Read maale ማቲዎሴ 19 Bible Online

ማቲዎሴ 19 - maale bible

ማቲዎሴ 19

¹ዬሱሴ ዬያ ባኮ ኬኤዚ ጋፒሴሢኮ ጊንፃ ጌሊላ ዓጮ'' ሃሺ'' ዮርዳኖሴ ዎሮ ሱካ'' ዓኣ፥ ዪሁዳ ዓጮ'' ዴንዴኔ።

²ዬማና ሚርጌ ዓሲ ዒዛ ጊንፆ ዓኣዻዛ ዔያቶይዳፓ ሃርጊንቴ ዓሶዋ ዒኢካ ዒ ፓሤኔ።

³ፔርሴ ዓሳ ዒ ዎዚ ጋዓቴያ ዋይዛኒ ዒዛ ኮይላ'' ሙካዖ፦ «ማዔ ባኣዚ'' ቢያና ዓሲ ፔኤኮ ማቾ ዓንጃንዳጉዲ ዎጋ'' ዓይሣ?» ጌዒ ዖኦጬኔ።

⁴ዬሱሴ ማሃዖ፦ «ፆኦሲ ቤርታዺ ዓቲንቄና ላኣሊና ማሂ ዓሲ ማዤሢ ዒንሢ ናባቢባኣዓዳ?

⁵ሃሣ ‹ዬያ ዛሎ''ና ዓሲ ዓዶና ዒንዶና ሃሺ'' ማቾና ዎላ'' ፔቴ'' ማዓኔ፤ ላምዖንሢያ ፔቴ'' ዓሲ ማዓኔ› ፆኦሲ ጌዔሢ ዒንሢ ናባቢባኣዓዳ?

⁶ዬያሮ ዔያታ ፔቴ''ኬ፤ ላምዖቱዋሴ፤ ፆኦሲ ዎላ'' ዋኣፄዞንሢ ዓሲ ቡሎ''ፓ» ጌዔኔ።

⁷ፔርሴ ዓሳ ጊንሣ፦ «ሂዴቶ ሙሴ ዓይጎሮ ‹ፔቴ'' ዓሲ ላኣሌሎ ዓንጄያ ማዔሢ ዔርዛ፥ ማርካ ማዔ፥ ፃኣፒንቴ ባኣዚ'' ዒንጊ ማቾ ዓንጆንጎ› ጌዒ ዓይሤይ?» ጌዔኔ።

⁸ዬሱሴ ማሃዖ፦ «ሙሴ ዒንሢኮ ዒኖ'' ዶዱሞ ዛጊ ላኣሊ ዒንሢ ዓንጃንዳጉዲ ዓይሣንዳኣፓዓቴም ማዢንታፓ ዓርቃዖ ዓኣ ዎጋ'' ያዺቱዋሴ፤

⁹«ታ ዒንሢም ሃሢ ጋዓሢ' ማቻ ፔኤኮ ሜሌ''ና ዒኢቲባኣንቴ ማቾ ዓንጂ ሜሌ'' ላኣሊ ዔካሢ ቢያ ዞኦስካ ኮኦማያ ማዓኔ» ጌዔኔ።

¹⁰ዒዛኮ ጊንፆ ሃንታዞንሢ ዬያ ዋይዛዖ፦ «ዓኒና ማቾና ዛላ ባኣዚ'' ያዺ ማዔቴ ዔኪቦኦቴ ሃሣ ሎዒቦኦቴ ቃራኬ» ጌዔኔ።

¹¹ዬሱሴ ጋዓንቴ፦ «ፆኦሲ ዱማ ዳንዳዒሢ ዒንጌ ዓሲዳፓ ዓታዛ ዬይ ባካ ዖኦማኣ ዳንዳዒንቱዋያኬ።

¹²ጋዓንቴ ዓሲ ላኣሊ ዔኩዋዖ ሃሣ ሌውዋዖ ዓታሢ፦ ፔቴ'' ፔቴ''ሢ ዓሽቲሚ ማዒ ሾይንታኔ፤ ዛላ'' ሃሣ ዓሲ ኩቺና ዓሽቲንቃኔ፤ ዓቴ''ሢ ሃሣ ጫሪንጮ ካኣቱሞ ማዾ''ሮ ‹ሾዓዓ› ጌዒ ፔና ዓሽቲሚጉዲ ማሃኔ፤ ዬያ ታ ጌዔ ባኮ ዔካኒ ዳንዳዓሢ ያዺ ማዾንጎ» ጌዔኔ።

¹³ዒማ''ና ናኣቶ''ኮ ዑፆይዳ ኩጮ ጌሢ ሺኢቃንዳጉዲ ዓሳ ዻኮ'' ናኣቶ'' ዒዛ ባንሢ ዔኪ ሙካዛ ዒዛኮ ጊንፆ ሃንታዞንሢ ጋዓንቴ ዓሶ ጎሬኔ።

¹⁴ዬሱሴ፦ «ናኣታ'' ታ ባንሢ ሙኮንጎ፥ ላኣጊፖቴ፤ ጫሪንጮ ካኣቱማ ዔያቶ ጉዴዞንሢምኬ» ጋዓዖ፥

¹⁵ኩጮ ናኣቶ'' ዑፃ ጌሢ ዓንጄሢኮ ጊንፃፓ ዬኖ ቤዛፓ ዔቂ ዓኣዼኔ።

¹⁶ዬካፓ ፔቴ'' ዓሲ ዬሱሴ ኮራ ሙካዖ፦ «ዔርዛሢዮ፥ ናንጊና ናንጊ ዴንቃኒ ዓይጎ ኮሺ ባኣዚ'' ታ ማዾንዶይ?» ጌዒ ዖኦጬኔ።

¹⁷ዬሱሴ ማሃዖ፦ «ኮሺ ማዾ ዛላ ኔ ታና ዓይጋ ዖኦጫይ? ኮሺ ማዓይ ፔቴ'' ፆኦዛሢ ሌሊኬ፤ ናንጊና ናንጊ ኔ ዴንቃኒ ኮዔቴ ዓይሢፆንሢ ኩንሤ» ጌዔኔ።

¹⁸ዓሢያ፦ «ዎንሢ ዓይሢፆንሢ?» ጌዔኔ። ዬሱሴ ማሃዖ፦ «ዓሲ ዎዺፖ፥ ማቾ ሃሣ ዓኒ ማዒባኣያና ላሂፖ፥ ዉኡቂፖ፥ ሉኡዙሞና ማርካዺፖ፥

¹⁹ኔ ዓዶና ኔ ዒንዶና ቦንቼ፥ ዓሲ ኔናጉዲ ማሂ ናሽኬ ጋዓ ዓይሢፆንሢኬ» ጌዔኔ።

²⁰ዼጌሢያ፦ «ዬንሢ ታ ቢያ ካፔያኬ፤ ሜሌ'' ዓቴ'' ባኣዚ'' ዓይጌ ዓኣይ?» ጌዔኔ።

²¹ዬሱሴ ማሃዖ፦ «ፔቶ ኔ ፂሎ'' ማዓኒ ኮዔቶ ኔኤኮ ዓኣ ባኮ ቢያ ሻንቺ ሚኢሾ ማንቆ ዓሶም ዒንጌ፤ ጫሪንጮይዳ ቆሎ ኔ ዴንቃንዳኔ። ዓካሪ ዬካፓ ታ ጊንፆ ሙኬ» ጌዔኔ።

²²ዼጌሢ ዬያ ዋይዛዖ፥ ሚርጌ ቆሎ ዒዛኮ ዓኣሢሮ ኮሺ'' ዖዪ ዖዪ ዴንዴኔ።

²³ዬካፓ ዬሱሴ ዒዛኮ ጊንፆ ሃንታ ናኣቶ'' ኮራ፦ «ጎኔ ታ ዒንሢም ጋዓኔ፤ ዖርጎቺም ፆኦሲ ካኣቱሞይዳ ጌሊሢ ሚርጌ ሜቶኬ፤

²⁴ላሚ ታ ሃሣ ዒንሢም ጋዓኔ፦ ዖርጎቺ ፆኦሲ ካኣቱሞይዳ ጌላሢዳፓ ጋኣላ ናርፔ ፂኢናና ጌላኒ ሼሌዔ ማዓንዳኔ» ጌዔኔ።

²⁵ዒዛኮ ጊንፆ ሃንታ ናኣታ'' ዬያ ዋይዜ ዎዶ''ና ኮሺ'' ዲቃቲ ሄርሻዖ፦ «ዓካሪ ሂዴቴ ዖኦኒ ዻቃኒ ዳንዳዓንዳይ?» ጌዒ ዖኦጬኔ።

²⁶ዬማና ዬሱሴ ዔያቶ ባንሢ ዛጋዖ፦ «ዬይ ዓሲም ዳንዳዒንቱዋ ባኣዚ''ኬ፤ ፆኦሲም ጋዓንቴ ቢያ ባኣዚ'' ዳንዳዒንታያኬ» ጌዔኔ።

²⁷ጴፂሮሴ፦ «ሃይሾ ቢያ ባኣዚ'' ኑ ሃሺ'' ኔ ጊንፆ ሃንታንቴሞ? ዓካሪ፥ ኑ ዴንቃንዳ ባካ ዓይጌንዴ ናንዳይ?» ጌዔኔ።

²⁸ዬሱሴ ማሃዖ፦ «ጎኔ ታ ዒንሢም ጋዓኔ፤ ሙካንዳ ዓኮ ዓጮ''ይዳ ዓሲኮ ናዓሢ ቦንቺንቴ፥ ካኣቱሞ ዖይቶይዳ ዴዔ ዎዶ''ና ዒንሢያ ታ ጊንፆ ሃንታዞንሢ ታጶ ላምዖ ካኣቱሞ ዖይቶይዳ ዴዒ፥ ታጶ ላምዖ ዒስራዔኤሌ ፃጶይዳ ዎጋንዳኔ።

²⁹ታ ሱ'ንፆሮ ጌዒ፦ ፔ ማኣሮ፥ ፔ ጌርሲንሢ፥ ጌሮንሢ፥ ዓዶ፥ ዒንዶ፥[7] ናኣቶ'' ማዔቶዋ ጎዦ ሃሻ''ሢ ቢያ ፄኤታ ጳንጬ ማሂ ዔካንዳኔ፤ ሃሣ ናንጊና ናንጎዋ ዴንቃንዳኔ።

³⁰ጋዓንቴ ቤርታ ማዔ፥ ጎኦቦ'' ማላ ሚርጌ ዓሳ ጊንሢም፤ ጊንፃ ዓቴ'' ላቤያ ማላ ሚርጌ ዓሳ ቤርቲም ማዓንዳኔ» ጌዔኔ።