Read maale ሉቃሴ 8 Bible Online

ሉቃሴ 8 - maale bible

ሉቃሴ 8

¹ዬካፓ ዬሱሴ ካታሞና ጉርዶናይዳ ፆኦሲ ካኣቱሞ ኮዦ ሃይሶ ኬኤዚ ኬኤዚ ዓኣዻኣና ታጶ ላምዖ ዒዛኮ ጊንፆ ሃንታዞንሢያ ዒዛና ዎላ'' ዓኣኔ።

²ዬያጉዲ ሃሣ ፑርቶ ዓያና'' ኬስኬም ፖዔዞንሢና ሜሌ'' ዶርዓሢዳፓኣ ፖዔ ላኣላ ዬሱሴ ጊንፆ ዓኣዻኔ፤ ዔያታ፦ ላንካይ ፑርታ ዓያና ኬስኬ ማይራማ፥

³ሄሮዲሴ ማኣራ ዓኣ ዓሶ ዓይሢ ዎይሣ ኩዛ ጎዖሢ ማቻ ዮሃናንታ ሶሲና ጎዖዞንታ ሜሌ'' ሚርጌ ላኣሊያ ዓኣኔ፤ ዬንሢ ላኣሎንሢ ዬሱሴና ዒዛኮ ጊንፆ ሃንታዞንሢና ፔኤኮ ሚኢሾ ዒንጊ ማኣዳ''ኔ።

⁴ሚርጌ ዴሬ ካታማፓ ካታማፓ ሙኪ ዬሱሴ ኮራ ቡኪንታዛ ዬሱሴ ኮኦኪንሢና ሂዚ ጌይ ኬኤዜኔ፤

⁵«ፔቴ'' ጎሺ ጎሽካ ዓሲ ዜርሢ ዜርቃኒ ኬስኬኔ፤ ዒዚ ዜርቃኣና ፔቴ'' ፔቴ'' ዜርፃ ጎይፆ ዓጫ ኬዲ'' ሄ'ርቂንቴኔ፤ ካፒያ ሙዔኔ።

⁶ዛሎ'' ዜርፃ ሃኣሻ ሳዓይዳ ኬዲ''፥ ባቃሌ ዎዶ''ና ሳዖኮ ሚርጌ ዎዑሞ ባኣሢሮ ባቃላ'' ሃይቄኔ።

⁷ዓቴ'' ዜርፃ ሃሣ ዓንጊሢ ቶሻ ባኣካ ኬዳ''ዛ ዓንጊፆ ቶሻ'' ዎላ'' ዑጊ ባይዜኔ።

⁸ሜሌ'' ዜርፃ ጋዓንቴ ኮሺ ሳዓይዳ ኬዲ'' ባቃሌኔ፤ ባቃላ''ኣ ዑጊ ፔቴ'' ፔቴ''ሢ ሚርጌ ዺቢ ዓኣፒ ዓኣፔኔ።» ዬካፓ ዬሱሴ፦ «ዋይዛሢ ኮሺ'' ዋይዞንጎ!» ጌዔኔ።

⁹ዒዛኮ ጊንፆ ሃንታዞንሢ ዬሱሴ ኮራ፦ «ዬኖ ኮኦኪንሤሎኮ ቡሊ''ፃ ዓይጌንዴዳይ?» ጌይ ዖኦጬኔ።

¹⁰ዬሱሴ ዔያቶም ማሃዖ፦ «ዒንሢም ፆኦሲ ካኣቱሞ ዛሎ''ኮ ዓኣሺንቴ ባኮ ዔሪሢ ዒንጊንቴኔ፤ ሜሌ''ዞንሢም ጋዓንቴ ቢያ ባኣዚ'' ኮኦኪንሢና ኬኤዚንታኔ፤ ዓይጎሮ ጌዔቶ ዔያታ ዛጋያታዖ ዒና ዔኩዋጉዲ፥ ዋይዛያታዖ ጶቂሡዋጉዲኬ» ጌዔኔ።

¹¹ኮኦኪንሦኮ ቡሊ''ፃ ያዺኬ፦ «ዜርፃ ፆኦሲ ቃኣሎ''ኬ፤

¹²ጎይፆ ዓጫ ኬዴ'' ዜርፃ ዻዋሢ' ቃኣሎ'' ዋይዛ ዓሶኬ፤ ጋዓንቴ ዔያታ ጉሙርቂ ጎናሲ ዻቁዋጉዲ ፃላሄ ሙኪ ቃኣሎ'' ዔያቶኮ ዒና''ፓ ዔካኔ።

¹³ሃኣቾ ዓጮ''ይዳ ኬዴ'' ዜርፃ ዻዋሢ' ቃኣሎ'' ዋይዚ ዎዛና ዔካዞንሢኬ፤ ጋዓንቴ ዔያታ ጉሙርቂ ጎናሲ ዔካሢ ዻካ'' ዎዴምኬ፤ ፃጲ ዔያቶኮ ባኣሢሮ ሜታ ሄሌ'' ዎዶ''ና ቤዞና ዔያታ ሃሻ''ኔ።

¹⁴ዓንጊፆ ቶሾ ባኣካ'' ኬዴ'' ዜርፃ ዻዋሢ ቃኣሎ'' ሃሣ ዋይዛ ዓሶንሢኬ፤ ጋዓንቴ ሃያ ዓጮ'' ማሊፆና ቆሎ''ና ሃሣ ሳዖ ናንጎ ኮሹማ ዒኖ ዓርቂ ዓኣፒ ባኣያ ዬያቶ ማሃኔ።

¹⁵ኮዦ ሳዖይዳ ኬዴ'' ዜርፃ ዻዋሢ' ጋዓንቴ ኮሺ ሃሣ ፒዜ ዒናና ቃኣሎ'' ዋይዚ ካፓዞንሢኬ፤ ዬንሢ ቃኣሎ''ና ዶዲ፥ ዓኣፖ ዓኣፓዞንሢኬ» ጌዔኔ።

¹⁶ዬካፓ ሃሣ ዬሱሴ፦ «ፖዒ ፖዒሲ ጉኡፒ ዓኣቻያና ሃሣ ሻኣላ'' ዴንካ ጌሣ ዓሲ ባኣሴ። ዬያይዲፆፓ ማኣሪ ጌላ ዓሳ ፖዖ ዛጋንዳጉዲ ዼ'ጌ ሻርናይዳ ጌሣኔ።

¹⁷«ዬያጉዲ ፔጋዹዋዖ ሓሣ ዔርቱዋዖ ዓኣሺንቲ ዓታንዳ ባኣዚ'' ባኣሴ።

¹⁸«ዬያሮ ዒንሢ ዎማይዲ ዋይዛንዳቴያ ዒንሢና ዔሩዋቴ፤ ዓይጎሮ ጌዔቶ ዔኤቢ ዓኣ ዓሲም ቃሲ'' ዒንጊንታኔ፤ ባኣሢዳፓ ጋዓንቴ ‹ታኣኮ ዓኣኔ› ጌዒ ዒ ማላ ዻኮ''ማኣ ዓይሱዋዖ ዒዛይዳፓ ዔኪንታንዳኔ» ጌዔኔ።

¹⁹ዬሱሴኮ ዒንዶና ጌርሲንሢና ዒዚ ዓኣ ቤዞ ሙኬኔ፤ ጋዓንቴ ዴሮ'' ሚርጉሞፓ ዔቄያና ዔያታ ዒዛ ዴንቃኒ ዳንዳዒባኣሴ።

²⁰ዬያሮ፦ «ኔኤኮ ዒንዶና ጌርሲንሢና ዙላ'' ዔቂ ኔና ዛጋኒ ኮዓኔ» ጌዒ ዓሳ ዒዛም ኬኤዜኔ።

²¹ዬሱሴ ማሃዖ፦ «ፆኦሲ ቃኣሎ'' ዋይዚ ኩንሣዞንሢ ቢያ፥ ዬንሢ' ታኣኮ ዒንዶና ጌርሲንሢናኬ» ጌዔኔ።

²²ፔቴ'' ኬሊ''ና ዬሱሴ ፔኤኮ ጊንፆ ሃንታዞንሢና ዎላ'' ዋኣፆና ፒንቆ ጎንጎ ቶጋዖ፦ «ባዞ''ኮ ሶ ሱኮ ኑ ፒንቆም» ጋዓዛ፥ ዔያታ ዴንዳኒ ዔቄኔ።

²³ዔያታ ባዞ'' ዑፆይዳ ዓኣዻኣና ዬሱሴ ጊንዔኔ፤ ዬማና ዎልቄና ዓኣ ባዚ'' ጉዳ ባዞ''ይዳ ዔቄኔ። ዋኣፃ ጎንጎ ጋሮ ኩሚሢ ዓርቄሢሮ ቢያሢ ካራ ባይዚ ሜታዼኔ።

²⁴ዬያሮ ዒዛኮ ጊንፆ ሃንታዞንሢ ላሚ ላሚ፦ «ዔርዛሢዮ! ኑ ኩዴኔ!» ጌዒ ዬሱሴ ጴቼኔ። ዒዚ ጴጫዖ ዢባሮና ጉዳሢና ጎራ''ዛ ዢባሮንታ ጉዳሢንታ ቤዞና ዚቲዮ ጌዔም ፔቴ''ታዖ ዓጊፃ ባኣዚ'' ባኣያ ማዔኔ።

²⁵ዬካፓ ዬሱሴ ዒዛኮ ጊንፆ ሃንታዞንሢ ኮራ፦ «ዒንሢኮ ጉሙርቂፃ ዋኣዳዖ?» ጌዔኔ። ዔያታ ጋዓንቴ ሚርጌና ዒጊጬስካፓ ሄርሺ ዲቃታዖ ዎሊ ኮይላ''፦ «ዢባሮና ጉዳሢና ዓይሣኔ፤ ዔያታኣ ዒዛም ዓዓይሢንታኔ፤ ካኣ! ሓይ ዓይጎ ዓሲዳይ?» ጌዔኔ።

²⁶ዬካፓ ዔያታ ባዞ''ና ፒንቂ ጌሊላ ሱኮ''ይዳ ዓኣ ጌርሴኖኔ ዓጮ'' ሄሌ''ኔ፤

²⁷ዬሱሴ ዋኣፆና ፒንቆ ጎንጋፓ ሳዓ ኬዳ''ዛ ፑርታ ዓያና ዓኣ ፔቴ'' ዓሲ ካታማ''ፓ ኬስኪ ዒዛና ካኣሜኔ፤ ዬይ ዓሢ ፔኤኮ ማኣዓሢ ኬኤሪ፥ ጉሪ ሃንታንቴ ሚርጌ ዎዴ ማዔያኬ፤ ዒዚ ናንጋሢ ዱኡፒ ካይዚዳኬ፥ ማኣሪዳቱዋሴ።

²⁸ዒዚ ዬሱሴ ዴንቂ ዒላቲ ዬሱሴ ቤርታ ሎኦማዖ ዑኡዞ ዼ'ጊዲ፦ «ኔኤኒ ፑኡፖ ፆኦዛሢ ናዓሦ፥ ዬሱሴ! ታኣና ዎላ'' ኔኤኮ ዓይጎ ዒጊንቶ ዓኣይ? ሃዳራ ታና ሜታሲፖ!» ጌዔኔ።

²⁹ዬያ ዒ ጌዔሢ ዬሱሴ ፑርቶ ዓያናሢ ዓሢዳፓ ኬስካንዳጉዲ ዓይሤሢሮኬ። ዬያኮ ቤርታ ፑርቶ ዓያናሢ ዓሢ ዑፆይዳ ሚርጌ ዎዴ ዔቃያኬ፤ ዬያሮ ዒዛኮ ቶኮ''ና ኩጮና ካኒ ቢራታና ዓንጊ ዱፄና ቱኡቲ ቱኡቲ ካፒንታያ ማዔቶዋ ካኖ ቢራቶዋ ዱኡዚ ዓንጎ ዱፆዋ ሜንሢሲ ዓሲ ናንጉዋ ዳውሎ'' ዒዛ ዔኪ ዔኪ ዴንዳኔ።

³⁰ዬሱሴ፦ «ሱንፃ ኔኤኮ ዖናዳይ?» ጌዒ ዖኦጫዛ፥ ዒዚ ሚርጌ ፑርታ ዓያና ዒዛይዳ ቡኪ ዓኣሢሮ፦ «ሱንፃ ታኣኮ ዴሬኬ» ጌዒ ዒዛም ማሄኔ።

³¹ፑርቶ ዓያና'' ዬሱሴ ኮራ፦ «ሓዳራ ጋፒንፃ ጴዹዋ ዔቶ'' ዼኤፖ[4] ኑና ዳኪፖ» ጌዒ ዒዛ ሺኢቄኔ።

³²ዬኖ ቤዞይዳ ዓኣ ዹኮ'' ጎኦባ'' ዓሲኮ ቆሎ ሚርጌ ጉዱንሢ ሄንቃንቴ ፑርቶ ዓያና''፦ «ሴኬ ጉዱንፆይዳ ኑ ጌላንዳጉዲ ኑና ዓይሤ» ጌዒ ዬሱሴ ሺኢቃዛ፥ ዔያታ ጌላንዳጉዲ ዒ ዓይሤኔ።

³³ዬያሮ ፑርቶ ዓያና'' ዓሢዳፓ ኬስኪ ጉዱንፆይዳ ጌላዛ ጉዱንፃ ዎሊ ዑፃ ዲርጊ ማጎ ዓኣዻዖ ባዞ''ይዳ ጌሊ ሙይንቴኔ።

³⁴ጉዱንፆ ሄንቃ ናኣታ'' ዬያ ባኮ ዛጋዖ ጳሽኪ ዴንዲ ካታሞና ዙሎ''ናይዳ ሚርጌና ሓይሶ ኬኤዜኔ።

³⁵ዓሳ ዬያ ባኮ ዛጋኒ ፔ ማኣራፓ ኬስኪ ዬሱሴ ባንሢ ሙካንቴ፥ ፑርቶ ዓያና'' ኬስኬ ዓሢ' ዒና'' ዒዛኮ ማዔም ዓፒሎ ፔኤኮ ማኣዒ ዬሱሴኮ ቶኮ'' ዴማ'' ዴዒ ዓኣንቴ ዔያታ ዴንቂ ዒጊጬኔ፤

³⁶ዓኣፖና ዛጌ ማርኮ ማዔ ዓሶንሢ ፑርቶ ዓያና'' ዓኣ ዓሢ ዎማይዲ ዻቄቶዋ ዔያቶም ኬኤዜኔ።

³⁷ዬካፓ ጌርሴኖኔ ዓጮ'' ዓሳ ቢያ ዬሱሴ ዔያቶኮ ዓጫ''ፓ ዴንዳንዳጉዲ ዒዛ ሺኢቄኔ። ዬያ ዔያታ ጌዔሢ ሚርጌና ዒጊጬሢሮኬ። ዬያሮ ዬሱሴ ዋኣፆና ፒንቆ ጎንጎ ቶጊ፥ ዎንዴ ሙኬ ቤዞ ባንሢ ዴንዳኒ ዔቃዛ፥

³⁸ፑርቶ ዓያና'' ኬስኬ ዓሢ ዬሱሴ ኮራ፦ «ሓዳራ፥ ታ ኔ ጊንፆ ሙኮም» ጌዒ ሺኢቄኔ።

³⁹ዬሱሴ ጋዓንቴ፦ «ኔ ማኣሪ ዓኣዺጋፓ ፆኦሲ ኔኤም ማዼ ባኮ ቢያ ኬኤዜ» ጌዒ ዒዛ ዳካዛ፥ ዓሢ ዬሱሴ ዒዛም ማዼ ፑኡፖ ባኮ ካታሞይዳ ቢያ ኬኤዚ ኬኤዚ ዴንዴኔ።

⁴⁰ዴራ'' ዒዛ ቢያ ካፒ ዓኣሢሮ ዬሱሴ ማዒ ሙካኣና ቢያሢ ዒዛ ዎዛና ዔኬኔ።

⁴¹ዒማ''ና ፔቴ'' ዓይሁዶ ዓሳ ቡኪንታ ቤዞኮ ሱኡጌ ማዔ፥ ዒያዒሮሴ ጌይንታ ዓሲ ሙኪ ዬሱሴኮ ቶኮ'' ዴማ'' ሎኦሚ፦ «ሓዳራ፥ ታ ማኣሪ ሙኬ» ጌዒ ዒዛ ሺኢቄኔ።

⁴²ዓይጎሮ ጌዔቶ ዒዛኮ ታጶ ላምዖ ሌዔ ማዔ ናይስኬና ሓርጊንቲ ሃይቃኒ ዑኪ ዓኣሢሮኬ። ዬያሮ ዬሱሴ ዒዛና ዎላ'' ዴንዳንቴ፥ ዒዛና ዎላ'' ዓኣዻ ሚርጌ ዓሳ ቱቺ ዒዛ ሜታሳኔ።

⁴³ዒማ''ና ታጶ ላምዖ ሌዔ ጉቤ ሱጉሢ ሾኦቲ ሜታሳ ፔቴ'' ላኣሊስኬና ዓኣኔ፤ ዒዛ ፔኤኮ ዓኣ ሚኢሾ ጉቤ ዼኤሾ ዔራ ዓሶም ዒንጊ ጋፒሴቶዋ ዖኦኒያ ዒዞ ዻቂሻኒ ዳንዳዒባኣሴ።

⁴⁴ዬና ላኣሌላ ዬሱሴ ባንሢ ሙኪ ጊንፆ ዛሎ''ና ዑኪ ዒዛኮ ዓፒሎ ዓጮ ሄላ''ዛ ቤዞማና ዒዞኮ ሾኦታ'' ሱጉፃ ዔቄኔ።

⁴⁵ዬሱሴ ዒማ''ና፦ «ዖ ታና ካኣሜይ?» ጌዒ ዖኦጬኔ። ቢያሢ፦ «ኑ ኔና ሄሊ''ባኣሴ» ጋዓዛ፥ ጴፂሮሴ ማሃዖ፦ «ዔርዛሢዮ! ዴራ'' ቱቺንቲ ኔ ጊንፆ ዓኣዻሢ ኔ ዛጉዋዓዳ?» ጌዔኔ።

⁴⁶ዬሱሴ ጋዓንቴ፦ «ታጊዳፓ ዎልቄ ኬስኬሢ ታ ዔራሢሮ ጎኔ፤ ፔቴ'' ዓሲ ታና ካኣሜኔ» ጌዔኔ።

⁴⁷ላኣሌላ ዓኣሺንታኒ ዳንዳዒባኣሢ ዔራዖ ጎጋይቂ ጎጋይቂ ዒዛኮ ቶኮ'' ዴማ'' ሎኦሜኔ፤ ዬካፓ ዒዛ ዓይጎሮ ካኣሜቶዋ ሃሣ ዎማይዲ ዒዛ ቤዞና ፖዔቶዋ ዴሮ'' ቢያ ቤርታ ፔጋሲ ኬኤዜኔ።

⁴⁸ዬሱሴያ፦ «ታ ናዔሌ! ኔ ጉሙርቂፃ ኔና ፖዒሴኔ፤ ኮሺ ዴንዴ» ዒዞም ጌዔኔ።

⁴⁹ዬሱሴ ዬያ ሃጊ ኬኤዛ ጎይሣ ዓኣንቴ ፔቴ'' ዓሲ ዓይሁዶኮ ቡኪንቶ ቤዞ ሱኡጋሢ፥ ዒያዒሮሴ ማኣራፓ ሙኪ ዒያዒሮሴ ኮራ፦ «ናዔላ ኔኤኮ ሓይቄኔ፤ ማይ ዔርዛሢ ጉሪ ላቢ''ሲፖ» ጌዔኔ።

⁵⁰ዬሱሴ ጋዓንቴ ዬያ ዋይዛዖ ዒያዒሮሴ ኮራ፦ «ኔኤሮ ዒጊጪፖ፥ ጉጉሙርቄ፤ ናዔላ ኔኤኮ ዻቃንዳኔ» ጌዔኔ።

⁵¹ዬሱሴ ዬማና ዒያዒሮሴ ማኣሪ ሄላ''ዖ ጲፂሮሴና ዮሓኒሴና ያይቆኦቤና ሃሣ ናዔሎኮ ዓዶና ዒንዶናፓ ዓታዛ ሜሌ'' ዖኦኒያ ዒዛና ዎላ'' ጋሮ ጌላንዳጉዲ ኮዒባኣሴ።

⁵²ዒኢካ ዓኣ ዓሳ ቢያ ናዔሎ ዛሎ'' ዖዪ ዬኤፒዳ ዓኣንቴ ዬሱሴ ዔያቶም፦ «ዬኤኪፖቴ፤ ናዔላ ጊጊንዓንዳፓዓቴም ሃሃይቂባኣሴ» ጌዔኔ።

⁵³ዔያታ ጋዓንቴ ናዔላ ሃይቄሢ ዔሬሢሮ ቢያሢ ዒዛ ቦሂ፥ ሚኢጬኔ።

⁵⁴ዬሱሴ ናዔሎኮ ኩጮ ዓርቃዖ፦ «ዓንቆ፥ ዔቄ!» ጌዔኔ።

⁵⁵ዒዛ ሼምፓሢ ዒዞኮ ማዔሢሮ ቤዞማና ላዓ ጌዒ ዔቃዛ፥ ዬሱሴ፦ «ዒዛ ሙዓንዳ ባኣዚ'' ዒዞም ዒንጉዋቴ» ጌዒ ዔያቶ ዓይሤኔ።

⁵⁶ናዔሎኮ ዓዶና ዒንዶና ዲቃቲ ሄርሼኔ፤ ዒዚ ጋዓንቴ፦ «ሃያ ባኮ ዖኦማኣ ኬኤዚፖቴ» ጌዔኔ።