Read maale ማቲዎሴ 13 Bible Online

ማቲዎሴ 13 - maale bible

ማቲዎሴ 13

¹ዬኖ ኬሎ'' ዬሱሴ ጋራፓ ኬስኪ ባዞ'' ዓጫ ዴዔኔ፤

²ሚርጌ ዴሬያ ዒዛ ኮይላ'' ሙኪ ቡኬሢሮ ዋኣፆና ፒንቆ ጎንጎይዳ ኬስኪ ዴዔኔ፤ ዴራ'' ጋዓንቴ ቢያ ባዞ'' ዓጫ ዔቄኔ።

³ዬካ ዒ ሚርጌ ባኣዚ'' ኮኦኪንሢና ኬኤዛዖ፦ «ፔቴ'' ዓሲ ጎሺዳ ዜርሢ ዜርቃኒ ኬስኬኔ፤

⁴ዒዚ ዜርቃንቴ ፔቴ'' ፔቴ'' ዜርፃ ጎይፆ ዓጫ ኬዳ''ዛ ካፓ ሙኪ ሙዔኔ።

⁵ዓቴ'' ዜርፃ ሚርጌ ዓጪባኣ፥ ሃኣሻ ቤሲዳ ኬዴ''ኔ፤ ዬኖ ቤዛ ሚርጌ ዓጪ ባኣሢሮ ዜርፃ ዑኬና ባቃሌኔ።

⁶ማዔቶዋ ሳዓ ዓባዛ ሹሌ''ኔ፤ ፃጲ ሚርጌ ዳኪባኣሢሮዋ ሜሌኔ።

⁷ዓቴ'' ዜርፃ ሃሣ ዓንጊሢ ቶሻ ባኣካ ኬዴ''ኔ፤ ዓንጊፆ ቶሻ'' ዑጋዖ ባቃሎ ባይዜኔ።

⁸ሃሣ ዓቴ'' ዜርፃ ኮሺ ቤስካ ኬዲ'' ባቃሌ ዎዶ''ና ሚርጌ ካፄኔ፤ ፔቴ''ዛ ፄኤታ ባጌላ ላሂ''ታሚ'' ዓቴ''ዛ ሃይሢታሚ'' ዓኣፒ ዓኣፔኔ።

⁹ዬያ ዋይዛ ዋይዚ ዓኣሢ ዋይዞንጎ!» ጌዔኔ።

¹⁰ዬካፓ ዒዛኮ ጊንፆ ሃንታዞንሢ ዬሱሴ ኮራ ሙካዖ፦ «ዓይጎሮ ዴሮ''ም ኔ ኮኦኪንሢና ኬኤዛይ?» ጌዔኔ።

¹¹ዒዚ ዔያቶም፦ «ዒንሢም ጫሪንጮ ካኣቱሞ ዛሎ'' ዓኣሺንቴ ባኮ ዛላ ዔራኒ ዔራቶ ፆኦሲዳፓ ዒንጊንቴኔ፤ ዔያቶም ጋዓንቴ ዒንጊንቲባኣሴ።

¹²ዔኤቢ ዓኣሢም ቃሲ'' ዒንጊንቴም ሚርጋንዳኔ፤ ዻካ'' ዓኣሢዳፓ ጋዓንቴ ዒማ'' ዻኮ'' ዓኣማታዖ ዔኪንታንዳኔ።

¹³ዛጋዖ ዴንቁዋያ፥ ዋይዛዖ ዒና ዔኩዋያ ሃሣ ጶቂሱዋያ ማዔሢሮ ዔያቶም ታ ኮኦኪንሢና ኬኤዛኔ።

¹⁴ዬይያ ፆኦሲ ማሊፆ ኬኤዛ ዒሲያሴ ዛሎ''ና፦ ‹ዋይዚ ዒንሢ ዋይዛኔ ጋዓንቴ ዒንሢ ጶቂሡዋሴ፤ ዛጊያ ዒንሢ ዛጋኔ ጋዓንቴ ዒንሢ ዒና ዔኩዋሴ።

¹⁵ዓይጎሮ ጌዔቶ ሃይ ዴራ'' ዒኖ ፔኤሲ'' ዶጪሴኔ፤ ዋዮዋ ዔያታ ዓርቄኔ፤ ዓኣፖዋ ዱኡሜኔ። ያዺ ማዒባኣያታቴ ዓኣፖና ዔያታ ዛጊ ዋዮና ዋይዚ ዒኖና ማሊ ታ ባንሢ ዔያታ ማዔም ሄኤዶ ታ ዔያቶ ዻቂሼያ ናንዳንቴኬ› » ጌይንቲ ኬኤዚንቴሢ ዔያቶይዳ ኩማ''ንዳኔ።

¹⁶ዬሱሴ ሃሣ፦ «ዒንሢ ጋዓንቴ ዓኣፓ ዒንሢኮ ዛጋሢሮ፥ ዋያኣ ዒንሢኮ ዋይዛሢሮ ዒንሢ ባሊቲና ዓኣያኬ።

¹⁷ጎኔ ታ ዒንሢም ጋዓኔ፤ ሚርጌ ፆኦሲ ማሊፆ ኬኤዛዞንሢና ፂሎ''ንሢና ዒንሢ ሃሢ ዛጋሢ ዛጋኒ ኮዔያታዖ ዛጊባኣሴ። ዒንሢ ዋይዛሢ ዔያታ ዋይዛኒ ኮዔያታዖ ዋይዛኒ ዳንዳዒባኣሴ» ጌዔኔ።

¹⁸ዬካፓ ዬሱሴ፦ «ዓካሪ፥ ዒንሢ ዜርፆኮ ኮኦኪንሦ ቡሊ''ፆ ዋይዙዋቴ፤

¹⁹ጎይፆ ዓጫ ኬዴ'' ዜርፃ ዻዋሢ፦ ፆኦሲ ካኣቱሞ ቃኣሎ'' ዋይዚ ዒና ዔኩዋ ዓሶኬ፤ ቤዞና ፃላሄ ሙኪ ዒና'' ዜርቂንታ ቃኣሎ'' ዔካኔ።

²⁰ሃኣቾ ሳዖይዳ ዜርቂንቴ ዜርፄላ ዻዋሢ፦ ቃኣሎ'' ዋይዛዖ ዎዛና ጉሙርቂ ዔካ ዓሶኬ።

²¹ማዔቶዋ ዻካ'' ዎዴሮ ማዓንዳፓዓቴም ፃጲ ዔያቶኮ ባኣሴ፤ ዬያሮ ቃኣሎ'' ዛሎ''ና ሜቶና ዒፂንቲ ዳኪንቲሢ ሄሌ'' ዎዶ''ና ዑኬና ዔያታ ዻቢንታኔ።

²²ዓንጊፆ ቶሾ'' ባኣካ'' ዜርቂንቴዛ ዻዋሢ፦ ቃኣሎ'' ዻካ'' ዎዴሮ ዋይዛ ዓሶኬ፤ ያዺ ማዔቶዋ ሃያ ዓጮ'' ዛሎ'' ማሊ ሜታዺሢና ቆሎ'' ናሹሞና ዒና'' ጌሊ ቃኣሎ'' ዋሊ''ሳሢሮ ዓኣፑዋዖ ዓታኔ።

²³ኮዦ ሳዖይዳ ዜርቂንቴዛ ዻዋሢ፦ ቃኣሎ'' ዋይዚ ዒና ዔካ ዓሶኬ፤ ዬያታ ዓኣፒ ዓኣፓኔ፤ ፔቴ''ዛ ፄኤታ፥ ባጌላ ላሂ''ታሚ'' ዓቴ''ዛ ሃይሢታሚ'' ዓኣፓኔ» ጌዔኔ።

²⁴ዬያጉዲ ሃሣ ዬሱሴ ሜሌ'' ኮኦኪንሢ፦ «ጫሪንጮ ካኣቱማ ጎሺዳ ጌኤሺ ዜርሢ ዜርቄ ዓሲ ማላኔ፤

²⁵ዓሳ ቢያ ላሄ ዎዶ''ና ሞርኬ ሙካዖ ባርቾ ባኣካ'' ዓዦ ዜርቂ ዓኣዼኔ።

²⁶ባርቻ ባቃሊ ፑርቃዛ ዓዣሢ ባኣካ'' ጴዼኔ።

²⁷ዬያሮ ጎዦ ዓዶኮ ማዻ ዓሳ ዒዛ ኮይላ'' ሙካዖ ‹ጎዳሢዮ! ኔ ጎዦይዳ ጌኤሺ ዜርሢ ኔ ዜርቂባኣዓዳ? ሂዳዖ ዓዣሢ ዓንካፓ ኬስኬይ?› ጌዔኔ።

²⁸ዒዚ ማሃዖ ‹ሃያ ማዼሢ ሞርካሢዋይ!› ዔያቶም ጋዓዛ፥ ማዻ ዓሳ ‹ሂዴቴ ዴንዲ ኑ ዓዣሢ ሃርማንዳጉዲ ኔ ኮዓ?› ጌዔኔ።

²⁹ዒዚ ጋዓንቴ ‹ዔይዔ! ዓይጎሮ ጌዔቶ ዓዣሢ ዒንሢ ሃርማ ዎዶ''ና ባርቾ ዎላ'' ቱጋንዳኔ።

³⁰ዬያሮ ሃሹ''ዋቴ፤ ባርቻ ማንፂንታ ዎዶ'' ሄላ''ንዳኣና ባርቾንታ ዓዣሢንታ ዎላ'' ዑጎንጎ፤ ማንፂንታ ዎዶ''ና ጋዓንቴ ማንፃ ዓሶም ዓዣሢ ቤርታዺ ቱጊ ታሚና ሚቺንታንዳጉዲ ናኣራ ናኣራ ቱኩ''ዋቴ፤ ባርቾ ጋዓንቴ ማንፂ ታኣኮ ኮኖይዳ ዋሁዋቴ› ሂዚ ታ ጋዓንዳኔ» ጌዒ ዔያቶም ኬኤዜኔ።

³¹ዬሱሴ ሃሣ ሜሌ'' ኮኦኪንሢ፦ «ጫሪንጮ ካኣቱማ ፔቴ'' ዓሲ ጎሺዳ ዜርቄ፥ ሴናፒጬ ጌይንታ ዻኮ'' ዜርፄሎ ማላኔ፤

³²ዒዛ ዜርሢዳፓ ቢያ ዻካ''ኬ፤ ባቃሊ ዑጌ ዎዶ''ና ጋዓንቴ ቱኮ''ና ሚፆይዳፓ ቢያ ባሼ፥ ዼኤፒ ሚሢ ማዓኔ፤ ሃሣ ካፓኣ ዒዞኮ ካኣፖይዳ ማኣሪ ማዢ ዴዓኔ» ጌይ ኬኤዜኔ።

³³ሃሣ ዔያቶም ዬሱሴ፦ «ጫሪንጮ ካኣቱማ ፔቴ'' ላኣሊ ሃይሦ ሻምባ ዲርኮና ዺኢሊዳ ዋሃ ሙኑቃ ፃኣዛ ማላኔ፤ ዬና ሙኑቆ ፃኣዛ ሙኑቆ ቢያሢ ዔቂሳኔ» ጌዒ ኬኤዜኔ።

³⁴ዬሱሴ ዬያ ባኮ ቢያ ኮኦኪንሢና ዴሮ''ም ኬኤዜኔ፤ ኮኦኪንሢ ባኣያ ዓይጎ ባኣዚ''ያ ዔያቶም ኬኤዚባኣሴ።

³⁵ዬይ ያዺ ማዔሢ፦ «ሃይሶ ታኣኮ ታ ኮኦኪንሢና ኬኤዛንዳኔ፤ ዓጫ'' ማዢንቴሢዳፓ ዓርቃዖ ዓኣሺንቴ ባኣዚ'' ታ ኬኤዛንዳኔ» ጌይንቲ ፆኦሲ ማሊፆ ኬኤዛሢ ዛሎ''ና ፃኣፒንቴሢ ኩማ''ንዳጉዲኬ።

³⁶ዬካፓ ዬሱሴ ዴሮ'' ሃሺ'' ኬኤፆ ጌሌኔ፤ ዒዛኮ ጊንፆ ሃንታዞንሢ ዒዛ ኮራ ሙኪ፦ «ጎዦኮ ዓዣሢ ኮኦኪንሦ ቡሊ''ፆ ኑም ኬኤዜ» ጌዔኔ።

³⁷ዬሱሴ ማሃዖ፦ «ጌኤዦ ዜርፆ ዜርቄሢ ዓሲ ናዓሢኬ፤

³⁸ጎዣ ሃያ ዓጮ''ኬ፤ ጌኤዦ ዜርፃ ፆኦሲ ናኣቶ''ኬ፤ ዓዣሢ ጋዓንቴ ፃላሄ ናኣቶ''ኬ፤

³⁹ዓዣሢ ዜርቄሢ ሞርካሢ ፃላሄኬ፤ ባርቾ ማንፂፃ ዓጮ''ኮ ጋፒንፆኬ፤ ማንፃ ዓሳ ፆኦሲ ኪኢታንቾኬ።

⁴⁰ዓዣሢ ቱጊ ቡኩሲ ታሞይዳ ሚቾሢጉዲ ዓጮ''ኮ ጋፒንፆና ያዺ ማዓንዳኔ።

⁴¹ዓጮ''ኮ ጋፒንፆ ዎዶ''ና ዓሲኮ ናዓሢ ፔ ኪኢታንቾ ዳካንዳኔ፤ ዔያታኣ ዓሶ ዻቢሻዞንሢና ፑርቶ ማዻዞንሢ ቢያ ዒዛ ካኣቱሞይዳፓ ቡኩሲ ኬሳ''ንዳኔ።

⁴²ዬካፓ ዼኤፖ ታሞይዳ ዓጋንዳኔ፤ ዒኢካ ዬኤፒና ዓቺ ዻይሢና ዔያቶም ማዓንዳኔ።

⁴³ፂሎ''ንሢ ጋዓንቴ ፔ ዓዳሢ ካኣቱሞይዳ ዓቢጉዲ ፖዓንዳኔ፤ ዋይዛ ዋይዚ ዓኣሢ ዋይዞንጎ!» ጌዔኔ።

⁴⁴ሄሊ''ሳዖ ዬሱሴ፦ «ጫሪንጮ ካኣቱማ ጎሺ ሳዛይዳ ዓኣቾና ባኣዚ'' ማላኔ፤ ፔቴ'' ዓሲ ዬኖ ባኬሎ ዴንቃዖ ማሂ ጊንሣ ዓኣቼኔ፤ ሚርጌ ዎዛዼሢሮ ዴንዲ ዓኣ ባኮ ቢያ ሻንቺ ዬኖ ጎዤሎ ሻንቄኔ» ጌዔኔ።

⁴⁵ላሚ ሃሣ ዬሱሴ፦ «ጫሪንጮ ካኣቱማ ኮሺ'' ሚዛጶ፥ ሹጮ ሻንቃኒ ኮዓ ኮርሞ ዓሢ ማላኔ፤

⁴⁶ዬይ ኮርማ ዓሢ ሚርጌ ቦንቺንታ ኮሺ'' ሚዛጲ ሹቺ ዴንቄ ዎዶ''ና ዴንዲ ዓኣ ባኮ ቢያ ሻንቺ ዬኖ ሹጬሎ ሻንቄኔ» ጌዔኔ።

⁴⁷ሃሣ ዬሱሴ፦ «ጫሪንጮ ካኣቱማ ባዞ''ይዳ ዓጊንቴ ሞላሢ ዓርቆ ሮኦጮ ማላ ሱዞ ማላኔ፤ ዬና ዱማ ዱማ ሞላሢ ቢያ ዓርቃያኬ።

⁴⁸ሞላሢ ጌሊ ዓርቂንቲ ኩሜ'' ዎዶ''ና ሞላሢ ዓርቃ ዓሳ ዬኖ ሱዜሎ ባዛ''ፓ ጎቺ ዓጮ ኬሲ''ጋፓ ዴዒ ኮዦ ኮዦ ቁሪ ዔካዖ፥ ፑርቶ ጋዓንቴ ዒኢካ ኬኤሪ ሃሻ''ኔ።

⁴⁹ዓጮ''ኮ ጋፒንፆ ዎጎ ኬሎ''ና ያዺ ማዓንዳኔ፤ ፆኦሲኮ ኪኢታንቻ ሙኪ ጎሞ ዓሶ ጌኤዦይዳፓ ቁሪ፥

⁵⁰ባይቁዋ ታሞይዳ ዓጋንዳኔ፤ ዒኢካ ዬኤፒና ዓቺ ዻይሢና ማዓንዳኔ» ጌዔኔ።

⁵¹ላሚ ሃሣ ዬሱሴ፦ «ዬይ ኮኦኪንሣ ቢያ ዒንሢም ዔርቲያ?» ጋዓዛ፥ ዔያታኣ «ሂዮ» ጌዔኔ።

⁵²ዒዚያ፦ «ጫሪንጮ ካኣቱሞኮ ዓኣሺንቴ ባኮ ኮሺ'' ዔራ ዓሲ' ፃኣፒ ዓርቆና ዓኮና ጪሞ ባኮናፓ ዔሪ ዔሪ ኬሳ''፥ ሙሴ ዎጎ ዔርዛ ዓሲጉዲኬ» ጌዔኔ።

⁵³ዬሱሴ ዬንሢ ኮኦኪንሦንሢ ኬኤዚ ኩርሴስካፓ ዬኖ ቤዛፓ ዴንዴኔ።

⁵⁴ፔ ዓጮ'' ናዚሬቴ ካታሞዋ ሙኪ፥ ዒኢካ ዓይሁዶ ዓሶኮ ቡኪንቶ ቤዛ ዔርዛንቴ ዒዛሲ ዋይዛ ዓሳ ቢያ ዲቃቲ ሄርሻዖ፦ «ሃይ ዓሢ ሃያጉዴ ዔራቶና ፆኦሲ ዎልቄና ማዺንታ ዓኮ ባኮና ዓንካፓ ዔሬይ?

⁵⁵ሃይ ሚፆ ዓርሳ ሃኣማ''ሢ ናኣዚ''ቱዋዓዳ? ዒንዳ ዒዛኮ ማይራሞቱዋዓዳ? ሃሣ ጌርሲንሢያ ዒዛኮ ያይቆኦቤንታ ዮሴፔንታ ሓሣ ሲሞኦኔንታ ዪሁዳንታቱዋዓዳ?

⁵⁶ጌሮንሢ ዒዛኮ ቢያ ኑኡና ዎላ''ቱዋዓዳ? ዓካሪ ሃይ ዓሢ ሃያ ቢያ ዓንካፓ ዔሬይ?» ጋዓዖ፥

⁵⁷ዒዛ ጎናሲ ጉሙርቁዋዖ ሃሼ''ኔ። ዬሱሴ ጋዓንቴ፦ «ፆኦሲ ማሊሢ ኬኤዛሢ ፔ ዓጮ''ና ፔ ማኣሮ ዓሶና ባኣካ'' ቦሂንታኔ፤ ጋዓንቴ ሜሌ'' ቤሲዳ ቦቦንቺንታኔ» ጌዔኔ።

⁵⁸ዔያታ ጉሙርቂ ጎናሲ ዔኪባኣሢሮ ዬሱሴ ዒኢካ ሚርጌ ፆኦሲ ዎልቄና ማዺንታ ዓኪ ባኣዚ'' ማዺባኣሴ።