Read maale ሉቃሴ 20 Bible Online

ሉቃሴ 20 - maale bible

ሉቃሴ 20

¹ፔቴ'' ኬሊ'' ዬሱሴ ጌኤዦ ማኣራ ጴዺ ዴሮ'' ዔርዚ ዔርዚ ሃሣ ኮዦ ሃይሶዋ ኬኤዛንቴ ቄኤሶኮ ሱኡጎና ሙሴ ዔርዜ ዎጎ ዔርዛ ዓሶና ሃሣ ጪሞና ዒዛ ኮይላ'' ሙካዖ፦

²«ሂንዳ ኑም ኬኤዜ! ሃያ ባኮ ኔ ማዻሢ ዓይጎ ቢታንቶናዳይ? ሃሣ ጊንሣ ሃያ ኔ ማዻንዳጉዲ ቢታንቶ ኔኤም ዒንጌሢ ዖናዳይ?» ጌዒ ዒዛ ዖኦጬኔ።

³ዬሱሴ ማሃዖ፦ «ታ ዒንሢ ፔቴ'' ባኣዚ'' ዖኦጫንዳኔ፤ ሂንዳ ዒንሢ ታኣም ማሁዋቴ፤

⁴ዮሓኒሴኮ ዋኣፆና ማስኪፃ ፆኦሲዳፓሞ ዓሲዳፓዳይ?» ጌዔኔ።

⁵ዔያታ ዎሊ ኮይላ''፦ « ‹ፆኦሲዳፓኬ› ኑ ጌዔቶ፥ ‹ሂዳዖ ዒንሢ ዓይጎሮ ጉሙርቂ ጎናሲ ዔኪባኣይ?› ዒ ጋዓንዳኔ።

⁶‹ዓሲዳፓኬ› ኑ ጌዔቶ ሃሣ ዓሳ ኑና ሹቻ ዹዓንዳኔ፤ ዓይጎሮ ጌዔቶ ቢያሢ ዮሓኒሴ ፆኦሲ ማሊሢ ኬኤዛያ ማዔሢ ጉሙርቃሢሮኬ» ጌዔኔ።

⁷ዬያሮ፦ «ዓንካፓ ማዔቴያ ኑ ዔሩዋሴ» ጌይ ዒዛም ዔያታ ማሄኔ።

⁸ዬሱሴያ፦ «ሂዴቶ ታኣኒያ ዓይጎ ቢታንቶና ሃያ ባኮ ማዻቶ ዒንሢም ኬኤዛዓኬ» ጌዔኔ።

⁹ዬካፓ ዬሱሴ ሃያ ኮኦኮንሦ ዴሮ''ም ኬኤዜኔ፦ «ፔቴ'' ዓሲ ዎይኔ ጌይንታ ባኣዚ'' ቱካ''ዖ ጎሽካ ዓሲም ጎሽኪ ጎሽኪ ካፓንዳጉዲ ዒንጊ፥ ሜሌ'' ሃኬ ዓጪ ዴንዲ ማዑዋዖ ሚርጌ ዎዴ ዴዔኔ።

¹⁰ዬና ካፃዛ ዎይኔሎኮ ዓዳሢ ዓኣፖይዳፓ ዒዛ ሄላ''ዞንሢ ዔካንዳጉዲ ፔቴ'' ማዻስኬያ ጎዦ ጎሽካዞንሢ ኮይላ'' ዳኬኔ፤ ጎዦ ጎሽካዞንሢ ጋዓንቴ ማዻ ዓሢ ጳርቂ ኩቺ ጉሪ ማሂ ዳኬኔ።

¹¹ዬያጉዲ ሜሌ'' ማዻስኬያ ዳካዛ ዬያኣ ሃሣ ዔያታ ጳርቂ፥ ቦርሲሲ ኩቺ ጉሪ ማሂ ዳኬኔ፤

¹²ሃሣ ሃይሣሳ ማዻ ዓሲ ዳካዛ ዬያ ሃሣ ጳርቂ ዑፆ ኪፃሴስካፓ ጎዦኮ ቲኢፆ ዙላ'' ኬኤሬኔ።

¹³ዬካፓ ዎይኔሎኮ ዓዳሢ ‹ዓካሪ ታ ዎዳ''ንዳይ? ታኣኮ ታ ናሽካ ናዓሢ ዳካንዳኔ! ዒዛ ጎዖንቴ ዔያታ ቦንቻንዳያ ናንዳኔ› ጌዔኔ።

¹⁴ጋዓንቴ ጎሽካዞንሢ ዒዛኮ ናዓሢ ዛጌ ዎዶ''ና ዎሊ ኮይላ'' ‹ሃይ ዒዛ ዻካላንዳሢኬ፤ ሃኒ ሙኩዋቴ ኑ ዒዛ ዎዾም፤ ቤዛኣ ኑም ማዓንዳኔ› ጌዔኔ።

¹⁵ዬያሮ ናዓሢ ዔያታ ዎይኖ ቱኮ''ና ቤዞኮ ቲኢፆ ዙላ'' ኬሲ'' ዎዼኔ። «ዓካሪ ያዺ ማዔቶ ዎይኔሎኮ ዓዳሢ ዬንሢ ጎሽካዞንሢ ዎዳ''ንዳያ ዒንሢም ማላይ?

¹⁶ዬኖ ዎይኔሎኮ ዓዳሢ ፔኤሮ ዬዓንዳኔ፤ ጎሽካዞንሢያ ዎዻንዳኔ፤ ዬኖ ዎይኖ ሜሌ'' ጎሽካ ዓሲም ዒንጋንዳኔ» ጌዔኔ። ዓሳ ዬያ ዋይዛዖ፦ «ዬያጉዴ ባኣዚ'' ማሊ ማዖፓ!» ጌዔኔ።

¹⁷ዬሱሴ ጋዓንቴ ዔያቶ ባንሢ ዛጋዖ፦ «ዓካሪ ‹ማኣሮ ማዣ ዓሳ ቦሂ ሃሼ'' ሹጫሢ ማኣሮኮ ሄላ''ሢ ማዔኔ› ጌይንቲ ፃኣፒንቴሢ ዓይጎ ዔርዛይ?

¹⁸ዬያ ሹጫሢዳ ሎኦማሢ ቢያ ሜቃንዳኔ፤ ሃሣ ዒዚ ዑፃ ኬዳ''ሢያ ቢያ ዳኣፂንታንዳኔ» ጌዔኔ።

¹⁹ሙሴ ዔርዜ ዎጎ ዔርዛ ዓሶና ቄኤሶኮ ሱኡጎና ዬያ ኮኦኪንሦ ዔያቶይዳ ዒ ኬኤዜሢ ዔራዖ ዬማና ዒዛ ዓርቃኒ ማሌኔ፤ ጋዓንቴ ዴሮ'' ዔያታ ዒጊጬኔ።

²⁰ዬያሮ ዬሱሴ ዔያታ ዓርቃኒ ዔያቶም ጊኢጋ ኬሊ'' ካፔኔ። ዓጮ'' ዎይሣሢ ቢታንቶና ዒዛይዳ ዎጋንዳጉዲ ዓኣሢ ዒዛ ዒንጊሳኒ ዳንዳዓ ፑርታ ባኣዚ'' ዒዛይዳፓ ዴንቃኒ ኮዓዖ ፒዜ ዓሲ ማሊ ዒ ጌስታ ጌኤዞና ዒዛ ቡኡዲ ዓራቃንዳ፥ ሙሪ ዓሲ ዒዛ ኮይላ'' ዳኬኔ።

²¹ዬንሢ ዓሶንሢ ዬሱሴ ኮራ ሙኪ፦ «ዔርዛሢዮ! ኔኤኒ ኬኤዛሢና ዔርዛሢ ጎኑሞ ማዔሢ ኑ ዔራኔ፤ ፆኦሲ ጎይሢ ጎኔና ኔ ዔርዛፓዓቴም ዖኦማኣ ኔ ሉኡዙሞና ዱማሲ ማኣዲ'' ጌስቱዋሴ።

²²ሂንዳ ኑም ኬኤዜ! ኑኡኮ ዎጎ ጎይፆና ሮሜ ዓጮ'' ካኣቲም ጊኢራ ጪጋኒ ዓይሢንቴሞ ዓይሢንቲባኣይ?» ጌዒ ዒዛ ዖኦጬኔ።

²³ዬሱሴ ጋዓንቴ ዔያቶኮ ጌኖ ማሊፆ ዔራዖ፦

²⁴«ሂንዳ ታና ሚኢሾ ዻውዋቴ፤ ሃኖ' ሚኢሾይዳ ዓኣ ዓውካሮና ፃኣፒንቴ ሱ'ንፆና ዖኦሮዳይ?» ጋዓዛ፥ ዔያታ፦ «ሮሜ ካኣቲሲኬ» ጌዔኔ።

²⁵ዬሱሴ ማሃዖ፦ «ያዺ ማዔቶ ካኣቲሲ ካኣቲም፥ ፆኦሲሲ ፆኦሲም ዒንጉዋቴ» ጌዔኔ።

²⁶ዔያታ ዴሮ'' ቤርቶይዳ ጌኤዞና ዒዛ ፒሪ ዓርቃኒ ዳንዳዒባኣሴ፤ ዬያሮ ዒ ማሄ ማሂፆና ዲቃቲ ሄርሻዖ ዚቲዮ ጌዔኔ።

²⁷«ሃይቄ ዓሲ ዔቂንዱዋሴ» ጋዓ ሳዶቄ ዓሳ ዬሱሴ ኮራ ሙካዖ፦

²⁸«ዔርዛሢዮ! ሙሴ ‹ፔቴ'' ዓሲ ናይ ሾውዋዖ ማቾይዳፓ ሃይቢና ዱማዼቶ ጌኤዛሢ ላኣሌሎ ዔኪ፥ ናይ ሾይ ሃይቄሢም ዜርሢ ጌሦንጎ› ጌዒ ፃኣፔኔ።

²⁹ዓካሪ ላንካይ ዎሊኮ ጌርሲንሢ ማዓይ ዓኣንቴ፥ ቢያሢኮ ቶይዳሢ ላኣሊ ዔኪ ናይ ሾውዋዖ ሃይቄኔ።

³⁰ዒዛ ሄሊ''ሴ ጌኤዛሢ ዬኖ ላኣሌሎ ዔኬኔ፤

³¹ሃሣ ሃይሣሳሢያ ዔኬኔ፤ ዬያይዴ ጎይሣ ላንኮንሢ ቢያ ዒዞ ዔካዖ ናይ ሾውዋዖ ሃይቄኔ።

³²ቢያሢኮ ጊንፃ ዬና ላኣሌላ ሃይቄኔ።

³³ዓካሪ ላንካዎንሢ ቢያ ፔ ዎዶ''ና ዎዶ''ና ቢያ ዒዞ ዔኬያታሢሮ፥ ሃይቄ ዓሳ ዔቃ ዎዶ''ና ዎያኮ ዒዛ ማቾ ማዓንዳይ?» ጌዒ ዒዛ ዖኦጬኔ።

³⁴ዬሱሴ፦ «ሃያ ዓጮ ዓሳ ዔካኔ፥ ሎዓኔ፤

³⁵ሃይቢዳፓ ዔቂ፥ ሙካ ዓጮ''ይዳ ናንጋኒ ኮይሳ ዓሳ ጋዓንቴ ዔኩዋሴ፥ ሎዑዋሴ።

³⁶ዓይጎሮ ጌዔቶ ፆኦሲ ኪኢታንቾጉዲ ማዓንዳሢሮ ሃይቁዋሴ፤ ሃይቢዳፓ ዔያታ ዔቄሢሮ ፆኦሲ ናይኬ።

³⁷ሃይቦ''ይዳፓ ዔቃንዳ ዓሶ ዛሎ'' ጋዓንቴ ሙሴ ካዮ ባኣኮ''ይዳ ዔኤቴ ታሞ ዛሎ'' ኬኤዜ ሃይሶይዳ ፔጋሲ ዬያ ኬኤዜኔ፤ ዬኖ ሃይሶይዳ ሙሴ ፆኦሲ፦ ‹ዓብራሃሜ ፆኦሲ፥ ዪሳኣቄ ፆኦሲ፥ ያይቆኦቤ ፆኦሲኬ› ጌዒ ኬኤዜኔ።

³⁸ፆኦሲ ሼምፖና ናንጊና ናንጋ ዓሶ ፆኦሲ፥ ሓይቄቶዋ ናንጊና ናንጋ ዓሶ ፆኦሲኬ፤ ዬያሮ ቢያሢ ዒዛም ሼምፔና ናንጋኔ» ጌዒ ዔያቶም ማሄኔ።

³⁹ሙሴ ዔርዜ ዎጎ ዔርዛዞንሢዳፓ ፔቴ'' ፔቴ''ዞንሢ፦ «ዔርዛሢዮ! ኮሺ ባኣዚ'' ኔ ኬኤዜኔ!» ጌዔኔ።

⁴⁰ዬካፓ ማይ ዬሱሴ ጫርቂ ዖኦጬ ዓሲያ ባኣሴ።

⁴¹ዬካፓ ዬሱሴ፦ «ዎይቲ ሜሲሔ ዳውቴ ናይኬ ዔያታ ጋዓይ?

⁴²ዳውቴ ፔ ቶኦኪና ዓይኑሞ ማፃኣፖይዳ፦ ‹ፆኦሲ ታ ጎዳሢም (ሜሲሔም) ኔኤኮ ሞርኮ ኔ ቢታንቶ ዴማ'' ታ ማሃንዳያ ሄላ''ንዳኣና ታኣኮ ሚዛቆ ዛላ'' ዴዔ ዒዛም ጌዔኔ› ጋዓኔ።

⁴³

⁴⁴«ዓካሪ ዳውቴ ፔ ቶኦኪና ጎዳ ጌዒ ዒዛ ዔኤሌ''ቶ ሜሲሔ ዳውቴኮ ዎይቲ ናይ ማዓኒ ዳንዳዓይ?» ዔያቶም ጌዔኔ።

⁴⁵ዴራ'' ቢያ ዒዛሲ ዋይዛ ጎይሣ ዓኣንቴ ዬሱሴ ጊንፆ ሃንታዞንሢ ኮራ፦

⁴⁶«ዖዶሲ ማኣዖ ማኣዒ ሴካ ሃንጋ ጌዒ ሃንታኒ፥ ቦኦካ ቤሲዳ ቦንቾ ዔኤሊ''ሢ ዔኤሊ''ንታኒ፥ ዓይሁዶ ዓሶኮ ቡኪንቶ ቤዛ ቦንቺንታ ዖይታ፤ ሙኡዚ'' ሙዖ ቤስካ ቦንቺንታ ቤሲዳ ዴዓኒ ኮዓ ሙሴ ዔርዜ ዎጎ ዔርዛዞንሢዳፓ ዒንሢና ካፑዋቴ።

⁴⁷ዔያታ ዓሲ ቤርቲዳ ጴዻኒ ዖዶሲ ሺኢቆ ሺኢጲሢና ጌሺ ጌሺ ዓኒንሢ ሃይቄ ላኣሎኮ ማኣሮ ማንቂሳኔ፤ ዬያሮ ዔያቶይዳ ዑሣ ዓኣዼ ፑርታ ዎጌ ዎጊንታንዳኔ» ጌዔኔ።