Read maale ማቲዎሴ 20 Bible Online

ማቲዎሴ 20 - maale bible

ማቲዎሴ 20

¹ዬካፓ ዬሱሴ፦ «ጫሪንጮ ካኣቱማ ፔኤኮ ዎይኖ ጎዦ ጎሽኪሳኒ ጎሽካ ዓሶ ኮዒ ጉቴ'' ዓሚ'' ኬስኬ ዓሲ ማላኔ፤

²ዒዚ ፔቴ'' ፔቴ'' ዓሶም ፔቴ'' ፔኤሺኮ ፔቴ'' ኬሊ'' ማዻዛ ዒንጎ ሚኢሾ ጪጋኒ ዓሶና ጌስቲ ጊኢጊ ጎዦ ቤዞ ዓሶ ዳኬኔ» ጌዔኔ።

³ዬሱሴ ኬኤዛዖ፦ «ዬይ ዓሢ ጉቴ'' ሶኦፓ ዎዴኮ ቤርታ ቦኦኮ'' ቤዞ ኬስኪ ማዾ ባይቄም ዔቂ ዓኣ ዓሲ ዴንቂ፥

⁴‹ዒንሢ ታኣኮ ዎይኖ ጎዦይዳ ዴንዲ ማዹዋቴ፤ ታ ዒንሢም ኮይሳሢጉዲ ጪጋንዳኔ› ጋዓዛ፥

⁵ዔያታ ዓኣዼኔ። ሃሣ ዓባ'' ሳዛ ሄላ''ኣና ጊንሣ ማሢ ዶምቦልሳ ዎዴ ማዓኣና ኬስኪ ሜሌ'' ማዻንዳ ዓሲ ዴንቄኔ።

⁶ዬካፓ ዓባ'' ዒባናኣና ኬስኪ ማዾ ባይቄም ዔቂ ዓኣ ሜሌ'' ዓሲ ዴንቃዖ፥ ‹ማዾ ባኣያ ሃይካ ዒንሢ ዓይጋ ዔቂ ፔኤቃይ?› ጌዒ ዖኦጫዛ፥

⁷ዔያታ ማሃዖ ‹ኑና ማዺሻኒ ጋዓ ዓሲ ባይቄሢሮኬ› ጌዔኔ፤ ዓሢ ዬያ ዋይዛዖ ‹ዒንሢያ ዓኣዺ ታኣኮ ዎይኖ ጎዦይዳ ማዹዋቴ› ጌዔኔ።

⁸«ዬካፓ ሳዓ ዓማዛ ጎዦ ዓዳሢ ማዻ ዓሶኮ ሱኡጋሢም ‹ጋፒንፃ ሙኬዞንሢዳፓ ዓርቃዖ ቤርታ ሙኬ ዓሶ ሄላ''ንዳኣና ማዾ'' ዓሶ ቢያ ዔኤሊ'' ዔያታ ማዼሢ ዛሎ'' ዔያቶም ጪጌ› ጌዔኔ።

⁹ዒማ''ና ዓባ'' ዒባናኣና ማዻኒ ሙኬ ዓሶንሢ ሚኢሾ ጪጋሢ ኮይላ''ፓ ፔቴ'' ኬሊ'' ማዼም ዒንጎ ሚኢሾ ዔኬኔ።

¹⁰ቤርታ ማዾ'' ዓርቄዞንሢ ዒማ''ና ባሼ ኑም ጪጎንዶኔ ጌዒ ማሌኔ፤ ጋዓንቴ ዔያቶማኣ ፔቴ'' ኬሊ'' ማዼም ዒንጎ ሚኢሻ ዒንጊንቴኔ።

¹¹ጪጎና ሚኢሾ ዔያታ ዔካዖ ጉንዱሚሢና ጎዦ ዓዶ ኮራ፦

¹²‹ሃንሢ ዓባ'' ዒባናንቴ ማዾ''ሮ ሙኬዞንሢ ዻካ'' ሌሊ ማዻዛ ሮኦሪ ማዾ''ና ላቢ''ንቲ ዓቦ'' ሩኡጳ ሜታዺ ፔኤቄ ዓሶ፥ ኑኡና ዎላ'' ሄኮ ዎይቲ ኔ ዔያቶም ጪጋይ?› ጌዔኔ።

¹³«ጎዦ ዓዴ ዬያ ማዻሢ ኮራ ‹ታ ዒሻሢዮ፥ ታ ፑርታ ኔኤም ማዺባኣሴ፤ ፔቴ'' ኬሊ'' ማዼም ጪጎ ሚኢሾም ማዻኒ ኔ ታኣና ዎላ'' ጌስቲ ጊኢጊባኣዓዳ?

¹⁴ሃኣዛጌ፤ ኔኤሮማ ዔኪ ዓኣዼ፤ ኔኤም ታ ዒንጌሢጉዴያ ጋፒንፃ ሙኬ ዓሢማኣ ታ ዒንጋኒ ኮዓኔ።

¹⁵ታኣኒ ታ ሚኢሾና ኮዔ ባኣዚ'' ማዻኒ ዳንዳዑዋዓዳ? ጊንሣ ሃሣ ሚጪንታያ ታ ማዔሢሮ ኔና ቂኢሪሻ?›

¹⁶«ዬያሮ ቤርታ ማዔ፥ ጎኦቦ'' ማላ ሚርጌ ዓሳ ጊንሢም፤ ጊንፃ ዓቴ'' ላቤ''ያ ማላ ሚርጌ ዓሳ ቤርቲም ማዓንዳኔ» ጌዔኔ።

¹⁷ዬሱሴ ዬሩሳላሜ ዓኣዺፆይዳ ዓኣዖ፦ ታጶ ላምዖ ዒዛኮ ጊንፆ ሃንታዞንሢ ሌሊ ዱማሲ፥

¹⁸«ሃኣዛጉዋቴ፥ ሃሢ ኑ ዬሩሳላሜ ዓኣዻኔ፤ ዓሲኮ ናዓሢ ቄኤሶኮ ሱኡጎና ሙሴ ዎጎ ዔርዛ ዓሶናም ዓኣሢንቲ ዒንጊንቴም ዔያታ ዒዛ ሃይቃንዳጉዲ ጌዒ ጌስቲ ዎጋንዳኔ፤

¹⁹ዔያታ ቦሃንዳጉዲና ዢራፓና ጳርቃንዳጉዲ ሃሣ ሱፃንዳጉዲ ዓይሁዴ ማዒባኣ ዓሶም ዓኣሢ ዒንጎንዶኔ፤ ዬካፓ ሃይቂ፥ ሃይባ''ፓ ሃይሣሳ ኬሎ''ና ዒ ዔቃንዳኔ» ጌዔኔ።

²⁰ዬካፓ ዜብዲዮሴ ማቻ ፔ ናኣቶ''ና ዎላ'' ዬሱሴ ኮይላ'' ሙኪ ዒዛም ጉምዓቲ ዚጋዖ ፔቴ'' ባኣዚ'' ዒዞም ማዺንታንዳጉዲ ሺኢቄኔ።

²¹ዬሱሴ፦ «ዓይጌንዴ ኔ ኮዓይ?» ጌዔኔ። ዒዛ፦ «ኔ ካኣቱሞ ቤዛ ሃንሢ ታኣኮ ላምዖ ናኣቶ''ንሢ፦ ፔቴ''ሢ ኔኤኮ ሚዛቃ፥ ፔቴ''ሢ ኔኤኮ ሻውሎ'' ዛላ'' ኔኤና ዎላ'' ዎይሣያ ማዓንዳዳጉዲ ማሂ ዴይሤ!» ጌዔኔ።

²²ዬሱሴ ጋዓንቴ፦ «ዓይጎ ሺኢቆንዶቴያ ዒንሢ ዔሩዋሴ፤ ታኣኒ ሃሢ ዑኬ ዔካንዳ ሜታሢ ዒንሢ ዔካኒ ዳንዳዓ? ሃሣ ታ ጌላንዳ ሜታስካ ዒንሢ ጌላኒ ዳንዳዓንዳ?» ጋዓዛ፥ ዔያታኣ፦ «ሂዮ፤ ኑ ዳንዳዓንዳኔ» ጌዔኔ።

²³ዬካፓ ዬሱሴ፦ «ጎኔ ዒንሢ ታ ዔካንዳ ሜታሢ ዔካንዳኔ፤ ጋዓንቴ ታኣኮ ሚዛቆና ሻውሎ''ናይዳ ዴዒ ታኣና ዎላ'' ዎይሣንዳጉዲ ማሃሢ ታናቱዋሴ፤ ዬይ ቤዛ ዒንጊንታሢ ታ ዓዴ ጊኢጊሼዞንሢምኬ» ጌዔኔ።

²⁴ዬማ''ና ዓቴ'' ታጶ ዒዛኮ ጊንፆ ሃንታዞንሢ ዬያ ዋይዜ ዎዶ''ና ላምዖንሢ ዑፃ ጎሪ''ንቴኔ።

²⁵ዬሱሴ ጋዓንቴ ቢያሢ ፔ ባንሢ ዔኤላ''ዖ፦ «ዓይሁዴ ማዒባኣ ዓሶኮ ሱኡጎንሢ ዴሮ'' ዎይሣዞንሢኬ፤ ዬያጉዲ ዴሮ'' ሱኡጎንሢኮ ዴሮ'' ዑፃ ቢታንቶ ዓኣሢ ዒንሢ ዔራኔ።

²⁶ዒንሢ ባኣካ'' ጋዓንቴ ያዺ ማዓንዳያ ኮይሱዋሴ፤ ዒንሢዳፓ ባሼ ማዓኒ ኮዓሢ ዒንሢኮ ዴማ'' ማዻያ ማዖንጎ።

²⁷ዒንሢዳፓ ዑፃ ማዓኒ ኮዓሢ ዒንሢኮ ዴማ'' ዓይሌ'' ማዖንጎ።

²⁸ዓሲኮ ናዓሢ ዓሲ ዒዛም ማዻንዳጉዲቱዋንቴ፥ ዓሲም ማዻኒና ሼምፓሢ ፔኤሲ'' ሚርጌ ዓሶ ዛሎ'' ባይዛኒ ሙኬኔ» ጌዔኔ።

²⁹ዬሱሴና ዒዛኮ ጊንፆ ሃንታዞንሢና ዒያርኮይዳፓ ኬስኪ ዓኣዻኣና ሚርጌ ዴሬ ዒዛና ዎላ'' ዓኣዼኔ።

³⁰ዒኢካ ላምዖ ዓኣፒ ባይቄ ዓሲ ጎይፆ ዓጫ ዴዒ ዓኣዖ፥ ዬሱሴ ዒኢና ዓኣዻሢ ዋይዚ፦ «ዳውቴ ናዓሢዮ፥ ጎዳ! ኑና ማኣዴ''!» ጌዒ ጌዒ ዒላቴኔ።

³¹ዴራ'' ዒማ''ና ዚቲ ጋዓንዳጉዲ ዔያቶ ጎራ''ዛ፥ ዔያታ ጋዓንቴ ኮሺ'' ዼ'ጊዲ፦ «ዳውቴ ናዓሢዮ፥ ጎዳ፥ ኑና ማኣዴ''!» ጌዔኔ።

³²ዒማ''ና ዬሱሴ ዴንዲቤቃ ዔቃዖ፥ ዔያቶ ዔኤሊ''፦ «ዓይጎ ታ ዒንሢም ማዻንዳጉዲ ዒንሢ ኮዓይ?» ጌዔኔ።

³³ዔያታ ማሃዖ፦ «ዓኣፓ ኑኡኮ ዛጋንዳጉዲ ኑ ኮዓኔ» ጌዔኔ።

³⁴ዬሱሴ ዔያቶ ሚጪንታዖ፥ ዓኣፖ ዔያቶኮ ፔ ኩጮና ካኣማዛ ቤዞማና ዛጊ ዒዛ ጊንፆ ዔያታ ዓኣዼኔ።