Read maale ፆኦሲ ማዾ''ም ዳኪንቴዞንሢኮ ማዾ'' 25 Bible Online

ፆኦሲ ማዾ''ም ዳኪንቴዞንሢኮ ማዾ'' 25 - maale bible

ፆኦሲ ማዾ''ም ዳኪንቴዞንሢኮ ማዾ'' 25

¹ፒስፆሴ ፔኤኮ ዒ ዓጮ'' ዎይሣ ቤዞ ጌሊ ሓይሦ ኬሊ'' ዴዓዖ፥ ቂሳሪያይዳፓ ዬሩሳላሜ ዓኣዼኔ፤

²ዒኢካ ቄኤሶኮ ሱኡጎና ፔቴ'' ፔቴ'' ዓይሁዶ ዓሶኮ ዼኤፖና ጳውሎሴ ማዼ ባኮ ዛሎ'' ኬኤዛዖ፦ «ጳውሎሴ ሓካ ዬሩሳላሜ ዔኪ ኑም ዬዔቴራ» ጌዒ ዒዛ ኮራ ሚርጌና ሺኢቄኔ፤ ዬያ ዔያታ ጋዓኒ ዳንዳዔሢ' ጎይፃ ካቲ'' ጳውሎሴ ዎዻኒ ኮዔሢሮኬ።

⁴ፒስፆሴ ጋዓንቴ፦ «ጳውሎሴ ቂሳሪያይዳ ቱኡዞ ማኣራ ቱኡቲ ካፒንቲ ዓኣኔ፤ ታኣኒያ ሓሣ ዑኬና ማዒ ዒኢካ ዓኣዻንዳኔ፤

⁵ዒንሢኮ ዎይሣ ዓሳ ታኣና ዎላ'' ቂሳሪያ ዓኣዺ፥ ጳውሎሴ ማዼ ዻቢንቲ ዓኣቴ ዒኢካ ዔያታ ዎጊሶንጎ» ጌዔኔ።

⁶ፒስፆሴ ሳሊ''ዳፓ ዴንዲ ታጶ ኬሊ'' ሄላ''ንዳኣና ዔያቶና ዎላ'' ዴዔስካፓ ቂሳሪያ ዓጮ'' ዓኣዼኔ፤ ዒኢካ ዒዚ ሄላ''ዖ ዚሮ ጉቴ''ሎ ዎጎ ዎጎ ቤዞይዳ ዴዒ ዓሳ ዒዛም ጳውሎሴ ዔኪ ሺኢሻንዳጉዲ ዓይሤኔ።

⁷ዬካፓ ጳውሎሴ ሙካዛ ዬሩሳላሜይዳፓ ሙኬ ዓይሁዶ ዓሳ ዒዛኮ ዓጮ'' ማንጊ ዔቃዖ ዒዛ ላሣንዳ ማርካ ዴንቃኑዋያ ሚርጌ ዴኤሢ ሓይሴ ዒዛይዳ ሺኢሼኔ፤

⁸ጳውሎሴያ፦ «ታኣኒ ዓይሁዶ ዓሶኮ ዎጎይዳ ማዔቶዋ ጌኤዦ ማኣሮይዳ ሓሣ ሮሜ ዓጮ''ኮ ካኣቲ ዑፆይዳ ማዼ ዻቢንቲ ባኣሴ» ጌዒ ማሂ ኬኤዜኔ።

⁹ፒስፆሴ ጋዓንቴ ዓይሁዶ ዓሶ ዎዛሳኒ ኮዓዖ ጳውሎሴ ኮራ፦ «ዬሩሳላሜ ዓኣዺ ሓያ ባኮ ዛሎ'' ዒኢካ ታ ቤርታ ኔ ሞኦታኒ ዴንዲንዱዋይ?» ጌዔኔ።

¹⁰ጳውሎሴ ጋዓንቴ ሂዚ ጌዒ ማሄኔ፦ «ሓይሾ ታኣኒ ሞኦቲንታኒ ታና ኮይሳ፥ ሮሜ ዓጮ'' ካኣቲኮ ዎጎ ቤዛ ዔቄኔ፤ ኔኤኒ ኮሺ'' ዔራሢጉዲ ዓይሁዶ ዓሶይዳ ታኣኒ ፔቴ''ታዖ ማዼ ዻቢንቲ ባኣሴ፤

¹¹ታኣኒ ዻቤያ ማዔቶ ሓሣ ሃይቢም ታና ዎጊሳ ዻቢንቲ ታ ማዼቶ ሃይቢፓ ዻቆም ታ ጎዑዋሴ፤ ጋዓንቴ ዔያቶኮ ጌኤዛ ጉሪ ባኣዚ'' ማዔቶ ዖኦኒያ ታና ዔያቶም ዓኣሢ ዒንጋኒ ዳንዳዑዋሴ፤ ታኣኒ ሓሢ ጌኤዛ ሮሜ ዓጮ'' ካኣቲ ቤርቶ ዓኣዻንዳጉዲ ኮዓኔ» ጌዔኔ።

¹²ዒማ''ና ፒስፆሴ ዒዛና ዎላ'' ዞርቲ ማዻ ዓሶና ጌስታዖ፦ « ‹ሮሜ ዓጮ'' ካኣቲ ቤርቶ ታና ዳኬ› ጌዒ ኔ ዖኦጬሢሮ ካኣቲ ቤርቶ ኔ ዓኣዻንዳኔ» ጌዔኔ።

¹³ዻካ'' ኬሊ''ኮ ጊንፃ ካኣቲ ዓጊሪጳና ቤርኒቄና ፒስፆሴ ዛጋኒ ቂሳሪያ ዓጮ'' ሙኬኔ።

¹⁴ዒኢካ ዔያታ ሚርጌ ኬሊ'' ዴዔሢሮ ፒስፆሴ ጳውሎሴ ዛሎ'' ባኮ ሂዚ ጌዒ ካኣቲ ዓጊሪጳም ፔጋሲ ኬኤዜኔ፦ «ፒልኪሴ ቤርታ፥ ዎዳ ቱኪ'' ሓሼ'' ፔቴ'' ዓሲ ዓኣኔ፤

¹⁵ታኣኒ ዬሩሳላሜ ዓኣዺ ዒኢካ ዓኣንቴ ቄኤሶኮ ሱኡጎና ዓይሁዶ ዓሶኮ ጪሞና ዬያ ዓሢ ዛሎ'' ታኣም ኬኤዜስካፓ ታ ዎጋንዳጉዲ ዔያታ ዖኦጬኔ።

¹⁶ታኣኒ ጋዓንቴ ‹ዎጌም ሺኢኬ ዓሲ ሺኢሼ ዓሶ ቤርታ ዔቂ ዎጊሳ ሓይሶ ዛሎ'' ማሂ ኬኤዙዋንቴ ዎጊሳኒ ሺኢሼ ዓሶም ዓኣሢ ዒንጊሢ ሮሜ ዓጪ ዳምቤቱዋሴ› ጌዒ ዔያቶም ማሄኔ።

¹⁷ዬያሮ ዎጎም ሺኢሼ ዓሳ ቡኪንቲ ሃይካ ሙካዛ ኔጉዋዖ ዚሬሎ ዎጎ ዎጎ ቤዞይዳ ዴዒ፥ ጳውሎሴ ዓሳ ዔኪ ዬዓንዳጉዲ ታ ዓይሤኔ።

¹⁸ዬካፓ ዎጎም ሺኢሼ ዓሳ ዒ ዻቤ ባኮ ኬኤዛኒ ዔቃዛ፦ ‹ፑርታ ባኣዚ'' ዒዚ ማዼያናንዳኔ› ጌዒ ታ ማሌጎይፆ ጉዴያ ዎጌም ሺኢሻንዳ ባኣዚ'' ፔቴ''ታዖ ዔያታ ሺኢሺባኣሴ።

¹⁹ጋዓንቴ ዒዛና ዎላ'' ዔያታ ማርማሢ ፔኤኮ ካኣዦ ዛሎ''ና ሃሣ ሃይቄያታንቴ፥ ጳውሎሴ ‹ሼምፔና ዓኣኔ› ጋዓ ዬሱሴና ዛሎ''ኬ።

²⁰ታኣኒያ ዬያጉዴ ባኣዚ'' ዖኦጪፃ ታኣም ዴኤፄሢሮ ጳውሎሴ ኮራ፦ ‹ዬሩሳላሜ ዓኣዺ ዒኢካ ሓያ ባኮ ኔ ሞኦቲንታኒ ዴንዲንዱዋይ?› ጌዔኔ።

²¹ዒዚ ጋዓንቴ ጌኤዛ ሮሜ ካኣቲ ባንሢ ዓኣዻንዳጉዲ ኮዒ ‹ካኣቲ ባንሢ ታና ዳኩዋቴ› ጌዔሢሮ ታ ዒዛ ዳካንዳያ ሄላ''ንዳኣና ቱኡዞ ማኣራ ዴዓንዳጉዲ ዓይሤኔ» ጌዔኔ።

²²ካኣታሢ ዓጊሪጳ ፒስፆሴ ኮራ፦ «ታኣኒያ ዬይ ዓሢ ጌስታ ሓይሶ ዋይዛኒ ኮዓኔ» ጌዔኔ። ፒስፆሴያ ዒዛም፦ «ሂዴቶ ዚሮ ኔ ዋይዛንዳኔ» ጌዔኔ።

²³ዬያሮ ዚሮ ጉቴ''ሎ ዓጊሪጳና ቤርኒቄና ካኣቱሞ ዓፒሎ ማኣዒ፥ ዼኤፒ ዒጊቻ ቦንቺንቲና ፖኦሊሶኮ ሱኡጎና ሓሣ ካታሞይዳ ዓኣ ዼኤፖ ዓሶና ዎላ'' ዎጎ ዎጎ ዳልጎ ማኣሮ ጌላዛ ፒስፆሴ ጳውሎሴ ዒኢካ ዔኤሊ'' ዔኪ ሺኢሻዖ፦

²⁴«ካኣታሦ ዓጊሪጳ! ሃሣ ዒንሢያ ቢያ ኑኡና ዎላ'' ዓኣ ዓሳ፤ ‹ሓይ ዓሢ ሃካፓ ሴካ ሼምፔና ናንጋንዳያ ኮይሱዋሴ› ጌዒ ዒላቲ ዬሩሳላሜይዳ ሓሣ ሃይካ ናንጋ ዓይሁዶ ዓሳ ታ ዎጋንዳጉዲ ታና ዔያታ ዖኦጬ ዓሢ ሃይ ዒንሢ ዛጋሢኬ።

²⁵ታኣኒ ጋዓንቴ ሃይቢም ዎጊሳንዳ ዻቢንቲ ዒዛይዳ ፔቴ''ታዖ ዴንቂባኣሴ፤ ጋዓንቴ ዒዚ ሮሜ ዓጮ'' ካኣቲ ባንሢ ታና ዳኬ ጌዔሢሮ ዒኢካ ታ ዳካኒኬ።

²⁶ያዺ ማዔቶዋ ዒዛ ዛሎ'' ሮሜ ዓጮ'' ካኣቲም ታ ፃኣፒ ዳካንዳ ዔርቴ ባኣዚ'' ባኣሴ፤ ዬያሮ ሓሢ ዒዚ ዖኦጪንቴስካፓ ታ ፃኣፓንዳ ባኣዚ'' ዴንቃንዳያናንዳኔ ጌዒ ዒንሢ ቤርቶ፥ ባሼና ሓሣ ካኣቲ ዓጊሪጳ! ኔ ቤርቶ ታ ሺኢሼኔ።

²⁷ዓይጎሮ ጌዔቶ ቱኡሲ ዓሲ ሌካ ዼ'ጌ ቤሲ ዳኪንታኣና ዒዛ ዓይሤ ባኮ ዛሎ'' ፔጋሱዋዖ ሓሺ''ሢ ዔኤያቶ ታኣም ማሊ ጴዼኔ» ጌዔኔ።