Read maale ፆኦሲ ማዾ''ም ዳኪንቴዞንሢኮ ማዾ'' 27 Bible Online

ፆኦሲ ማዾ''ም ዳኪንቴዞንሢኮ ማዾ'' 27 - maale bible

ፆኦሲ ማዾ''ም ዳኪንቴዞንሢኮ ማዾ'' 27

¹ዬካፓ ዋኣፆ ካኣሚሎና ዒፃሊያ ዓጮ'' ኑ ዓኣዻንዳጉዲ ጌይንታዛ ዔያታ ጳውሎሴንታ ሜሌ'' ቱኡሲ ዓሲንታ «ሮሜ ዓጮ'' ካኣቲኮ ፖኦሊሶ» ጌይንቲ ፓቂንቴ ዓሶ ዓይሣ ዓሶፓ ፔቴ''ሢ ማዔ፥ ዩሊዮሴ ጌይንታ ፄኤቶ ዓሶ ዓይሣሢም ዔኪ ዓኣዻንዳጉዲ ዒንጌኔ።

²ዬማና ዒሲያ ዓጮ''ኮ ባዞ'' ዓጮይዳ ዓኣ ሳዖ ባንሢ ዓዲራሚፂዮኔ ጎዖ ቤዛፓ ዓኣዻ ዋኣፆ ካኣሚሎና ኑ ዴንዴኔ፤ ቴስሎንቄይዳ ናንጋ፥ ሜቄዶኒያ ዓጮ'' ዓሢ ዓሪስፂሮኮሴያ ኑኡና ዎላ'' ዓኣኔ።

³ዚሬሎ ኑኡኒ ሲዶና ሄሌ''ኔ፤ ዩሊዮሴ ጳውሎሴም ኮሺ ማዔሢሮ ጳውሎሴ ፔኤኮ ላጎ ባንሢ ዴንዴም ዔያታ ዒዛም ኮይሳ ማኣዶ ማኣዳ''ንዳጉዲ ዓይሤኔ።

⁴ዬካፓ ኑ ዔቃኣና ዢባራ ኑኡኮ ቤርታ ዢባርሻያ ማዔሢሮ ቆጲሮሴ ጌይንታ ዋኣፆ ሳዛ'' ዓኣ ዓጬ''ሎና ካናዺ ኑ ዓኣዼኔ።

⁵ኪልቂያና ጲንፒሊያ ዓጮ'' ኮይሎ''ይዳ ዓኣ ባዞ''ና ፒንቄስካፓ ሉቂያ ዓጮ''ይዳ ዓኣ ሙራ ጌይንታ ካታማ ኑ ሄሌ''ኔ።

⁶ዒዞ ቤዞይዳ ፄኤቶ ፖኦሊሶ ዓይሣሢ ዒፃሊያ ዓጪ ባንሢ ዒስኪንዲሪያ ጎዖ ቤዛፓ ዓኣዻ ዋኣሢ ካኣሚሌ ዴንቃዖ ዒዞ ኑና ቶጊሴኔ።

⁷ሚርጌ ኬሊ'' ታሢ ታሢ ኑ ዓኣዺ፥ ሚርጌ ሜቶና ቄኔዲዮሴ ካታሞ ኮይሎ ሄሌ''ኔ፤ ዢባራ ጋዓንቴ ቤርቲም ኑ ዴንዱዋጉዲ ኑና ላኣጌሢሮ ሲልሞና ጌይንታ ዋኣፆ ሳዞ'' ሶርቶሚ ጌሌ ሳዓኮ ኮይሊ''ና ጌዒ ዋኣፆ ሳዛ'' ዓኣ፥ ቄርፄሴና ካናዺ ኑ ዓኣዼኔ።

⁸ዬኖ ቤዞና ሚርጌ ሜታዺ፥ ባዞ''ኮ ዓጮማ ዓርቂ ኑ ዓኣዼስካፓ ላሲያ ካታሞ ኮይላ'' ዓኣ «ዢባሮና ጉዳሢና ዋኣፆ ካኣሚሎ ፑርቲሱዋ ኮሺ ቤሲ» ጌይንታ ቤዞ ኑ ሄሌ''ኔ።

⁹ኑኡኮ ሃንቲፆይዳ ሌሊ ሚርጌ ዎዴ ጋፔሢሮና ሙኡዚ'' ሙዑዋዖ ሺኢቆ ዎዳ'' ዓኣዼሢሮ ሓሣ ዬኖ ዎዶ''ና ባዚ'' ጊዳ'' ዓኣዺሢ ኮሺ'' ፑርታሢሮ ዬማና ጳውሎሴ ዓሶም፦

¹⁰«ዓሲዮቴ! ሓካፓ ሴካ ዓኣ ኑኡኮ ጎይፆይዳ ፑርታ ባኣዚ'' ዓኣሢ ታኣም ጴዻኔ፤ ዬይያኣ፦ ዋኣፆ ካኣሚሎይዳ ጫኣኒንቴ ባኮና ዋኣፆ ካኣሚሎናይዳ ሌሊቱዋንቴ ዓሲ ሼምፖይዳኣ ዼኤፒ ፑርታ ባኣዚ''ና ባይሲንታና ሄላ''ንዳኔ» ጌይ ላቲ ኬኤዜኔ።

¹¹ፄኤቶ ፖኦሊሶ ዓይሣሢ ጋዓንቴ ጳውሎሴ ዞሮ''ይዳፓ ዋኣፆ ካኣሚሎ ዒሻሢና ዋኣፆ ካኣሚሎኮ ዓዳሢና ጋዓ ባኮ ባሼ ዋይዜኔ።

¹²ዬና ባዞ'' ዓጮይዳ ዓኣ ሳዔላ ባርጊ ዎዴና ዒኢካ ዴዓኒ ጊኢጉዋያ ማዔሢሮ ሚርጌ ዓሳ፦ «ኑኡኒ ዴንዲጋፓ፥ ዳንዳዒንቴቶ ኬዶ'' ዛሎ''ኮ ዓባ'' ጌላ ባንፆና ሓሣ ዾኦሎ'' ዛሎ''ኮዋ ዓባ'' ጌላ ባንፆይዳ ዓኣ ፒንቄ ጌይንታ ቄርፄሴ ዓጮ''ኮ ዋኣፆ ካኣሚሎ ዔቂሶ ቤዞ ሄሊ'' ዒኢካ ባርጎ ዎዶ'' ኑ ዓኣሦም» ጌዒ ማሊሢ ሺኢሼኔ።

¹³ዓባ'' ኬስኪ ጌላ ዛሎ''ኮ ዾኦሎ'' ዛሎ'' ዢባራ ዻካ'' ዢባርሼም ዔያታ ዛጋዖ ዔያታ ማሌ ጎይፆ ማዔያ ዔያቶም ማላዛ ዋኣፆ ካኣሚሎ ዓርቂ ዔቂሳ ዓንጎ ኮንጮ ቱጊ ዓኣዺፆ ዔቄኔ፤ ዔያታ ዋኣፆ ካኣሚሎ ዔቂሶ ቤዛፓ ዔቂ ባዞ''ኮ ዓጮማ ዓርቂ ቄርፄሴኮ ኮይሊ''ና ዓኣዼኔ።

¹⁴ጋዓንቴ ኔጉዋዖ «ኬዶ'' ዛሎ''ኮ ዓባ'' ኬስካ ባንፆ ዓልጋሢ» ጌይንታ ዶዲ ዓልጋ ዋኣፆ ሳዛ'' ዓኣ ሳዔሎይዳፓ ዔቂ ዔያቶይዳ ሙኬኔ።

¹⁵ዋኣፆ ካኣሚላ ሂዒንቴሢሮ ሓሣ ዢባሮዋ ቃዛኒ ዳንዳዒባኣሢሮ ዢባራ ኑና ዒሼም ዚቲዮ ጌዒ ኑ ዓኣዼኔ።

¹⁶ዬካፓ ቄዳ ጌይንታ ዋኣፆ ሳዛ'' ዓኣ ዻካ'' ዓጪስኬኖና ካናዺ ኑ ዴንዲቤቃ ዋኣፆ ካኣሚሎይዳ ቱኪ''ንቲ ዓኣ ዋኣፆና ፒንቆ ጎንጊስኬና[13] ቶላ''ኒ ዑኬም ሜቶና ኑ ቃዛኒ ዳንዳዔኔ።

¹⁷ዋኣፆ ካኣሚሎይዳ ዓኣ ዓሳ ዋኣፆና ፒንቆ ጎንጌሎ ጎቺ ዔኪ ዋኣፆ ካኣሚሎ ጋሮ ጌልዜስካፓ ሱሲና ዶዲሺ ቱኬ''ኔ፤ ዋኣፆ ካኣሚላ ሓሣ ሱሪቲሴ ጌይንታ ዋኣፆ ዴማ'' ዓኣ፥ ኩሊንቴ ማኣሻላ'' ዴንዲ ዹዒንቱዋጉዲ ሻራሢ ጌይንታ ዳልጎ ዓፒሎጉዴ ባኮ ኬይሳዖ ኮዔ ጎይሢ ዓኣዻንዳጉዲ ሓሼ''ኔ።

¹⁸ጋዓንቴ ዓልጋሢ ሓሾ'' ዒፄሢሮ ዚሬሎ ዋኣፆ ካኣሚሎ ዑፆይዳ ጫኣኒንቴ ሜሆ''ይዳፓ ዛሎ'' ባዞ''ይዳ ዓሳ ኬኤሪሢ ዓርቄኔ።

¹⁹ሓይሣሳ ኬሎ''ና ዋኣፆ ካኣሚሎም ኮይሳ ባኮዋ ዔኪ ዔኪ ፔ ኩቻ ዔያታ ኬኤሬኔ፤

²⁰ሚርጌ ኬሊ'' ዓቢንታ ዦኦጎንታ ኑ ዛጊባኣሢሮ ሓሣ ዓልጋሢ ዢባርሺፆ ሃሾ'' ዒፄሢሮ፦ «ኑ ዻቃኒ ዳንዳዑዋሴ» ኑ ጌዔኔ።

²¹ዓሳ ፔቴ''ታዖ ሙኡዚ'' ሙዑዋዖ ሚርጌ ኬሊ'' ዴዔሢሮ፥ ጳውሎሴ ዔያቶ ባኣካ'' ዔቃዖ፦ «ዓሲዮቴ! ዒንሢ ዎንዴ ታ ዒንሢም ጌዔ ባኮ ዋይዚ ቄርፄሴይዳፓ ዔቂባኣያታቶ ሓይ ዋኣፆ ካኣሚሎይዳ ማዔ ባካ ቢያ ዒንሢ ሄሊ''ንዱዋያታንቴኬ፤

²²ሓሢ ዋኣፆ ካኣሚላ ሌሊ ፑርታንዳኣፓዓቴም ዒንሢዳፓ ዖናይዳኣ ማዖም ባይሲንታ ሄሊ''ንዱዋሴ፤ ዬያሮ ዶዱዋቴ፥ ዒጊጪፖቴ፤ ጌዒ ታ ዒንሢ ዞራኔ።

²³ታ ዒዛሮ ማዒ፥ ዒዛ ካኣሽካ ፆኦዛሢ ዳኬ ኪኢታንቻ ዋንቴ ታ ኮራ ዔቂ፦

²⁴‹ጳውሎሴ ዒጊጪፖ! ኔኤኒ ሮሜ ዓጮ'' ካኣቲ ቤርታ ዔቃንዳያ ኮይሳኔ፤ ሓይሾ፥ ኔኤና ዎላ'' ዓኣዻ ዓሶ ቢያ ኔ ጋይቴ ጌዒ ፆኦሲ ሃይቢዳፓ ዻቂሻንዳኔ› ጌዒ ታኣም ኬኤዜኔ።

²⁵ዬያሮ ዒንሢ ሓይ ዓሳ ዶዱዋቴ፤ ፆኦሲ ዬያ ታኣም ኬኤዜ ባኮ ቢያ ኩንሣንዳሢ ታ ጉሙርቃኔ።

²⁶ማዔቶዋ ዢባራ ኑና ዔኪ ፔቴ'' ዋኣሢ ሳዛይዳ ዓኣ ሳዓኮ ዓቺዳ ኬኤራንዳኔ» ጌዔኔ።

²⁷ታጶ ዖይዳሳ ዋንቶና ዓዲሪያ ባዞ''ይዳ ዢባሮና ሂዒንቲ ሴካ ሃንጋ ኑ ጌዒ ጌዒ ዓኣንቴ ሳዖኮ ጊዲሚሺ ማዓዛ ዋኣፆ ካኣሚሎይዳ ማዻ ዓሶ ኮራ ሳዖ ባንሢ ዑኬያ ማሌኔ።

²⁸ዬያሮ ባዞ''ኮ ዔታዺፆ ሚፂ'' ዛጎ ሱዞ ዔያታ ዓጋዛ፥ ባዞ''ኮ ዔታ'' ሳሊ''ታሚ'' ዋዻ ማዒ ጴዼኔ፤ ሓሣ ዻካ'' ናጋዖ ዛጎ ሱዜሎ ዔያታ ዓጌም ላሂ''ታሚ'' ዋዻ ማዒ ጴዼኔ።

²⁹ዋኣፆ ካኣሚላ ባዞ'' ዓጮይዳ ዓኣ ሹጫ ዓኣዺ ዹይንቱዋጉዲ ዔያታ ዒጊጪ፥ ዋኣፆ ካኣሚሎኮ ጊንፆ ዛሊ''ና ዋኣፆ ካኣሚሎ ቃዛንዳ ዖይዶ ዓንጎ ኮንጮ ሊካ ዓጊ፥ ዬካፓ ዹማ ካራንዳጉዲ ሺኢጲሢ ዓርቄኔ።

³⁰ዋኣፆ ካኣሚሎይዳ ማዻ ዓሳ ዋኣፆ ካኣሚሎይዳፓ ኬስኪ ዴንዳኒ ኮዔያታሢሮ ዋኣፆ ካኣሚሎኮ ቤርቶ ዛሎ''ና ዓንጎ ኮንጮ ሊካ ዓጋያ ማሊ ዋኣፆ ካኣሚሎይዳ ዓኣ ዋኣፆና ፒንቆ ጎንጌሎ ባዞ''ይዳ ኬኤሬኔ።

³¹ዬማና ጳውሎሴ ፄኤቶ ፖኦሊሶ ዓይሣሢና ፖኦሊሶና ኮይላ''፦ «ሓኣታ፥ ዋኣፆ ካኣሚሎይዳ ማዻ ዓሳ ዋኣሊ''ንቂፆ ሃሺ'' ዚቲ ጌዒ ዴዒባኣቶ ዒንሢ ዻቃኒ ዳንዳዑዋሴ» ጌዔኔ።

³²ዬያሮ ፖኦሊሳ ዋኣፆና ፒንቆ ጎንጌሎኮ ሱዞ ቲቃዖ ዋኣፆይዳ ጉሪ ዒዛ ሴካ ሃንጋ ጋዓንዳጉዲ ሓሼ''ኔ።

³³ሳዓ ካራኒ ዑካዛ ቢያሢ ሙኡዚ'' ሙዓንዳጉዲ ጳውሎሴ ዔያቶ ሺኢቃዖ፦ «ፔቴ''ታዖ ሙኡዚ'' ሙዑዋዖ ዒንሢ ካፓንቴ ሓኖ'' ዒንሢኮ ታጶ ዖይዶ ኬሊ''ኬ።

³⁴ዬያሮ ዒንሢ ሙኡዚ'' ሙዓንዳጉዲ ታ ሺኢቃኔ፤ ዬይያ፦ ዒንሢም ዎልቄ ዶዲሻንዳኔ፤ ዓይጌንዴጉዴ ፑርታ ባኣዚ'' ፔቴ''ታዖ ዒንሢዳ ሄላ''ዓኬ» ጌዔኔ።

³⁵ዬያ ጌዔስካፓ ካሣ ዔኪ ቢያሢኮ ቤርታ ፆኦሲ ጋላታዖ፥ ቡንፂ ሙዒሢ ዓርቄኔ።

³⁶ዬማና ቢያሢኮ ዒና'' ማዔም ዶዲ ሙዖ ሙዔኔ።

³⁷ዋኣፆ ካኣሚሎይዳ ኑኡኒ ዓኣ ዓሳ ቢያ ላምዖ ፄኤታና ላንካይታሚ'' ላሆ''ኬ።

³⁸ዬካፓ ቢያሢ ሙዒ ሚሽካዖ ዋኣፆ ካኣሚሎይዳ ጫኣኒንቴ ዛርጋሢ ባዞ''ይዳ ኬኤሪ ዋኣፆ ካኣሚሎ ዴኤፃ ባኮ ሼሌዒሴኔ።

³⁹ዬማፓ ሳዓ ካራዛ ዔያታ ሄሌ'' ቤዞ ዔያታ ዔሪባኣሴ፤ ጋዓንቴ ማኣሻላ ዓኣ ባዚ'' ዓቺ ዔያታ ዴንቄኔ፤ ዬያሮ ዔያቶም ዳንዳዒንቴቶ ዒዞ ባንሢ ዶጪሳኒ ማላዖ፥

⁴⁰ዓርቄ ሱዞ ቲቂ ዓንጎ ኮንጮ ባዞ''ይዳ ሓሼ''ኔ፤ ዬማና ሓሣ ጊንፆ ዛላ'' ዓኣ፥ ዓጊሢ ዓጊሢ ዒሺ ዔኪ ዓኣዾ ዳልጎ ዖዶዞ ሚፆኮ ሱዞ ቡሊ''፥ ቤርቶ ዛሎ''ና ዓኣ ዳልጎ ሻራሢ ዢባሮ ባንሢ ዼ'ጊዲ ባዞ'' ዓጮ ባንሢ ኬስካኒ ዔያታ ዓኣዼኔ።

⁴¹ጋዓንቴ ዋኣፆ ካኣሚላ ዋኣፆ ዴማ'' ዓኣ ኩሊንቴ ማኣሻሎይዳ ዹዒንቲ ቤርቶ ዛሎ''ና ሊካ ዾቂንቲ ዓጊፁዋያ ማዓዛ፥ ጊንፆ ዛሎ''ና ጋዓንቴ ጉዳሢዳፓ ዔቄያና ካኣሚላ ሜቂሢ ዓርቄኔ።

⁴²ቱኡዞ ዓሳ ፁቢ ፒንቂ ቶሉ''ዋጉዲ ፒንቃኒ ጌዔቶ ዔያቶ ፖኦሊሳ ዎዻኒ ማሌኔ።

⁴³ፄኤቶ ፖኦሊሶ ዓይሣሢ ጋዓንቴ ጳውሎሴ ዓውሳኒ ኮዔሢሮ ዬኖ ፖኦሊሶኮ ማሊፆ ዔኤዖ ዒፂ፥ ፁቢ ዔራ ዓሳ ቤርታዺ ዋኣፆ ካኣሚሎይዳፓ ባዞ''ይዳ ኮኦሚ ጌሊ ፁቢ ፁቢ ፒንቃንዳጉዲ ዓይሤኔ።

⁴⁴ሓሣ ዓቴ'' ዓሳ ዋኣፆ ካኣሚሎኮ ዱማ ዱማ ሜቂፆንታ ዳልጎ ላሻሢ ሚፆንታ ዓርቂ ዓርቂ ፒንቃንዳጉዲ ዓይሣዛ ዬያይዲ ቢያሢ ኮሺና ሳዖ ሄሌ''ኔ።