Read maale ማቲዎሴ 28 Bible Online

ማቲዎሴ 28 - maale bible

ማቲዎሴ 28

¹ዓይሁዶ ዓሶኮ ሃውሾ ኬላ'' ጋፓዛ ዚሮ ጉቴሎ ጉቴ ዓማ'' ሜግዴላ ዓጮ'' ማይራሞና ሓሣ ሃንጎ ማይራሞና ዎላ'' ዬሱሴኮ ዱኡፖ ዛጋኒ ዓኣዼኔ።

²ዔያታ ሙኩዋንቴ ቤርታ ዔርቲባኣንቴ ሳዓ ዓጊፃዛ፥ ጎዳኮ ኪኢታንቻ ጫሪንጫፓ ኬዲ''፥ ዱኡፖ ዔቶ'' ካሮ'' ዎዾና ሹጫሢ ቡምባልሲ ዑፃ ዴዔኔ።

³ዬያ ኪኢታንቻሢኮ ዓኣፖ ካራ'' ዜኤሊንሢጉዲ ፖዓያ፤ ሃሣ ዓፒላ''ኣ ሻቺጉዲ ቦኦራያኬ።

⁴ዱኡፖ ዔቶ'' ካፓዞንሢ ኪኢታንቻሢ ዒጊጪፆይዳፓ ዔቄያና ዲቃታዖ ሃይቄ ሌሲ''ጉዲ ማዔኔ፤

⁵ኪኢታንቻሢ ላኣሎንሢ ኮራ፦ «ዒንሢ ዒጊጪፖቴ፤ ሱፂንቴ ዬሱሴ ዒንሢ ኮዓሢ ታ ዔራኔ፤

⁶ዒዚ ሃይካ ባኣሴ፥ ዒ ኬኤዜሢጉዲ ሃይባ''ፓ ዔቄኔ፤ ሃኒ ሙኪ ዒ ላሄ ቤዞ ዛጉዋቴ።

⁷ሃሢ ሩኡሪ ዓኣዺጋፓ ዒዛኮ ጊንፆ ሃንታ ናኣቶ''ም ‹ሃይባ''ፓ ዒ ዔቄኔ፥ ጌሊላ ዒንሢ ዒ ቢሪ ዓኣዻንዳኔ፤ ዒኢካ ዒንሢ ዒዛ ዛጋንዳኔ› ጌዒ ኬኤዙዋቴ፤ ዬያ ታ ዒንሢም ኬኤዜያኬ» ጌዔኔ።

⁸ዬካፓ ላኣሎንሢ ኮሺ'' ዒጊጪሢና ሃሣ ዎዛና ዱኡፖ ቤዛፓ ዑኬና ዒዛኮ ጊንፆ ሃንታዞንሢም ኬኤዛኒ ጳሽኪ ዴንዴኔ።

⁹ዒኢካ ቤዞማና ዬሱሴ ዔያቶ ዴንቃዖ፦ «ዒንሢ ኮሺዳ?» ጋዓዛ ዔያታ ዬሱሴ ባንሢ ሙካዖ ሂርኪ ጌይ ቶኮ'' ዒዛኮ ዓርቂ ዒዛም ዚጌኔ።

¹⁰ዬሱሴ፦ «ዒንሢ ዒጊጪፖቴ፤ ዴንዲጋፓ ታ ዒሾንሢ ጌሊላ ዓኣዻንዳጉዲ ዔያቶም ኬኤዙዋቴ፤ ዒኢካ ታና ዔያታ ዛጋንዳኔ» ጌዔኔ።

¹¹ላኣሎንሢ ካታሞ ዓኣዺፆይዳ ዓኣንቴ ዱኡፖ ካፓ ፖኦሊሶንሢዳፓ ፔቴ'' ፔቴ''ዞንሢ ካታሞ ዴንዳዖ ማዔ ባኮ ቢያ ቄኤሶኮ ሱኡጎም ኬኤዜኔ።

¹²ዬካፓ ቄኤሶኮ ሱኡጎና ጪሞና ዎላ'' ቡኪንቲ ዞርቴሢኮ ጊንፃ ፖኦሊሶንሢም ሚርጌ ሚኢሼ ዒንጋዖ፦

¹³« ‹ኑኡኒ ጊንዒ ዓኣንቴ ዬሱሴኮ ጊንፆ ሃንታዞንሢ ሙኪ ዒዛኮ ሌዞ ዉኡቄኔ› ጌዒ ዴሮ''ም ኬኤዙዋቴ።

¹⁴ዓጮ'' ዎይሣሢ ዬያ ዋይዜያ ማዔቶ ዒንሢዳ ሜቶ ዒ ሄሊ''ሱዋጉዲ ኑኡኒ ዒዛም ኬኤዛንዳኔ» ጌዔኔ።

¹⁵ዬያሮ ፖኦሊሶንሢ ዔያቶም ዒንጎና ሚኢሾ ዔካዖ ዔያቶም ኬኤዚንቴሢጉዲ ማዼኔ፤ ዬያ ሃኖ'' ሄላ''ንዳኣና ዓይሁዶ ዓሳ ኬኤዛኔ።

¹⁶ዬካፓ ዬሱሴኮ ጊንፆ ሃንታ፥ ታጶ ፔቴ''ዞንሢ ዒዚ ዔያቶም ዓኣዻንዳጉዲ ኬኤዜ ጌሊላይዳ ዓኣ ዹኮ'' ዓኣዼኔ።

¹⁷ዒኢካ ዒዛ ዔያታ ዴንቃዖ ዒዛም ሂርኪ ጌዒ ዚጌኔ፤ ዛላ'' ጋዓንቴ «ዒዛ ናንጋንዳ?» ጌዔኔ።

¹⁸ዬማና ዬሱሴ ዒዛኮ ጊንፆ ሃንታዞንሢ ኮራ ሙካዖ፦ «ቢታንቶ ቢያ ጫሪንጮና ሳዖናይዳ ታኣም ዒንጊንቴኔ፤

¹⁹ዬያሮ ዓኣዺጋፓ ዴሮ'' ቢያ ዓዶ፥ ናዖ፥ ዓያኖ ጌኤዦናሮ ማዓንዳጉዲ ዋኣፆና ማስኪ ማስኪ ታ ዓሲ ማሁዋቴ፤

²⁰ታ ዒንሢም ዓይሤ ባኮ ቢያ ዓሳ ካፓንዳጉዲ ዔያቶ ዔርዙዋቴ፤ ታኣኒያ ዓጮ''ኮ ጋፒንፆ ሄላ''ንዳኣና ቢያ ዎዴ ዒንሢና ዎላ''ኬ» ጌዔኔ።