Read maale ሉቃሴ 24 Bible Online

ሉቃሴ 24 - maale bible

ሉቃሴ 24

¹ላኣሎንሢ ጊኢጊሼ፥ ሳውቃ ቲዦ ዔኪ ቃልሾ ኬሎ''ኮ ቤርታሳ ዓቦ'' ጉቴ ዓሚ'' ዱኡፖ ቤዞ ዴንዴኔ፤

²ዒማ''ና ዱኡፖ ካሮ'' ዎዾና ሹጫሢ ዱኡፖ ካራ''ፓ ኮላዺ ዓኣንቴ ዔያታ ዴንቄኔ።

³ዔያታ ዱኡፖ ዔቶ'' ጋሮ ጌሌ ዎዶ''ና ጋዓንቴ ጎዳ ዬሱሴኮ ሌዞ ዴንቂባኣሴ።

⁴ዬያ ባኮና ኮሺ'' ዔያታ ዲቃቲ ዓኣንቴ ዓኣፒዳ ዱካ፥ ጌኤሺ ቦኦሬ ዓፒላ ማይንቴ ላምዖ ዓሲ ዔያታ ዔሩዋንቴ ሙኪ ዔያቶ ኮይላ'' ዔቄኔ።

⁵ላኣሎንሢ ሚርጌና ዒጊጫዖ ሊካ ሳዓ ዛጊ ዓኣንቴ፦ «ሼምፔና ዓኣ፥ ዬሱሴ ሃይቄ ዓሶ ባኣካ'' ዓይጋ ዒንሢ ኮዓይ?

⁶ዒዚ ሃይካ ባኣሴ፤ ዔቄኔ፤ ቤርታ ዎንዴ ጌሊላይዳ ዓኣ ዎዶ''ና ዒንሢም ኬኤዜሢ ማሉዋቴ።

⁷ዬይያ፦ ‹ዓሲኮ ናዓሢ ጎሞ ዓሶም ዓኣሢ ዒንጊንታኒ ሃሣ ሱፂንታኒ፥ ሃይሣሳ ኬሎ''ና ሃይባ''ፓ ዔቃኒ ኮይሳኔ› ዒንሢም ጌዔሢኬ» ጌዔኔ።

⁸ላኣሎንሢ ዬሱሴኮ ቃኣሎ'' ማሊ ጶቂሴኔ፤

⁹ዱኡፖ ቤዛፓ ማዒ ዬያ ቢያ ታጶ ፔቴ''ዞንሢና ዓቴዞንሢናም ኬኤዜኔ፤

¹⁰ዬያ ዳኪንቴዞንሢም ኬኤዜዞንሢ ሜግዴላ ዓጮ'' ማይራማ፥ ዮሃና፥ ያይቆኦቤኮ ዒንዶ ማይራሞንታ ዬያጉዲ ሃሣ ሜሌ'' ላኣሊያ ዓኣኔ።

¹¹ዳኪንቴዞንሢ ጋዓንቴ ዬይ ባካ ዔያቶም ዓውቲ ማሌሢሮ ጎኔኬ ጌይባኣሴ።

¹²ጋዓንቴ ጴፂሮሴ ዔቂ ዱኡፖ ቤዞ ጳሽኬኔ፤ ዒኢካ ዒ ሄሊ'' ሂርኪ ጌዒ ዛጋዖ ሌዞ ሱኡዶና ሻኣዦ ሚዛጶ ዓፒሎ ሌሊ ዴንቄስካፓ ማዔ ባኮ ዲቃቲ ሄርሺ ሄርሺ ማኣሪ ማዔኔ።

¹³ዬኖ ኬሎ''ና ዬሱሴኮ ጊንፆ ሃንታዞንሢዳፓ ላምዖንሢ ዔማዎሴ ጌይንታ ጉርዳስኬኖ ዴንዳኔ፤ ዔማዎሴ ዓኣሢ ዬሩሳላሜይዳፓ ኮሺ'' ሃኩዋ[13] ቤስካኬ።

¹⁴ዔያታ ዬያ ማዔ ባኮ ቢያ ዛሎ'' ዎላ'' ጌስቲ ጌስቲ ዓኣዻኔ፤

¹⁵ዬያ ዔያታ ኬኤዚ ጌስታ ዎዶ''ና ዬሱሴ ፔ ቶኦኪና ሙኪ ዔያቶና ዎላ'' ዓኣዻኔ።

¹⁶ጋዓንቴ ዔያታ ፔ ዓኣፖና ዒዛ ዛጋያታዖ ዖና ማዔቶዋ ዔራኒ ዳንዳዒባኣሴ።

¹⁷ዒዚ፦ «ዒንሢ ሃይ ጌስቲ ጌስቲ ዓኣዻሢ፥ ዬይ ዓይጎ ባኣዚ''ዳይ?» ዔያቶ ኮራ ጌዔኔ። ዔያታ ዒማ''ና ኮሺ'' ዖያዖ ዓኣ ቤዛ ዔቄኔ።

¹⁸ዔያቶይዳፓ ፔቴ'' ቄሌዮጳ ጌይንታሢ፦ «ኔኤኒ ዬሩሳላሜ ካታሞይዳ ዓኣዖ ሃሢ ቢሪ ማዺንቴ ባኮ ቢያ ዔሩዋዖ ሾኦቺ ማዒ ዓቴሢ ኔና ሌሊዳ?» ጌዔኔ።

¹⁹ዬሱሴ ማሃዖ፦ «ዬይ ዓይጌንዴዳይ?» ጋዓዛ፥ ዔያታ «ናዚሬቶ ዓጮ'' ዓሢ፥ ዬሱሴ ዑፃ ማዔ ባኮሾ! ዒዚያ ፆኦሲና ዓሲና ቢያ ቤርታ ኬኤዛ ባኮና ማዾና ዶዲ ማዔ ፆኦሲ ማሊሢ ኬኤዛያኬ።

²⁰ቄኤሶኮ ሱኡጎና ኑና ዎይሣ ዔርቴ ዓሳ ሃይቃንዳጉዲ ዒዛይዳ ዎጌስካፓ ዒዛ ሱፄኔ።

²¹ኑኡኒ ጋዓንቴ ‹ዒስራዔኤሌ ዓሶ ዻቂሻንዳይ ዒዛኬ› ጌዒ ሚርጌና ሃጊ ማዓንዳ ዎዛ ጌሤያታንቴ፥ ዬይ ቢያ ባካ ማዔስካፓ ሃኖ'' ሃይሣሳ ኬሊ''ኬ።

²²ሃሣ ኑ ባኣኮ''ይዳ ዓኣ ፔቴ'' ፔቴ'' ላኣላ ሚርጌና ኑና ዲቃሢ ማሊሼኔ፤ ዔያታ ሃኖ'' ጉቴ ዱኡፖ ቤዞ ዴንዳዖ፥

²³ዒዛኮ ሌዞ ዴንቂባኣሴ፤ ‹ዒዚ ሃይባ''ፓ ዔቄኔ› ጋዓ ኪኢታንቾ ዓውቲጉዴያና ዛጌኔ ጌዒ ዔያታ ማዒ ሙኬኔ።

²⁴ሃሣ ኑጊዳፓ ፔቴ'' ፔቴ''ዞንሢ ዱኡፖ ቤዞ ዴንዳዖ ላኣላ ጌዔሢጉዲ ማዔም ዛጌኔ፤ ዬሱሴ ጋዓንቴ ዔያታ ዴንቂባኣሴ» ዒዛም ጌዔኔ።

²⁵ዬሱሴ ዔያቶም ማሃዖ፦ «ዒንሢ ማሊ ጶቂሡዋያ ሃሣ ፆኦሲ ማሊፆ ኬኤዛዞንሢ ኬኤዜሢ ቢያ ጎኔኬ ጎዑዋዖ ዒኖ ዶጪሴ ዓሳ!

²⁶ሜሲሔ ዬያ ቢያ ሜታሢ ዔካንዳያና ቦንቺንታኒያ ኮይሳያቱዋዓዳ?» ጌዔኔ።

²⁷ዬካፓ ሙሴና ፆኦሲ ማሊፆ ኬኤዛ ዓሶና ማፃኣፖይዳፓ ዓርቃዖ ጌኤዦ ማፃኣፖይዳ ቢያ ዒዛ ዛሎ'' ኬኤዚንቴ ባኮ ፓይዲ ፓይዲ ዔያቶም ኬኤዜኔ።

²⁸ዔያታ ዴንዳ ጉርዴሎኮ ዑካዛ ዬሱሴ ዔያቶ ኮራ ዎርቁዋዖ ዴንዳያ ማሌሢሮ፥

²⁹ዔያታ፦ «ሳዓ ዓሜ''ኔ፥ ዓባ''ኣ ጌሌኔ፤ ዬያሮ ኑኡና ዎላ'' ሃካ ዎርቄ» ጌይ ዒዛ ኮሺ'' ዶዲሺ ሺኢቄሢሮ ዔያቶና ዎላ'' ዎርቃኒ ማኣሪ ጌሌኔ።

³⁰ዬካፓ ዔያቶና ዎላ'' ሙዓኒ ዴዓዖ፥ ካሣ ዔኪ ጋላታ ሺኢጲሢ ሺኢቄሢኮ ጊንፃ ቡንፂ ዔያቶም ዒንጌኔ።

³¹ዬማና ዓኣፓ ዔያቶኮ ቡሊ''ንታዛ ዬሱሴ ማዔሢ ዔያታ ዔሬኔ፤ ዒዚ ጋዓንቴ ቤዞማና ዔያቶኮ ዓኣፓፓ ዓኣሺንቴኔ።

³²ዔያታ ዎሊ ኮይላ''፦ «ዎንዴ ጎይፃ ኑ ዓኣንቴ ኑም ዒ ኬኤዛኣና፥ ጌኤዦ ማፃኣፓፓ ፓይዲ ፓይዲ ኑም ዔርዛኣና ዎዛና ኑኡኮ ዒና'' ታሚጉዲ ዔኤቲባይ?» ጌዔኔ።

³³ዔያታ ዬማና ዔቃዖ ዬሩሳላሜ ማዒ ዴንዴኔ፤ ዒኢካ ታጶ ፔቴ''ዞንሢ፥ ዔያቶኮ ላጎንሢና ዎላ'' ፔቴ''ይዳ ቡኪንቲ ዓኣንቴ ዴንቄኔ።

³⁴ዒማ''ና ታጶ ፔቴ''ዞንሢ፦ «ጎዳ ዬሱሴ ጎኔ ሃይባ''ፓ ዔቄኔ! ሲሞኦኔማ ጴዼኔ!» ጋዓኔ።

³⁵ላምዖ ጊንፆ ሃንታዞንሢ ሃሣ ፔ ዛሎ''ና ዔያቶ ኮይላ'' ጎይፃ ማዔ ባኮና ጎዳ ዬሱሴ ካሦ ዔያቶም ቡንፂ ዒንጌ ዎዶ''ና ዎይቲ ዒዛ ዔያታ ዔሬቶዋ ኬኤዜኔ።

³⁶ዔያታ ዬያ ጋዓ ጎይሣ ዓኣንቴ ዬሱሴ ፔ ቶኦኪና ዔያቶ ባኣካ'' ሙኪ ዔቃዖ፦ «ዒንሢ ዎዚ ዓኣይ?» ጌዔኔ።

³⁷ዔያታ ጋዓንቴ ዔኤዤ ዛጋያ ዔያቶም ማላዛ፥ ዲቃቲ ሚርጌና ዒጊጬኔ።

³⁸ዬሱሴ ጋዓንቴ፦ «ዓይጎሮ ዒንሢ ዲቃታይ? ሃሣ ዓይጎሮ ዒንሢ ‹ሃይ ጎኔ ባኣዚ''ዳ?› ጌዒ ማላይ?

³⁹ታኣኮ ኩጮና ቶኮ''ና ዛጊጋፓ ታና ማዔሢ ዔሩዋቴ፤ ሃሣ ዑፆዋ ታኣኮ ዓርቂ ዛጉዋቴ፤ ታና ዒንሢ ዛጋሢጉዲኬ፤ ዔኤዤኮ ጋዓንቴ ዓሽኪንታ ሜጌሢንታ ባኣሴ» ጌዔኔ።

⁴⁰ዬያ ጌዒጋፓ ፔኤኮ ኩጮና ቶኮ''ና ዔያቶ ዻዌኔ፤

⁴¹ዔያታ ኮሺ'' ዎዛዺ፥ ሃሣ ዲቃቲ ሄርሺፆይዳፓ ዔቄያና ዬያ ጎኔኬ ጌዒባኣሴ። ዬሱሴ ማሃዖ፦ «ዔኤቢ፥ ሙዖ ባኣዚ'' ዒንሢኮ ዓኣ?» ጌይ ዔያቶ ዖኦጫዛ፥

⁴²ዔያታ ሚቺንቴ ሞሎ ዓሽኪ ዻካ'' ዒዛም ዒንጌኔ።

⁴³ዒዚያ ዔኪ ዔያቶኮ ቤርታ ሙዓዖ፦

⁴⁴«ቤርታ ዒንሢና ዎላ'' ታ ዓኣ ዎዶ''ና ሙሴ ዎጎይዳ፥ ፆኦሲ ማሊፆ ኬኤዛ ዓሶና ዓይኑሞ ማፃኣፖናይዳ ታ ዛሎ'' ፃኣፒንቴሢ ቢያ ኩማንዳያ ኮይሳኔ ጌዒ ታ ዒንሢም ኬኤዜ ቃኣላ'' ሃያኬ» ዔያቶም ጌዔኔ።

⁴⁵ዬካፓ ጌኤዦ ማፃኣፖ ማሊ ዔያታ ጶቂሣንዳጉዲ ዒኖ ዔያቶኮ ቡሌ''ኔ።

⁴⁶ዒዚ ዔያቶም፦ «ሜሲሔ ሜቶ ዔካንዳሢና ሃይሣሳ ኬሎ''ና ሃይቢዳፓ ዔቃንዳሢ ቤርታዺ ፃኣፒንቴኔ፤

⁴⁷ዬያጉዲ ሃሣ ዒዛኮ ሱንፆና ጎሜ ቡኡፂ ጌኤሽኪሢ ዛላኮ ኮሺ ሃይሴ ዬሩሳላሜይዳፓ ዓርቃዖ ቢያ ዓጮ''ይዳ ዓኣ ዴሮ''ም ኬኤዚንታንዳጉዲ ጌይንቴኔ።

⁴⁸ዒንሢያ ዬያ ባኮኮ ቢያ ማርኮንሢኬ፤

⁴⁹ዓካሪ ታኣኒ ታ ዓዳሢኮ ሃጊ ማዓንዳ ዎዞ ዒንጊፆ ዒንሢም ዳካንዳኔ፤ ዒንሢያ ዎልቄ ዒንሢም ሎፓ ዒንጊንታንዳያ ሄላ''ንዳኣና ዬሩሳላሜ ካታሞይዳ ዴዑዋቴ» ዔያቶም ጌዔኔ።

⁵⁰ዬካፓ ዬሱሴ ዔያቶ ዬሩሳላሜ ካታማፓ ኬሲ''፥ ቢታኒያ ጌይንታ ቤዞ ሄላ''ንዳኣና ዔኪ ዴንዳዖ ዒኢካ ኩጮ ዒዛኮ ዔያቶ ዑፃ ፒሺ ዔያቶ ዓንጄኔ።

⁵¹ዒኢካ ዔያቶ ዒ ዓንጄ ጎይሣ ዓኣዖ ዔያቶይዳፓ ዱማዺ ሌካ ጫሪንጮ ዔውቴኔ።

⁵²ዔያታኣ ዒዛም ዚጋዖ፥ ዼኤፒ ዎዛና ጊንሣ ዬሩሳላሜ ማዒ ዓኣዼኔ።

⁵³ሓሣ ፆኦሲ ጋላቲ ጋላቲ ቢያ ኬሊ''ና ጌኤዦ ማኣራፓኣ ዔያታ ዱማዺባኣሴ።