa, to en gimoro mobironwa abira.”

¹⁰Jogo notimo kamano. Ne gikawo duesni ariyo madhodho, mi gitueyo e gari, to nyiroye ne giloronigi e kul.

¹¹Ne giyieyo Sanduk mar Ruoth Nyasaye e gari, kaachiel gi sanduk moketie oyieyo mag dhahabu kod gik maket gi buchegi.

¹²Dhogo nochiko nyimgi tir e yo madhi Beth-shemesh, ka giluwo yo maduong’. Ne giywak ka gidhi, to ne ok gibaro korachwich kata koracham. Ruodhi mag jo-Filistia noluwogi nyaka tong’ Beth-shemesh.

¹³Noyudo jo-Beth-shemesh kayo ngano e holo, kendo kane giting’o wang’gi, mi gineno Sanduk, ne gidoko mamor.

¹⁴Gari nodonjo, mochung’ e puoth Joshua ja-Beth-shemesh, but kidi moro mang’ongo. Ne gibaro yiend gari, kendo ne gichiwo ni Ruoth Nyasaye dhogo ka misango miwang’o pep.

¹⁵Jo-Lawi noloro Sanduk mar Ruoth Nyasaye kod sanduk mane oting’o gik molos gi dhahabu mi giketogi ewi kidi mang’ongono. Chieng’no jo-Beth-shamesh notimo ni Ruoth Nyasaye misengni miwang’o pep, kod misengni mamoko.

¹⁶Kane ruodhi abich mag jo-Filistia oseneno gima otimore, ne gidok Ekron mana chieng’ono.

¹⁷Buche molos gi dhahabu mane jo-Filistia ochiwo ni Ruoth Nyasaye ka mich mar pwodho richo ne mag Ashdod gi Gaza gi Ashkelon gi Gath kod Ekron, ka bur ka bur ochung’ ni dala ka dala.

¹⁸To oyieyo molos gi dhahabu ne mag miech jo-Filistia, mane ruodhi abichgo rito. Ne gin mier mochiel gi ohinga, kod ma ok ochiel. Kidi mang’ongo mane giketoe Sanduk mar Ruoth Nyasaye obedo ranyisi e puoth Joshua ja-Bethshemesh nyaka chil kawuono.

¹⁹To jo-Beth-shemesh moko nong’iyo i Sanduk mar Ruoth Nyasaye, omiyo Ruoth Nyasaye nonego ji piero abiriyo kuomgi, mi ji noywak nikech kum malit mane Ruoth Nyasaye okelonigi kamano.

²⁰Eka jo-Beth-shemesh nowacho niya, “Onge ng’ama nyalo chung’ e nyim Ruoth Nyasaye, ma Nyasaye malerni! Ere kama dwatere mondo oa kuomwa?”

²¹Mi gioro joote ir jo-Kiriath-jearim, ka giwacho niya, “Jo-Filistia osedwoko Sanduk mar Ruoth Nyasaye. Biuru ukawe, ubed kode.” Omiyo jo-Kiriath-jearim nobiro, moomo Sanduk mar Ruoth Nyasaye.