Read maale ፆኦሲ ማዾ''ም ዳኪንቴዞንሢኮ ማዾ'' 5 Bible Online

ፆኦሲ ማዾ''ም ዳኪንቴዞንሢኮ ማዾ'' 5 - maale bible

ፆኦሲ ማዾ''ም ዳኪንቴዞንሢኮ ማዾ'' 5

¹ፔቴ'' ሓናኒያ ጎዖ ዓሲስኬያ ሳጲራ ጌይንታ ዒዛኮ ማቾስኬኖና ዎላ'' ሳዓ ሻንቼኔ፤

²ማቻ ዒዛኮ ዔራንቴ ሳዖ ሻንቾና ሚኢሾይዳፓ ፓቂ፥ ዓይሲ ዔኪ ሙኪ ዳኪንቴዞንሢም ዒንጌኔ፤

³ጴፂሮሴ ጋዓንቴ ዒዛም፦ «ሓናኒያ! ዓያኖ ጌኤዦም ኔ ሉኡቃንዳጉዲ ሓሣ ሳዖ ኔ ሻንቼ ሚኢሾኮ ዛሎ'' ፓቂ ዓይሳንዳጉዲ ማዼ ፃላሄ ዒና'' ኔኤኮ ዓይጋ ጌሌይ?

⁴ኔኤኒ ሳዖ ሻንቺባኣንቴ ቤርታ ኔኤሮቱዓዳ? ሓሣ ኔ ሻንቼስካፓ ሚኢሻ ኔኤሮቱዋይ? ሂዳዖ ሓያ ባኮ ዓይጋ ኔ ዒኖና ማሌይ? ኔ ሉኡቄሢ ፆኦሲም ማዓንዳኣፓዓቴም ዓሲምቱዋሴ» ጌዔኔ።

⁵ሓናኒያ ዬያ ዋዋይዛዖ ሎኦሚ ሓይቄኔ፤ ዬኖ ባኮ ዋይዜ ዓሳ ቢያ ኮሺ'' ዒጊጬኔ።

⁶ዓሲስኬንሢ ዒማ''ና ሌዞ ዒዛኮ ሱኡዳዖ ዔኪ ዓኣዺ ዱኡኬኔ።

⁷ዬካፓ ኔጌንቴ ሓናኒያኮ ማቻ ዒዞ ቤዞ ሙኬኔ፤ ዓኒዳ ማዺንቴ ባኮ ጋዓንቴ ዒዛ ዔሪባኣሴ።

⁸ጴፂሮሴ ዒዞ ኮራ፦ «ሂንዳ ታኣም ኬኤዜ፤ ዒንሢ ሳዖ ዒንሢኮ ሻንቼሢ ሓንሢጉዴ ሚኢሼምዳ?» ጌዔኔ። ዒዛ ማሓዖ፦ «ሂዮ፥ ዬንሢጉዴ ሚኢሼምኬ» ጌዔኔ።

⁹ዬማና ጴፂሮሴ፦ « ‹ፆኦሲኮ ዓያና'' ዎይታቴ ሂንዳ ኑ ዛጎም ጌዒ ዎዲ'' ዒንሢ ዎላ'' ጌስቴይ?› ሓይሾ ኔኤኮ ዓኒ ዱኡኪ ማዓ ዓሳ ካራ'' ዓኣኔ፤ ኔናኣ ሓሣ ዔያታ ዔኪ ዓኣዺ ዱኡካንዳኔ» ጌዔኔ።

¹⁰ዒዛኣ ቤዞማና ቶኮ'' ዴማ'' ዒዛኮ ሎኦሚ ሓይቄኔ፤ ዓሶንሢ ጌላንቴ ዒዛ ሓይቂ ዓኣ ጋዓዛ፥ ዔኪ ዓኣዺ ዓኒ ዱኡፖ ኮራ ዱኡኬኔ።

¹¹ሺኢጲፆ ማኣሮ ዓሶ ቢያሢዳ፤ ሓሣ ጊንሣ ዬያ ባኮ ዋይዜ ዓሶ ቢያሢዳ ዒጊቹሞ ጌሌኔ።

¹²ሚርጌ ፆኦሲ ዎልቄና ማዺንታ ዓኪ ባኣዚ''ና ዲቃሣ ባኣዚ''ና ዳኪንቴዞንሢ ዛሎ''ና ዒማ''ና ማዺንታኔ፤ ሓሣ ኪሪስቶሴ ጉሙርቃዞንሢያ ፔቴ'' ዒኔና ማዒ «ሴሎሞኔ ዴማ'' ሃንታ፥ ዼኤፖ ዛምፓሢ» ጎዖ ቤዞይዳ ቡኪንታኔ።

¹³ዔያቶይዳፓዓቴም ጉሪ ሜሌ'' ዓሲ ማዔያ ፔቴ''ታዖ ዔያቶና ዎላ'' ማዓኒ ጫርቂባኣሴ፤ ያዺ ማዔቴያ ዴራ'' ዔያቶ ቦቦንቻኔ።

¹⁴ጎዳ ጉሙርቃ ዓሶ ዓቲንቆና ላኣሎናኮ ፓይዳ'' ኮሺ'' ሚርጊ ሚርጊ ዓኣዼኔ።

¹⁵ዳኪንቴዞንሢ ዛሎ''ና ማዺንታ ዲቃሣ ማዾ''ሮ ጌዒ ዓሳ ዺቢ ሃርጊንቴ ዓሲ ጎይፆይዳ ኬሲ'' ኬሲ''፥ ዛሎ'' ሻኣላ''ይዳ ዛሎ'' ሃላሢዳ ላይሣኔ፤ ያዒ ዔያታ ማዼሢ ጴፂሮሴ ዬይና ዓኣዻኣና ዔኤዦ ሺባታዖ ፔቴ'' ፔቴ'' ዓሶ ዑፆ ሄላ''ንዳጉዲኬ።

¹⁶ዬሩሳላሜ ኮይላ'' ዓኣ ካታማፓ ዓሳ ፔኤኮ ሃርጊንቴ ዓሶና ፑርታ ዓያናና ሜታዻ ዓሶ ዔኪ ሙካኔ፤ ቢያሢያ ዶርዓሢዳፓ ፖዓኔ።

¹⁷ዬያይዳፓ ዔቄያና ቄኤሶኮ ሱኡጋሢና ዒዛና ዎላ'' ዓኣ ሶዶቄ ዓሶ ዜርፃ ቢያ ሞርኬ ማዒ ዳኪንቴዞንሢ ዑፃ ዔቄኔ፤ ሓሣ ዔያቶ ዒናፓ ቂኢሪ፥

¹⁸ዓርቂ ዔኪ ዴሮ''ኮ ቱኡዞ ማኣራ ጌልዚ ቱኬ''ኔ።

¹⁹ፆኦሲኮ ኪኢታንቻ ጋዓንቴ ዹሞና ቱኡዞ ማኣሮኮ ካሮ'' ቡሊ'' ዔያቶ ኬሳ''ዖ፦

²⁰«ዴንዲ ሺኢጲፆ ማኣሮይዳ ዔቂ ዴሮ''ም ሓያ ሼምፖ ቃኣሎ'' ቢያ ኬኤዙዋቴ» ጌዔኔ።

²¹ዳኪንቴዞንሢያ ዬኖ ዓይሢፆ ዔኪ ጉቴ'' ዓሚ'' ሺኢጲፆ ማኣሪ ጌላዖ ቃኣሎ'' ኬኤዚሢ ዓርቄኔ፤ ዒማ''ና ቄኤሶኮ ሱኡጋሢንታ ዒዛና ዎላ'' ዓኣ ዓሶንታ ሓሣ ዎጎ ዎጋ ዓሶንታ ዓይሁዶ ዓሶኮ ጪሞንታ ቢያ ሙኪ ፔቴ''ይዳ ቡኪንቴኔ፤ ዬካፓ ዳኪንቴዞንሢ ቱኡዞ ማኣራፓ ዴንዲ ዔኪ ሙካንዳጉዲ ዓሲ ዳኬኔ።

²²ኪኢቶ''ና ዓኣዼ ዓሶንሢ ጋዓንቴ ቱኡዞ ማኣሪ ዓኣዻዖ ዳኪንቴዞንሢ ዒኢካ ዴንቂባኣሴ፤ ዬያሮ ማዒ ሙካዖ፦

²³«ቱኡዞ ማኣሮኮ ካራ'' ኮሺ'' ዎዺንቲ፥ ካፓ ዓሳ ሓሣ ካራ'' ዔቂ ዓኣንቴ ኑ ዴንቄኔ፤ ቱኡዞ ማኣሮኮ ካሮ'' ኑ ቡላ''ዖ ጋሮይዳ ፔቴ''ታዖ ዓሲ ዴንቂባኣሴ» ጌዒ ኬኤዜኔ።

²⁴ጌኤዦ ማኣሮ ካፓ ዓሶ ዓይሣሢና ቄኤሶኮ ሱኡጎና ዬያ ዋይዛዖ፦ «ሓይ ዓይጎ ባኣዚ'' ናንዳይ?» ጌዒ ዔያቶ ዛሎ'' ጎዖንዶ ጎይሢ ባይዜኔ።

²⁵ዬማና ፔቴ'' ዓሲስኬያ ሙካዖ፦ «ዒንሢ ቱኡዞ ማኣራ ቱኬ'' ዓሶንሢ ሓይሾ ጌኤዦ ማኣሮይዳ ዔቂ ዴሮ'' ዔርዛኔ» ጌዒ ዔያቶም ኬኤዜኔ።

²⁶ጌኤዦ ማኣሮ ካፓ ዓሶኮ ሱኡጋሢ ዒዛኮ ዓይሢንቲ ማዻ ዓሶና ዎላ'' ኔጉዋዖ ዴንዲ ዳኪንቴዞንሢ ዔኪ ሙኬኔ፤ ዔያታ ዔኪ ሙኬሢ' ዎልቄናቱዋንቴ ጌሺሢናኬ፤ ያዺ ዔያታ ማዼሢ' ዴራ'' ዔያቶ ሹቻ ዹዓንዳኔ ጌዒ ዒጊጬሢሮኬ።

²⁷ዔያታ ዔኪ ሙካዖ ዎጎ ዎጋ ዓሶ ቤርታ ዔቂሳዛ፥ ቄኤሶኮ ሱኡጋሢ ዔያቶ ኮራ፦

²⁸«ዬሱሴኮ ሱ'ንፆ ዔኤሊ'' ፔቴ'' ባኣዚ''ታዖ ዒንሢ ዔርዙዋጉዲ ላቲ'' ዒንሢ ኑ ዓይሤኔ፤ ሓሢ ዒንሢ ጋዓንቴ ዬሩሳላሜ ዓጮ'' ቢያ ዔርዚ ሓይሾ ኩርሴኔ፤ ዒንሢ ሃና ዓሳ ዬያ ዓሢኮ ሱጉፆ ኑ ዑፃ ማሃኒ ኮዓያኬ ሃይሾ!» ጌዔኔ።

²⁹ጴፂሮሴንታ ዒዛና ዎላ'' ዓኣ ዳኪንቴዞንሢንታ ማሓዖ፦ «ዓሲም ዓይሢንቲሢፓ ፆኦሲም ዓይሢንቲሢ ኑና ኮይሳኔ፤

³⁰ኑ ዓዶንሢ ፆኦዛሢ' ሚፆይዳ ዒንሢ ሱፂ ዎዼ ዬሱሴ ሓይባ''ፓ ዔቂሴኔ፤

³¹ዬይ ዬሱሴ ዒስራዔኤሌ ዴሮ'' ጎማፓ ማሓንዳጉዲና ጎሞ ዓቶም ጋዓንዳጉዲ ፆኦሲ ዒዛ ዓርና ሓሣ ዻቂሻያ ማሂ ፔኤኮ ሚዛቆ ዛላ'' ቦንቾና ጌሤኔ፤

³²ዬያ ባኮኮ ኑናንታ ፆኦሲ ፔኤም ዓይሢንታ ዓሶም ቢያ ዒንጌ ዓያኖ ጌኤዦንታ ማርካኬ» ጌዔኔ።

³³ዎጎ ዎጋ ዓሳ ዬያ ዋይዛዖ ኮሺ'' ዻጋዺ ዳኪንቴዞንሢ ዎዻኒ ኮዔኔ።

³⁴ጋዓንቴ ዴሮ'' ባኣካ'' ቦንቺንታያ ሙሴ ዎጎ ዔርዛ ጌማሊያሌ ጌይንታ ፔቴ'' ፔርሴ ዓሲስኬይ ዔቃዖ ዻካ''ሮ ዎጎ ዎጋ ዓሶ ቤርታፓ ዳኪንቴዞንሢ ሺኢሻንዳጉዲ ዓይሤኔ።

³⁵ዬካፓ ዎጎ ዎጋ ዓሶም፦ «ዒስራዔኤሌ ዓሲዮቴ! ዒንሢ ሓኖ' ዓሶይዳ ዓይጎ ማዻኒ ማላቴያ ዒንሢና ኮሺ'' ዔሩዋቴ፤

³⁶ሃያኮ ቤርታ ዬያጉዲ ቴዎዳሴ ጌይንታ ዓሲ ‹ታ ዼኤፒኬ› ጌዒ ዔቄኔ፤ ሓሣ ዒዛና ዎላ'' ዖይዶ ፄኤታ ዓሲ ፔቴ'' ማዔኔ፤ ጋዓንቴ ዬያ ዎዾም ዒዛኮ ጊንፆ ሓንታ ዓሳ ላኣሊንቲ ባይቃዛ ማሊፃ ዒዛሲያ ባይቄኔ።

³⁷ዬካፓ ሓሣ ዴራ'' ፓይዲንቴ ዎዶ''ና ጌሊላ ዓጪ ዓሲ ማዔ፥ ዪሁዳ ጎዖሢ ዔቂ ሚርጌ ዴሬ ዒዛ ጊንፆ ሃንታንዳጉዲ ማሄኔ፤ ዒዚያ ዎዺንቴኔ፤ ዒዛ ጊንፆ ሓንታ ዓሳኣ ላኣሊንቲ ባይቄኔ።

³⁸ዬያሮ ሓሢ ታ ዒንሢም ጋዓሢ ሓንሢ ዓሶንሢዳፓ ሓኪ ዒንሢ ዔያቶ ሃሻ''ንዳጉዲኬ፤ ዓይጎሮ ጌዔቶ ሓይ ማሊፃ ሓሣ ሃይ ማዻ'' ዓሲፓ ሙኬያታቶ ባይቃንዳኔ፤

³⁹ፆኦሲፓ ሙኬያ ማዔቶ ጋዓንቴ ዔያቶ ዒንሢ ባይዛኒ ዳንዳዑዋሴ፤ ፔቶ'' ዬይ ዒንሢኮ ፆኦሲና ዎላ'' ፑርቲሢ ማዓንዳኔ» ጋዓዛ፥ ዔያታ ጌማሊያሌኮ ዞሮ'' ዋይዚ ዔኬኔ።

⁴⁰ዬካፓ ዔያታ ዳኪንቴዞንሢ ዔኤላ''ዖ ጳርቂሲ ዬሱሴኮ ሱ'ንፆ ዔኤሊ'' ዓሶ ዔርዙዋጉዲ ላታ''ዖ ዳኬኔ።

⁴¹ዳኪንቴዞንሢ ጋዓንቴ ዬሱሴ ዛሎ''ና ቦርሲንቲታቶዋ ዔካኒ ጊኢጌያታሢሮ ዎዛዺ ዎዛዺ ዎጎ ዎጋ ዓሶ ቤርታፓ ኬስኪ ዴንዴኔ፤

⁴²ቢያ ኬሊ'' ጌኤዦ ማኣሮና ዓሶኮ ማኣሮናይዳ ሜሲሔ ማዔ፥ ዬሱሴ ዛሎ'' ኬኤዚፆንታ ኮዦ ሓይሶ ኬኤዚፆዋ ዔያታ ሓሺ''ባኣሴ።