Read maale ሉቃሴ 7 Bible Online

ሉቃሴ 7 - maale bible

ሉቃሴ 7

¹ዬሱሴ ዬያ ቢያ ዴሮ''ም ኬኤዚ ጋፒሴስካፓ ቂፒርናሆሜ ካታሞ ዓኣዼኔ።

²ዒኢካ ፔቴ'' ሮሜ ዓጪ ዓሲ ማዔያ፥ ፄኤታ ፖኦሊሴ ዓይሣስኬይ ዓኣኔ። ዒዚ ሚርጌ ናሽካ፥ ዒዛም ዓይሢንቲ ማዻስኬይ ኮሺ'' ሃርጊንቲ ሃይቃኒ ዑኬኔ።

³ፄኤቶ ፖኦሊሶ ዓይሣሢ ዬሱሴ ዛሎ'' ዋይዜ ዎዶ''ና ዓይሁዶ ዓሶኮ ጪሞ ኮራ፦ «ሃዳራቴ፥ ዬሱሴ ሙኪ ታኣኮ ማዻሢ ፖዒሳንዳጉዲ ዒዛ ታኣም ሺኢቁዋቴ» ጌዒ ዔያቶ ዳኬኔ።

⁴ዔያታ ዬሱሴ ባንሢ ዓኣዻዖ፦ «ዬያ ዒዛም ኔ ማዻኒ ኮይሳ ዓሲኬ፤

⁵ዒዚ ኑኡኮ ዴሮ'' ናሽካያኬ፤ ዬያሮ ኑኡኮ ቡኪንቶ ቤሲያ ዒ ኑም ማዤኔ» ጌይ ዶዲሺ ዒዛ ሺኢቄኔ።

⁶ዬያሮ ዬሱሴ ዬንሢ ዓሶንሢና ዎላ'' ዓኣዺ፥ ፄኤቶ ፖኦሊሶ ዓይሣሢኮ ማኣሮ ሄላ''ኒ ዑካዛ ላሚ ሃሣ ፄኤቶ ፖኦሊሶ ዓይሣሢ ዒዛኮ ላጌስኬንሢ ዬሱሴ ኮራ፦ «ጎዳሢዮ! ታኣኒ፡ ኔ ታ ማኣሪ ጌላንዳ ዓሲቱዋኣሢሮ ታ ኮይላ'' ሙኪ ላቢ''ፖ።

⁷ታኣኒያ ኔ ኮይላ'' ሙካኒ ዳንዳዓ ዓሲቱዋሴ፤ ዬያሮ ኔኤኒ ዬካ ዓኣዖ ዻንጋና ሌሊ ዓይሤቴ ታኣኮ ማዻሢ ፖፖዓንዳኔ።

⁸ታኣኒ ታ ቶኦኪና ዎይሣ ዓሶም ዓይሢንታያታዖ ታኣኮ ዴማ'' ታ ዓይሣ ፖኦሊሴ ዓኣኔ። ዬያሮ ዔያቶይዳፓ ፔቴ''ሢ ‹ዴንዴ› ታ ጋዓዛ ዴዴንዳኔ፤ ባጋሢ ሃሣ ‹ሃኒ ሙኬ› ታ ጋዓዛ ሙሙካኔ፤ ታኣም ማዻሢማኣ ‹ሃያ ማዼ› ታ ጋዓዛ ማማዻኔ» ሂዚ ጌዒ ኬኤዙዋቴ ጌይ ዳኬኔ።

⁹ዬሱሴ ዬያ ዋይዛዖ ዲቃቲ ሄርሺ ዒዛ ጊንፆ ሙካ ዴሮ'' ባንሢ ሺሪ፦ «ዒስራዔኤሌይዳታዖ ሃያጉዴ ጉሙርቂሢ ፔቴ''ታዖ ታ ዴንቂባኣሴ፤ ታ ዒንሢም ጋዓኔ» ጌዔኔ።

¹⁰ዒዛ ኮይላ'' ዳኪንቴ ዓሶንሢ ፄኤቶ ፖኦሊሶ ዓይሣሢ ማኣሮ ባንሢ ማዔ ዎዶ''ና ዒዛኮ ማዻሢ ፖዒ ዓኣንቴ ዔያታ ዴንቄኔ።

¹¹ዬማፓ ኔጉዋዖ ዬሱሴ ናይኔ ጌይንታ ፔቴ'' ካታማስኬኖ ዒዛኮ ጊንፆ ሃንታዞንሢና ሜሌ'' ሃሣ ሚርጌ ዴሬና ዎላ'' ዓኣዼኔ፤

¹²ዬሱሴ ካታሜሎ ጌላ ካሮ'' ዑካዛ ዓሳ ሌሲ'' ኬዲ ካታማ''ፓ ኬስካኔ። ዬይ ሓይቄ ናዓሢ ዒንዶኮ ፔቴ''ኬ። ዒንዴላኣ ዓኒ ሓይቄያ ዜኤሪንዶኬ፤ ሓሣ ዬኖ ካታሜሎይዳፓ ሚርጌ ዓሲ ዒዞና ዎላ'' ዓኣኔ።

¹³ጎዳሢ ዒዞ ዛጋዖ ዒዞ ሚጪንቲ፦ «ዔናኣሬ፥ ዬኤኪፖ» ጌዔኔ።

¹⁴ዬካፓ ዬሱሴ ቤርቲም ዴንዳዖ ኪንቺሎ ኩቻ ሄላ''ዛ ኬዴ ዓሳ ዔቄኔ፤ ዬሱሴ ዒማ''ና፦ «ሃይ ኔ ዼጌሢ ዔቄ ታ ኔና ጋዓኔ!» ጌዔኔ።

¹⁵ሓይቄሢያ ዬማና ዔቂ ዴዒ ጌስቲሢ ዓርቄኔ፤ ዬካፓ ዬሱሴ ዒንዴሎም፦ «ሓይሾ ኔኤኮ ናዓሢ» ጌዒ ዒንጌኔ፤

¹⁶ዬያሮ ቢያሢ ዒጊቹሞ ዓርቄም፦ «ኑ ባኣካ'' ፑኡፒ ፆኦሲ ማሊሢ ኬኤዛያ ዔቄኔ፤ ፆኦሲያ ፔ ዴሮ'' ዻቂሻኒ ሙኬኔ» ጌዒ ጌዒ ፆኦሲ ጋላቴኔ።

¹⁷ዬሱሴኮ ሱ'ንፃ ዪሁዳ ዓጫ'' ሃሣ ኮይሎ ዓጮ'' ቢያይዳ ዋይዚንቴኔ።

¹⁸ዮሓኒሴኮ ጊንፆ ሃንታዞንሢ ዬሱሴ ማዼ ባኮ ቢያ ዮሓኒሴም ኬኤዜኔ፤ ዒዚያ ዒዛኮ ጊንፆ ሓንታዞንሢዳፓ ላምዖንሢ ዔኤሊ''፦

¹⁹« ‹ሙካንዳኔ› ጌይንቴ ሜሲሔ ኔናሞ ሜሌ'' ኑ ካፖንዶይ? ጌዒ ዒዛ ዖኦጩዋቴ» ጌይ ዬሱሴ ባንሢ ዳኬኔ።

²⁰ዔያታ ዬሱሴ ኮራ ዓኣዻዖ፦ « ‹ሙካንዳኔ› ጌይንቴ ሜሲሔ ኔናሞ ሜሌ'' ኑ ካፖንዶይ? ጌይ ዒዛ ዖኦጩዋቴ ጌዒ ማስካ ዮሓኒሴ ኔ ኮራ ኑና ዳኬኔ» ጌዔኔ።

²¹ዬሱሴ ዬማና ዓሶ ዱማ ዱማ ዶርዖና ፑርታ ሓርጌናይዳፓ ፓሤኔ፤ ፑርቶ ዓያኖዋ ኬሴ''ኔ፤ ሃሣ ሚርጌ ዓኣፖ ባይቄ ዓሶኮዋ ዓኣፖ ቡሌ''ኔ።

²²ዬሱሴ ሙኬ ኪኢቶ'' ዓሶንሢም፦ «ማዒ ዴንዲጋፓ ዮሓኒሴም ዒንሢ ዛጌ ባኮና ዋይዜ ባኮዋ ሂዚ ጌይ ኬኤዙዋቴ፦ ዓኣፖ ባይቄ ዓሳ ዛጋኔ፤ ዎቦ ዓሳ ፒኪ ሃንታኔ፤ ዑፃ ኬስካ ዶርዓሢና ዓኣ ዓሳ ዻቃኔ፤ ዋዮ ባይቄ ዓሳ ዋይዛኔ፤ ሃሣ ሃይቄ ዓሳ ዔቃኔ፤ ማንቆ ዓሶማኣ ኮዦ ሃይሳ ኬኤዚንታኔ።

²³‹ጎኔሞ ሉኡዚዳይ?› ጌዒ ታ ዛሎ''ና ዹቂንቱዋኣሢ ዓንጂንቴያኬ» ጌዔኔ።

²⁴ዮሓኒሴ ኮራፓ ሙኬ ኪኢቶ'' ዓሶንሢ ማዒ ዴንዴሢኮ ጊንፃፓ ዬሱሴ ዮሓኒሴ ዛሎ'' ዴሮ''ም ሂዚ ጌዒ ኬኤዚሢ ዓርቄኔ፦ «ዒንሢ ሃካ ዓሲ ናንጉዋ ዳውሎ'' ዓይጎ ዛጋኒ ሙኬይ? ዢባራ ዓጊሣ ዱሮ'' ፒሎ'' ዛጋኒዳ?

²⁵ሃሣ ዒንሢ ዓይጎ ዛጋኒ ኬስኬይ? ጉኡፂሲ ሱኪ ዹይሶና ዓፒሎ ማኣዔ ዓሲ ዛጋኒዳ? ዬያጉዴ ዓፒሎ ማኣዒ፥ ፔና ኮሺ'' ናንጋ ዓሳ ካኣቶ'' ማኣራ ዓኣኔ!

²⁶ሂዴቶ ዓይጎ ዒንሢ ዛጋኒ ኬስኬይ? ፆኦሲ ማሊሢ ኬኤዛ ዓሲ ዛጋኒዳ? ሂዮ ጎኔኬ፥ ፔቶ'' ዬያ ፆኦሲ ማሊፆ ኬኤዛሢዳፓ ባሼሢ ዛጋኒኬ።

²⁷ዒዚያ ‹ቤርታ ቤርታ ዴንዲ ጎይፆ ኔኤም ጊኢጊሻ ታኣኮ ኪኢቶ'' ናዓሢ ታ ዳካንዳኔ› ጌይንቲ ዒዛ ዛሎ'' ፃኣፒንቴሢኬ።

²⁸ሳዖይዳ ሾይንቴ ዓሶይዳፓ ቢያ ዮሓኒሴፓ ባሻይ ዖኦኒያ ባኣሴ፤ ፆኦሲ ካኣቱሞ ጋራ ዓኣ ዓሶ ባኣካ'' ዓሲኬ ጌይንቱዋኣሢ ጋዓንቴ ዒዛፓ ባሼኬ» ጌዔኔ።

²⁹ዬያ ዔያታ ዋይዜ ዎዶ''ና ዴራ'' ቢያ፤ ኮርሞ ዓሶፓ ሚኢሾ ቡኩሳ ዓሳኣ ዓቱዋዖ ዮሓኒሴ ኮራ ቤርታ ዋኣፆ ማስቴሢሮ ፆኦሲ ማዻ'' ፒዜ ማዔሢ ዔሬኔ።

³⁰ፔርሴ ዓሶና ሙሴ ዔርዜ ዎጎ ዔርዛ ዓሳ ጋዓንቴ፦ «ዮሓኒሴ ኮራ ኑ ማስታዓ» ጌዒ ፆኦሲ ማሊፆ ዒፄኔ።

³¹ሄሊ''ሳዖ ዬሱሴ፦ «ዓካሪ ሃያ ዎዶ'' ዓሶ ዓይጎና ታ ማላታንዳይ? ዓይጎ ዔያታ ማላይ? ጌዔቶ፦

³²ዓሳ ቡካ ጶኦካ'' ዴዒ ዓማላ'' ናኣቶ'' ማላኔ፤ ዔያታ ዎሊ ዔኤሊ'' ዔኤሊ'' ‹ዎዛ ዓይኑሞ ኑ ዒንሢ ዋይዚሴኔ፤ ዒንሢ ጋዓንቴ ኮርጊባኣሴ፤ ቃዮ ኑ ቃዬኔ፥ ዒንሢ ጋዓንቴ ዬኤኪባኣሴ› ጋዓዞንሢኬ።

³³ዬያጉዲ ማስካ ዮሓኒሴ ሙዖ ሃሾ ዳምቦ ካፓዛ ሃሣ ማሣ ዎይኖ ዑዦዋ ዑሽኩዋዖ ሙካዛ ‹ፑርታ ዓያና ዒዛይዳ ዓኣኔ› ዒንሢ ጌዔኔ።

³⁴ዓሲኮ ናዓሢ ሙዒ ሙዒ ሃሣ ዑሽኪ ዑሽኪ ሙካዛ ‹ሃይ ሃሣ ሙኡዚ''ና ማሣ ዑሺና ናሽካያ፥ ኮርሞ ዓሶፓ ሚኢሾ ቡኩሳዞንሢና ጎሞ ዓሶናኮ ላጌኬ› ዒንሢ ጌዔኔ።

³⁵ጋዓንቴ ፆኦሲ ዔራቶኮ ፒዙማ ፆኦሲም ዓይሢንታ ዓሶ ዛሎ''ና ፔጋዺ ዔርታኔ» ጌዔኔ።

³⁶ፔቴ'' ፔርሴ ዓሲስኬይ ዬሱሴ ሙኡዚ'' ሙዓንዳጉዲ ዔኤላ''ዛ ዬሱሴ ዬያ ዓሢ ማኣሪ ጌሊ ሙዓኒ ዴዔኔ።

³⁷ዬኖ ካታሜሎይዳ ፔቴ'' ጎሜና ዓኣ፥ ላኣሊስኬና ዓኣኔ፤ ዬሱሴ ፔርሴ ዓሢ፥ ሲሞኦኔ ማኣሮይዳ ሙዖም ዔኤሊ''ንቴሢ ዒዛ ዋይዛዖ ሳውቃ ቲሺ ሹቺ ቢልቃፄና ኩንሢ ዔኪ ሙኪ፥

³⁸ዬሱሴኮ ጊንፆ ዛሎ''ና[2] ቶኮ'' ዓጫ ዔቂ፥ ዬኤኪ ዬኤኪ ዒዛኮ ቶኮ''ዋ ፔ ዓቢፆና ማስኪ ፔኤኮ ቶኦኮ'' ጋሞና ዑጫኔ፤ ሃሣ ቶኮ'' ዒዛኮ ሄርቂያ ሄርቂ ሳውቃ ቲዦናኣ ቲሽካኔ።

³⁹ሙዖ ዒዚ ሙዖም ዔኤሌ'' ፔርሴ ዓሢ ዬያ ዛጌ ዎዶ''ና፦ «ሃይ ዓሢ ፆኦሲ ማሊሢ ኬኤዛ ዓሲ ማዔቴ፥ ሃና ዒዛኮ ዑፆ ፒፃ'' ላኣሌላ ዖና ማዔቶ ሃሣ ዎዚጉዴ ጎሜና ዓኣያ ማዔቴያ ዔሬያናንዳኔ» ጌይ ፔ ዒኖና ማሌኔ።

⁴⁰ዬሱሴያ ፔርሴ ዓሢ ኮይላ''፦ «ሲሞኦኔ! ፔቴ'' ታ ኔኤም ኬኤዛ ባኣዚ'' ዓኣኔ» ጌዔኔ። ዒዚ፦ «ዔርዛሢዮ! ሂንዳ ታኣም ኬኤዜ» ጌዔኔ።

⁴¹ዬሱሴያ ሂዚ ጌዒ ሃይሶ ኬኤዚሢ ዓርቄኔ፦ «ፔቴ'' ዓሲዳፓ ሚኢሼ ታልዔ ላምዖ ዓሲ ዓኣኔ፤ ፔቴ''ሢ ዶንጎ ፄኤታ ኬሊ'' ማዾ ማዼም ዒንጊንታ ቢራ፤ ባጋሢ ሃሣ ዶንጊታሚ'' ኬሊ'' ማዾ ማዼም ዒንጊንታንዳ ቢራ ታልዒ ዔኬኔ።

⁴²ላምዖንሢ ዔያታ ታልዒ ዔኬ ሚኢሾ ጪጎ ባሺንቴም ታልዔሢ ዔያቶኮ ጋሎ'' ማሂሱዋዖ ሃሼ''ኔ፤ ዓካሪ ጋሎ'' ዓሶ ላምዖንሢዳፓ ዎይ ባሼ ታልዔ ዓሢ ናሽካንዳያ ማላይ?» ጌዔኔ።

⁴³ሲሞኦኔያ፦ «ሚርጌ ጋላ'' ዓቴ'' ዓሢ ባሼ ዒዛ ናሽካንዳያ ማላኔ» ጌይ ማሄኔ። ዬሱሴ፦ «ኔ ጌዔሢ ጎኔኬ» ጌዔኔ።

⁴⁴ዬካፓ ዬሱሴ ላኣሌሎ ባንሢ ሺራዖ፦ «ሃኖ' ላኣሌሎ ኔ ዛጋ? ታ ኔ ማኣሪ ጌላዛ ኔኤኒ ታ ቶኮም ዋኣሢታዖ ዒንጊባኣሴ፤ ዒዛ ጋዓንቴ ቶኮ ታኣኮ ፔኤኮ ዓቢፆና ማስኪ ፔ ቶኦኮ'' ጋሞና ዑጬኔ።

⁴⁵ታ ኔ ኮይላ'' ጌላኣና ኔ ታና ሄርቂባኣሴ፤ ዒዛ ጋዓንቴ ታ ኔ ማኣሪ ጌሌሢዳፓ ዓርቃዖ ታኣኮ ቶኮ ሄርቂፆ ሃሺ''ባኣሴ፤

⁴⁶ኔኤኒ ታኣኮ ቶኦኮ'' ዛይቶ ቲዦናታዖ ቲሽኪባኣሴ፤ ዒዛ ጋዓንቴ ታኣኮ ቶኮ ሳውቃ ቲዦና ቲሽኬኔ፤[3]

⁴⁷ሚርጌ ጎማ ዒዞኮ ዓቶም ጌይንቴሢሮኬ ሚርጌና ዒዛ ናሽኬሢ፤ ታ ኔኤም ጋዓኔ። ጎማ ዻካ'' ዓቶም ጌይንቴሢ ጋዓንቴ ናሽካሢያ ዻካ''ኬ» ጌዔኔ።

⁴⁸ዬካፓ ዬሱሴ ላኣሌሎ ኮራ፦ «ኔኤኮ ጎማ ዓቶም ጌይንቴኔ» ጌዔኔ።

⁴⁹ዒዛና ዎላ'' ሙዓ ዓሳ፦ «ጎሜ ዓቶም ጋዓሢ ሃይ ዎዚ ዓሲዳይ!» ጌዒ ጌዒ ፔ ዒኖና ማሊሢ ዓርቄኔ።

⁵⁰ዬሱሴ ጋዓንቴ ላኣሌሎ ኮራ፦ «ኔኤኮ ጉሙርቂፃ ኔና ዻቂሼኔ፤ ኮሺ ዓኣዼ!» ጌዔኔ።