Read maale ማቲዎሴ 7 Bible Online

ማቲዎሴ 7 - maale bible

ማቲዎሴ 7

¹ዬሱሴ ሃሣ ኬኤዛዖ፦ «ፆኦሲ ዒንሢዳ ዎጉዋጉዲ ዖናኣ ‹ዒ ፑርታኬ› ጌይ ዎጊፖቴ፤

²ዒንሢ ዎጌ ጎይፆማ ዒንሢም ዎጊንታንዳኔ፤ ዒንሢ ማኬ''ማና ዒንሢም ማኪ''ንታንዳኔ።

³ኔ ዓኣፖይዳ ዓኣ ዼኤፖ ቡኡሮ ዴንቁዋዖ ኔ ላጋሢኮ ዓኣፖይዳ ዓኣ ዻኮ'' ቡኡሮማ ዓይጋ ኔ ዛጋይ?

⁴ኔ ዓኣፖይዳ ዼኤፒ ቡኡራ ዓኣንቴ፥ ‹ኔኤኮ ዓኣፓፓ ዻኮ'' ቡኡሮማ ታ ኬሶ''ም› ዎይቲ ኔ ጋዓኒ ዳንዳዓይ?

⁵ሃይ ኔ ሄርሺንታሢ ሃይ! ቤርታዺ ኔኤኮ ዓኣፓ ዓኣ ዼኤፖ ቡኡሮ ኬሴ''፤ ዬካፓ ኔ ላጋሢኮ ዓኣፓ ዓኣ ዻኮ'' ቡኡሮማ ኔ ዴንቂ ኬሳ''ንዳኔ።

⁶ፆኦሲም ዱማዼ፥ ጌኤዦ ባኮ ካናቶም ዓጊፖቴ፤ ሃሣ ሚዛጶ ሹጮ ጉዱንፆ ቤርታ ኬኤሪፖቴ፤ ዓይጎሮ ጌዔቶ ጉዱንፃ ዬያ ሚዛጶ ሹጮ ቶኪና ሄ'ርቃንዳኔ፤ ካናታ ሃሣ ጊንሣ ሺሪ ዒንሢ ዻዓንዳኔ» ጌዔኔ።

⁷ዬሱሴ ሃሣ ኬኤዛዖ፦ «‹ሺኢቁዋቴ ዒንሢም ዒንጊንታንዳኔ፤ ኮዑዋቴ ዒንሢ ዴንቃንዳኔ፤ ካራ'' ዔቂ ዔኤሉ''ዋቴ ካራ'' ዒንሢም ቡሊ''ንታንዳኔ።

⁸ሺኢቃሢም ቢያ ዒንጊንታንዳኔ፤ ኮዓሢያ ዴንቃንዳኔ፤ ካራ'' ዔቂ ዔኤላ''ሢማኣ ካራ'' ቡሊ''ንታንዳኔ።›

⁹‹ዒንሢ ባኣካ''ፓ ናዓ ካሣ ሺኢቃዛ ሹቺ ዒንጋ ዓዴ ዓኣ?

¹⁰ሃሣ ጊንሣ ዓሽኪ ሺኢቃዛ ሾኦሺ ዒንጋይ ዓኣ?

¹¹ዓካሪ ዒንሢ ፑርታታዖ ዒንሢ ናኣቶ''ም ኮሺ ባኣዚ'' ዒንጊ ዔራቶ፥ ዒንሢኮ ጫሪንጮይዳ ዓኣ ዓዳሢ ዒዛ ሺኢቃዞንሢም ኮሺ ባኣዚ'' ዒንጋንዳሢ ባሼና ዔራኔ።

¹²ሜሌ'' ዓሳ ዒንሢም ማዻንዳጉዲ ዒንሢ ኮዓ ባኮ ዒንሢያ ዔያቶም ማዹዋቴ፤ ሙሴ ዎጎና ፆኦሲ ማሊፆ ኬኤዛ ዓሶናኮ ዔርዚፃ ያዺ ጋዓኔ› » ጌዔኔ።

¹³ዬሱሴ ሃሣ ኬኤዛዖ፦ «ኩንዖ ካሬ''ሎና ጌሉዋቴ፤ ዓይጎሮ ጌዔቶ ባይሲንቶ ባንሢ ጌልዛ ካራ'' ዳልጊ፥ ዔኪ ዓኣዻ ጎይፃኣ ዳልጊኬ። ዬኖ ባንሢ ጌላንዳ ዓሳ ሚርጌኬ።

¹⁴ናንጊ ባንሢ ጌልዛ ካራ'' ጋዓንቴ ኩንዔ፥ ጎይፃኣ ሜታሳያኬ፤ ዬያሮ ዬኖ ጎይፄሎና ጌላንዳ ዓሳ ዻካ''ኬ» ጌዔኔ።

¹⁵ዬሱሴ ሃሣ ኬኤዛዖ፦ «ጋሮና ሙዓ ያኣዮታዖ፥ ማራይ ጉፓሌ ማይንቲ ዒንሢ ባኣኮ'' ጌሊ ዒንሢ ባይዛኒ ማላ ሉኡቂ ‹ፆኦሲ ማሊፆ ኬኤዛኔ› ጋዓዞንሢዳፓ ካፒንቱዋቴ።

¹⁶ዒንሢ ዔያቶኮ ማዾ'' ዓኣፖይዳፓ ዔራንዳኔ፤ ጋውዲዳፓ ኩሩንቱሼ፤ ሓሣ ጋኣላንሣይዳፓ ሻኣቢ ማንፂንታ?

¹⁷ዬያጉዲ ኮሺ ሚሢ ቢያ ኮሺ ዓኣፒ፥ ፑርታ ሚሢ ሃሣ ፑርታ ዓኣፒ ዓኣፓኔ።

¹⁸ኮሺ ሚሢ ፑርታ ዓኣፒ፥ ፑርታ ሚሢ ኮሺ ዓኣፒ ዓኣፓኒ ዳንዳዑዋሴ።

¹⁹ኮሺ ዓኣፒ ዓኣፑዋ ሚሢ ቢያ ቲቂንቲ ታሚዳ ዓጊንታንዳኔ።

²⁰ዬያሮ ሉኡቂ ፆኦሲ ማሊፆ ኬኤዛኔ ጋዓ ዓሶኮ ማዾ'' ዓኣፖይዳፓ ዒንሢ ዔራንዳኔ።

²¹«ጫሪንጫ ዓኣ ታ ዓዶ ማሊፆ ኩንሡዋዖ ‹ጎዳሢዮ፥ ጎዳሢዮ› ጋዓሢ ቢያ ጫሪንጮ ካኣቱሞይዳ ጌላዓኬ።

²²ዓጮ''ይዳ ፆኦሲ ዎጋ ኬሎ'' ሚርጌሢ ‹ጎዳሢዮ! ጎዳሢዮ! ኔ ሱ'ንፆና ፆኦሲ ማሊሢ ኑ ኬኤዚባኣዓዳ? ኔ ሱ'ንፆና ፑርታ ዓያና ዓሶይዳፓ ኑ ኬሲ''ባኣዓዳ? ኔ ሱ'ንፆና ማዺንታ ሚርጌ ዓኪ ባኣዚ'' ኑ ማዺባኣዓዳ?› ጋዓንዳኔ።

²³ዬኖ ዎዶ''ና ‹ፔቴ''ታዖ ታ ዒንሢ ዔሩዋሴ፥ ዒንሢ ፑርቶ ዓሳ ታ ኮይላ''ፓ ሺኢኩዋቴ!› ጌዒ ፔጌና ታ ዔያቶም ኬኤዛንዳኔ» ጌዔኔ።

²⁴ዬሱሴ ሃሣ ኬኤዛዖ፦ «ዓካሪ ሃያ ታኣኮ ቃኣሎ'' ዋይዚ ማዻ ዓሢ ማኣሮ ዶዲ ቤስካ ዶዲሺ ማዤ ጪንጫ ዓሲ ማላኔ።

²⁵ዼኤፒ ዒርዚ ዋርቄም ዲጳ ኩሚ''፥ ዢባሬያ ዢባርሼኔ፤ ጋዓንቴ ዬይ ማኣራሢ ዶዲ ቤሲዳ ማዢንቴሢሮ ዶዒባኣሴ።

²⁶«ሓያ ታኣኮ ቃኣሎ'' ዋይዚ ማዹዋኣሢ ጋዓንቴ ማኣሮ ማኣሻላይዳ ማዤ ቦኦዛ ዓሲ ማላኔ።

²⁷ዼኤፒ ዒርዚ ዋርቄም፥ ዲጳ ኩሚ'' ዢባሬያ ዢባርሻዛ ዬና ማኣሬላ ቤዞና ጋፒ ዶዔኔ» ጌዔኔ።

²⁸ዬሱሴ ዬያ ባኮ ኬኤዚ ጋፒሳዛ ዴራ'' ዒዛኮ ዔርዚፆና ዲቃቲ ሄርሼኔ።

²⁹ዓይጎሮ ጌዔቶ ዒዚ ዔያቶኮ ዎጎ ዔርዛ ዓሶጉዲቱዋንቴ ዼኤፒ ቢታንቶና ዔርዛሢሮኬ።