Read maale ማርቆሴ 10 Bible Online

ማርቆሴ 10 - maale bible

ማርቆሴ 10

¹ዬሱሴ ዬኖ ዓጮ''ይዳፓ ዔቂ ዪሁዳ ዓጮ''ና ጌዒ ዮርዳኖሴ ዎሮ ሱኮ ፒንቄኔ፤ ሚርጌ ዴሬ ዒዛ ባንሢ ሙኬሢሮ ዒዚ ሚናኣፓ ዔርዛሢጉዲ ሓሣ ዔርዚሢ ዓርቄኔ።

²ፔቴ'' ፔቴ'' ፔርሴ ዓሳ ዬሱሴ ባንሢ ሙካዖ ጌኤሲና ዒዛ ፒራኒ ኮዓሢሮ፦ «ዓሲ ፔ ማቾ ዓንጃንዳጉዲ ዎጋ'' ዓይሣ?» ጌዒ ዖኦጬኔ።

³ዬሱሴ፦ «ሙሴ ዒንሢ ዬያ ዛሎ'' ዎዚ ጌይ ዓይሣዖ?» ጌዒ ዖኦጪሢና ማሄኔ።

⁴ዔያታ፦ «ሙሴ ዎጋ'' ዓንጂንቶ ዔርዛያ ፃኣፖና ዋርቃታ ዒንጊጋፓ ዓንጃንዳጉዲ ጋዓኔ» ጌዔኔ።

⁵ዬሱሴ ዔያቶም ሂዚ ጌዒ ማሄኔ፦ «ሙሴ ያዒ ጌይ ዓይሤሢ ዒንሢኮ ዒና'' ዋይዞ ዒፂ ዶዳሢ ዛጊኬ።

⁶ጋዓንቴ ማዢንቶኮ ዓይፃፓ ጌኤዦ ማፃኣፓ ጋዓ ጎይፆ ‹ፆኦሲ ዓቲንቄና ላኣሊና ማሂ ማዤኔ፤›

⁷‹ዬያሮ ዓሲ ዓዶና ዒንዶና ሓሺ'' ማቾና ዎላ'' ፔቴ'' ማዓኔ፤

⁸ላምዖንሢያ ፔቴ'' ዑሢ ማዓኔ› ዬካፓ ሴካ ላምዖ ማዒፃ ዓቴ''ም ፔቴ'' ማዓኔ።

⁹ዬያሮ ፆኦሲ ዋኣፄሢ ዖኦኒያ ቡሎ''ፓ።»

¹⁰ዬሱሴኮ ጊንፆ ሓንታ ናኣታ'' ማኣሮ ባንሢ ማዔ ዎዶ''ና ላሚ ዒዞ ዛላ ዬሱሴ ዖኦጬኔ።

¹¹ዬሱሴ ዔያቶም ማሓዖ፦ «ዖና ማዔቶዋ ፔ ማቾ ዓንጂ ሜሌ'' ላኣሊ ዔካሢ ፔኤኮ ቤርታኣ ማቾ ዒኢሳ''ኔ ጌይሢኬ።

¹²ዬያጉዲ ሓሣ ዖናታቴያ ፔ ዓኒፓ ዓንጂንቲ ሜሌ''ም ሎዓ ላኣሌላ ዒኢታያ ማዓኔ ጌይሢኬ» ጌዔኔ።

¹³ፔቴ'' ፔቴ'' ዓሳ ፔኤኮ ናኣቶ''ኮ ዬሱሴ ኩጮና ዑፆ ካኣማንዳጉዲ ዔኪ ሙካዛ ዬሱሴኮ ጊንፆ ሓንታ ናኣታ'' ዬኖ ዓሶ ጎሬኔ።

¹⁴ዬሱሴ ዬያ ዛጊጋፓ ጎሪ''ንቲ ፔኤኮ ጊንፆ ሓንታ ናኣቶ''ም ሂዚ ጌዔኔ፦ «ፆኦሲ ካኣቱማ ሃንሢ ዔያቶ ጉዴዞንሢም ማዔሢሮ ናኣታ'' ታ ኮራ ሙኮንጎ፤ ሓሹ''ዋቴ፥ ላኣጊፖቴ፤

¹⁵ጎኔ ታ ዒንሢም ጋዓኔ፤ ፆኦሲኮ ካኣቱሞ ናይ ማዒ ዔኩዋ ዓሲ ፔቴ''ታዖ ዒኢካ ጌሊንዱዋሴ!»

¹⁶ዬሱሴ ዬካፓ ናኣቶ'' ኮንቂ፥ ኩጮ ዑፃ ጌሢ ዓንጄኔ።

¹⁷ዬሱሴ ዬካፓ ኬስኪ ጊንሣ ዓኣዻኣና ፔቴ'' ዓሲስኬያ ጳሽኪ ሙኪ ቤርታ ጉምዓታዖ፦ «ኮዦ ዔርዛሢዮ! ናንጊና ናንጊ ዴንቃኒ ዓይጎ ማዻንዳያ ታና ኮይሳይ?» ጌዒ ዖኦጬኔ።

¹⁸ዬሱሴ ማሓዖ፦ «ዓይጎሮ ኮዣሢዮ ኔኤኒ ታና ጋዓይ? ፔቴ'' ፆኦሲዳፓ ዓቴም ሜሌ'' ኮሺ ዖኦኒያ ባኣሴ።

¹⁹ኔኤኒ ዓይሢፆንሢ ዔራኔ፤ ዬንሢያ፦ ‹ዓሲ ዎዺፖ፥ ላኣሊ ዒኢሲ''ፖ፥ ዉኡቂፖ፥ ሉኡዙሞና ማርካቲፖ፥ ጌሺፖ፥ ዓዶና ዒንዶና ቦንቼ› ጋዓዞንሢኬ።»

²⁰ዓሢያ፦ «ዔርዛሢዮ! ዬያ ዓይሢፆ ቢያ ናኣቶፓ ዓርቃዖ ታኣኒ ካፓኔ» ጌዔኔ።

²¹ዬሱሴ ናሹሞና ዒዛ ዛጋዖ፦ «ፔቴ'' ባኣዚ'' ሌሊ ዓቴ''ኔ፤ ዴንዲ ኔኤኮ ዓኣ ባኮ ቢያ ሻንቺ ማንቆ ዓሶም ጊሽኪ ዒንጌ፤ ዬካፓ ታ ጊንፆ ሙኪ ሓንቴ፤ ጫሪንጮ ማኣራ ቡኪንቴ ቆሎ ኔኤኮ ዓኣያ ማዓንዳኔ» ጌዔኔ።

²²ዓሢ ዬያ ዋይዛዖ ዓኣፖ ካሮ'' ቱኬ''ኔ፤ ኮሺ'' ዒ ዖርጎቺታሢሮ ዖዪ ዖዪ ዴንዴኔ።

²³ዬሱሴ ጊንፆ ሓንታ ናኣቶ'' ባንሢ ሺራዖ፦ «ዖርጎቺ ዓሲም ፆኦሲ ካኣቱሞይዳ ጌሊሢ ዎዚጉዲ ሜታንዳይ!» ጌዔኔ።

²⁴ጊንፆ ሓንታ ናኣታ'' ዬኖ ዬሱሴ ጌዔዞ ዋይዚ፦ «ሓያጉዴ ባኣዚ''» ጌዒ ዲቃቴኔ፤ ጋዓንቴ ዬሱሴ ላሚ፦ «ናይዮቴ! ፆኦሲ ካኣቱሞይዳ ጌሊሢ ዎዚ ሜታንዳይ!

²⁵ዖርጎቺ ዓሲ ፆኦሲ ካኣቱሞይዳ ጌላንዳስካፓ ጋኣላ ናርፔ ፂኢናና ጌላኒ ሼሌዓንዳኔ» ጌዔኔ።

²⁶ጊንፆ ሓንታ ናኣታ'' ዬሱሴ ጌዔሢና ኮሺ'' ዲቃቲ ሄርሻዖ፦ «ያዒ ማዔቶ ማይ ዖኦኒ ዻቃኒ ዳንዳዓይ!» ዎሊ ኮራ ጌዔኔ።

²⁷ዬሱሴ ዔያቶ ባንሢ ዛጋዖ፦ «ጎኔና ዬይ ዓሲም ዳንዳዒንቱዋሴ፤ ጋዓንቴ ፆኦሲም ዳዳንዳዒንታያኬ፤ ቢያ ባኣዚ'' ፆኦሲም ዳንዳዒንታኔ» ጌዔኔ።

²⁸ጴፂሮሴ ዒማ''ና፦ «ሃይሾ ኑኡኒ ቢያ ባኣዚ'' ሃሺ'' ኔ ጊንፆ ሓንታንቴሞ» ጌዔኔ።

²⁹ዬሱሴ ሂዚ ጌይ ማሄኔ፦ «ጎኔ ታኣኒ ጋዓኔ፤ ታናንታ ታኣኮ ኮዦ ሓይሶንታሮ ጌዒ ፔኤኮ ማኣሮ፥ ጌርሲንሢ፥ ጌሮንሢ፥ ዒንዳ፥ ዓዴ፥ ናኣቶ''ንታ ጎዦንታ ሓሻ''ሢ ባሼና ዴንቃንዳኔ።

³⁰ሓያ ዎዶ''ይዳታቴያ ዒፂንቲ ዳኪንቲፆና ፔኤኮ ማኣሮ፥ ጌርሲንሢ፥ ጌሮንሢ፥ ዒንዶንሢ፥ ናኣቶ''ንታ ጎዦንታ ሓሼ''ቶ ሚርጌ ፄኤታ ጳንጬ ማሂ ዔካንዳኔ፤ ሙካ ዓጮ''ይዳ ናንጊና ናንጊ ዴንቃንዳኔ።

³¹ዬይ ያዺ ማዔቶዋ ቤርቲ ማዔ ጎኦቦ'' ማላ ሜርጌ ዓሳ ጊንሢም፤ ጊንፃ ዓቴ''፥ ላቤያ ማላ ሜርጌ ዓሳ ቤርቲም ማዓንዳኔ።»

³²ዬሩሳላሜ ዴንዳ ጎይፆይዳ ዔያታ ዓኣንቴ ዬሱሴ ዔያቶኮ ቤርታ ቤርታ ዴንዳኔ፤ ጊንፆ ሓንታ ናኣታ''፦ «ሓያጉዴ ባኣዚ''» ጌዒ ዬኖ ሓይሶ ዲቃቲ ሄርሼኔ፤ ሓንጎ ዒዛና ዓኣ ዓሳ ዒጊጬኔ። ዒዚ ጊንሣ ላሚ ዒዛ ሄላ''ንዳ ባኮ ኬኤዛኒ ታጶ ላምዖንሢ ፔ ባንሢ ዔኤላ''ዖ ሂዚ ጌዒ ኬኤዜኔ፦

³³«ሓይሾ ኑኡኒ ዬሩሳላሜ ዴንዲፆይዳኬ፤ ዓሲኮ ናዓሢ ቄኤሶኮ ሱኡጎና ሙሴ ዔርዜ ዎጎ ዔርዛዞንሢናም ዓኣሢ ዒንጊንታንዳኔ፤ ዔያታኣ ዒዚ ሓይቃንዳጉዲ ጌዒ ጌስቲ ኩንሣንዳኔ፤ ዓይሁዴ ማዒባኣ ዓሶም ዒዛ ዓኣሢ ዒንጎንዶኔ፤

³⁴ዓይሁዴ ማዒባኣ ዴራ'' ዒዛ ቦሃንዳኔ፥ ጩታንዳኔ፥ ዢራፓና ጳርቃንዳኔ፤ ሓሣ ዎዻንዳኔ። ጋዓንቴ ሓይሦ ዓቢኮ ጊንፃ ሓይባ''ፓ ዔቃንዳኔ።»

³⁵ዜብዲዮሴኮ ናኣታ'' ያይቆኦቤና ዮሓኒሴና ዬሱሴ ኮራ ሙካዖ፦ «ኑና ዔርዛሢዮ! ኑኡኒ ዖኦጫ ባኮ ኔኤኒ ማዻንዳጉዲ ኑ ኮዓኔ» ጌዔኔ።

³⁶ዬሱሴ፦ «ዓይጎ ታኣኒ ማዻንዳጉዲ ዒንሢ ኮዓይ?» ጌዒ ዖኦጬኔ።

³⁷ዔያታ ማሓዖ፦ «ኔኤኮ ቦንቺንቴ ካኣቱሞይዳ ዓኣ ቦንቾ ቤዛ፡ ኑጊዳፓ ፔቴ''ሢ ኔኤኮ ሚዛቃ፤ ፔቴ''ሢ ሻውሎ ዛላ'' ኑና ማሂ ዴይሤ» ጌዔኔ።

³⁸ዬሱሴ ጋዓንቴ፦ «ዒንሢ ዖኦጮ ባኮ ዔሩዋሴ፤ ታኣኒ ዔካ ሜታሢ ዒንሢ ዔካኒ ዳንዳዓ? ታኣኒ ጌላንዳ ሜታስካ ዒንሢ ጌላኒ ዳንዳዓ?» ጌዒ ዔያቶ ዖኦጬኔ።

³⁹ያይቆኦቤና ዮሓኒሴና ማሓዖ፦ «ሂዮ ኑኡኒ ዳንዳዓንዳኔ» ጌዔኔ። ዬሱሴያ፦ «ጎኔኬ፤ ዒንሢ ታኣኒ ዔካ ሜቶ'' ዔካኒ፥ ታኣኒ ጌላ ሜታስካኣ ጌላኒ ዳንዳዓኔ።

⁴⁰ጋዓንቴ ታኣኮ ሚዛቆና ሻውሎ''ናይዳ ዴዓንዳጉዲ ዓይሣሢ ታናቱዋሴ፤ ዬይ ቤዛ ዒንጊንታሢ ዒዞ ቤዞም ፆኦሲ ጊኢጊሼ ዓሶምኬ» ጌዔኔ።

⁴¹ዓቴ'' ታጶንሢ ዬያ ዋይዛዖ ያይቆኦቤና ዮሓኒሴናይዳ ዻጋዼኔ።

⁴²ዬሱሴ ቢያሢ ፔ ባንሢ ዔኤላ''ዖ ሂዚ ጌዔኔ፦ «ዓይሁዴ ማዒባኣ ዓሶኮ ሱኡጋ ዴሮ''ኮ ዎይሣዞንሢ ጌይንቲ ዔኤሊ''ንታያ ማዔሢና ሓሣ ዔያቶኮ ቢቶ'' ማዔዞንሢኮ ዔያቶ ዑፃ ቢታንቶ ዓኣያ ማዔሢ ዒንሢ ዔራኔ።

⁴³ጋዓንቴ ዒንሢ ባኣካ'' ያዒ ማዓኒ ኮይሱዋሴ፤ ዒንሢፓ ፔቴ'' ዓሲ ፑኡፒ ማዓኒ ኮዔቶ ቢያሢም ማዻያ ማዖም፤

⁴⁴ዒንሢ ባኣካ''ፓ ዼ'ጌ ማዓኒ ኮዓሢ ቢያሢም ዓይሌ'' ማዖም፤

⁴⁵ዓሲኮ ናዓሢታዖ ቢያሢኮ ዴማ'' ማዒ ማዻኒና ፔኤኮ ሼምፓሢ ሚርጌዞንሢ ዛሎ'' ዒንጊ ዻቂሻኒ ሙካንዳኣፓዓቴም ዓሲ ዒዛም ማዻንዳጉዲ ሙኪባኣሴ።»

⁴⁶ዬካፓ ዬሱሴና ዒዛኮ ጊንፆ ሓንታ ናኣቶ''ና ዎላ'' ዒያርኮ ጌይንታ ካታሞ ሙኬኔ፤ ዔያቶና ዎላ'' ሚርጌ ዴሬ ዒያርኮ ካታማፓ ኬስካንቴ ፔቴ'' ፂሞሴ ናይ፥ ዓኣፒ ባይቄያ ቤርፄሞሴ ጎዖስኬይ ጎይፆ ዓጫ ዴዒ ዔኤቢ ዒንጎም ሺኢቃኔ።

⁴⁷ዒዛኮ ኮርሲና ዴንዳሢ ናዚሬቶ ዬሱሴ ማዔሢ ዒ ዋይዛዖ፦ «ዳውቴ ናዓሢዮ! ዬሱሴ ሓዳራ ታና ሚጪንቲ ማኣዴቴራ» ጌዒ ዒላቲሢ ዓርቄኔ።

⁴⁸ሚርጌ ዓሳ፦ «ዚቲዮ ጌዔ!» ጌይ ጎሬኔ፤ ዒዚ ጋዓንቴ «ዳውቴ ናዓሢዮ ታና ማኣሬ!» ጌዒ ሓቺም ዒላቴኔ።

⁴⁹ዬሱሴ ዔቃዖ፦ «ዒዛ ዔኤሉ''ዋቴ» ጌዔኔ፤ ዔያታ ዓኣፓ ባይቄሢ ዔኤላ''ዖ፦ «ዔኤዛይ ዒጊጪፖ፥ ዔቄ! ዬሱሴ ኔና ዔኤላ''ኔ» ጌዔኔ።

⁵⁰ዒዚ ፔኤኮ ቃሲ'' ዑፃ ማኣዔ ዓፒሎ ኬኤሪ፥ ጱሊ'' ዔቃዖ ዬሱሴ ባንሢ ዓኣዼኔ።

⁵¹ዬሱሴ፦ «ታኣኒ ዓይጎ ዎኦቶም ኔኤኒ ኮዓይ?» ጌዒ ዖኦጬኔ። ዒዚ፦ «ዔርዛሢዮ! ሓዳራ ታኣኒ ዛጋንዳጉዲ ዓኣፖ ታኣም ፖዒሴ» ጌዒ ማሄኔ።

⁵²ዬሱሴ፦ «ሂዴቶ ዴንዴ፤ ኔ ጉሙርቂፃ ኔና ዓውሴኔ» ጌዔኔ። ዓሢያ ቤዞማና ዛጌኔ፤ ጎይፆናኣ ዬሱሴ ጊንፆ ዓኣዼኔ።