Read maale ሉቃሴ 11 Bible Online

ሉቃሴ 11 - maale bible

ሉቃሴ 11

¹ፔቴ'' ኬሊ'' ዬሱሴ ፔቴ'' ቤሲዳ ሺኢቃኔ፤ ዒዚ ሺኢቂ ጋፒሳዛ ዒዛኮ ጊንፆ ሃንታዞንሢዳፓ ፔቴ''ይ፦ «ጎዳሢዮ! ዮሓኒሴ ፔኤኮ ጊንፆ ሃንታዞንሢ ሺኢጲፆ ዔርዜሢጉዲ ኔኤኒያ ኑና ሺኢቂሢ ዔርዜቴራ!» ጌዔኔ።

²ዬሱሴያ፦ «ዒንሢ ሺኢቃዖ፥ ‹[ጫሪንጫ ናንጋ] ኑ ዓዳሢዮ! ሱ'ንፃ ኔኤኮ ቦንቺንቶም፤ ኔ ካኣቱማ ሙኮም፤

³ኬላ'' ኬላ'' ኑ ሙዓንዳ ሙኡዚ'' ዒንጌ፤

⁴ኑም ዻቤሢም ኑ ዓቶም ጋዓሢጉዲ ኑ ዻቢንቶ ኑም ዓቶም ጌዔ፤ ዻቢሻኒ ጌሾያይዳ ኑና ጌልዚፖ› » ጎዑዋቴ ጌዔኔ።

⁵ዬካፓ ዬሱሴ ፔኤኮ ጊንፆ ሃንታዞንሢ ኮራ፦ «ኮኦኪንሢና፡ ዒንሢዳፓ ፔቴ''ሢኮ ላጌ ዓኣኔ ኑ ጎዖም፤ ዒዚ ሳዓ ጊዲሚሺ ማዓኣና ፔ ላጋሢ ማኣሪ ዓኣዺ ‹ዔኤዛይ! ሃዳራ ታኣም ሃይሦ ካሣ ታልዔ፤

⁶ፔቴ'' ታኣኮ ላጌ ማዔ ዓሲ ሃኬ ጎይሢዳፓ ሙኬም ታ ዒዛ ሙኡዛንዳ ካሣ ባይቄኔ› ዒዛ ኮራ ጌዔቶ፤

⁷ዓካሪ ዬይ ላጋሢ ጋራ ዓኣዖ ‹ሃዳራ ታሚ ዋኣሢ ላሄም ሃያ ዎዴ ታና ሜታሲፖ፤[8] ዬያሮ ታ ዔቂ ኔ ኮዔ ካሦ ዒንጋኒ ዳንዳዑዋሴ› ጋዓንዳ?

⁸ጋዓንቴ ላጉሞ ዛሎ''ሮ ጌዒ ዔቂ፥ ዒንጋኒ ኮዒባኣቶዋ ዒዛ ሺኢቂ ሜታሳሢሮ ኮይሳሢ ቢያ ዒንጋንዳኔ፤ ታ ዒንሢም ጋዓኔ።

⁹«ዬያሮ ታ ዒንሢም ሂዚ ጋዓኔ፦ ሺኢቁዋቴ ዒንሢም ዒንጊንታንዳኔ፥ ኮዑዋቴ ዒንሢ ዴንቃንዳኔ፥ ካራ'' ዔቂ ዔኤሉ''ዋቴ ዒንሢም ቡሊ''ንታንዳኔ፤

¹⁰ሺኢቃሢ ጉቤ ዔካንዳኔ፤ ኮዓሢያ ዴንቃንዳኔ፤ ካራ'' ዔቂ ዔኤሊ''ንታሢማኣ ቡሊ''ንታንዳኔ።

¹¹ዒንሢዳፓ ዓዶ ማዔ ዓሲ ናዓ [ካሣ ሺኢቃዛ ሹቺ ዒንጋይ ዖናዳይ?] ሞሎ ሺኢቄም ሾኦሺ ዒንጋ?

¹²ሃሣ ጱኡላ'' ሺኢቄም ኮርኖ ዒንጋ?

¹³ዒንሢ ፑርታታዖ ዒንሢ ናኣቶ''ም ኮሺ ባኣዚ'' ዒንጊ ዔራቶ፥ ጫሪንጫ ናንጋ ዒንሢኮ ዓዳሢ ዒንሢፓ ባሼ ዒዛ ሺኢቃዞንሢም ዓያኖ ጌኤዦ ዒንጋኒ ኮዓያኬ!» ዔያቶም ጌዔኔ።

¹⁴ፔቴ'' ኬሊ'' ዬሱሴ ዻንጋ ባይቄ ዓሲስኬያይዳፓ ፑርታ ዓያና፥ ጌስቲሱዋያ ኬሳ''ንቴ ፑርቶ ዓያና'' ኬስካዛ ዻንጎ ባይቄሢ ጌስቲሢ ዓርቄም ዴራ'' ዬያ ባኮና ዲቃቲ ሄርሼኔ።

¹⁵ፔቴ'' ፔቴ''ዞንሢ ጋዓንቴ፦ «ፑርቶ ዓያኖ ዒዚ ኬሳ''ሢ ፑርቶ ዓያኖኮ ሱኡጋሢ ቢዔልዛቡሌናኬ» ጌዔኔ።

¹⁶ዓቴ''ዞንሢ ሃሣ ዬሱሴ ዎዚ ጋዓቴያ ዛጋኒ ኮዓዖ ጫሪንጮይዳፓ ዒዚ ኪሪስቶሴ ማዒፆ ዔርዛ ፔቴ'' ማላታ ማዓ ባኣዚ'' ዻዋንዳጉዲ ዒዛ ዖኦጬኔ።

¹⁷ዬሱሴ ጋዓንቴ ዔያቶኮ ማሊፆ ዔራዖ፦ «ፔቴ'' ካኣታ'' ዎሊፓ ፓቂንታያና ዖልታያና ማዔቶ፥ ዬያ ዓጮ'' ካኣቲ ባይቃንዳኔ፤ ዬያጉዲ ሃሣ ፔቴ'' ማኣሪ ዓሲ ዎሊም ዋይዚ ዒፂ ፓቂንቴቶ ባይቃንዳኔ።

¹⁸ዓካሪ ፃላሄ ካኣታ'' ዎሊፓ ፓቂንታያና ዖልታያ ማዔቶ ዎዲ'' ዶዲ ዔቃኒ ዳንዳዓይ? ዒንሢ ጋዓንቴ ‹ዒዚ ፑርቶ ዓያኖ ኬሳ''ሢ ቢዔልዛቡሌናኬ› ታና ጋዓኔ።

¹⁹ታኣኒ ፑርቶ ዓያኖ ቢዔልዛቡሌ ዎልቆና ኬሳ''ያ ማዔቶ ዒንሢኮ ዓሳ ዖኦና ፑርቶ ዓያኖ ኬሳ''ይ? ዬያሮ ዒንሢ ዓሳ ዒንሢ ዑፃ ዎጋንዳኔ።

²⁰ዓካሪ ታኣኒ ፑርቶ ዓያኖ ፆኦሲ ዎልቄና ኬሳ''ያ ማዔቶ ዬይ፡ ፆኦሲ ካኣቱማ ሙኬሢ ዔርዛኔ።

²¹«ፔቴ'' ዎልቄና ዓኣ ዓሲ ዖልዚ ዓንጋሞ ዓርቂ ፔ ማኣሮ ካፓያ ማዔቶ ዒዛኮ ማኣራ ቡሪንታዓኬ፤

²²ጋዓንቴ ዒዛይዳፓ ባሼ ዎልቄና ዓኣ ዓሲ ሙኪ፥ ዒዛ ባሼቶ ዒ ጉሙርቃ ዓንጋሞ ዒዛይዳፓ ዔኪ ዒዛኮ ዓኣ ባኮ ቢያ ቡሪ ሜሌ'' ዓሲማኣ ጊሽካንዳኔ።

²³«ታኣና ዎላ'' ማዒባኣሢ ቢያ ታና ዒፃኔ፤ ታኣና ዎላ'' ማዒ ቡኩሲባኣሢ ላኣሊ ባይዛኔ» ጌዔኔ።

²⁴«ፑርታ ዓያና ዓሲዳፓ ኬስኬ ዎዶ''ና ጌሊ ሃውሾ ቤሲ ኮዒሢና ዋኣሢባኣ ዓሲ ናንጉዋ ዳውሎ'' ቢያ ሃንቲ፥ ሃውሺ ዴዓ ቤሲ ዴንቂባኣቶ ‹ታ ኬስኬ ማኣሮ ታኣኮ ታ ማዒ ዓኣዾም› ጋዓኔ።

²⁵ዬያሮ ማዒ ሙካኣና ዬና ቤዜላ ጌኤሽኪ ጊኢጊንቲ ዓኣንቴ ዴንቃኔ።

²⁶ዬካፓ ዴንዲ ዒዛይዳፓ ባሼ ፑርታ ሜሌ'' ላንካይ ፑርታ ዓያና ዔኪ ሙኪ፥ ቤርታ ዒ ናንጋ ማኣራ ጌሊ ናንጋንዳኔ። ዓካሪ ዬያ ዓሢኮ ጋፒንፃ ሚና ቤርታኣሲዳፓ ባሼ ፑርታ ማዓንዳኔ» ጌዔኔ።

²⁷ዬሱሴ ዬያ ጌይ ኬኤዛኣና ፔቴ'' ላኣሊስኬና ዴሮ'' ባኣካ''ፓ ዑኡዞ ዼ'ጊዲ፦ «ኔና ሾዒ ዻንሢሤ፥ ዒንዴላ ዎዚ ዓንጂንቴያዳይ!» ጌዔኔ።

²⁸ዬሱሴ ጋዓንቴ፦ «ዓንጂንቴዞንሢ ፆኦሲኮ ቃኣሎ'' ዋይዚ ማዾይዳ ፔኤሻዞንሢኬ» ጌዔኔ።

²⁹ሚርጌ ዓሳ ሙኪ ዒዛ ኮይላ'' ቡካዛ ዬሱሴ፦ «ሃያ ዎዶ'' ዓሳ ማላታ ዛጋኒ ኮዓ ፑርታ ዓሲኬ፤ ጋዓንቴ ፆኦሲ ማሊፆ ኬኤዛ ዮናሴይዳ ማዺንቴ ማላታ''ፓ ዓታዛ ሜሌ'' ማላታ ዔያቶም ዒንጊንታዓኬ።

³⁰ፆኦሲ ማሊፆ ኬኤዛ ዮናሴ ኔኔዌ ካታሞ ዓሶም ማላታ ማዔሢጉዲ፥ ዓሲኮ ናዓሢ ሃያ ዎዶ'' ዓሶም ማላታ ማዓንዳኔ።

³¹ዓባ'' ኬስኪ ጌላ ካሮ''ኮ ዾኦሎ'' ዛሎ'' ዓጫ''ፓ ሙኬ ካኣቴላ ጋፒንፆ ዎጎ ኬሎ''ና ዔቂ ዔያቶ ዑፃ ዎጋንዳኔ፤ ዓይጎሮ ጌዔቶ ዒዛ ሴሎሞኔኮ ዔራቶ ዋይዛኒ ዓጮ''ኮ ጋፒንፆይዳፓ ሙኬኔ፤ ጋዓንቴ ሓይሾ ሴሎሞኔይዳፓ ባሼ ሃይካ ዓኣኔ!

³²ዬያጉዲ ሃሣ ኔኔዌ ዓሳ ጋፒንፆ ዎጎ ኬሎ''ና ዔቂ ዔያቶ ዑፃ ዎጋንዳኔ፤ ዓይጎሮ ጌዔቶ ኔኔዌ ዓሳ ዮናሴ ኬኤዜ ባኮ ዋይዜ ዎዶ''ና ፔኤኮ ጎማ ዻቢንቲታሢ ዔሪ ቡኡፄኔ፤ ጋዓንቴ ሃይሾ ዮናሴይዳፓ ባሻይ ሃይካ ዓኣኔ!» ጌዔኔ።

³³ሄሊ''ሳዖ ዬሱሴ፦ «ፖዒ ፖዒሲ ዓኣሺንታ ቤስካ ጌሣያና ሃሣ ጉኡፖ ባኣዚ''ና ጉኡፓ ዓሲ ባኣሴ፤ ዬያፓ ዓሳ ጋሮ ጌላኣና ጴዻንዳጉዲ ዼ'ጊዲ ሻርናይዳ ጌሣኔ።

³⁴ኔኤኮ ዑፆኮ ፖዒ ዓኣፒኬ፤ ኔኤኮ ዓኣፓ ኮሺ ማዔቶ ዑፃ ኔኤኮ ቢያ ፖዒ ማዓንዳኔ፤ ዓኣፓ ኔኤኮ ጋዓንቴ ሃርጌያ ማዔቶ ዑፃ ኔኤኮ ጉቤ ዹሜያ ማዓንዳኔ።

³⁵ዬያሮ ኔጊዳ ዓኣ ፖዓ ዹሚ ማዑዋጉዲ ኔና ዔሬ።

³⁶ዓካሪ ኔኤኮ ዑፆይዳ ዓይጌንዴ ዹሚያ ባኣያ፥ ፖዔ ማዔቶ ፆምፔ ኔ ዑፃ ፖዓዖ ሼኤራሢጉዲ ኔኤኒ ፖዓያ ማዓንዳኔ» ጌዔኔ።

³⁷ዬሱሴ ዬያ ኬኤዚ ጋፔስካፓ ፔቴ'' ፔርሴ ዓሲስኬይ ሙኡዚ'' ሙዖም ዔኤላ''ዛ፥ ዒዚ ዓሢ ማኣሪ ጌሊ ሙዖ ሙዓኒ ዴዔኔ።

³⁸ዬሱሴ ሙዖ ሙዓንዳሢኮ ቤርታ ኩጮ ማስቲባኣሢሮ ዬይ ዓሢ ዲቃቲ ሄርሼኔ።

³⁹ዬያሮ ዬሱሴ ዒዛም፦ «ዒንሢ ፔርሴ ዓሳ፥ ዒንሢኮ ዑሽኮ ዓንጎና ሙዖ ሙዎ ጋባዶናኮ ዙሎ'' ዛሎ'' ኮሺ'' ዒንሢ ጌኤሺ ማስካኔ፤ ዒንሢኮ ጋራ ጋዓንቴ ቡሪሢና ፑርቱሞና ኩሜያኬ።

⁴⁰ዒንሢ ሃይ ዔኤዮ ዓሳ፥ ዙሎ'' ማዤ ፆኦዛሢ ጋሮ ማዢባኣዓዳ?

⁴¹ዒንሢኮ ዑሽኮ ዓንጎና ሙዖ ጋባዶናይዳ ዓኣ ባኮ ማንቆ ዓሶም ዒንጉዋቴ፤ ዬካፓ ቢያ ባካ'' ዒንሢም ጌኤሺ ማዓንዳኔ።

⁴²«ዒንሢ ፔርሴ ዓሳ ዒንሢና ባዴዔ! ዓይጎሮ ጌዔቶ ፔቴ'' ዛሎ''ና ዲዮና ፃልቴናይዳፓ፤ ሃሣ ኮልፖና ዬያጉዴ ባኮይዳፓ ቤርቶ ዒንሢ ፆኦሲም ዒንጋያታዖ ፔቴ'' ዛሎ''ና ጋዓንቴ ፒዜ ዎጌና ፆኦሲ ናሽኪሢና ዒንሢ ሃሼ''ኔ፤ ዬያ ዒንሢ ማዻንዳያ ኮይሳኔ። ጋዓንቴ ዬያ ዒንጎ ባኮ ዒንሢ ሃሻ''ኒ ኮይሱዋሴ።

⁴³«ዒንሢ ፔርሴ ዓሳ ዒንሢና ባዴዔቴ! ዓይጎሮ ጌዔቶ ዓይሁዶኮ ዓሳ ቡኪንታ ቤዛ ቦንቺንታ ዖይቶይዳ ዴዓኒ ዒንሢ ኮዓኔ፤ ዬያጉዲ ቦኦኮ'' ቤዞይዳኣ ዓሲ ዒንሢ ቦንቾ ዔኤሊ''ሢ ዔኤላ''ንዳጉዲ ዒንሢ ኮዓኔ።

⁴⁴ዓሳ ዔሩዋዖ ጊዴና ዓኣዻ፥ ማላታባኣ ዱኡፒ[9] ዒንሢ ማላሢሮ ዒንሢና ባዴዔቴ» ጌዔኔ።

⁴⁵ሙሴ ዔርዜ ዎጎ ዔርዛዞንሢዳፓ ፔቴ'' ዬሱሴ ኮራ፦ «ዔርዛሢዮ! ሃይ ኔ ኑና ጫሽካንቴሞ!» ጌዔኔ።

⁴⁶ዬሱሴ ማሃዖ፦ «ዒንሢ ሙሴ ዔርዜ ዎጎ ዔርዛ ዓሳ! ዓሲ ዑሢዳ ዴኤሢ ኬዲ ዒንሢ ጌሣኔ፤ ዒንሢ ጋዓንቴ ዬኖ ኬዶ'' ኬኤላ''ናታዖ ካኣሙዋሴ።

⁴⁷ዬያጉዲ ዒንሢኮ ዓዶንሢ' ዎዼ፥ ፆኦሲ ማሊፆ ኬኤዛ ዓሶኮ ዱኡፖ ዒንሢ ፓልሚሲ ኮሻ''ሢሮ ዒንሢና ባዴዔ!

⁴⁸ዓካሪ ዒንሢኮ ዓዶንሢ' ዎዼ፥ ፆኦሲ ማሊፆ ኬኤዛ ዓሶ ዱኡፖ ኮሺ''ሶና ዔያቶኮ ፑርቶ ማዾ'' ኮሺ ማሂ ዒንሢ ዻዋኔ።

⁴⁹ዬያ ዒንሢኮ ፑርቶ ማዾ'' ፆኦሲ ዔሬሢሮ ፔ ዔራቶና ‹ታ ማሊፆ ኬኤዛዞንሢና ዳኪንቴዞንሢና ታ ዔያቶ ባንሢ ዳካንዳኔ፤ ፔቴ'' ፔቴ''ዞንሢ ዎዾንዶኔ፥ ዓቴ''ዞንሢ ሃሣ ዳውሶንዶኔ› ጌዔኔ።

⁵⁰ዬያሮ ሳዓ ማዢንቴሢዳፓ ዓርቃዖ ላኣሊንቴ ፆኦሲ ማሊፆ ኬኤዛ ዓሶ ሱጉፆ ዛሎ'' ሃያ ዎዶ'' ዓሳ ዖኦጪንታንዳኔ።

⁵¹ጎኔ ታ ዒንሢም ኬኤዛኔ፤ ዓኣቤኤሌይዳፓ ዓርቃዖ ፆኦሲም ዒንጎ ባኮ ዒንጊ ካኣሽኮ ቤዞና ጌኤዦ ማኣሮና ባኣኮ''ይዳ ዎዾና ዛካሪያሴ ሱጉፆ ዛሎ''ሮ ሃያ ዎዶ'' ዓሳ ዖኦጪንታንዳኔ» ጌዔኔ።

⁵²«ዒንሢ ዎጎ ዔርዛ ዓሳ ዒንሢና ባዴዔቴ! ጌኤዦ ማፃኣፖ ዓሳ ዔሩዋጉዲ ካሮ'' ዒንሢ ዎዼኔ፤ ዒንሢሮዋ ዒንሢ ዔሪባኣሴ፤ ሃሣ ዔራኒ ኮዓ ዓሶዋ ዒንሢ ላኣጌኔ።»

⁵³ዬሱሴ ዬኖ ቤዜሎፓ ዴንዳኒ ዔቃዛ ሙሴ ዔርዜ ዎጎ ዔርዛ ዓሶና ፔርሴ ዓሶና ዒዛ ዒፂ ማኪሢና ሚርጌ ዖኦጪሢያ ዓርቄኔ፤

⁵⁴ዬያ ዔያታ ማዼሢ ጌኤሲና ዒዛ ቡኡዳኒ ኮዓሢሮኬ።