Read maale ዮሓኒሴ 4 Bible Online

ዮሓኒሴ 4 - maale bible

ዮሓኒሴ 4

¹ዬኖ ዎዶ''ና ዬሱሴ ዮሓኒሴይዳፓ ባሼ ሚርጌ ዓሶ ፔና ዔርዚ፥ ፔ ዓሲ ማሃሢና ዋኣፆና ማስካሢያ ፔርሴ ዓሳ ዋይዜኔ፤

²ጋዓንቴ ዋኣፆና ዓሶ ማስካሢ ዒዛኮ ጊንፆ ሃንታዞንሢ ማዓንዳፓዓቴም ዒዚ ፔኤሮ ዋኣፆና ማስኩዋሴ።

³ዒዛ ዛሎ'' ጌይንቴ ባኮ ፔርሴ ዓሳ ዋይዜሢ ዒ ዔራዖ ዪሁዳ ዓጮ'' ሃሺ'' ጌሊላ ማዒ ዓኣዼኔ።

⁴ዒኢካ ዒ ዓኣዻዖ ሳማሪያ ዓጮ'' ጊዴና ዓኣዻንዳያ ዒዛ ኮይሴኔ።

⁵ዬያሮ ሲካሬ ጌይንታ ሳማሪያይዳ ዓኣ ካታሜሎ ዒ ሙኬኔ፤ ሲካሬ ያይቆኦቤ ፔኤኮ ናኣዚ'' ዮሴፔም ዒንጌ ቤዞኮ ኮይሎ''ይዳ ዓኣያኬ፤

⁶ዒኢካ ያይቆኦቤኮ ቦኦኮና ዔቴ ዋኣሢ ዓኣንቴ ዬሱሴ ጎይፆ ሓንቲ ላቤ''ሢሮ ዬኖ ዔቶ'' ዋኣፄሎ ዓጫ ዴዔኔ፤ ዬማና ዓባ'' ሳዛ ማዓያኬ።

⁷ዒማ''ና ፔቴ'' ሳማሪያ ዓጪ ላኣሊስኬና ዋኣፆ ዱዓኒ ዔቶ'' ባንሢ ሙካዛ ዬሱሴ፦ «ዔና፥ ዋኣሢ ታና ዑሼቴራ!» ጌዔኔ።

⁸ዬማና ዒዛኮ ጊንፆ ሓንታዞንሢ ሙኡዚ'' ሻንቃኒ ካታሞ ዴንዴኔ።

⁹ዬና ሳማሪያ ዓጮ'' ላኣሌላ ዬሱሴ ኮራ፦ «ኔኤኒ ዓይሁዴ ዓሲታዖ ዎዲ'' ታና ሳማሪያ ዓጮ'' ላኣሌሎ ‹ዋኣሢ ታና ዑሼ!› ጌይ ዖኦጫይ?» ጌዔኔ። ዬያ ዒዛ ጌዔሢ ዓይሁዶ ዓሶና ሳማሪያ ዓጮ'' ዓሶናኮ ዎላ'' ፔቱሞ ባኣሢሮኬ።

¹⁰ዬሱሴ፦ «ፆኦሲ ዒንጋ ባኮና ‹ዋኣፆ ታና ዑሼ› ኔና ጋዓሢኮ ዖኑሞ ኔ ዔሬያ ማዔቴ ዒዛ ሺኢቃኒ ኔና ኮይሳንቴኬ፤ ዒዚያ ኔኤም ናንጊ ዋኣሢ ዒንጋንዳያታንቴኬ» ጌዔኔ።

¹¹ዒዛ ማሃዖ፦ «ጎዳሢዮ! ኔኤኮ ዋኣሢ ዱዖ ባኣዚ'' ባኣሴ፤ ዋኣፆ ዔታኣ ኮሺ'' ዔታዻያኬ፤ ሂዳዖ ናንጎ ዋኣፆ ዓንካፓ ኔ ዴንቃንዳይ?

¹²ኔኤኒ ሓያ ኑም ዋኣፆ ዔቶ'' ዒንጌ፥ ኑ ዓዳሢ፥ ያይቆኦቤይዳፓ ባሼዳ? ዒዛና ዒዛኮ ናኣቶ''ና ዒዛኮ ቆልማኣ ሃኖ ዋኣፆ ዔታፓ ዑሽኬኔ» ጌዔኔ።

¹³ዬሱሴ ዒዞም ማሃዖ፦ «ሓኖ ዋኣፆይዳፓ ዑሽካሢ ቢያ ላሚ ዋኣሢ ዼኤባንዳኔ፤

¹⁴ታኣኒ ዒንጋ ዋኣፆይዳፓ ዑሽካሢ ናንጊና ፔቴ''ታዖ ዼኤቢንታዓኬ፤ ዓይጎሮ ጌዔቴ ታ ዒንጋ ዋኣፆ ዑሽካ ዓሢዳፓ ናንጊና ናንጊ ዋኣሢ ዓልቃያ ማዓንዳኔ» ጌዔኔ።

¹⁵ላኣሌላ፦ «ጎዳሢዮ! ሓይፓ ሴካ ዋኣሢ ታና ዼኤቡዋጉዲና ሓይካኣ ታ ዱዓኒ ሙኩዋጉዲ ሓዳራ ታኣም ዬኖጉዴ ዋኣፄሎ ዒንጌ» ጌዔኔ።

¹⁶ዬሱሴያ፦ «ዴንዲ ኔኤኮ ዓኒ ዔኤሊ'' ዔኪ ሙኬ» ጌዔኔ።

¹⁷ላኣሌላ፦ «ዓኒ ታኣኮ ባኣሴ» ጌይ ማሄኔ፤ ዬሱሴ ጊንሣ ዒዞም፦ «ዓኒ ታኣኮ ባኣሴ ጌይፃ ኔኤኮ ጎኔኬ፤

¹⁸ያዺ ማዔቴያ ኔኤኮ ዶንጎ ዓኒንሢ ዓኣኔ፤ ሓሢ ኔኤና ዎላ'' ዓኣሢ ኔኤኮ ዓኒቱዋሴ፤ ዬያሮ ኔኤኒ ጎኔ ጌስቴኔ» ጌዔኔ።

¹⁹ላኣሌላ ዒዛም፦ «ጎዳሢዮ! ኔኤኒ ፆኦሲ ማሊሢ ኬኤዛያታሢ ሓሢ ታ ኔና ዔሬኔ፤

²⁰ኑ ዓዶንሢ ሓያ ዹካ''ሢ ዑፃ ካኣሽካኔ፤ ዒንሢ ጋዓንቴ ‹ዓሲ ዚጊ ካኣሽካኒ ኮይሳሢ ዬሩሳላሜይዳኬ› ጋዓኔ» ጌዔኔ።

²¹ዬሱሴ ሃሣ ዒዞም፦ «ኔ ሓና ላኣሌላ ፆኦሲ ዓዳሢም ሓያ ዹኮ'' ዑፆይዳ፤ ሃሣ ዬሩሳላሜይዳ ዚጊ ካኣሽኪሢ ዛላ ዒንሢ ሜታዺንዱዋ ዎዴ ሙካንዳሢ ዔሪ ታና ጉሙርቄ፤

²²ዒንሢ ሳማሪያ ዓሳ ዒንሢሮ ዒንሢ ዔሩዋ ፆኦሲ ዚጊ ካኣሽካኔ፤ ኑኡኒ ጋዓንቴ ዻቂንታ ዓይሁዴይዳፓ ማዔሢሮ ኑ ዔራ ፆኦዛሢ ዚጊ ካኣሽካኔ።

²³ጋዓንቴ ጎኔና ዚጊ ካኣሽካዞንሢ፦ ፆኦሲ ዓዳሢም ዓያና ጌኤሺና ሓሣ ጎኑሞና ዚጊ ካኣሽካንዳ ዎዴ ሙካንዳኔ፤ ዬይ ሓሢ ሙኪናኣኮኬ፤ ፆኦሲ፥ ዓዳሢያ ኮዓሢ ዬያጉዴ ዚጊ ካኣሽኪፆኬ።

²⁴ፆኦሲ ዓያናኬ፤ ጎኑሞና ዒዛም ዚጊ ካኣሽካዞንሢያ ዓያናና ዚጊ ዒዛ ካኣሽካንዳያ ኮይሳኔ» ጌዔኔ።

²⁵ላኣሌላኣ፦ «ዓያና ጌኤሺ ካኣቱሞም ዓርቄ፥ ሜሲሔ ሙካንዳሢ ታ ዔራኔ፤ ዒዚ ሙካዖ ቢያ ባኣዚ'' ኑም ኬኤዛንዳኔ» ጌዔኔ።

²⁶ዬሱሴ ዒማ''ና፦ «ሓሢ ሓይ ኔኤና ጌስታሢ፥ ታ ዒዛኬ» ጌዔኔ።

²⁷ዬማና ዒዛኮ ጊንፆ ሃንታዞንሢ ዴንዴ ቤዛፓ ማዒ ሙካንቴ ዬሱሴ ላኣሊና ዎላ'' ጌስታሢሮ ዲቃቲ ሄርሼኔ፤ ማዔቶዋ፦ «ኔኤኒ ዔናኣሬ፥ ዓይጎ ኮዓይ? ሓሣ ዒዞና ዎላ'' ኔ ዓይጋ ጌስታይ?» ጌዒ ዖኦጬ ዓሲ ባኣሴ።

²⁸ዬካፓ ላኣሌላ ዋኣፆ ዱዓኒ ዔኪ ሙኬ ጉዞ ሓሺ''፥ ካታሞ ዴንዲ ዓሶም፦

²⁹«ታ ማዼ ባኮ ቢያ ታኣም ኬኤዜ ዓሲስኬያ ሃኒ ሙኪ ዛጉዋቴ! ጎዖንቴ ዒዚ ሜሲሔ ማዓንዳሞ?» ጌዔኔ።

³⁰ዬያሮ ዓሳ ካታማ''ፓ ኬስኪ ዬሱሴ ዓኣ ቤዞ ባንሢ ዴንዴኔ።

³¹ዒማ''ና ዒዛኮ ጊንፆ ሃንታ ናኣታ'' ዬሱሴ ኮራ፦ «ዔርዛሢዮ! ካሦ ሙዔ» ጌይ ዒዛ ሺኢቄኔ።

³²ዒዚ ጋዓንቴ፦ «ዒንሢ ዔሩዋያ፥ ታኣኒ ሙዓ ሙኡዚ'' ታኣኮ ዓኣኔ» ዔያቶም ጌዔኔ።

³³ዬያሮ ዒዛኮ ጊንፆ ሓንታዞንሢ፦ «ዓሲ ዒዛም ሙኡዚ'' ዔኪ ሙኬያናንዳሞ?» ዎሊ ኮይላ'' ጌዔኔ።

³⁴ዬሱሴ ዔያቶም፦ «ታኣኮ ሙዓ ታና ዳኬሢኮ ዓይሢፆ ኩንሥሢና ማዾ''ዋ ማዺሢኬ።

³⁵ዒንሢ፦ ‹ሓጊ ዖይዶ ዓጊኒ ዓቴ''ኔ፤ ዬካፓ ማኣሊ'' ቡሪንታንዳኔ› ጋዓያቱዋይ? ታ ሓሢ ዒንሢም ‹ሂንዳ ዼ'ግ ጌይጋፓ ማኣላ'' ሃሢ ቡሪሢም ሄሌ''ሢ ዛጉዋቴ› ጋዓኔ።

³⁶ማኣሎ'' ቡራሢ ዒ ማኣሎ'' ቡሬሢ ዛሎ'' ዔካንዳኔ፤ ናንጊና ናንጊም ማዓ ዓኣፒያ ቡኩሳንዳኔ፤ ዬያሮ ዜርቃሢያ፥ ማኣሎ'' ቡራሢያ ዎላ'' ዎዛዻንዳኔ።

³⁷ዬያ ጎይፆና ‹ፔቴ''ይ ዜርቃኔ፥ ሜሌ''ሢ ሃሣ ማኣሎ'' ቡራኔ› ጌይንቴ ማላታ ጎኔኬ።

³⁸ዒንሢ ላቢ''ባኣ ማኣሊ'' ቡራንዳጉዲ ታ ዒንሢ ዳኬኔ፤ ሜሌ'' ዓሳ ማዾ''ና ላቤ''ኔ፤ ዒንሢ ጋዓንቴ ዔያቶኮ ላቢ''ፆ ዓኣፖ ቡኩሲ ዔኬኔ» ጌዔኔ።

³⁹ላኣሌላ፦ «ታ ማዼ ባኮ ቢያ ታኣም ኬኤዜኔ» ጌዒ ዒዛ ማርካዼሢሮ ዬኖ ካታሜሎይዳ ሚርጌ ሳማሪያ ዓጪ ዓሲ ዬሱሴ ጉሙርቄኔ።

⁴⁰ዬያሮ ሳማሪያ ዓጮ'' ዓሳ ዒዛ ኮራ ሙካዖ ዔያቶና ዎላ'' ዒ ዴዓንዳጉዲ ዒዛ ሺኢቃዛ፥ ዒዚያ ላምዖ ኬሊ'' ዒኢካ ፔኤቄኔ።

⁴¹ዒ ኬኤዛ ቃኣሎ'' ዛሎ''ና ሜሌ'' ሚርጌ ዓሲ ዒዛ ጉሙርቄኔ።

⁴²ዓሳ ላኣሌሎም፦ «ዓካሪ ኑኡኒ ዒዛ ጉሙርቄሢ ኔኤኒ ኑም ኬኤዜ ቃኣሎ''ና ሌሊቱዋንቴ ኑ ኑ ቶኦኪና ዋይዜሢሮና ጎኔና ዒዚ ዓጮ'' ዻቂሻያ ማዔሢ ኑ ዔሬሢሮኬ» ጌዔኔ።

⁴³ዬሱሴ ሳማሪያይዳ ላምዖ ኬሊ'' ፔኤቄስካፓ ጌሊላ ዓኣዼኔ።

⁴⁴ዒዚ ፔ ቶኦኪና፦ «ፆኦሲ ማሊሢ ኬኤዛ ዓሲ ፔ ዓጮ''ይዳ ቦንቺንቱዋሴ» ጌይ ቤርታ ኬኤዜኔ።

⁴⁵ጋዓንቴ ጌሊላ ዓጮ'' ዒ ዴንዳዛ ጌሊላ ዓሳ ኮሺና ዒዛ ሾኦቺንሢ ዔኬኔ፤ ዓይጎሮ ጌዔቴ ዓይሁዶኮ ዑሣ ዓኣዺፆ ቦንቾ ኬሎ''ና ዬሩሳላሜ ዴንዲ ዒዚ ዒኢካ ማዼ ባኮ ቢያ ዔያታ ዛጌሢሮኬ።

⁴⁶ዬካፓ ዬሱሴ ዋኣፆ ጫርሺ ዑሺ ማሄ ቤዞ፥ ጌሊላ ዓጮ''ይዳ ዓኣ፥ ቃና ካታሜሎ ላሚ ዴንዴኔ፤ ዒማ''ና ቂፒርናሆሜይዳ ፔቴ'' ናይ ሃርጊንቴ፥ ካኣቲ ማኣራ ፑኡፒ ማዒ ማዻ ዓሲስኬይ ዓኣኔ።

⁴⁷ዒዚያ ዬሱሴ ዪሁዳ ዓጫ''ፓ ጌሊላ ሙኬሢ ዋይዛዖ ዬሱሴ ባንሢ ቂፒርናሆሜ ሙኪ ኮሺ'' ሓርጊንቲ ሃይቃኒ ዑኬ ዒዛኮ ናይስኬያ ፓሣንዳጉዲ ዬሱሴ ሺኢቄኔ።

⁴⁸ዬሱሴያ፦ «ዒንሢ ፆኦሲ ዎልቄና ማዺንታ ዓኮ ባኮና ማላታና ዛጊባኣታቶ ፔቴ''ታዖ ጉሙርቁዋያቲ!» ዒዛም ጌዔኔ።

⁴⁹ዬይ ፑኡፖ ዓሣሢ፦ «ጎዳሢዮ! ታኣኮ ናዓሢ ሓይቁዋንቴ ሃዳራ ዑኬና ሄሌ''» ዒዛም ጌዔኔ።

⁵⁰ዬሱሴ ዒዛም፦ «ኔ ማኣሪ ዴንዴ፤ ናዓ ኔኤኮ ፖዔኔ» ጋዓዛ፥ ዓሢ ዬሱሴ ኬኤዜ ቃኣሎ'' ጉሙርቂ ማኣሪ ዴንዴኔ።

⁵¹ዒ ማኣሪ ዴንዳንቴ ዒዛኮ ማዻ ዓሳ ጎይፃ ዒዛና ካኣማዖ፦ «ናዓ ኔኤኮ ፖዔኔ» ጌይ ኬኤዜኔ።

⁵²ዒዚያ ናማ ኮሺ ማዔ ዎዶ'' ዖኦጫዛ፥ ዔያታ፦ «ዚጊኖ ዓባ'' ሳዛፓ ሺራኣና ቆሣ ሺሜኔ» ጌዔኔ።

⁵³ዓዳሢያ፦ «ናዓ ኔኤኮ ፖዔኔ» ዬሱሴ ጌዔሢ ዒማ'' ዎዶ'' ማዔሢ ዔሬኔ፤ ዬያሮ ዬኖ ኬሎ''ይዳፓ ዓርቃዖ ዒዛንታ ዒዛኮ ማኣሮ ዓሳኣ ቢያ ዬሱሴ ጉሙርቄኔ።

⁵⁴ዬይ ፆኦሲ ዎልቄና ማዺንቴ ዓኮ ባካ ዬሱሴ ዪሁዳይዳፓ ጌሊላ ሙካዖ ማዼ ላምዓሳ ዓኮ ባኮኬ።