Read maale ፆኦሲ ማዾ''ም ዳኪንቴዞንሢኮ ማዾ'' 14 Bible Online

ፆኦሲ ማዾ''ም ዳኪንቴዞንሢኮ ማዾ'' 14 - maale bible

ፆኦሲ ማዾ''ም ዳኪንቴዞንሢኮ ማዾ'' 14

¹ዓንፆኪያይዳ ዔያታ ማዼ ጎይፆ ሃሣ ዒቆኒዮ ዓጮ''ይዳ ጳውሎሴና ባርናባሴና ዓይሁዶ ዓሶኮ ቡኪንቶ ቤዞ ጌሊ፥ ዒኢካ ዼኤፒ ዎልቄና ዔያታ ፆኦሲ ባኮ ኬኤዜሢሮ ሚርጌ ዓይሁዴ ዓሲና ጊሪኬ ዓሲና ኪሪስቶሴ ጉሙርቄኔ።

²ኪሪስቶሴ ጉሙርቂፆ ዒፄ ዓይሁዶ ዓሳ ዓይሁዴ ማዒባኣ ዓሶ ዴሚ''ና ዞሪ ኪሪስቶሴ ጉሙርቄ ዓሶ ዒፃንዳጉዲ ማሄኔ።

³ጳውሎሴና ባርናባሴና ጋዓንቴ ጎዳ ዛሎ'' ጫርቂ ኬኤዚ ኬኤዚ ዒኢካ ሚርጌ ዎዴ ዴዔኔ፤ ጎዳኣ ዔያቶም ዲቃሣ ባኣዚ''ና ፆኦሲ ዎልቄና ማዺንታ ዓኪ ባኣዚ'' ማዻንዳ ቢታንቶ ዒንጊ ዒዛኮ ኮሹሞና ዒንጊንቴ ቃኣላ'' ጎኔ ማዔሢ ፔጋሴኔ።

⁴ካታሞይዳ ናንጋ ዓሳ ጋዓንቴ ላምዖ ቤሲ ፓቂንቲ ዛላ'' ዓይሁዶ ዓሶና፥ ዛላ'' ሓሣ ዳኪንቴዞንሢና ዎላ'' ማዔኔ።

⁵ዓይሁዴ ማዒባኣ ዓሶና ዓይሁዴ ዓሶና ሓሣ ዔያቶኮ ሱኡጎና ዎላ'' ማዒ ጳውሎሴና ባርናባሴና ዔያታ ሜታሳኒ፥ ጊንሣ ሹቻ ዹዒያ ዎዻኒ ኮዔኔ።

⁶ጳውሎሴና ባርናባሴና ዬያ ዔራዖ ሊቃዖኒያይዳ ሊስፂራና ዴርቤና ጌይንታ ካታሞ ሓሣ ኮይሎይዳ ዓኣ ዓጮ'' ባንሢ ፑኒንቲ ዴንዴኔ።

⁷ዒኢካ ኮዦ ሓይሶዋ ኬኤዜኔ።

⁸ሊስፂራይዳ ቶኪ ሲሌ፥ ፔቴ'' ዎቦ ዓሲስኬያ ዓኣኔ፤ ዬይ ዓሢ ሾይንቴማፓ ዓርቃዖ ዎቦ ማዔሢሮ ቶኪና ሃንቲ ቤቂባኣሴ፤

⁹ዬይ ዓሢ ጳውሎሴ ኬኤዛኣና ዴዒ ዋይዛንቴ፥ ጳውሎሴ ዓሢ ኮሺ'' ዛጋዖ ዓሢኮ ፔና ዻቂሻንዳ ጉሙርቂሢ ዓኣያ ማዔሢ ዴንቂ፥

¹⁰ፔ ዑኡዞ ዼ'ጊዲ፦ «ሌካ ኔኤሮ ዔቄ!» ጌዔስካፓ ዓሢ ላዓ ጌዒ ዔቂ ሃንቲሢ ዓርቄኔ።

¹¹ዓሳ ዬያ ጳውሎሴ ማዼ ባኮ ዛጋዖ ፔኤኮ ዑኡዞ ዼ'ጊዲ ሊቃዖኒያ ዓጮ'' ሙኡጮና፦ «ካኣሽኮ ፆኦዛ ዓሲ ማሎና ኑ ባንሢ ኬዴ''ኔ!» ጋዓዖ፥

¹²ዔያታ ባርናባሴኮ ሱ'ንፆ «ዲያ» ጌዔኔ፤ ጳውሎሴ ዔያቶም ባሼ ኬኤዛሢታሢሮ ዒዛ ዔያታ «ሄርማኔ» ጌዔኔ።

¹³ዬማና ካታሞኮ ዙላ'' ዓኣ ዲያ ጌይንታ፥ ዓይሁዶ ዓሶኮ ጌኤዦ ማኣሮ ቄኤሳሢ ዚያ ጌማይና ቡኒና ካታሞኮ ጌሎ ካሮ'' ባንሢ ዔኪ ሙኪ ዴሮ''ና ዎላ'' ማዒ ጳውሎሴና ባርናባሴናም ዒንጎ ባኣዚ ማሂ ሺኢሻኒ ኮዔኔ።

¹⁴ጳውሎሴና ባርናባሴና ጋዓንቴ ዬያ ዋይዛዖ ዖዪ ዓፒሎ ፔኤኮ ዳርዚ፥ ዒላቲ ዒላቲ ዴሮ'' ባንሢ ጳሽኪ ሙኪ ሂዚ ጌዔኔ፦

¹⁵«ዒንሢ ሃይ ዓሳ፥ ዓይጎሮ ሓያይዳይ? ኑኢኒያ ዒንሢጉዲ ዓሲኬ፤ ኑኡኒ ሓይካ ሙኬሢ ዒንሢ ሓያ ጉሪ ማዔ ካኣዦ ሓሺ''፥ ሳዖንታ ዼኤፖ ዋኣፆ ባዞ''ንታ ዬያቶኮ ጊዳ'' ዓኣ ባኮ ቢያ ማዤ ናንጊና ናንጋ ፆኦዛሢ ባንሢ ማዓንዳጉዲ ኮዦ ሓይሶ ኑ ዒንሢም ኬኤዛኒኬ፤

¹⁶ሓያኮ ቤርታ ሚናኣ ዎዶ''ና ዴራ'' ፔ ሼኔ ጌዔ ጎይሢ ዓኣዻንዳጉዲ ፆኦሲ ዔያቶ ሓሼ''ኔ፤

¹⁷ያዺ ማዔቶዋ ፆኦሲ ኮሺ ማዾ ሃሹ''ዋዖ ማዺፆና ዒዚ ዓኣያ ማዒፆ ማርካሴኔ። ዬያ ዒ ማርካሴሢ፦ ጫሪንጫፓ ዒርዚ ዒንሢም ዋርቂሲፆና ሃኣካ ዒንሢም ካፃንዳጉዲ ቃራ ዎዴ ዒንጊፆና፤ ሃሣ ዒንሢ ሙኡዚ'' ዴንቂ ሚርጌና ዎዛዻንዳጉዲያ ማሂፆናኬ።»

¹⁸ዳኪንቴዞንሢ ያዺ ጌዒ ኬኤዜያ ማዔቶዋ ዴራ'' ዔያቶም ዒንጋ ዒንጊፆ ሺኢሹዋጉዲ ዔያታ ሓሺ''ሴሢ ሚርጌ ሜቶናኬ።

¹⁹ዓይሁዶ ዓሳ ጋዓንቴ ዓንፆኪያና ዒቆኒዮ ዓጮ''ናይዳፓ ዒኢካ ሙኪ ዴሮ'' ፑርታ ማሊሲሢና ዔያቶ ባንሢ ማሄስካፓ፥ ጳውሎሴ ዔያታ ሹቻ ዹዒ «ዎዼኔ» ጌዒ ጎቺ ካታማ''ፓ ኬሴ''ኔ።

²⁰ጋዓንቴ ኪሪስቶሴ ጉሙርቃ ዓሳ ሙኪ ዒዛኮ ዓጫ ዔቃዛ ጳውሎሴ ዔቂ ካታሞ ጊንሣ ማዒ ጌሌኔ፤ ዬካፓ ዚሮ ጉቴ''ሎ ባርናባሴና ዎላ'' ዴርቤ ዒዚ ዓኣዼኔ።

²¹ጳውሎሴና ባርናባሴና ዴርቤይዳ ኮዦ ሓይሶ ኬኤዚ ሚርጌ ዓሲ ኪሪስቶሴ ጉሙርቃንዳጉዲ ማሄኔ። ዬካፓ ሊስፂራና ዒቆኒዮ ጊዴና ጌዒ ዓንፆኪያ ዓጮ'' ዴንዴኔ።

²²ዬያቶ ዓጮ'' ቢያሢዳ ኪሪስቶሴ ጉሙርቃ ዓሳ ጉሙርቂፆና ዶዳንዳጉዲ ዶዲሺ ዶዲሺ ሓሣ ዞሪ ዞሪ፦ «ፆኦሲ ካኣቱሞይዳ ጌላኒ ኑና ሚርጌ ሜቶ ዔካንዳያ ኮይሳኔ» ጌዒ ጌዒ ዔርዜኔ።

²³ሓሣ ሺኢጲፆ ማኣሮኮ ጪሚያ ዔያታ ዶኦሪ፥ ሙኡዚ'' ሓሺ'' ሺኢቆ ሺኢጲፆዋ ሺኢቄስካፓ ዔያታ ጉሙርቄ ጎዳሢም ሃዳርሲ ዔያቶ ዒንጌኔ።

²⁴ዬካፓ ጲሲዲያ ዓጮ'' ጊዴና ጌዒ ጲንፒሊያ ዓጮ'' ዴንዴኔ፤

²⁵ጴርጌይዳ ቃኣሎ'' ኬኤዜስካፓ ዓፃሊያ ዓጮ'' ኬዴ''ኔ፤

²⁶ዬካፓ ዔያታ ዋኣፆ ካኣሚሎ'' ቶጊ ሶኦሪያይዳ ዓኣ ዓንፆኪያ ጊንሣ ማዔኔ፤ ሶኦሪያ ጌይንታ ቤዜላ ዔያታ ማዼ ማዾ''ኮ ቤርታዺ ዓይሢፆ ሓዳራ ዔያቶም ዒንጊንቴ ካታሜሎኬ።

²⁷ዒኢካ ዔያታ ሄላ''ዖ ኪሪስቶሴ ጉሙርቃ ዓሶ ፔቴ''ይዳ ቡኩሲ፥ ፆኦሲ ዔያቶና ዎላ'' ማዒ ማዼ ባኮ ቢያሢና ዓይሁዴ ማዒባኣ ዓሳ ኪሪስቶሴ ጉሙርቃንዳጉዲ ዎዲ'' ዔያቶም ካራ ቡሊ''ንቴቴያ ዓሶም ኬኤዜኔ።

²⁸ኪሪስቶሴ ጉሙርቃ ዓሶና ዎላ'' ሚርጌ ዎዴ ዔያታ ዴዔኔ።