Read maale ማርቆሴ 14 Bible Online

ማርቆሴ 14 - maale bible

ማርቆሴ 14

¹ዓይሁዴ ዓሳ ዑሣ ዓኣዺፆንታ ላኣዳ ሙዒ ቦንቾ ኬሎ''ንታ ማሊ ቦንቻኒ ላምዖ ዓቢ ዓታዛ ቄኤሶኮ ሱኡጎና ዎጎ ኮሺ'' ዔራ ዓሳ ጌኔ ማሊሢና ዬሱሴ ዓርቂ ዎዾንዶ ጎይሢ ኮዔኔ።

²ጋዓንቴ ዴራ'' ዑራ ዔቂሳንዳኔ ጌዒ፦ «ኑኡኒ ቦንቾ ኬሎ''ና ዬያ ማዻዓ» ዔያታ ጌዔኔ።

³ዬሱሴ ቢታኒያ ጎዖ ጉርዶይዳ ዑፃ ኬስካ ፑርቶ ዶርዓሢና ዓርቂንቴዖ ፖዔ፥ ሲሞኦኔ ጎዖሢ ማኣራ ዓኣዖ ካሣ ሙዓኒ ጊኢጊ ዴዒ ዓኣንቴ ፔቴ'' ላኣሊስኬና ሹቺ ቢልቃፄይዳ ናርዶሴ ጎዖያ ቦንቺንቴያ ሓሣ ሻንቾዛ ሚርጌ ሚኢሼ ዔካ፥ ሳውቃያ ዋኣሢ ማዔ ቲሺ ኩንሢ ዔኪ ሙካዖ ዬኖ ቢልቃፄሎ ዎዺ ሳውቃ ቲዤሎ ዬሱሴኮ ቶኦካ'' ዋሄኔ።

⁴ዬያ ዒዛ ማዻኣና ዒኢካ ዓኣ ዓሶይዳፓ ፔቴ'' ፔቴ'' ዓሳ ጎሪ''ንታዖ፦ «ሓይ ሳውቃ ቲዣ ጉሪ ዓታሢ ዓይጎሮዳይ?

⁵ሓያ ሳውቃ ቲዦ ፔቴ'' ዓሲ ፔቴ'' ሌዔ ማዾ ማዼም ዒንጎንዶ ሚኢሼይዳፓ ዑሣ ሻንቺ ዔኤቢ ባኣ፥ ዓሶ ማንቆም ዒንጎናቴ ዓይጌ ዓኣይ?» ጌዒ ላኣሌሎዋ ዔያታ ፓሴኔ።

⁶ዬሱሴ ማሓዖ፦ «ሓሹ''ዋቴ፤ ዒዞ ዒንሢ ዓይጎሮ ሜታሳይ? ዒዛ ታኣም ኮሺ ባኣዚ'' ማዼኔ፤

⁷ማንቆ ዓሳ ቢያ ኬሊ'' ዒንሢና ዎላ'' ዓኣሢሮ ኮዔ ዎዴና ዔያቶ ዒንሢ ማኣዳ''ኒ ዳዳንዳዓኔ፤ ጋዓንቴ ታኣኒ ቢያ ኬሊ'' ዒንሢና ዎላ'' ሓይካቱዋሴ፤

⁸ሓና ላኣሌላ ፔኤም ዳንዳዒንቴሢ ጉዴያ ማዼኔ፤ ዓሽካ ታኣኮ ዱኡኪንቱዋንቴ ቤርታሲ ሳውቃ ቲሺና ዒዛ ታኣኮ ዑፆ ቲሽኪ ዱኡፖም ጊኢጊሼኔ።

⁹ጎኔ ታ ዒንሢም ጋዓኔ፤ ዓጮ'' ቢያይዳ ሓይ ኮዦ ሓይሳ ኬኤዚንታ ዎዶ''ና ዓንካ ማዔቶዋ ሓይ ዒዛ ማዼ ባካ ዒዞ ጶቂሥሢ ማዒ ኬኤዚንታንዳኔ» ጌዔኔ።

¹⁰ታጶ ላምዓሢዳፓ ፔቴ'' ዓስቆሮንቶ ዪሁዳ ጎዖሢ ዬሱሴ ጌሺሢና ዓኣሢ ዒንጋኒ ቄኤሶኮ ሱኡጎ ኮራ ዓኣዼኔ።

¹¹ዔያታ ዒዛኮ ጎዳ ሻንቾሮ ሙኪፆ ዔራዖ ኮሺ'' ዎዛዺ ሚኢሼ ዒዛም ዒንጋኒ ዎላ'' ጌስቲ ጊኢጌኔ። ዬካፓ ዒዚ ዬሱሴ ዓኣሢ ዒንጋኒ ዒዛም ጊኢጋንዳ ጎይሢ ኮዔኔ።

¹²ዬሱሴኮ ጊንፆ ሓንታዞንሢ ዓይሁዴ ዓሳ ዑሣ ዓኣዺፆ ቦንቾ ኬሎ'' ማራቶ ሹኪ ላኣዶዋ ሙዒ ቦንቻ ኬሎ''ኮ ዓይፆይዳ ዒዛ ኮራ ሙካዖ፦ «ዑሣ ዓኣዺፆ ኬሎ'' ማሊ ሙዎ ካዋሢ ሙዓኒ ዎካ ዓኣዺ ጊኢጊሻንዳጉዲ ኔኤኒ ኮዓይ?» ጌዒ ዖኦጬኔ።

¹³ዒዚያ ዒዛኮ ጊንፆ ሓንታዞንሢዳፓ ላምዖንሢም ሂዚ ጌዒ ዳኬኔ፦ «ሴኬ ካታሞ ዴንዱዋቴ፤ ዒኢካ ዒንሢ ዋኣሢ ጉሲ ኬዴ ዓሲ ዴንቃንዳኔ፤ ዬያ ዓሢኮ ጊንፆ ዓኣዹዋቴ፤

¹⁴ዒዚ ዴንዲ ጌላ ኬኤፆማ ጌሊጋፓ ማኣሮኮ ዓዳሢ ኮራ ‹ዔርዛሢ፡ ታኣኮ ጊንፆ ሓንታዞንሢና ዎላ'' ታኣኒ ዑሣ ዓኣዺፆ ኬሎ'' ሙዖ ሙዓንዳ ኬኤፃ ዎካዳይ?› ጋዓኔ፥ ጎዑዋቴ።

¹⁵ዒዚያ ኩቦ ጋራ ዓኣ ሂኢሢ ጊኢጊንቴ ዳልጎ ቤዞ ዒንሢም ዻውዋንዳኔ፤ ዒኢካ ኑም ጊኢጊሹዋቴ።»

¹⁶ላምዖ ጊንፆ ሓንታዞንሢ ኬስኪ ካታሞ ዴንዲ ዬሱሴ ጌዔማጉዲ ቤዞዋ ዴንቂ ዑሣ ዓኣዺፆ ኬሎ'' ካዋሢ ሙዓኒ ዒኢካ ጊኢጊሼኔ።

¹⁷ሳዓ ዓማዛ ዬሱሴ ታጶ ላምዖንሢና ዎላ'' ሙኬኔ፤

¹⁸ካሦ ሺኢሺ ዔያታ ሙዓኣና ዬሱሴ፦ «ጎኔ ታኣኒ ዒንሢም ጋዓኔ፤ ሓሢ ታኣና ዎላ'' ካሦ ሙዓያ ዒንሢዳፓ ፔቴ''ይ፥ ታና ዓኣሢ ዒንጋንዳኔ» ጌዔኔ።

¹⁹ዔያታ ዬኖ ጌኤዞና ዖያዖ፦ «ጎኔ ታናቱዋሴ፤ ኔ ታናኬ ጋዓ?» ጌዒ ጌዒ ፔቴ'' ፔቴ''ሢ ዒዛ ዖኦጬኔ።

²⁰ዬሱሴ ማሓዖ፦ «ዬይ ዓሢ ሓሢ ታኣና ዎላ'' ሃኖ ጎንጋ ኩጮ ዳካያ፥ ዒንሢ ታጶ ላምዓሢዳፓ ፔቴ''ሢኬ፤

²¹ዓሲኮ ናዓሢ ቤርታዺ ዒዛ ዛሎ'' ፃኣፒንቴ ጎይፆና ሓይቂሢ ዓታዓኬ፤ ጋዓንቴ ዓሲኮ ናዓሢ ጌሺሢና ዓኣሢ ዒንጋ ዬያ ዓሢም ባዴዔ፤ ዬይ ዓሢ ቤርታዺ ሾይንቲባኣቴ ቃራታዖኬ» ጌዔኔ።

²²ዔያታ ሙዖይዳ ዓኣንቴ ዬሱሴ ካሣ ዔካዖ ጋላቲ ቡንፂጋፓ ዒዛኮ ጊንፆ ሓንታ ናኣቶ''ም፦ «ሓኣዛጉዋቴ፥ ሓይ ታናኬ» ጌዒ ዒንጌኔ።

²³ሓሣ ዑሽኮ ባኮዋ ዔካዖ ጋላቲ ዔያቶም ዒንጌኔ፤ ቢያሢ ዑሽኮ ባኮይዳፓ ዑሽኬኔ።

²⁴ዒማ''ና ዒዚ ዔያቶም፦ «ሓይ ታኣኮ ሚርጌ ዓሶም ላኣሊንታንዳ ጫኣቁሞ ሱጉፆኬ፤

²⁵ጎኔ ታ ዒንሢም ጋዓኔ፤ ፆኦሲ ካኣቱሞይዳ ዓኮ ታኣኒ ዑሽካንዳያ ሄላ''ንዳኣና ሓኖ ዎይኖ ዑዦ ላሚ ታኣኒ ዑሽካዓኬ» ጌዔኔ።

²⁶ዬካፓ ዔያታ ፆኦሲ ቦንቾም ማዓ ዓይኑሞ ዓይናዻዖ ሪሚቲ ዹካ ዓኣዻኒ ኬስኬኔ።

²⁷ዬሱሴ ዒዛኮ ጊንፆ ሓንታ ናኣቶ''ም፦ « ‹ሄንቃሢ ታኣኒ ዎዻንዳኔ፤ ማራታኣ ዣኣላንዳኔ› ጌይንቲ ፃኣፒንቴሢጉዲ ታ ዒንሢኮ ዹቆ ማዔም ዒንሢ ቢያ ታና ሓሻ''ንዳኔ፤

²⁸ጋዓንቴ ሓይባ''ፓ ታኣኒ ዔቄስካፓ ጌሊላ ጎዖ ዓጮ'' ቢሪ ታ ዒንሢ ዓኣዻንዳኔ» ጌዔኔ።

²⁹ጴፂሮሴ፦ «ሜሌ'' ዓሳ ኔ ዛሎ''ና ዹቂንቴታቶዋ ታኣኒ ማሊ ዹቂንታዓኬ» ጌዔኔ።

³⁰ዬሱሴ፦ «ታኣኒ ኔኤም ጎኔ ጋዓኔ፤ ሓኖ'' ዒባኒ ኮይዳ ላሚ ቂኢቁዋንቴ ኔኤኒ ታና ሓይሢ ማይንቲ ‹ታ ዒዛ ዔሩዋሴ› ጋዓንዳኔ» ጌዔኔ።

³¹ጴፂሮሴ ጋዓንቴ፦ «ሓይቂ ሓይቆቴያ ታኣኒ ኔኤና ሓይቃንዳኣፓዓቴም ማሊ ‹ታ ኔና ዔሩዋሴ› ጋዓዓኬ» ጌዒ ጌዒ ዶዲሺ ኬኤዛኣና ሓንጎ ዓቴ'' ጊንፆ ሓንታዞንሢያ ያዒ ጌዔኔ።

³²ዬማፓ ጌኤቴሴማኔ ጎዖያ፥ ቱኮ''ና ሚሢ ሚርጌ ዓኣ ቤሲ ዔያታ ዓኣዻዖ ዬሱሴ ፔኤኮ ጊንፆ ሓንታ ናኣቶ''ም፦ «ታኣኒ ሺኢቃኣና ዒንሢ ሃካ ዴዑዋቴ» ጌዔስካፓ፥

³³ዒዛና ዎላ'' ጴፂሮሴንታ ያይቆኦቤንታ ሓሣ ዮሓኒሴንታ ዔኪ ዓኣዻዖ ዒኢካ ዒዚ ኮሺ'' ማሊ ዖዪሢ ዓርቄኔ።

³⁴ዔያቶ ኮራ ዒዚ፦ «ሼምፓሢ ታኣኮ ሚርጌ ዖዪ ሓይቃኒ ዑኬኔ፤ ዒንሢ ሓይማካ ዴዒ ዶዲ ካፑዋቴ» ጌዔኔ።

³⁵ዒዚ ዔያቶይዳፓ ዻካ'' ሓኪ ዓኣዻዖ ባሊቶና ሳዓ ሎኦሚ ዳንዳዒንታያ ማዔቶ ዬና ፑርቶ ሜቶ ዎዴላ ዒዛ ሄሉ''ዋጉዲ፥

³⁶ሂዚ ጌዒ ሺኢቄኔ፦ «ዓዳሢዮ! ቢያ ባኣዚ'' ኔኤም ዳንዳዒንታያታሢሮ ሃኖ'' ታኣኒ ዔካኒ ጊኢጌ ሜቶ'' ታጊዳፓ ሓኪሴ፤ ጋዓንቴ ኔ ማሊፆጉዲ ማዓንዳኣፓዓቴም ታ ማሊፆጉዲ ማዖፓ።»

³⁷ዬካፓ ሓይሦ ዒዛኮ ጊንፆ ሃንታዞንሢ ኮራ ማዒ ሙካዖ ዔያታ ጊንዒ ዓኣንቴ ዴንቂ ጴፂሮሴ ኮራ፦ «ሲሞኦኔ! ኔኤኒ ጊንዒዳ? ዻካ'' ዎዴታዖ ጴጪ ዶዲ ዴዓኒ ኔኤኒ ዳንዳዒባኣዓዳ?» ጌዔኔ።

³⁸ሄሊ''ሳዖ ቢያሢም፦ «ዒንሢ ዻቢሳኒ ጌሾ ባኣዚ''ዳ ዒንሢ ጌሉዋጉዲ ጴጪ ሺኢቁዋቴ፤ ዓሲኮ ዓያና ጊኢጌያኬ፤ ጋዓንቴ ዓሽኪ ላቤያኬ» ጌዔኔ።

³⁹ሓሣ ጊንሣ ዓኣዺ ቤርታ ዒዚ ሺኢቄሢ ጎይፆ ላሚ ዒማ ጌዒ ሺኢቄኔ።

⁴⁰ዬካፓ ዒዚ ማዒ ሙካንቴ ጊንዓሢ ዔያቶ ሚርጌና ባሼሢሮ ጊንዒ ዓኣንቴ ዴንቄኔ፤ ዔያታ ዒዛም ማሂ ኬኤዛኒያ ዳንዳዓባኣሴ።

⁴¹ሓይሣሲ ዔያቶ ኮራ ማዒ ሙካዖ ሂዚ ጌዔኔ፦ «ሓሢ ሄላ''ንዳኣና ዒንሢ ላሂ ሓውሺሢዳዳ? ማይ ዓካሪ ጊዴኔ፤ ዎዳ''ኣ ሄሌ''ኔ፤ ሓይሾ ዓሲኮ ናዓሢ ጎሞ ዓሶ ኩጫ ጌሺሢና ዓኣሢ ዒንጊንታንዳኔ።

⁴²ሂዮ ማይ ዔቁዋቴ ኑኡኒ ዓኣዾም! ታና ጌሺሢና ዓኣሢ ዒንጋሢ ሓይሾ ሙኬኔ» ጌዔኔ።

⁴³ዬሱሴ ሂዚ ጌዒ ኬኤዛ ጎይሣ ዓኣንቴ ዒዛኮ ጊንፆ ሓንታ ታጶ ላምዓሢዳፓ ፔቴ'' ዪሁዳ ጎዖሢ ሙኬኔ፤ ዒዛና ዎላ'' ዓፓሮና ኮኦሎ''ና ዓርቄ ሚርጌ ዓሲ ዓኣኔ፤ ዬያታ ዳኪንቴሢ ቄኤሶኮ ሱኡጎና ሙሴ ዔርዜ ዎጎ ዔርዛ ዓሶንታ ጪሞንታይዳፓኬ።

⁴⁴ጌሺፆና ዓኣሢ ዒንጋ ዪሁዳ ዓሶም፦ «ዒንሢ ዓርቃንዳሢ ዎያዳይ ጌዔቶ ‹ኮሺዳ?› ጌዒ ታኣኒ ሄርቃንዳሢኬ፤ ዒዛ ዛጊ ዓርቂ ዔኪ ዓኣዹዋቴ» ጌዒ ዔያታ ዔራንዳጉዲ ቤርታዺ ኬኤዜኔ።

⁴⁵ዪሁዳ ሙሙካዖ ዬሱሴ ኮራ ዶጪ፦ «ዔርዛሢዮ!» ጌዒ ሄርቄኔ።

⁴⁶ዬማፓ ዓሳ ዬሱሴ ቶሊ''ንዱዋ ጎይሢ ዓርቄኔ።

⁴⁷ዬማና ዒኢካ ዔቂ ዓኣ ዬሱሴኮ ጊንፆ ሓንታዞንሢዳፓ ፔቴ''ስኬይ ጬንቻ ቱጊ ቄኤሶ ሱኡጋሢ ዓይላ''ሢኮ ዋዮ ቆፂ'' ቲቄኔ።

⁴⁸ዬሱሴያ ዔያቶም ሂዚ ጌዔኔ፦ «ጬንቻና ኮኦሎ''ና ዒንሢ ዔኪ ሙኬሢ ሱላጉዲ ታና ዓርቃኒዳ?

⁴⁹ቢያ ኬሊ'' ጌኤዦ ማኣሮይዳ ታኣኒ ዔርዚ ዔርዚ ናንጋኣና ዒንሢ ታና ዓርቂባኣሴ፤ ጋዓንቴ ሓይ ማዔሢ ፃኣፒንቴሢ ኩማንዳጉዲኬ።»

⁵⁰ዬማፓ ዒዛኮ ጊንፆ ሓንታ ናኣታ'' ቢያ ዒዛ ሃሺ'' ፑኒንቴኔ።

⁵¹ዒማ''ና ሜሌ'' ባኣዚ'' ዑፃ ባኣያ ፓሎ ዓፒላ ማኣዔ ዼጌስኬይ ሌሊ ዬሱሴኮ ጊንፆ ጊንፆ ዓኣዻንቴ ዓሳ ዬያ ዼጌሢ ዓርቃዛ፥

⁵²ዬኖ ፓሎ ዓፒሌሎ ኬኤሪ፥ ዑሢ ጉሪ ጳሽኪ ቶሌ''ኔ።

⁵³ዬሱሴ ዔያታ ቄኤሶኮ ቢያ ዑፃሢ ማኣሪ ዔኪ ዓኣዼኔ፤ ዒኢካ ቄኤሶኮ ሱኡጎና ጪሞና ሓሣ ሙሴ ዔርዜ ዎጎ ዔርዛ ዓሳ ቢያ ቡኪንቴኔ።

⁵⁴ጴፂሮሴያ ቄኤሶኮ ቢያ ዑፃሢ ዲሮ ጋሮ ሄላ''ንዳኣና ሓኬ ሓኬ ዬሱሴኮ ጊንፆ ዓኣዻዖ ዒኢካ ዲሮ ጋሮ ካፓ ዓሶና ዎላ'' ዴዒ ታሚ ካሽታኔ።

⁵⁵ቄኤሶኮ ሱኡጎና ዓይሁዶኮ ቡኪንቶ ቢታ'' ቢያ ዬሱሴ ሓይቃንዳጉዲ ዎጊሳንዳ ማርካ ኮዔኔ፤ ጋዓንቴ ዔያታ ዴንቂባኣሴ።

⁵⁶ሚርጌሢ ሉኡቂ ማርካቴንቴ ዔያታ ኬኤዜ ጌኤዛ ፔቴ'' ማዒባኣሴ።

⁵⁷ፔቴ'' ፔቴ'' ዓሳ ዔቃዖ ሂዚ ጌዒ ሉኡቂ ማርካቴኔ፦

⁵⁸« ‹ታኣኒ ሓያ ዓሲ ኩቻ ማዦና ጌኤዦ ማኣሮ ሻሂ፥ ሓይሦ ኬሊ''ዳ ሜሌ'' ዓሲ ኩቻ ማዢንቲባኣያ ማዣንዳኔ› ዒ ጋዓንቴ ኑኡኒ ዋይዜኔ።»

⁵⁹ያዒ ዔያታ ጌዔንቴያ ማርካታ ዔያቶኮ ዎላ'' ካኣሚባኣሴ።

⁶⁰ቄኤሶኮ ቢያ ዑፃሢ ዔያቶ ባኣካ'' ዔቃዖ ዬሱሴ ኮራ፦ «ፔቴ'' ባኣዚ''ታዖ ማሂ ኔ ኬኤዙዋዓዳ? ሓይ ዓሳ ኔጊዳ ጋዓ ባካ ዓይጎዳዖ?» ጌዒ ዖኦጬኔ።

⁶¹ዬሱሴ ጋዓንቴ ዚቲ ጌዔያፓዓቴም ፔቴ'' ባኣዚ''ታዖ ማሂ ኬኤዚባኣያ ማዓዛ ቄኤሶኮ ቢያ ዑፃሢ ዬሱሴ ኮራ ላሚ፦ «ዓንጂንቴ ፆኦሲኮ ናኣዚ'' ሜሲሔ ኔናዳ?» ጌዒ ዖኦጬኔ።

⁶²ዬሱሴያ ማሓዖ፦ «ሂዮ ታናኬ፤ ዓሲኮ ናዓሢ ዼኤፖ ፆኦሲኮ ሚዛቆ ዛላ'' ዴዒ ዓኣንቴ ሓሣ ጫሪንጮ ሻኣሮና ማዒ ሙካንቴ ዒንሢ ዛጋንዳኔ» ጌዔኔ።

⁶³ዒማ''ና ቄኤሶኮ ቢያ ዑፃሢ ዻጋዺ ፔኤኮ ዓፒሎ ዳርዛዖ፦ «ሜሌ'' ማርካ ኑም ማይ ዓይጎ ኮይሳይ?

⁶⁴ሓያ ዋይዙዋቴ፤ ፆኦሲ ዒዚ ጫሽካንቴ ዒንሢ ዋይዜኔ፤ ዓካሪ ሓይ ዒንሢም ዓይጎ ማላይ?» ጋዓዛ፥ ቢያሢ ፔቴ'' ዑኡሲና፦ «ሓይቢ ዒዛም ኮይሳኔ!» ጌዒ ዎጌኔ።

⁶⁵ፔቴ'' ፔቴ'' ዓሳ ዒዛይዳ ጩቲ'' ጩቲ'' ዓኣፓ ዒዛኮ ዛጉዋጉዲ ቱርጫና ቱኪ''፦ «ሂንዳ ኔኤኒ ፆኦሲ ማሊሢ ኬኤዛያታቴ ኔና ዖኦኒ ዱሌ''ቶዋ ዔሬ» ጌዒ ጌዒ ዔያታ ዒዛ ኩቺ ሙሊ ዱሌ''ኔ። ሓንጎ ዲሮ ጋሮ ካፓ ዓሳ ሓሣ ዒዛ ባዒ ባዒ ዔኪ ዓኣዼኔ።

⁶⁶ጴፂሮሴ ቄኤሶኮ ቢያ ዑፃሢ ማኣሮኮ ዾኦሌ'' ዲሮ ጋራ ዓኣንቴ ቄኤሶኮ ቢያ ዑፃሢም ዓይሢንቲ ማዻ ፔቴ'' ዉዱሮ ናይስኬና ሙካዖ፥

⁶⁷ጴፂሮሴ ዒኢካ ታሚ ካሽታንቴ ዴንቂ ኮሺ'' ዛጋዖ፦ «ኔኤኒያ ናዚሬቶ ዓሢ ዬሱሴና ዎላ'' ዓኣያቲ» ጌዔኔ።

⁶⁸ዒዚ ጋዓንቴ፦ «ታኣኒ ዔሩዋሴ፤ ኔኤኒ ጋዓ ባካ ታኣም ዔርቱዋሴ» ጌዔኔ። ዬማ ዒዚ ጌዒ ካሮ'' ባንሢ ኬኬስካኣና ኮይዳ ቂኢቄኔ።

⁶⁹ዉዱሮ ናዔላ ጴፂሮሴ ዛጋዖ ዒኢካ ዔቂ ዓኣ ዓሶም፦ «ሓይያ ዔያቶ ባኣካ'' ዓኣያኬ» ጌዒ ላሚ ኬኤዚሢ ዓርቄኔ።

⁷⁰ዒዚ ጋዓንቴ ሓሣ ጊንሣ «ታ ዒዛ ዔሩዋሴ» ጌዔኔ። ዻካ'' ናጋጉዲ ጋዓዖ ዒኢካ ዔቂ ዓኣ ዓሳ ጴፂሮሴ ኮራ፦ «ኔኤኒ ጌሊላ ዓሲታሢሮ ጎኔ ኔ ዔያቶ ባኣካ'' ዓኣያኬ» ጌዔኔ።

⁷¹ዒዚ ጋዓንቴ፦ «ዒንሢ ዬያ ጋዓ ዓሢ ታኣኒ ዔሩዋሴ፤ ታና ባይዞም» ጌዒ ፔና ጋዳንቂ ጫኣቂሢ ዓርቄኔ።

⁷²ዬማፓ ኔጉዋዖ ኮይዳ ላሚሣ ቂኢቃዛ ጴፂሮሴም፦ «ኮይዳ ላሚ ቂኢቁዋንቴ ሓይሢ ማይንቲ ኔኤኒ ታና ‹ዔሩዋሴ› ጋዓንዳኔ» ጌዒ ዬሱሴ ኬኤዜ ቃኣላ'' ጶቃዛ ዒናፓ ዖዪ ዬኤኬኔ።