Read maale ሉቃሴ 21 Bible Online

ሉቃሴ 21 - maale bible

ሉቃሴ 21

¹ዬሱሴ ዼ'ግ ጌዒ ዛጋንቴ ዖርጎጮ ዓሳ ፆኦሲም ዒንጎ ባኮ፥ ሳኣፂኖ ጋራ ዓጋንቴ ዴንቄኔ።

²ዬያጉዲ ሓሣ ፔቴ'' ዜኤሪንዶስኬና ዬኖ ዎዶ'' ሚኢሾና ላምዖ ሲኪና ማዓያ ሳኣፂኖ ጋራ ዓጋንቴ ዒ ዴንቄኔ።

³ዒማ''ና ዬሱሴ፦ «ጎኔ ታ ዒንሢም ጋዓኔ፤ ሃና፥ ዜኤሮይንዶ ማንቄላ ቢያፓ ዑሣ ዓኣዼ ባሼ ዒንጌኔ።

⁴ዓይጎሮ ጌዔቶ ዔያታ ዒንጌሢ ዔያቶኮ ዓኣ ባካፓ ዺቢ ዑሣ ዓኣዼሢኬ፤ ዒዛ ጋዓንቴ ማንቆታዖ ፔቴ''ታዖ ዒዞም ዓይሱዋዖ ዒዞኮ ዓኣ ባኮማ ጋፒ ዒንጌኔ» ጌዔኔ።

⁵ፔቴ'' ፔቴ'' ዓሳ፦ «ሃይ ጌኤዦ ማኣራ ሚዛጲ ሹቺና ሃሣ ፆኦሲም ዒንጊንቴ ዒንጊፆና ሚዛጲሲ ኮሾ''ናያኬ» ጌዒ ጌዒ ዎላ'' ጌስታንቴ፥

⁶ዬሱሴ፦ «ሃይ ዒንሢ ዛጋሢ ቢያ፥ ሹጫ ሹጮይዳ ኬልቂንቲ ዓቲንዱዋ ዎዴ ሙካንዳኔ፤ ሃይ ሹጫ ቢያ ፔቴ'' ዓቢና ዶዓንዳኔ» ጌዔኔ።

⁷ዔያታኣ፦ «ዔርዛሢዮ! ዬይ ማዓንዳሢ ዓይዲዳይ? ዬይ ያዺ ማዓንዳ ዎዳ'' ዑኬሢ ኑ ዔራንዳ ማላታ'' ዓይጌንዴዳይ?» ጌይ ዒዛ ዖኦጬኔ።

⁸ዬሱሴ፦ «ዒንሢ ዻቢንቱዋጉዲ ዒንሢና ዔሩዋቴ፤ ሚርጌሢ ‹ታኣኒ ኪሪስቶሴኬ! ሃይሾ ዎዳ'' ዑኬኔ!› ጌዒ ጌዒ ታ ሱንፆና ሙካንዳኔ፤ ዔያቶ ጊንፆ ዓኣዺፖቴ።

⁹ዖልዚና ዴሬኮ ዋይዚ ዒፂሢና ዛላ ዒንሢ ዋይዜ ዎዶ''ና ዲቃቲፖቴ፤ ቤርታዺ ዬይ ቢያ ያዺ ማዓንዳያ ኮይሳኔ፤ ማዔቶዋ ጋፒንፃ ዑኬ ማዓዓኬ» ጌዒ ዔያቶም ማሄኔ።

¹⁰ዬካፓ ሃሣ ዬሱሴ፦ «ዴራ'' ዴሮ''፥ ካኣታ'' ካኣቶ'' ዖላንዳኔ።

¹¹ዱማ ዱማ ቤሲዳ ዶዲ፥ ዒጊቻ ሳዓ ዓጊፂሢና ሉማና ሃሣ ዶርዓኣ ኬስካንዳኔ። ሃሣ ዒጊቻ ባኣዚ''ና ዼኤፒ ዼኤፒ ማላታ ጫሪንጮይዳ ጴዻንዳኔ።

¹²ጋዓንቴ ዬይ ቢያ ማዓንዳሢኮ ቤርታ ዓሳ ዒንሢ ዓርቃንዳኔ፤ ዒፂ ሃሣ ዒንሢ ዳውሶንዶኔ፤ ዓይሁዶ ዓሶኮ ቡኪንቶ ቤዞና ቱኡዞ ማኣሮናም ዓኣሢ ዒንሢ ዒንጎንዶኔ፤ ታ ሱንፆሮ ጌዒ ካኣቶ'' ቤርቶ ሃሣ ዎይሣ ዓሶ ቤርቶ ዔኪ ዒንሢ ዓኣዾንዶኔ።

¹³ዬይያ ታ ሱንፆ ዛሎ'' ዒንሢ ማርካታኒ ዒንሢም ኮሺ ዎዴ ማዓንዳኔ።

¹⁴ዬያሮ ዒንሢ ፑርቲሴ ዓሲጉዲ ዖኦጪንታ ባኮኮ ዒንሢ ማሃንዳ ባኮሮ ሜታዻንዳያ ኮይሱዋኣሢ ቤርታዺ ዔሩዋቴ።

¹⁵ዓይጎሮ ጌዔቶ ዒንሢኮ ሞርኮይዳፓ ዖኦኒያ ዒንሢ ባሻኒና ማካኒ ዳንዳዑዋ ጌስቶንዶ ጌኤሲና ዔራቶና ታ ዒንሢም ዒንጋንዳኔ።

¹⁶ዒንሢኮ ሾዔ ዓሶና ጌርሲንሢና ዒንሢኮ ዒጊኖና ላጎና ዓቱዋዖ ዓኣሢ ዒንሢ ዬያ ባኮም ዒንጋንዳኔ፤ ዒንሢዳፓ ፔቴ'' ፔቴ''ሢ ሃይቂያ ሃይቃንዳኔ።

¹⁷ታ ሱንፆሮ ጌዒ ዓሲ ቢያና ዒፂንቴያ ዒንሢ ማዓንዳኔ።

¹⁸ጋዓንቴ ዒንሢኮ ቶኦኮ'' ጋፓናፓ ፔቴ''ታዖ ባይቃዓኬ።

¹⁹ዒንሢ ጊቢ'' ዳንዳዒ ሼምፓሢ ዒንሢኮ ዒንሢ ዓውሳንዳኔ» ጌዔኔ።

²⁰ዬካፓ ሃሣ ዬሱሴ፦ «ዒዞ ሞርኮኮ ዖላ ዓሶና ዬሩሳላሜ ማንጊንቲ ዓኣንቴ ዒንሢ ዛጌ ዎዶ''ና ባይቃኒ ዒዛ ዑኬሢ ዔሩዋቴ፤

²¹ዒማ''ና ዪሁዳ ዓጮ''ይዳ ዓኣዞንሢ ሌካ ዹኮ'' ባንሢ ዓኣሺንቶንጎ፤ ካታማ ዓኣዞንሢ ዬካፓ ኬስኮንጎ፤ ካታሞኮ ዙላ'' ዓኣዞንሢያ ሃንጋ ካታሞ ጌሎፓ።

²²ዓይጎሮ ጌዔቶ ዬኖ ባይሲንቴሎ ዛሎ'' ፃኣፒንቴ ሎንሣ ኩማንዳጉዲ፥ ዬና ኮሜ ዔኪሢና ሜቶ ዒንጊሢ ዎዴ ማዓንዳኔ።

²³ዬኖ ዎዶ''ና ጎጶይንዶና ናኣቶ'' ዓኣሎ ዻንሢሣዞንሢም ባዴዔ! ዓይጎሮ ጌዔቶ ዬኖ ዓጬ''ሎይዳ ዼኤፒ ሜቶ ዎዴ ማዓንዳኔ፥ ዴሮ'' ዑፆይዳኣ ፆኦሲ ጎሪ''ንቲ ሙካንዳኔ።

²⁴ዔያቶይዳፓ ሚርጌሢ ዖልዚና ሃይቃንዳኔ፤ ዓቴ'' ዓሳ ዲዒንቲ ዱማ ዱማ ዓጪ ዔኪ ዓኣዺንታንዳኔ፤ ሜሌ'' ዴራ ዑፃ ማዒ ዎይሣ ዎዳ'' ጋፓንዳያ ሄላ''ንዳኣና ዬሩሳላሜ ካታሞ ዔያታ ሄ'ርቂ ዎይሣያ ማዓንዳኔ» ጌዔኔ።

²⁵ሄሊ''ሳዖ ዬሱሴ፦ «ዓቦ''ና ዓጊኖናይዳ ሃሣ ዦኦጋሢዳ ዲቃሣ ማላታ ጴዻንዳኔ፤ ሳዖይዳ ዓኣ ዴራ'' ቢያ ባዞ''ና ባዞ''ይዳ ዔቃ ዲቃሣ ጉዳሢ ዢባሮ ዑኡዞፓ ዔቄያና ዒጊጪ ሜታዻንዳኔ።

²⁶ሳዖይዳ ሙካ ባኮ ካፒሢና ዓሳ ዒጊቹሞና ሂርጊ ሜታዻንዳኔ፤ ዓይጎሮ ጌዔቶ ዬኖ ዎዶ''ና ጫሪንጫ ዎልቄና ዓኣ ባካ ዓጊፃንዳኔ፤

²⁷ዬካፓ ዓሲኮ ናዓሢ ዼኤፒ ዎልቄና ሃሣ ቦንቺንቲ ሻኣሮ ዑፃ ማዒ ሙኪ ጴዻንዳኔ።

²⁸ዬይ ቢያ ማዒፆ ዓርቄ ዎዶ''ና ዒንሢኮ ዻቂንታ ዑኬሢሮ ዼ'ግ ጌዒ ሌካ ዛጉዋቴ» ጌዔኔ።

²⁹ዬካፓ ዬሱሴ ሂዚ ጌዒ ኮኦኪንሢ ዔያቶም ኬኤዜኔ፦ «ቤሌሶ ሚፆንታ ሃንጎ ሚፆዋ ኮሺ'' ዒና ዔኪ ዛጉዋቴ፤

³⁰ዔያቶኮ ዒላዣ ፂላንቴ ዒንሢ ዛጌ ዎዶ''ና ዖጎሢ ዑኬሢ ዒንሢ ዔራኔ።

³¹ዬያ ጎይፆ ዬይ ቢያ ባካ ማዒፆ ዓርቃሢ ዒንሢ ዛጌ ዎዶ''ና ፆኦሲ ካኣቱማ ሙካኒ ዑኬሢ ዔሩዋቴ።

³²«ጎኔ ታ ዒንሢም ጋዓኔ፤ ዬይ ቢያ ኩማንዳያ ሄላ''ንዳኣና ሃይ ሾይንታ ዓኣዻዓኬ።

³³ጫሪንጮና ሳዖና ዓኣዻንዳኔ፤ ታኣኮ ቃኣላ'' ጋዓንቴ ናንጊና ዶዲ ናንጋንዳኔ» ጌዔኔ።

³⁴ሄሊ''ሳዖ ዬሱሴ፦ «ሚርጌ ሙኡዚ''ና ዑሺና ዛላ ማሊ ማሊ ዎዶ'' ዒንሢኮ ጉሪ ኩርሲፖቴ፤ ሓሣ ሃያ ሳዖ ናንጎ ባኮ ዛሎ'' ሜታዺሢና ዒኖ ዒንሢኮ ዶጪሲፖቴ፤ ያዺ ዒንሢ ማዔቴ ዬና ኬሌ''ላ ፒሮጉዲ ዔሩዋንቴ ዒንሢ ዓርቃንዳሢ ዔሩዋቴ።

³⁵ዬና ኬላ'' ሳዖይዳ ዓኣ ዓሶ ቢያ ዔሩዋንቴ ዓርቃንዳኔ።

³⁶ዬያሮ ሙካ ፑርቶ ባኮ''ይዳፓ ቢያ ቶላ''ኒ፥ ዎልቄያ ዴንቃኒና ዓሲ ናዓሢኮ ቤርታ ዒንሢ ዔቃኒ ዳንዳዓንዳጉዲ ሺኢቂ ሺኢቂ ቢያ ዎዴና ዶዱዋቴ» ጌዔኔ።

³⁷ዒማ''ና ዬሱሴ ቢያ ኬሊ'' ጌኤዦ ማኣሮይዳ ዔርዛኔ፤ ሳዓ ዓማኣና ጋዓንቴ ዛይቴ ሪሚቲ ዹካ ጌይንታ ዹኮ'' ኬስኪ ኬስኪ ዎርቃኔ።

³⁸ዓሳ ቢያ ዬሱሴ ኮራፓ ዋይዛኒ ጉቴ'' ዓማ'' ጌኤዦ ማኣሪ ዒዛ ባንሢ ዓኣዻኔ።