Read maale ሉቃሴ 9 Bible Online

ሉቃሴ 9 - maale bible

ሉቃሴ 9

¹ዬሱሴ ታጶ ላምዖ ዳኪንቴዞንሢ ዒዛ ባንሢ ዔኤላ''ዖ ፑርቶ ዓያኖ ቢያ ኬሳ''ንዳያ ሓሣ ዱማ ዱማ ዶርዖዋ ፖዒሳንዳ ዎልቄና ቢታንቶና ዔያቶም ዒንጌኔ።

²ፆኦሲ ካኣቱሞ ዛሎ'' ዓሶም ቢያ ኬኤዛንዳጉዲ፥ ሃርጊንቴ ዓሶዋ ፖዒሳንዳጉዲ ዔያቶ ዳካዖ፦

³«ዒንሢኮ ጎይፆም ማዓ ባኣዚ'' ዓይጎዋ ዔኪፖቴ፤ ኮኦሎ'' ማዔቶዋ፥ ጋላታቶዋ፥ ጋላ ዓርቆ ሉካ''ታቶዋ፥ ሚኢሼታቶዋ፥ ዒንሢ ማኣዔ ዓፒላፓ ሜሌ'' ማኣዖዋ ዔኪፖቴ።

⁴ሾኦቹሞና ዒንሢ ጌላ ማኣሮይዳ ዬኖ ጉርዴሎይዳፓ ኬስኪ ዓኣዻንዳያ ሄላ''ንዳኣና ዒኢካ ዴዑዋቴ።

⁵ዓሳ ዒንሢ ሾኦቺንሢ ዔኩዋያ ማዔቶ ጋዓንቴ ዬኖ ጉርዴሎ ሃሺ'' ኬስካዖ፥ ቶካ''ፓ ዒንሢኮ ሲላሎ ፒፂ''[5] ዓኣዹዋቴ፤ ዬይ ዔያቶም ‹ዒንሢና ዔሩዋቴ› ጋዓ ማርካቶ ማዓንዳኔ» ጌዔኔ።

⁶ዬያሮ ዳኪንቴዞንሢ ዬካፓ ኬስኪ ኮዦ ሃይሶ ዔርዚ ዔርዚ፥ ሃርጊንቴ ዓሶዋ ፖዒሲ ፖዒሲ ጉርዶ ቢያይዴና ዓኣዼኔ።

⁷ጌሊላ ዓጮ'' ዎይሣ፥ ሄሮዲሴ ዬሱሴ ማዼ ባኮ ቢያ ዋይዜሢሮ ጎዖንዶ ጎይሢ ባይዜኔ፤ ዓይጎሮ ጌዔቶ ፔቴ'' ፔቴ'' ዓሳ፦ «ማስካ ዮሓኒሴ ሃይቦ''ይዳፓ ዔቄኔ» ጌዒ ጌዒ ጌስታሢሮኬ።

⁸ዬያጉዲ ሃሣ ፔቴ'' ፔቴ'' ዓሳ፦ «ፆኦሲ ማሊፆ ኬኤዛ ዔኤሊያሴ ማዒ ሙኬኔ» ጋዓዛ፥ ዓቴ'' ዓሳ ሃሣ፦ «ሚና ፆኦሲ ማሊፆ ኬኤዛዞንሢዳፓ ፔቴ'' ሃይባ''ፓ ዔቄኔ» ጋዓኔ።

⁹ሄሮዲሴ ፔ ዛሎ''ና፦ «ታኣኒ ዮሓኒሴኮ ቶኦኮ'' ቲቂሴንቴ፥ ሂዳዖ ሃያ ቢያ ባኮ ማዻኔ ጌይንቲ ኬኤዚንታሢ ዒ ዖናዳይ?» ጌዒ ዛጋኒ ኮዓኔ።

¹⁰ዳኪንቴዞንሢ ዳኪንቴ ቤዛፓ ማዒ ሙካዖ ማዼ ባኮ ቢያ ዬሱሴም ኬኤዜኔ። ዒማ''ና ዒዚ ዔያቶ ዱማሲ ዔኪ ቤቴሳይዳ ጌይንታ ካታሞ ዓኣዼኔ።

¹¹ዓሳ ዬሱሴ ዓንካ ዓኣቶዋ ዔራዖ ዒዛ ጊንፆ ሙካዛ፥ ዒዚ ዔያቶ ዔኪ ፆኦሲ ካኣቱሞ ዛሎ'' ዔርዜኔ። ዶርዓሢዳፓኣ ፖዓኒ ኮዔ ሃርጊንቴ ዓሶዋ ፖዒሴኔ።

¹²ሳዓ ዓማ''ኒ ጋዓኣና ታጶ ላምዖንሢ ዬሱሴ ኮራ ሙካዖ፦ «ኑኡኒ ዓኣ ቤዛ ዓሲ ናንጉዋ ዳውሎ''ይዳኬ፤ ዬያሮ ዓሳ ሃካ ኮይሎ''ይዳ ዓኣ ካታሞና ካታሞ ዙላ'' ዓኣ ጉርዶ ዴንዲ ሙዖ ባኣዚ''ና ዎርቆ ቤሲና ኮይ ዴንቃንዳጉዲ ዓሶ ዳኬ» ጌዔኔ።

¹³ዬሱሴ ጋዓንቴ፦ «ዒንሢ፥ ዔያታ ሙዓንዳ ባኣዚ'' ዒንጉዋቴ» ጋዓዛ፥ ዔያታ ማሃዖ፦ «ኑኡኮ ዓኣዞንሢ ዶንጎ ካሣና ላምዖ ሞሎና ሌሊኬ፤ ዬያሮ ኑ ዓኣዺ ካሣ ሻንቂባኣያታቶ ሃያ ዴሮ''ም ቢያ ጊዳዓኬ» ዒዛም ጌዔኔ።

¹⁴ዒማ''ና ዓቲንቆኮ ሚርጉማ ዶንጎ ሺያ ማዓያኬ። ዬካፓ ዬሱሴ ጊንፆ ሃንታዞንሢም፦ «ዓሶ ዶንጊታሚ'' ዶንጊታሚ'' ማሂ ፓቂ ዴይሡዋቴ» ጌዔኔ።

¹⁵ጊንፆ ሃንታ ናኣታ'' ዒዚ ዔያቶ ዓይሤሢጉዲ ዓሶ ዴይሤኔ።

¹⁶ዬካፓ ዬሱሴ ዶንጎ ካሦንሢና ላምዖ ሞሎንሢና ዔኪ ሌካ ጫሪንጮ ዼ'ጊ ጌዒ ዛጋዖ ፆኦሲ ጋላቲ፥ ቡንፄስካፓ ዓሶም ዔያታ ዒንጋንዳጉዲ ዒዛኮ ጊንፆ ሃንታዞንሢም ዒንጌኔ፤

¹⁷ቢያሢ ሙይ ሚሽካዛ፥ ዒዛኮ ጊንፆ ሃንታዞንሢ ዓቴ'' ዶንቦ ታጶ ላምዖ ዳልጊ ሌማቴ ኩሙሢ ዔኬኔ።

¹⁸ፔቴ'' ኬሊ'' ዬሱሴ ፔኤሮ ሌሊ ሺኢቂቤቃ ዒዛኮ ጊንፆ ሃንታዞንሢ ዒዛ ኮራ ዓኣሢሮ፦ «ዓሳ ታና ዖናኬ ጋዓይ?» ጌይ ዔያቶ ኮራ ዖኦጬኔ።

¹⁹ዔያታ ማሃዖ፦ «ፔቴ'' ፔቴ'' ዓሳ፥ ‹ማስካ ዮሓኒሴኬ› ዛላ'' ሃሣ ‹ዔኤሊያሴኬ› ኔና ጋዓኔ፤ ዓቴ'' ዓሳ ሃሣ ‹ሚና ቤርታ ፆኦሲ ማሊፆ ኬኤዛዞንሢዳፓ ፔቴ'' ሃይባ''ፓ ዔቄኔ› ጋዓሢያ ዓኣኔ» ጌዔኔ።

²⁰ዒንሢ፦ «ታና ዖናኬ ጋዓይ?» ጌይ ዔያቶ ዖኦጫዛ፥ ጴፂሮሴ ማሃዖ፦ «ኔኤኒ ፆኦሲ ኔና ዳኬ፥ ሜሲሔኬ» ጌዔኔ።

²¹ዬሱሴያ ዬያ ዔያታ ዖኦማኣ ኬኤዙዋጉዲ ላቲ ዔያቶም ኬኤዜኔ።

²²ዬካፓ ሃሣ ዬሱሴ ፔኤኮ ጊንፆ ሃንታ ናኣቶ''ም፦ «ዓሲኮ ናዓሢ ሚርጌ ሜቶ ዔካንዳያ ኮይሳኔ፤ ጪሞና ቄኤሶኮ ሱኡጎና ሃሣ ሙሴ ዔርዜ ዎጎ ዔርዛ ዓሳኣ ዒዛ ቦሂ ሃሻ''ንዳኔ፤ ሃሣ ዎዺያ ዎዻንዳኔ፤ ማዔቶዋ ሃይሣሳ ኬሎ''ና ሃይባ''ፓ ዔቃንዳኔ» ጌዔኔ።

²³ቢያሢም ሃሣ፦ «ታ ጊንፆ ሙካኒ ናሽካያ ዓኣቶ ፔና ሃሾ''ንጎ፤ ቢያ ኬሊ'' ሃይቢ ሄላ''ንዳኣና ጊኢጌያ ማዒ ታ ጊንፆ ሃንቶንጎ፤

²⁴ፔ ናንጎ ዓይሳኒ ኮዓሢ ቢያ ፔ ናንጎ ባይዛንዳኔ፤ ታ ጋይቴ ጌዒ ፔ ናንጎ ዓኣሢ ዒንጋሢ ጋዓንቴ ፔ ናንጎ ዓይሳንዳኔ።

²⁵ዓሲ ዓጮ''ይዳ ዓኣ ቆሎ ቢያ ዴንቃዖ ናንጎ ፔኤኮ ባይዚ ሓሣ ጉሪ ዓታያ ማዔቶ ዓይጎ ፓሣንዳይ?

²⁶ታኣና ታ ቃኣሎ''ና ዛሎ'' ኬኤዛኒ ቦርሲንታሢዳ ቢያ ዓሲኮ ናዓሢ ፔ ቦንቾና ሃሣ ፔ ዓዶ ቦንቾና ዬያጉዲ ጌኤዦ ኪኢታንቾ ቦንቾና ሙካ ዎዶ''ና ዒዛይዳ ቦርሲንታንዳኔ።

²⁷ጎኔ ታ ዒንሢም ጋዓኔ፤ ሃሢ ሃይካ ዒንሢ ባኣካ''ፓ ፆኦሲ ካኣቱሞ ዛጋንዳያ ሄላ''ንዳኣና ሃይቂንዱዋ ፔቴ'' ፔቴ'' ዓሲ ዓኣኔ» ጌዔኔ።

²⁸ዬሱሴ ዬያ ባኮ ኬኤዜሢኮ ሳሊ'' ኬሊ''ኮ ጊንፃ ጲፂሮሴና ዮሓኒሴና ያይቆኦቤና ዔኪ ሺኢቃኒ ፔቴ'' ዹካ'' ኬስኬኔ።

²⁹ዒዚ ሺኢቃንቴ ዓውካራ ዒዛኮ ላኣሚንቲ ዓፒላ''ኣ ዒዛኮ ቦኦሪ፥ ዓኣፓ ዱካያ ማዔኔ፤

³⁰ዬማና ዔርቲባኣንቴ ላምዖ ዓሲ ሙኪ ዒዛና ዎላ'' ጌስታኔ። ዬንሢያ ሙሴና ዔኤሊያሴናኬ።

³¹ቦንቾና ጴዺ ዒዛና ዔያታ ጌስታሢ' ዬሱሴ ዬሩሳላሜይዳ ሃይቂ ፆኦሲ ማሊፆ ኩንሣንዳሢ ዛሎ''ኬ።

³²ዬማና ጴፂሮሴና ዒዛኮ ላጎንሢና ጊንዓ ባሼም ላሂ ዓኣኔ። ጋዓንቴ ዔያታ ጴጪ ዬሱሴ ፔ ቦንቾና ፖዒ ዓኣንቴ ዴንቄኔ፤ ሃሣ ዬያጉዲ ዒዛና ዎላ'' ዓኣ ላምዖ ዓሶንሢያ ዴንቄኔ።

³³ላምዖ ዓሶንሢ ዬሱሴ ኮራፓ ዱማዺ ዓኣዻዛ ጴፂሮሴ ዬሱሴ ኮራ፦ «ዔርዛሢዮ! ኑም ሃይካ ዴዒፃ ኮሺኬ፤ ዬያሮ ፔቴ'' ኔኤም፥ ፔቴ'' ሙሴም፥ ፔቴ'' ሃሣ ዔኤሊያሴም ማዓያ ሃይሦ ዉዲ ኑኡኒ ማዦም» ጌዔኔ። ጴፂሮሴ ዬያ ጋዓኣና ዒ ጋዓ ባኮ ዔሩዋያኬ።

³⁴ጴፂሮሴ ዬያ ኬኤዜ ጎይሣ ዓኣንቴ ሻኣሬ ሙኪ ዔያቶ ባይዜኔ፤ ዬይ ሻኣራ ዔያቶ ባይዛዛ ዔያታ ዒጊጬኔ።

³⁵ሻኣሮ ባኣኮ''ይዳፓ፦ «ታኣኒ ዶኦሬ፥ ታ ናዓሢ ሃያኬ፤ ዒዚ ጋዓሢ ዋይዙዋቴ» ጋዓ ዑኡሲ ዋይዚንቴኔ።

³⁶ዑኡዛ ዋይዚንቴሢኮ ጊንፃ ዬሱሴ ፔኤሮ ሌሊ ዓቲ'' ጴዼኔ፤ ዬንሢ ዒዛና ዓኣ ጊንፆ ሃንታዞንሢ ዔያታ ዛጌ ባኮ ቢያ ዒማ''ና ዖኦማኣ ኬኤዙዋዖ ዚቲዮ ጌዔኔ።

³⁷ዚሮ ጉቴ''ሎ ዬሱሴና ሃይሦ ዒዛኮ ጊንፆ ሃንታዞንሢና ዎላ'' ዹካ''ፓ ኬዳ''ዛ ሚርጌ ዓሲ ዬሱሴና ካኣሜኔ።

³⁸ዓሶ ባኣኮ''ይዳፓ ፔቴ'' ዓሲስኬይ፦ «ዔርዛሢዮ! ሓይ ናዓሢ ታኣኮ ፔቴ'' ሌሊኬ፤ ሃዳራ ታኣም ዛጌ፤

³⁹ሃኣዛጌ፥ ዒዛ ፑርታ ዓያና ዓርቂ ዔሩዋንቴ ዒላሣኔ፤ ሳዖይዳኣ ሎንሢ ዻንጎና ዱባሲ ዱባሲ ባርዲሳኔ፤ ዑፆዋ ዒዛኮ ኪፃሲ ኮሺ'' ሜታሴስካፓ ሓሻ''ኔ።

⁴⁰ዬያ ፑርቶ ዓያናሢ ኬሳ''ንዳጉዲ ኔኤኮ ጊንፆ ሃንታዞንሢ ታ ዖኦጬንቴ ዔያታ ኬሳ''ኒ ዳንዳዒባኣሴ» ጌዒ ዒላቴኔ።

⁴¹ዬሱሴ ማሃዖ፦ «ዒንሢ ጉሙርቁዋ፥ ሃይ ዎቦ ሾይንታ! ታ ዒንሢና ዎላ'' ዓይዲ ሄላ''ንዳኣና ናንጋንዳይ? ሃሣ ዓይዲ ሄላ''ንዳኣና ታ ዒንሢ ጊቢ'' ዳንዳዓንዳይ? ሂንዳ ኔኤኮ ናዓሢ ሃኒ ዔኪ ባዔ» ጌዔኔ።

⁴²ናዓሢ ዬሱሴ ባንሢ ዑኬ ዎዶ''ና ፑርቶ ዓያናሢ ናዖ ሳዓ ሎንሢ ባርዲሳኣና ዬሱሴ ፑርቶ ዓያናሢ ጎሪ''፥ ናዓሢያ ዻቂሺ ዓዳሢም ዒንጌኔ።

⁴³ዴራ'' ቢያ ፆኦሲኮ ዼኤፖ ዎልቆ ዛጌሢሮ ዲቃቲ ሄርሼኔ፤ ዓሳ ቢያ ማዺንቴ ባኮና ዲቃቲ ሄርሺፆይዳ ዓኣንቴ ዬሱሴ ዒዛኮ ጊንፆ ሃንታ ናኣቶ''ም፦

⁴⁴«ሓያ ታ ዒንሢም ኬኤዛ ቃኣሎ'' ዒና ዔኪ ማሉዋቴ፤ ሓይሾ ዓካሪ ዓሲኮ ናዓሢ ዓሶ ኩጫ ዓኣሢ ዒንጊንታንዳኔ» ጌዔኔ።

⁴⁵ዔያታ ጋዓንቴ ዬያ ዒ ጌዔ ባኮ ዔሪባኣሴ፤ ፆኦሲ ዔያቶም ዒ ጌዔ ባካ ዎዚ ጌይሢታቴያ ዓኣቼሢሮ ዒ ጌዔ ባካ ዔያቶም ጌሊባኣሴ፤ ጋዓንቴ ዒዛ ዖኦጫኒ ዔያታ ዒጊጬኔ።

⁴⁶ዒዛኮ ጊንፆ ሃንታ ናኣታ''፦ «ኑጊዳፓ ቢያ ባሼሢ ዖናዳይ?» ጌዒ ዎላ'' ማርሜኔ።

⁴⁷ዬሱሴ ጋዓንቴ ዔያቶኮ ዒኖ'' ማሊፆ ዔራዖ ፔቴ'' ናይ ዔኪ ሙኪ ፔ ኮይላ'' ዔቂሲ፦

⁴⁸«ሓያ ናዖ ታ ሱንፆና ቦንቺ ዔካሢ ቢያ ታና ዔካኔ፤ ታና ቦንቺ ዔካሢያ ቢያ ታና ዳኬሢያ ዔካኔ። ዒንሢ ባኣካ''ፓ ቢያ ባሼ ሂርኬ ማዓ ዓሢ ዒዚ ቢያይዳፓ ባሼ ማዓንዳኔ» ዔያቶም ጌዔኔ።

⁴⁹ዬካፓ ዮሓኒሴ ዬሱሴ ኮራ፦ «ዔርዛሢዮ! ፔቴ'' ዓሲ ኔ ሱንፆና ፑርታ ዓያና ኬሳ''ንቴ ኑ ዛጌኔ፤ ጋዓንቴ ዒ ኑኡና ዎላ'' ኔ ዓሲ ማዒባኣሢሮ ዒዚ ኬሱ''ዋጉዲ ኑ ላኣጌኔ» ጌዔኔ።

⁵⁰ዬሱሴ ማሃዖ፦ «ዒንሢ ማኪ፥ ዒፁዋኣሢ ቢያ ዒንሢና ዎላ''ታሢሮ ሃሹ''ዋቴ፥ ላኣጊፖቴ» ጌዔኔ።

⁵¹ዬሱሴ ሌካ ጫሪንጮ ዔውታ ኬላ'' ዑኬ ዎዶ''ና ዬሩሳላሜ ባንሢ ዓኣዻኒ ማሊ ዔቄኔ።

⁵²ዒዛኮ ቤርታ ቢሪ ዓኣዻንዳ ኪኢታ ዓሲያ ዳኬኔ፤ ዔያታ ቢያ ባኣዚ'' ጊኢጊሻኒ ሳማሪያይዳ ዓኣ ፔቴ'' ጉርዳ ዓኣዼኔ።

⁵³ጋዓንቴ ዬኖ ጉርዴሎ ዓሳ ዒዛ ሾኦቺንሢ ዔካኒ ኮዒባኣሴ፤ ዓይጎሮ ጌዔቶ ዒዚ ዬኖ ዓጮ''ና ጌዒ ዬሩሳላሜ ዓኣዻንዳሢ ዔያታ ዔሬሢሮኬ።

⁵⁴ዒዛኮ ጊንፆ ሃንታ፥ ያይቆኦቤና ዮሓኒሴና ዬያ ዛጌ ዎዶ''ና፦ «ጎዳሢዮ![6] ጫሪንቺዳፓ ታሚ ኬዲ'' ሃንሢ ዓሶንሢ ሙዓንዳጉዲ ኑ ዓይሦም?» ጌዔኔ።

⁵⁵ዬሱሴ ጋዓንቴ ዔያቶ ባንሢ ሺሪጋፓ፦ [«ዒንሢም ዎዚጉዴ ዓያና ዒንጊንቴቶዋ ዒንሢ ዔሩዋሴ፤ ዓሲኮ ናዓሢ ሙኬሢ ዓሲ ዓዓይሳኒ ማዓንዳኣፓዓቴም ባይዛኒቱዋሴ»] ጌይ ጎሬኔ።

⁵⁶ዬካፓ ዔያታ ዔቂ ሜሌ'' ጉርዳ ዓኣዼኔ።

⁵⁷ዬሱሴና ዒዛኮ ጊንፆ ሃንታዞንሢና ጎይፆ ዓኣዺፆይዳ ዓኣንቴ ፔቴ'' ዓሲ ዬሱሴ ኮራ፦ «ታኣኒ ኔ ዓኣዻ ቤዞ ቢያ ኔኤና ዎላ'' ዓኣዻኒ ኮዓኔ» ጌዔኔ።

⁵⁸ዬሱሴ ዒዛም ማሃዖ፦ «ዉኡካሢኮ ዔቴ ዓኣኔ፤ ካፖኮ ሃሣ ዎርቆ ማኣሪ ዓኣኔ፤ ዓሲ ናዓሢ ጋዓንቴ ላሂ ሃውሻንዳ ቤሲታዖ ባኣሴ» ጌዔኔ።

⁵⁹ባጋሢም ሃሣ፦ «ታ ጊንፆ ሙኬ» ጋዓዛ፥ ዓሢ ጋዓንቴ «ጎዳሢዮ! ቤርታዺ ታ ዴንዲ ዓዶ ዱኡኪ ሙኮም» ጌዔኔ።

⁶⁰ዬሱሴ ማሃዖ፦ «ሓይቄ ዓሳ ሃይቄ ዓሶ ዱኡካንዳጉዲ ሃሼ''፤ ኔኤኒ ጋዓንቴ ዓኣዺጋፓ ፆኦሲ ካኣቱሞ ዛሎ'' ዔርዜ» ጌዔኔ።

⁶¹ሃሣ ፔቴ'' ሜሌ'' ዓሲስኬይ፦ «ታ ጎዳሢዮ! ታ ኔ ጊንፆ ሙካኒ ኮዓኔ፤ ጋዓንቴ ቤርታዺ ታ ማኣሮ ዓሶ ሳራሢ ታ ዬዓንዳኔ» ጌዔኔ።

⁶²ዬሱሴ፦ «ጌማይ ጎሽካኣና ዙርጎ ዓርቃዖ ጊንሢም ዛጋ ዓሲ ፆኦሲ ካኣቱሞም ማዓ ዓሲቱዋሴ» ጌይ ዒዛም ማሄኔ።