Read maale ዮሓኒሴ 17 Bible Online

ዮሓኒሴ 17 - maale bible

ዮሓኒሴ 17

¹ዬሱሴ ዬያ ኬኤዜሢኮ ጊንፃ ሌካ ጫሪንጮ ባንሢ ዛጋዖ ሂዚ ጌይ ሺኢቄኔ፦ «ታ ዓዳሢዮ! ሓይሾ ዎዳ'' ዓካሪ ሄሌ''ኔ፤ ናዓሢ ኔኤኮ ኔና ቦንቻንዳጉዲ ኔኤኮ ናዓሢ ቦንቼ፤

²ኔ ዒዛ ቦንቻንዳሢያኣ ኔኤኒ ዒዛሮ ማሂ ዒንጌሢም ቢያ ናንጊና ናንጊ ሼምፖ ዒ ዒንጋንዳጉዲ፥ ዓሶ ቢያሢ ዑፃ ቢታንቶ ኔ ዒንጌሢሮኬ።

³ናንጊና ናንጎ ሼምፖ ጌይፃ፦ ኔኤሮ ሌሊ ጎኔ ፆኦሲ ማዔሢ፥ ኔናንታ ኔኤኒ ዳኬ፥ ዬሱስ ኪሪስቶሴያ ዔሪሢኬ።

⁴ኔኤኒ ታኣም ዒንጌ ማዾ'' ኩንሢ ሳዖይዳ ታ ኔና ቦንቼኔ።

⁵ታ ዓዳሢዮ! ዓጫ'' ማዢንታንዳሢኮ ቤርታ ኔኤና ዎላ'' ታኣኮ ዓኣ ቦንቾ ጎይፆ ሃሢ ኔ ኮራ ታና ቦንቺሴ።

⁶«ዓጮ''ይዳፓ ዶኦሪ ኔ ታኣም ዒንጌ ዓሶም ኔኤኮ ዖኑሞ ታ ፔጋሲ ኬኤዜኔ፤ ዔያታ ኔኤሮኬ፤ ኔኤኒ ዔያቶ ታኣም ዒንጌኔ፤ ዔያታኣ ኔ ቃኣሎ'' ካፔኔ፤

⁷ኔ ታኣም ዒንጌ ባካ ቢያ ኔ ጊዳ''ፓ ማዔሢ ዔያታ ሃሢ ዔሬኔ።

⁸ኔ ታኣም ዒንጌ ቃኣሎ'' ታ ዔያቶም ዒንጌኔ፤ ዔያታኣ ዬያ ዔኬኔ፤ ኔ ኮይላ''ፓ ታ ሙኬሢያ ጎኔና ዔያታ ዔሬኔ፤ ሃሣ ኔ ታና ዳኬሢ ጉሙርቂ ዔያታ ዔኬኔ።

⁹«ታኣኒ ሃሢ ሺኢቃሢ ዔያቶሮኬ፤ ሃንሢ፥ ኔኤኒ ዒንጌዞንሢ ኔኤሮ ማዔሢሮ ዔያቶ ዛሎ'' ታ ሺኢቃኣፓዓቴም ሓያ ዓጮ''ሮ ማዔ ዓሶም ታ ሺኢቁዋሴ።

¹⁰ታኣም ማዔሢ ቢያ ኔኤሮኬ፤ ዬያጉዲ ሃሣ ኔኤም ማዔሢያ ታኣሮኬ፤ ታኣኒያ ዔያቶና ቦንቺንቴኔ።

¹¹ታኣኒ ሃይፓ ሴካ ዓጮ''ይዳ ናንጊንዱዋሴ፤ ዔያታ ጋዓንቴ ዓጫ''ኬ። ታኣኒ ኔ ኮይላ'' ሙካኒኬ፤ ጌኤዦ ዓዳሢዮ! ሃንሢ ኔ ታኣም ዒንጌዞንሢ ኑ ፔቴ'' ማዔ ጎይፆ ዔያታኣ ፔቴ'' ማዓንዳጉዲ ታኣም ኔኤኒ ዒንጌ፥ ኔ ሱ'ንፆና ዔያቶ ካፔ።[7]

¹²ታኣኒ ዔያቶና ዎላ'' ዓኣ ዎዶ''ና ኔ ታኣም ዒንጌ ኔ ሱ'ንፆና ታ ዔያቶ ካፔኔ[8] ዬያሮ ፃኣፒንቴ፥ ፆኦሲ ቃኣላ'' ኩማንዳጉዲ ዬያ ባይሲንቶ ናዓሢዳፓ ዓታዛ ፔቴ''ታዖ ዔያቶይዳፓ ዖኦኒያ ባይቂባኣሴ።

¹³ሃሢ ታኣኒ ኔ ኮራ ሙካኒኬ፤ ታኣኒ ዓጮ''ይዳ ዓኣዖ ዬያ ኬኤዛሢ ታ ዎዛዼሢጉዲ ዔያታኣ ሚርጌና ዎዛዻንዳጉዲኬ።

¹⁴ታኣኒ ኔኤኮ ቃኣሎ'' ዔያቶም ዒንጌኔ፤ ታኣኒ ዓጫ''ፓቱዋኣሢጉዲ ዔያታኣ ሃሣ ዓጫ''ፓቱዋሴ፤ ዬያሮ ዓጫ'' ዔያቶ ዒፃኔ።

¹⁵ፑርታፓ ዔያቶ ኔ ካፓንዳጉዲ ማዓንዳኣፓዓቴም ዓጮ''ይዳፓ ዙላ'' ኔ ዔያቶ ኬሳ''ንዳጉዲ ታ ኔና ሺኢቁዋሴ።

¹⁶ታኣኒ ሃያ ዓጫ''ፓቱዋኣሢጉዲ ዔያታኣ ሃያ ዓጫ''ፓቱዋሴ።

¹⁷ኔኤኮ ጎኑሞና ዔያቶ ኔኤም ዱማሴ፤ ኔኤኮ ቃኣላ''ኣ ጎኑሞኬ።

¹⁸ኔኤኒ ታና ዓጮ'' ባንሢ ዳኬሢጉዲ ታኣኒያ ዔያቶ ዓጮ'' ዳኬኔ።

¹⁹ዔያታ ጎኔና ኔኤም ዱማዼያ ማዓንዳጉዲ ታኣኒ ታ ቶኦኮ'' ዔያቶ ጋቴ ዱማሴኔ።

²⁰«ሃሢ ታ ኔና ሺኢቃሢ ሃንሢ፥ ዔያቶ ዛሎ''ሮ ሌሊቱዋንቴ ዔያታ ማርካዻ ቃኣሎ'' ዛሎ''ና ታና ጉሙርቃንዳ ዓሶንታም ዎላ''ኬ።

²¹ታ ኔና ሺኢቃሢ ቢያሢ ዎላ'' ፔቴ'' ማዓንዳጉዲኬ፤ ዬያጉዲ ሃሣ ዓዳሢዮ! ኔኤኒ ታኣና ዎላ'' ፔቴ'' ማዔሢጉዲ ታኣኒያ ኔኤና ዎላ'' ፔቴ'' ማዔሢጉዲ ዔያታኣ ኑኡና ዎላ'' ፔቴ'' ማዓንዳጉዲኬ፤ ሃሣ ኔኤኒ ታና ዳኬያ ማዔሢያ ዓጫ'' ጉሙርቃንዳጉዲኬ።

²²ኑኡኒ ፔቴ'' ማዔሢ ጎይፆ ዔያታኣ ዎላ'' ፔቴ'' ማዓንዳጉዲ ታኣም ኔኤኒ ዒንጌ ቦንቾ ታ ዔያቶም ዒንጌኔ።

²³ታኣኒ ኔና ሺኢቃሢ ታኣኒ ዔያቶና፤ ኔኤኒያ ታኣና ማዔሢጉዲ ዔያታኣ ጉቤና ፔቴ'' ማዓንዳጉዲኬ፤ ሃሣ ኔኤኒ ታና ዳኬሢና ኔ ታና ናሽኬሢጉዲ ዔያቶዋ ኔኤኒ ናሽካሢ ዓጫ'' ዔራንዳጉዲኬ።

²⁴«ታ ዓዳሢዮ! ዓጫ'' ማዢንቱዋንቴ ኔ ታና ናሽኬሢሮ ታኣም ኔኤኒ ዒንጌ ቦንቾ ዔያታ ዛጋንዳጉዲ ሃንሢ፥ ኔ ታኣም ዒንጌዞንሢ ታኣኒ ዓኣ ቤዞይዳ ታኣና ዎላ'' ዔያታ ናንጋንዳጉዲ ታ ኮዓኔ።

²⁵ፂሎ'' ዓዳሢዮ! ዓጫ'' ኔና ዔሪባኣሴ፤ ታኣኒ ጋዓንቴ ኔና ዔሬኔ፤ ሃንሢያ ሃሣ ኔ ታና ዳኬሢ ዔሬኔ።

²⁶ኔኤኒ ታና ናሽኬ ናሹሞ ጎይፆ ዔያታ ዎሊ ናሽካንዳጉዲ ሃሣ ታኣኒያ ዔያቶና ማዓንዳጉዲ ጊንሣ ሃሣ ዔያታ ኔና ዔራንዳጉዲ ታ ዔያቶ ማሄኔ፤ ዬኖ ጎይፆ ቃሲ'' ቃሲ'' ታ ማዻንዳኔ» ጌዔኔ።