Read maale ማቲዎሴ 17 Bible Online

ማቲዎሴ 17 - maale bible

ማቲዎሴ 17

¹ላሆ'' ኬሊ''ኮ ጊንፃፓ ዬሱሴ ጴፂሮሴና ያይቆኦቤና ሃሣ ያይቆኦቤኮ ጌርሲ ዮሓኒሴና ሌሊ ዔኪ ዼኤፒ ዹካ ኬስኬኔ።

²ዬካ ዔያቶኮ ቤርታ ዒ ላኣሚንታዖ ዓኣፖ ካራ'' ዒዛኮ ዓቢጉዲ ፖዔኔ፤ ሃሣ ዒዛኮ ማኣዓሢያ ዓኣፓ ዱካያ ማዒ ቦኦሬኔ።

³ዬማ''ና ሙሴንታ ዔኤሊያሴንታ ዬሱሴና ዎላ'' ጌስታንቴ ዔያታ ዴንቄኔ።

⁴ጴፂሮሴ ዬሱሴ ኮራ፦ «ጎዳሢዮ! ሃይካ ኑ ናንጌቴ ኮሺኬ፤ ኔ ናሽኬቶ ፔቴ'' ኔኤም፥ ፔቴ'' ሙሴም፥ ፔቴ'' ሃሣ ዔኤሊያሴም ሃይሦ ዉዲ ታ ማዦም» ጌዔኔ።

⁵ዒ ኬኤዛ ጎይሣ ዓኣንቴ ቦኦሬ ሻኣሬ ሙኪ ዔያቶ ባይዜኔ፤ ዬያ ሻኣሮ ባኣካ''ፓ፦ «ታ ዒዛና ዎዛዻ፥ ታ ናሽካ ናዓሢ ሃያኬ፤ ዒዛሲ ዋይዙዋቴ» ጋዓ ዑኡሲ ዋይዚንቴኔ።

⁶ዒማ''ና ዒዛና ዎላ'' ዓኣ ዬሱሴኮ ጊንፆ ሃንታዞንሢ ዬያ ዋይዜ ዎዶ''ና ዲቃቲ ሳዖይዳ ባሊቲና ሎኦሜኔ።

⁷ዬሱሴ ሙኪ ዔያቶ ኩጮና ዓርቃዖ፦ «ዒጊጪፖቴ፥ ዔቁዋቴ» ጌዔኔ።

⁸ዬካፓ ዔያታ ዼ'ግ ጌዒ ዛጋንቴ ዬሱሴይዳፓ ዓታዛ ሜሌ'' ዖኦኒያ ባኣሴ።

⁹ዹካ''ፓ ዔያታ ኬዲፆይዳ ዓኣንቴ ዬሱሴ ዔያቶም፦ «ዓሲኮ ናዓሢ ሃይቂ ሃይባ''ፓ ዔቃንዳያ ሄላ''ንዳኣና ዒንሢ ዛጌ ባኮ ዖኦማኣ ኬኤዚፖቴ» ጌዔኔ።

¹⁰ዒዛኮ ጊንፆ ሃንታዞንሢ፦ «ዓካሪ፥ ሙሴ ዎጎ ዔርዛዞንሢ ዔኤሊያሴ ቤርታዺ ሙካንዳያ ኮይሳኔ ጋዓሢ ዓይጎሮዳዖ?» ጌዒ ዒዛ ዖኦጬኔ።

¹¹ዒዚ ዔያቶም ማሃዖ፦ «ዔኤሊያሴ ጎኔ ሙኪ ቢያ ባኣዚ'' ጊኢጊሻንዳኔ፤

¹²ጋዓንቴ ታ ዒንሢም ሂዚ ጋዓኔ፦ ዔኤሊያሴ ሙኪናኣኮኬ፤ ማዔቶዋ ዔያታ ኮዔ ባኣዚ'' ዒዛይዳ ማዼያፓዓቴም ዒዛ ዔሪባኣሴ። ዬያጉዲ ሃሣ ዓሲኮ ናዓሢ ዔያታ ሜታሳንዳኔ» ጌዔኔ።

¹³ዬማ''ና ዒዛና ዓኣ ጊንፆ ሃንታዞንሢ ዬሱሴ ዔያቶም ኬኤዜሢ' ማስካ ዮሓኒሴ ዛሎ'' ማዔሢ ዔሬኔ።

¹⁴ዬሱሴና ሃይሦ ዒዛኮ ጊንፆ ሃንታዞንሢና ዴሮ'' ባንሢ ማዒ ሙካዛ ፔቴ'' ዓሲ ዬሱሴኮ ቤርታ ሙኪ ጉምዓታዖ፦

¹⁵«ታ ጎዳሢዮ! ታኣኮ ናዓሢ ዓውሴ፤ ዴንሣ ፑርታ ዓያና ዶርዓ ዒዛ ሜታሳኔ፤ ሚርጌ ዎዴ ታሚዳ ሎኦማኔ፤ ሃሣ ዋኣሢዳኣ ጌላኔ።

¹⁶ኔኤኮ ጊንፆ ሃንታዞንሢ ኮራ ታ ዔኪ ሙኬንቴ ዔያታ ዒዛ ዓውሳኒ ዳንዳዒባኣሴ» ጌዔኔ።

¹⁷ዬሱሴ፦ «ሓይ ዒንሢ ጉሙርቁዋ ዎቦ ዓሳ! ዓይዴ ሄላ''ንዳኣና ታ ዒንሢና ናንጋንዳይ? ሃሣ ዓይዲ ሄላ''ንዳኣና ታ ዒንሢ ጊቢ'' ዳንዳዓንዳይ? ሂንዳ ናዓሢ ታኣም ዔኪ ዬዑዋቴ!» ጌዔኔ።

¹⁸ዬካፓ ዬሱሴ ፑርቶ ዓያናሢ ጎራ''ዛ፥ ፑርቶ ዓያናሢ ናዓሢዳፓ ኬስኬም ናዓሢ ዬማፓ ዓርቃዖ ዻቄኔ።

¹⁹ዬካፓ ዒዛኮ ጊንፆ ሃንታ ናኣታ'' ፔኤሮ ዬሱሴ ኮይላ'' ሙካዖ፦ «ኑኡኒ ፑርቶ ዓያኖ ኬሳ''ኒ ዳንዳዒባኣሢ ዓይጎሮዳይ?» ጌይ ዖኦጬኔ።

²⁰ዬሱሴ ማሃዖ፦ «ጉሙርቂፃ ዒንሢኮ ዻኬሢሮኬ፤ ጎኔ ታ ዒንሢም ጋዓኔ፤ ሴናፒጬ ጌይንታ ባኮማ ዓኣፖ ጉዴያታዖ ጉሙርቂሢ ዒንሢኮ ዓኣቶ ሃያ ዹኮ'' ‹ሃካፓ ሺኢኬ› ጌዔቶ ዒንሢም ዓኣዻንዳኔ፤ ዒንሢ ባሻንዳ ባኣዚ'' ፔቴ''ታዖ ባኣሴ። [

²¹ሓያ ጉዴሢ ሙኡዚ'' ሃሺ'' ሺኢቆ ሺኢጲሢና ማዒባኣቶ ኬስኩዋሴ» ጌዔኔ።]

²²ጌሊላይዳ ዒዛኮ ጊንፆ ሃንታዞንሢ ቡኪንቲ ዓኣንቴ ዬሱሴ ዔያቶም፦ «ዓሲኮ ናዓሢ ዓሶም ዓኣሢንቲ ዒንጊንታንዳኔ፤

²³ዔያታኣ ዒዛ ዎዻንዳኔ፤ ዒዚያ ሃይባ''ፓ ሃይሣሳ ኬሎ''ና ዔቃንዳኔ» ጌዔሢሮ ዒዛኮ ጊንፆ ሃንታ ናኣታ'' ሚርጌና ዖዬኔ።

²⁴ዬሱሴና ዒዛኮ ጊንፆ ሃንታዞንሢና ቂፒርናሆሜ ጎዖ ዓጮ'' ሄላ''ዛ ጌኤዦ ማኣሮኮ ጊኢሮ ጪጊሳ ዓሳ ጴፂሮሴ ኮይላ'' ሙካዖ፦ «ዒንሢኮ ዔርዛሢ ጌኤዦ ማኣሮም ጪጎ ሚኢሾ ጪጋ?» ጌዒ ዖኦጬኔ።

²⁵ጴፂሮሴ፦ «ሂዮ፤ ጪጋኔ» ጌዔኔ። ዬካፓ ጴፂሮሴ ጋሮ ጌላዛ ዬሱሴ ቤርታዺ ሲሞኦኔ ኮራ፦ «ዓጮ'' ካኣታ'' ጊኢሮ ሚኢሾንታ ኮርሞ ዓሶፓ ዔኮ ሚኢሾ ዔካሢ ዓጮ'' ዓሶይዳፓሞ? ዙሎ'' ዓሶይዳፓዳይ?» ጌዒ ዖኦጬኔ።

²⁶ጴፂሮሴ ማሃዖ፦ «ዙሎ'' ዓሶይዳፓኬ» ጌዔኔ። ዬያሮ ዬሱሴ፦ «ሂዴቶ ዓጮ'' ዓሳ ጊኢራ ጪጉዋሴ ጌይሢኬ!

²⁷ዓካሪ ኑና ዔያታ ቆፁዋጉዲ ዴንዲ ሞላሢ ዓርቆ ዓንጎ ኪሮ ባዛ'' ዓጌ፤ ዬካፓ ቤርታዺ ኔ ዓርቄ ሞሎማ ሹካዖ ዻንጋፓ ኔ ዔካንዳ ሹጮ ቢሮ'' ታኣና ኔኤናና ዛሎ'' ጪጌ» ጌዔኔ።