Read maale ሉቃሴ 2 Bible Online

ሉቃሴ 2 - maale bible

ሉቃሴ 2

¹ዬኖ ዎዶ''ና ሮሜ ዓጮ''ይዳ ዓኣ ዴሮ'' ቢያ ፓይዳኒ፥ ሱ'ንፃ ዴሮ''ኮ ፃኣፒንታንዳጉዲ ሮሜ ካኣቲ ዓውጊስፆሴ ዓይሤኔ።

²ቤርታዺ ዴሮ'' ፓይዳኒ ሱ'ንፆ ፃኣፖና ዎዶ''ና ቄርኔዎሴ ጎዖሢ ሶኦሪያ ዓጮ'' ዎይሣያኬ።

³ዬያሮ ፔቴ'' ፔቴ'' ዓሳ ሱንፆ ፃኣፒሳኒ ፔኤኮ ዓጮ'' ካታሞ ካታሞ ዴንዳኔ።

⁴ዮሴፔ ጌሊላይዳ ዓኣ ናዚሬቴ ካታማ''ፓ ዔቂ ዪሁዳ ዓጮ''ይዳ ዓኣ ዳውቴ ካታሞ ጌይንታ ቤኤቴሌሄሜ ዴንዴኔ፤ ዓይጎሮ ጌዔቶ ዒዛኮ ዜርፃ ዳውቴ ፃጳፓ ማዔሢሮኬ።

⁵ዒዚ ፃኣፒንታኒ ዓኣዼሢያ ጎጳዺ ዓኣ፥ ዒዛኮ ዖኦጮዞ፥ ማይራሞና ዎላ''ኬ።

⁶ዔያታ ላምዖንሢ ቤኤቴሌሄሜ ካታሞይዳ ዓኣንቴ ማይራሞኮ ሾይፆ ኬላ'' ሄሌ''ም፥

⁷ዒኢካ ዒዞኮ ኮይሮ ናዓሢ ሾዓዖ ናይ ዓርቆ ቱርጫና ካንቄኔ፤ ሾኦጫ ዎርቃ ቤዛ ቤሲ ዔያታ ዴንቂባኣሢሮ ባይ ሞስካ፥ ባኣታ ሙዖ ሙዓ ጎንጋላ'' ናዓሢ ላይሤኔ።

⁸ዬኖ ዓጮ''ይዳ ካታሞኮ ዙላ፥ ቦኦሎ''ይዳ ቆልሞ ሄንቂ ሞኦሢዳ ዎርቃ ናይ ዓኣኔ።

⁹ዒማ''ና ዔያቶም ፆኦሲ ኪኢታንቻሢ ጴዼም፥ ፆኦሲኮ ቦንቾ ፖዓ ዔያቶ ዑፃ ፖዔሢሮ ሚርጌና ዔያታ ዒጊጪ ዲቃቴኔ፤

¹⁰ኪኢታንቻሢ ጋዓንቴ፦ «ሃይ ዒንሢ ዎይታይ? ዒጊጪፖቴ፤ ዴሬም ቢያ ዼኤፒ ዎዛ ማዓ ኮሺ ሃይሴ ታ ዒንሢም ኬኤዛንዳኔ፤

¹¹ዋይዙዋቴ! ሓኖ'' ዳውቴ ካታሞይዳ ዼኤሻ ዒንሢም ሾይንቴኔ፤ ዒዚያ ጎዳ ኪሪስቶሴኬ።

¹²ዬያኮ ማላታ ያዺ ማዓንዳኔ፦ ናይ ዓርቆ ቱርጫና ካንቂንቴ ናይ፥ ባይ ባርታይዳ ባኣታ ሙዖ ሙዓ ጎንጋላ'' ላሂ ዓኣንቴ ዒንሢ ዴንቃንዳኔ» ጌዔኔ።

¹³ዬማና ዔያታ ዔሩዋንቴ ሚርጌ ጫሪንቺ ኪኢታንቻ ኪኢታንቻሢና ዎላ'' ጴዻዖ ፆኦሲ ጋላቲሢና፦

¹⁴«ጫሪንጮይዳ ፆኦሲም ቦንቾ ማዖም፤ ሳዖይዳኣ ዒዚ ናሽካ ዓሶም ቢያ ኮሹሞ ማዖም» ጌዔኔ።

¹⁵ኪኢታንቾንሢ ዔያቶይዳፓ ዱማዺ ሌካ ጫሪንጮ ዴንዴ ዎዶ''ና ቆልሞ ሄንቃ ናኣታ'' ዎሊ ኮይላ''፦ «ዓካሪ ቤኤቴሌሄሜ ኑ ዴንዲ፥ ሃሢ ማዔ ባኮና ጎዳ ኑም ፔጋሲ ዻዌ ባኮ ኑ ዛጎም» ጌዔኔ።

¹⁶ዔያታ ዒማ''ና ዑኬና ዴንዳዖ ማይራሞና ዮሴፔና ዴንቄኔ፤ ሃሣ ናዖዋ ባኣቶ ባርታ ባኣታ ሙዖ ሙዓ ጎንጋላ'' ላሂ ዓኣንቴ ዴንቄኔ።

¹⁷ናዓሢ ዔያታ ዛጌሢኮ ጊንፃ ኪኢታንቻሢ ዒዛ ዛሎ'' ዔያቶም ኬኤዜሢ ዔያታ ማይራሞና ዮሴፔናም ኬኤዜኔ።

¹⁸ቆልሞ ናኣታ'' ኬኤዜ ባኮ ዋይዜ ዓሳ ቢያ ዲቃቲ ሄርሼኔ።

¹⁹ማይራማ ጋዓንቴ ዬያ ቢያ ባኮ ፔ ዒና'' ዓርቂ ማላኔ።

²⁰ቆልሞ ናኣታ'' ቢያ ባካ ኪኢታንቻሢ ዔያቶም ኬኤዜሢጉዲ ማዔም ዔያታ ዛጌሢና ዋይዜሢናሮ ፆኦሲ ቦንቺ ቦንቺ ሃሣ ጋላቲ ጋላቲ ዔያታ ሙኬ ቤዞ ማዒ ዴንዴኔ።

²¹ናዓ ሾይንቴስካፓ ሳሊ'' ኬሊ''ኮ ጊንፃ ናዖኮ ዓቲንቶ ቤርቶ ቲቂፆ ዎጎ ኬሎ''ና ሱ'ንፃ ዒዛኮ «ዬሱሴ» ጌይንቴኔ። ዬይያ፦ ሓጊ ዒንዳ ዒዛ ጎጳዹዋንቴ ቤርታ ኪኢታንቻሢ ዒዛም ጌሤ ሱ'ንፆኬ።

²²ሙሴ ዔርዜ ዎጎ ጎይፆና ዑፆ ጌኤሺፆ ዎጋ'' ጋፓ ኬላ'' ሄሌ''ሢሮ ናዓሢ ጎዳም ዔያታ ሺኢሻኒ ዔኪ ዬሩሳላሜ ዴንዴኔ።

²³ዬያ ዔያታ ዓይጎሮ ማዼይ ጌዔቶ ጎዳኮ ዎጎይዳ፦ «ዓቲንቄ ማዔ ቶይዲ ናይ ቢያ ጎዳም ዒንጊንቲ ዱማዼያ ማዖንጎ» ጌይንቲ ፃኣፒንቴሢሮኬ።

²⁴ዬያጉዲ ሃሣ ጎዳኮ ዎጎይዳ፦ «ላምዖ ኪሬ፤ ማዒባኣቴ ላምዖ ዶኦሌ'' ናይ ሚቺ ዒንጎ ካኣዦም ዒንጋንዳያ ኮይሳኔ» ጋዓሢሮኬ።

²⁵ዒማ''ና ዬሩሳላሜይዳ ሲሞኦኔ ጎዖ ፔቴ'' ዓሲስኬያ ዓኣኔ፤ ዒዚያ ፂሎ'' ሃሣ ፆኦሲ ዒጊጫ ዓሲኬ፤ ዒስራዔኤሌኮዋ ሃጊ ማዓንዳ ዻቂንቶ ዎዞ ካፓያ ሃሣ ዓያና ጌኤሺያ ዒዛና ዓኣያኬ።

²⁶ዒዚ ጎዳፓ ማዔ፥ ሜሲሔ ዛጉዋዖ ሃይቂንዱዋኣሢ ዓያና ጌኤሺ ዒዛም ቤርታ ዔርዜያኬ።

²⁷ዬኖ ኬሎ'' ዓያና ጌኤሺ ዒዛ ዔቂሴም ጌኤዦ ማኣሪ ዒ ዓኣዼኔ፤ ዒማ''ና ዮሴፔና ማይራሞና ካኣዦ ዎጎ ኩንሣኒ ናዓሢ ዔኪ ጌኤዦ ማኣሪ ጌሌኔ።

²⁸ዒማ''ና ሲሞኦኔ ናዓሢ ኮንቂ ፆኦሲ ጋላቲሢና፦

²⁹«ታ ጎዳሢዮ! ሓይሾ፥ ኔ ታኣም ኬኤዜ ሃጊ ማዓንዳ ዎዞ ቃኣላ'' ኩሜኔ፤ ዓካሪ ሃሢ ታና ኔኤኮ ማዻሢ ኮሺና ዔኬ፤

³⁰ታኣኒ ታ ዓኣፒና ዓሶም ቢያ ኔ ጊኢጊሼ፥ ዼኤሻሢ ዛጌኔ፤

³¹

³²ዒዚ ሜሌ'' ዴሮ''ም ጎኑሞ ፔጋሲ ዻዋ ፖዒ ማዓንዳኔ፤ ኔኤኮ ዴሮ'' ዒስራዔኤሌ ዓሶዋ ዒ ቦንቺሳንዳኔ» ጌዔኔ።

³³ዮሴፔና ማይራሞና ናዓሢ ዛሎ'' ጌይንቴ ባኮ ቢያና ዲቃቲ ሄርሼኔ።

³⁴ሲሞኦኔ ዔያቶ ዓንጄሢኮ ጊንፃ ዱማና ናዓሢኮ ዒንዶ ማይራሞም፦ «ሃይ ናዓሢ ዒስራዔኤሌይዳ ሚርጌ ዓሶኮ ባይሲንታ፤ ሃሣ ሚርጌ ዓሶኮ ጋዓንቴ ዻቂንታ ካራ ማዓንዳኔ፤ ዒዚ ሚርጌሢ ዒዛ ጎናሲ ዔኩዋ ማላታ ማዓንዳኔ።

³⁵ዬያና ሚርጌ ዓሶኮ ዒኖይዳ ዓኣሺንቴ ማሊፃ ፔጋዺ ጴዻንዳኔ፤ ዖዪሢያ ኔኤኮ ዒኖ'' ጬንቻ ዓፓሮጉዲ ቲቃንዳኔ» ጌዔኔ።

³⁶ዬያጉዲ ሃሣ ዬኖ ዎዶ''ና ዓሴኤሬ ዜርፆይዳፓ ማዔ፥ ፓኑዔኤሌ ጎዖሢኮ ናዎ፥ ሃኣና'' ጌይንታ ፆኦሲ ማሊሢ ኬኤዛስኬና ዓኣኔ። ዒዛ ሚርጌ ጋርቼ ላኣሊኬ፤ ዓኒና ዎላ'' ዒዛ ላንካይ ሌዔ ዴዔስካፓ ዓኒ ዒዞኮ ሃይቄኔ፤

³⁷ዬካፓ ሌዓ ዒዞኮ ሳሊ''ታሚ'' ዖይዶ ማዓንዳያ ሄላ''ንዳኣና ጌኤዦ ማኣራፓ ዱማዹዋዖ ሙኡዚ'' ሓሺ'' ሺኢቆ ሺኢጲሢ ሺኢቂ ሺኢቂ ሮኦሪና ዋንቴና ቢያ ፆኦሲም ማዻያኬ።

³⁸ዬኖና ዒዛ ሙኪ ፆኦሲ ጋላቲሢ ዓርቄኔ፤ ናዓሢ ዛሎ''ዋ ዬሩሳላሜኮ ዻቂንቶ ሃጊ ማዓንዳ ዎዛ ጌሢ ካፓዞንሢም ቢያ ኬኤዜኔ።

³⁹ጎዳኮ ዎጎይዳ ዓይሢንቴ ዎጎ ቢያ ኩንሤስካፓ ጌሊላይዳ ዓኣ ዔያቶኮ ናንጎ ካታሞ ናዚሬቴ ዔያታ ማዒ ዴንዴኔ።

⁴⁰ናዓሢያ ዑጊ ዶዲ ዶዲ ዓኣዼኔ፤ ዒናዺያ ዶዴኔ፤ ሓሣ ፆኦሲ ዒዛ ዓንጄኔ።

⁴¹ዮሴፔና ማይራሞና ሌዓ ሌዓ ዑሣ ዓኣዺፆ ቦንቾ ኬሎ''ሮ ዬሩሳላሜ ዓኣዻያኬ።

⁴²ዬሱሴኮ ሌዓ ታጶ ላምዖ ማዔም ቤርታ ዔርቴ ጎይፆጉዴያ ዬኖ ቦንቾ ቦንቻኒ ዔያታ ዓኣዼኔ።

⁴³ቦንቾ ኬላ'' ጋፔም ዔያታ ማኣሪ ማዓዛ ዬሱሴ ዬሩሳላሜይዳ ዓቴ''ኔ፤ ዮሴፔና ማይራሞና ጋዓንቴ ዒዚ ዒኢካ ዓቴ''ሢ ዔሪባኣሴ።

⁴⁴ጎይፆ ዓኣዻ ዓሶና ዒዚያ ዎላ'' ዓኣያ ዔያቶም ማሌሢሮ ፔቴ'' ኬሊ'' ጎይሢ ጉቤ ዔያታ ዓኣዻዖ ዔያቶኮ ዒጊኖና ፔ ላጎና ኮይላ'' ኮዒሢ ዒዛ ዓርቄኔ።

⁴⁵ጋዓንቴ ዔያታ ዒዛ ዴንቃኒ ዳንዳዒባኣሢሮ ዒዛ ኮዒ ኮዒ ጊንሣ ዬሩሳላሜ ማዔኔ።

⁴⁶ሓይሦ ኬሊ''ኮ ጊንፃፓ ጌኤዦ ማኣራ ዔያታ ዒዛ ዴንቄኔ፤ ዒዚያ ዒኢካ ዎጎ ዔራ ዓሶ ባኣካ'' ዴዒ ዔያቶሲ ዋይዚ ሃሣ ዖኦጪሢያ ዖኦጫኔ።

⁴⁷ዒዛሲ ዋይዛ ዓሳ ቢያ ዒዚ ማሊ ጶቂሣ ጶቂሢፆና ሓሣ ዒ ማሃ ማሂፆና ዛሎ''ሮ ዲቃቲ ሄርሻኔ።

⁴⁸ዮሴፔና ማይራሞና ጌኤዦ ማኣሮይዳ ዒዛ ዴንቂ ዲቃቲ ሄርሻዖ ዒንዴላ ዒዛ ኮራ፦ «ታ ናዓሢዮ፥ ዓይጎሮ ኔ ኑና ሃያይዴይ? ኔኤኮ ዓዶና ታኣና ሜታዺ ኔና ኑ ኮዓንቴቱዋይ!» ጌዔኔ።

⁴⁹ዬሱሴ ማሃዖ፦ «ዓይጎሮ ዒንሢ ታና ኮዔይ? ታኣኒ ታ ዓዶ ማኣራ ማዓንዳያ ኮይሳሢ ዒንሢ ዎንዴ ዔሩዋያዳ?» ጌዔኔ።

⁵⁰ዔያቶም ጋዓንቴ ዒዚ ዬይ ጌዔ ባካ ዔርቲባኣሴ።

⁵¹ዬካፓ ዬሱሴ ዔያቶና ዎላ'' ናዚሬቴ ዴንዴኔ፤ ዒኢካ ዔያቶም ዒ ዓይሢንታኔ፤ ያዺ ማዓዛ ዒንዳ ዬያ ባኮ ቢያ ፔ ዒና ዓርቃኔ።

⁵²ዬሱሴ ፆኦሲንታ ዓሲንታ ዎዛሳያ ማዔኔ፤ ሓሣ ዒናዺ ዔጶናኣ ዲጪ ዲጪ ዓኣዼኔ።