Read luo 1 Samuel 9 Bible Online

1 Samuel 9 - luo bible

1 Samuel 9

¹Ne nitie ja-Benjamin moro, ma nyinge Kish, wuod Abiel, wuod Zeror, wuod Bekorath, wuod Afia. Ne en jaduong’ ma japith.

²Nonywolo wuowi maratego kendo ma jaber ma nyinge Saulo. Kuom jo-Israel duto ne onge ng’at man gi chia moloye. Ne orabora ahinya, ma ji duto ne rem mana e goke.

³Chieng’ moro kenje mag Kish wuon Saulo nolal, mi Kish nowacho ni Saulo wuode niya, “Kaw jatich moro, udhi umanygo kenjego.”

⁴Ne gidhi mi gimanyogi e piny gode mag Efraim kendo e piny Shalisha, to ne ok giyudogi.

⁵To kane gibiro e piny Zuf, Saulo nowacho ni jotichne mane ni kode niya, “Wuoth wadogi, dipo ka wuora oweyo paro kenje, koparo mana wan.”

⁶To jalo nowachone ni, “E dalani nitie ng’at Nyasaye marahuma. Weche duto mowacho timore adier. We wadhi kuno, dipo ka ofwenyonwa wach moro kuom wuodhwani.”

⁷Saulo nopenje niya, “Ka wadhi to ere gima dang’ water ni ng’at Nyasayeno, nimar chiemo mane wating’o koro oserumo, kendo waonge gi mich ma wanyalo terone? Koso wan gang’o?”

⁸Jatich nodwoke ni, “An gi pesa moro matin. Mano ema adhi miye mondo onyiswa gima onego watim.”

¹⁰Saulo nowachone niya, “Iwacho maber, wuoth wadhi.” Eka ne gidhi e dala mane ng’at Nyasaye nitie. (E ndalo ma chon e Israel kane ng’ato dhi penjo wach kuom Nyasaye, to nowacho ni, “Wadhiuru ir janen” nikech ng’at ma ndalogi luongo ni janabi, ne iluongo chon ni, janen.)

¹¹Kane pod giidho got, ka gichiko dalano, ne giromo gi nyiri moko kadhi umbo pi, mi gipenjo niya, “Janen nitie?”

¹²Nyigo nodwokogi ni, “Ee, en nyimu kanyo. Returu, koroni eka odonjo dala, nikech jodalano timo misango kawuono e hembko man kama oting’ore.

¹³Ka usedonjo e dala to ubiro yude, ka pok oidho odhi e hembko. Ji ok nyal chiemo ka pok obiro, nimar en ema oguedho gir misango, eka bang’e joma oluong chiemo. Ero, idhuru, ubiro yude piyo.”

¹⁴Omiyo ne giidho gidhi e dalano. To kane gidonjo e dala, ne gineno Samuel kowuok biro romo kodgi, kodhi e hembko.

¹⁵To chieng’ motelo ni biro mar Saulo, Ruoth Nyasaye noyudo osefwenyore ni Samuel, ka wachone niya,

¹⁶“Kiny kar sa makama, anaorni ng’at moro moa e piny Benjamin. Wire mondo obed ruodh joga Israel. Enores joga e lwet jo-Filistia, nimar aseneno chandruok mar joga, kendo ywakgi osechopo ira.”

¹⁷Mano emomiyo kane Samuel oneno Saulo, Ruoth Nyasaye nonyise niya, “Ma e jal ma nyoro awachoni. En ema norit joga.”

¹⁸Bang’e saulo nosudo machiegni gi Samuel e dhorangach, mowachone ni, “Kiyie to nyisa kama janen odakie.”

¹⁹Samuel nodwoke niya, “An e janen. Teluru nyima e hembko, nikech kawuono ang’ nichiem koda. To kiny gokinyi naweyi idhi, ka asedwoko weche duto manie chunyi.

²⁰To kik iparri kuom kenjeni ma nyocha olal, nimar koro oseyudgi. To en ng’a, ma noyud gik malong’o duto mag Israel? Donge en mana in gi dhoodu koso?”

²¹Saulo nodwoke niya, “To an mana ja-Benjamin, ma libamba matinie moloyo libembni duto mag Israel, kendo dhoodwa en dhoot matinie moloyo dhoudi duto mag Benjamin. Koro, ere gimomiyo iwachona weche ma kamago?”

²²Samuel notero Saulo gi jotichne e od chiemo, moketogi kama oyiedhi e kind joma noluongi, ma dirom piero adek.

²³Eka Samuel nowacho ni jatedo niya, “Kel lemo ma nende amiyi kawachoni ni mondo ikan tenge cha.”

²⁴Mi jatedo nokelo em kod sembe, moketo e nyim Saulo. “Ma e lemo ma nende okanni. Chame, nikech osekannigo mondo ichame e sawoni gi welo maseluongo.” Kamano Saulo nochiemo gi Samuel chieng’ono.

²⁵Bang’e ne gilor gia e hembko, mi gidhi e dala, kendo ne gipedho ni Saulo kitanda ewi ot malo, monindo.

²⁶To kinyne gokinyi mang’ich, Samuel noluongo Saulo ewi ot, kowachone niya “Chungi, mondo akowi.” Saulo nochung’, mi ne giwuok oko gi Samuel.

²⁷To kane oyudo gilor e mbap dala, Samuel nowacho ni Saulo niya, “Wach ni jatichni okadh otel nyimwa, kendo kosetelo, to in ichung’ mondi, anyisi wach Nyasaye.”