Read maale ዮሓኒሴ 14 Bible Online

ዮሓኒሴ 14 - maale bible

ዮሓኒሴ 14

¹ዬካፓ ዬሱሴ፦ «ዒንሢኮ ዒና'' ማሊ ሜታዾፓ፤ ፆኦሲ ጉሙርቁዋቴ፤ ታናኣ ጉሙርቁዋቴ፤

²ታ ዓዶ ኮሮይዳ ሚርጌ ናንጎ ቤሲ ዓኣኔ፤ ያዺ ማዒባኣታቴ ‹ዒንሢ ናንጋንዳ ቤዞ ታ ጊኢጊሻኒ ዓኣዻንዳኔ› ታ ዒንሢም ጌይንዱዋያታንቴኬ።

³ታኣኒ ዴንዲ ዒንሢም ቤዞ ጊኢጊሼስካፓ ታኣኒ ዓኣ ቤዞይዳ ዒንሢያ ናንጋንዳጉዲ ላሚ ታ ሙኪ ዒንሢ ዔካንዳኔ።

⁴ታኣኒ ዴንዳ ቤዞ ሄሊ''ሳ ጎይፆ ዒንሢ ዔራኔ» ጌዔኔ።

⁵ቶኦማኣሴ ዒማ''ና፦ «ጎዳሢዮ! ዓንኮ ኔ ዓኣዻቶዋ ኑ ዔሩዋሴ፤ ሂዳዖ ጎይፆ ኑ ዎዲ'' ዔራኒ ዳንዳዓንዳይ?» ዬሱሴ ኮራ ጌዔኔ።

⁶ዬሱሴ ዒዛም፦ «ጎኑሞና ጎይፃሢና ሼምፓሢያ ታናኬ፤ ታ ዛሎ''ና ማዒባኣታዖ ዖኦኒያ ዓዶ ኮራ ሙካንዳይ ባኣሴ።

⁷ታና ዒንሢ ዔሬያታቴ ታ ዓዶዋ ዒንሢ ዔሬያ ናንዳንቴኬ፤ ሃካፓ ሴካ ጋዓንቴ ዒንሢ ዔራንዳኔ፤ ዒዛ ዒንሢ ዛጌኔ» ጌዔኔ።

⁸ፒልጶሴ፦ «ጎዳሢዮ! ዓዶ ኑና ኔ ዻዌቴ ማይ ኑም ጊዳንዳኔ» ዒዛ ኮራ ጌዔኔ።

⁹ዬሱሴ ዒዛም፦ «ፒልጶሴ! ሓያጉዴ ዎዴ ታ ዒንሢና ዎላ'' ናንጋዛ ኔ ታና ዔሩዋዓዳ? ታና ዛጌሢ ዓዶ ዛጌኔ፤ ሂዳዖ ዓካሪ ኔኤኒ ‹ዓዶ ኑና ዻዌ› ዎይቲ ጋዓይ?

¹⁰ታኣኒ ዓዶና ዎላ'' ዓኣሢ ሃሣ ዓዴያ ታኣና ማዔሢ ኔ ጉሙርቁዋዓዳ? ዒንሢም ኬኤዛ ቃኣሎ'' ታኣኒ ኬኤዛሢ ታ ቢታንቶናቱዋሴ፤ ጋዓንቴ ማዾ'' ቢያ ማዻሢ ታኣና ናንጋ፥ ዓዶኬ።

¹¹ታኣኒ ዓዶና ዓኣሢጉዲ ዓዴያ ታኣና ዓኣሢ ታ ዒንሢም ኬኤዛሢ ጉሙርቁዋቴ፤ ዬይ ዓቴቴ ታኣኒ ማዻ ዓኮ ባኮ ዛሎ''ሮታዖ ታና ጉሙርቁዋቴ።

¹²ጎኔ ታ ዒንሢም ጋዓኔ፤ ታና ጉሙርቃሢ ታኣኒ ማዻ ማዾ'' ማዻንዳኔ፤ ዬያፓ ዑሣ ዓኣዼ ባኣዚ''ያ ማዻንዳኔ፤ ዓይጎሮ ጌዔቴ ታኣኒ ሌካ ታ ዓዶ ባንሢ ዴንዳንዳኔ።

¹³ዓዴ ናዓሢ ዛሎ''ና ቦንቺንታንዳጉዲ ታ ሱ'ንፆና ዒንሢ ሺኢቃ ባኮ ቢያ ታ ዒንሢም ማዻንዳኔ።

¹⁴ዓይጎ ባኣዚ''ታቶዋ ታ ሱ'ንፆና ዒንሢ ሺኢቄቶ ታ ማዻንዳኔ» ጌዔኔ።

¹⁵ዬሱሴ ሃሣ ኬኤዛዖ፦ «ታና ዒንሢ ናሽካያ ማዔቶ ታ ዓይሢፆ ዒንሢ ካፓንዳኔ፤

¹⁶ታኣኒ ዓዶ ሺኢቃንዳኔ፤ ዒዚያ ናንጊና ዒንሢና ናንጋንዳ፥ ሜሌ'' ዶዲሻያ ዒንሢም ዒንጋንዳኔ።

¹⁷ዬያ ዶዲሻሢ ዓጫ'' ዴንቂንዱዋኣሢሮና ዔሪንዱዋኣሢሮ ዔካኒ ዳንዳዑዋሴ፥ ዬይ ጎኑሞ ዔርዛ ዓያናኬ፤ ዒንሢ ጋዓንቴ ዬያ ዔራንዳኔ፤ ዓይጎሮ ጌዔቴ ዒንሢና ዎላ'' ናንጋንዳሢሮና ዒንሢኮ ጋሮይዳ ማዓንዳሢሮኬ።

¹⁸«ዓዶና ዒንዶናባኣ ናይጉዲ ታ ዒንሢ ዒንሢሮ ሌሊ ሃሺ''ንዱዋሴ፤ ማዒ ታ ዒንሢ ኮራ ሙካንዳኔ።

¹⁹ዻካ'' ዎዴኮ ጊንፃፓ ዓጫ'' ታና ዛጊንዱዋሴ፤ ዒንሢ ጋዓንቴ ታና ዛጋንዳኔ፤ ታኣኒ ናንጊና ባይቁዋያ ማዔሢሮ ዒንሢያ ናንጊና ባይቁዋያ ማዒ ናንጋንዳኔ፤

²⁰ታኣኒ ዓዶና ዓኣሢ፥ ዒንሢያ ታኣና ዓኣሢ፥ ታኣኒያ ዒንሢና ዓኣሢ ዬኖ ኬሎ''ና ዒንሢ ዔራንዳኔ።

²¹«ታኣኮ ዓይሢፆ ዔካሢና ሃሣ ማዾይዳ ፔኤሻሢ፥ ዒዚ ታና ናሽካኔ፤ ታና ናሽካሢ ታ ዓዴያ ዒዛ ናሽካንዳኔ፤ ታኣ ዒዛ ናሽካንዳኔ፤ ታና ታ ዒዛም ፔጋሲ ዻዋንዳኔ» ጌዔኔ።

²²ዓስቆሮንቶ ካታሞሲቱዋንቴ ሃንጎ ዪሁዳ፦ «ጎዳሢዮ! ኔና ዓጮ''ምቱዋንቴ ኑም ኔ ፔጋሲ ዻዋንዳሢ ዎይቲዳይ?» ዒዛ ኮራ ጌዔኔ።

²³ዬሱሴ ዒዛም፦ «ታና ናሽካሢ ታ ቃኣሎ'' ካፓንዳኔ፤ ታ ዓዴያ ዒዛ ናሽካንዳኔ፤ ኑኡኒያ ዒዛ ኮይላ'' ሙኪ ዒዛና ዎላ'' ናንጋንዳኔ።

²⁴ታና ናሽኩዋኣሢ ታ ቃኣሎ'' ካፒንዱዋሴ፤ ሃይ ዒንሢ ዋይዛ ቃኣላ'' ታና ዳኬ፥ ዓዶሮ ማዓንዳኣፓዓቴም ታኣሮቱዋሴ» ጌዔኔ።

²⁵ዬሱሴ ሃሣ፦ «ሓሢ ታ ዒንሢና ዎላ'' ዓኣዖ ሃያ ባኮ ታ ዒንሢም ኬኤዜኔ፤

²⁶ዓዴ ታ ሱ'ንፆና ዳካ፥ ዶዲሻ ዓያኖ ጌኤዣ ጋዓንቴ ቢያ ባኣዚ'' ዒንሢ ዔርዛንዳኔ፤ ታ ዒንሢም ኬኤዜ ባኮዋ ቢያ ዒንሢ ጶቂሳንዳጉዲ ማሃንዳኔ።

²⁷«ኮሹሞ ታ ዒንሢም ዒንጋንዳኔ፤ ሃሣ ታ ኮሹሞዋ ታ ዒንሢም ዒንጋንዳኔ፤ ታኣኒ ዒንሢም ዒንጋ ኮሹማ ዓጫ'' ዒንሢም ዒንጋሢጉዲቱዋሴ፤ ዒና'' ዒንሢኮ ማሊ ሜታዺ ዒጊጮፓ» ጌዔኔ።

²⁸ዬሱሴ ሃሣ ኬኤዛዖ፦ « ‹ታኣኒ ዒንሢ ኮራፓ ዓኣዻንዳኔ፤ ሃሣ ማዒያ ታ ዒንሢ ባንሢ ሙካንዳኔ› ታ ጌዔሢ ዒንሢ ዋይዜኔ፤ ታና ዒንሢ ናሽካያ ማዔቶ ዓዴ ታጊዳፓ ባሼታሢሮ ታኣኒ ዓዶ ባንሢ ዓኣዺፆና ዒንሢ ዎዛዻንዳያታዖኬ።

²⁹ዬይ ያዺ ማዔ ዎዶ''ና ዒንሢ ጉሙርቃንዳጉዲ ዬይ ማዓንዳሢኮ ቤርታዺ ታ ዒንሢም ሃሢ ኬኤዜያኬ።

³⁰ሓያ ዓጮ'' ዎይሣ ፃላሄ ሙካሢሮ ሃካፓ ሴካ ታ ዒንሢና ዎላ'' ሚርጌ ጌስታዓኬ። ዒዚ ታ ጊዳ'' ፔቴ'' ባኣዚ''ያ ማዻኒ ዳንዳዑዋሴ፤

³¹ጋዓንቴ ታኣኒ ታ ዓዶ ናሽካሢ ዓጫ'' ዔራንዳጉዲ ዓዴ ታና ዓይሤ ባኮ ቢያ ታኣኒ ኩንሣንዳኔ፤ ‹ዓካሪ ሃካፓ ኑ ዴንዶም› » ጌዔኔ።