Read maale ፆኦሲ ማዾ''ም ዳኪንቴዞንሢኮ ማዾ'' 8 Bible Online

ፆኦሲ ማዾ''ም ዳኪንቴዞንሢኮ ማዾ'' 8 - maale bible

ፆኦሲ ማዾ''ም ዳኪንቴዞንሢኮ ማዾ'' 8

¹ዒስፂፓኖሴ ሓይቄ ኬሎ''ና ዬሩሳላሜይዳ ዓኣ ሺኢጲፆ ማኣሮ ዓሶይዳ ዼኤፒ ዳውሲሢ ዔቄኔ፤ ፆኦሲ ማዾ''ም ዳኪንቴዞንሢፓ ዓታዛ ሓንጎ ፆኦሲ ጉሙርቃ ዓሳ ቢያ ዪሁዳ ዓጮ''ና ሳማሪያ ዓጮ''ና ባንሢ ላኣሊንቲ ዴንዴኔ።

²ፆኦሲ ዶዲ ካኣሽካ፥ ፔቴ'' ፔቴ'' ዓሳ ዒስፂፓኖሴ ዱኡኬኔ፤ ሓሣ ዒናፓ ማዔ ዼኤፒ ዬኤፒያ ዬኤኬኔ።

³ሳውሌ ጋዓንቴ ዬኖ ዎዶ''ና ሺኢጲፆ ማኣሮ ዓሶ ባይዛኒ ሚርጌ ካራ ኮዓኔ፤ ዓሶኮዋ ማኣሮ ቢያ ጌሊ ጌሊ ኪሪስቶሴ ጉሙርቃ ዓሶ ዓቲንቆና ላኣሎና ጎቺ ጎቺ ኬሲ''፥ ቱኡሲ ማኣሪዳ ቱኪ''ሳኔ።

⁴ዱማ ዱማ ቤዞ ላኣሊንቲ ዓኣዼ ኪሪስቶሴ ጉሙርቃ ዓሳ ቢያ ቤዞይዳ ፆኦሲኮ ቃኣሎ'' ኬኤዜኔ፤

⁵ፒልጶሴያ ሳማሪያኮ ፑኡፖ ካታሞ ዴንዲ ሜሲሔ ዛሎ'' ዓሶም ኬኤዜኔ።

⁶ዓሳ ፒልጶሴኮ ቃኣሎ'' ዋይዛዖ ሓሣ ዒ ማዻ ፆኦሲ ዎልቆና ማዺንታ ዓኮ ባኮዋ ዛጋዖ ፔቱሞና ዒዚ ጋዓ ባኮ ኮሺ'' ዋይዛኔ።

⁷ፑርቶ ዓያናኣ ዼ'ጊዲ ዒላቲ ዒላቲ ሚርጌ ዓሶይዳፓ ኬስካኔ፤ ሃሣ ሚርጌ ሓንታኒ ዳንዳዑዋ ዎቦ ዓሲና ፒዜ ሃንቱዋ ዎቦ ዓሲያ ዻቄኔ።

⁸ዬያሮ ዬኖ ካታሞይዳ ዼኤፒ ዎዛ ማዔኔ።

⁹ዬኖ ካታሜሎይዳ ሲሞኦኔ ጌይንታ ፔቴ'' ዓሲ ዓኣኔ፤ ዬይ ዓሢ ካታሞይዳ ዦዋቶና ዓኪ ባኣዚ'' ማዺ ማዺ ሳማሪያ ዓጮ''ይዳ ሄርሺ ዲቃቲንታያ ማዒ ናንጋኔ፤ ሓሣ «ታኣኒ ዼኤፒ ዓሲኬ!» ጌዒ ጌዒ ፔና ኬኤዛኔ።

¹⁰ዓሶ ዻኮ''ንታ ዼኤፖንታ ቢያ፦ «ሓይ ዓሢ ዼኤፒ ጌይንቲ ዔኤሊ''ንታ ፆኦሲ ዎልቃሢኬ!» ጌዒ ጌዒ ዒዛሲ ዋይዛኔ።

¹¹ዔያታ ዒዛሲ ዋይዛሢ ሚርጌ ዎዴይዳፓ ዓርቃዖ ዦዋቶና ዓኪ ባኣዚ'' ማዺሢና ዔያቶ ዲቃሢ ሄርሺሳሢሮኬ።

¹²ጋዓንቴ ፒልጶሴ ፆኦሲ ካኣቱሞ ዛሎ''ና ዬሱስ ኪሪስቶሴ ዛሎ''ና ኬኤዜ ኮዦ ሓይሶ ጎናሲ ዔኪ ዓቲንቆንታ ላኣሎንታ ዋኣፆና ማስቴኔ።

¹³ሲሞኦኔያ ዓቱዋዖ ኪሪስቶሴ ጉሙርቂ ዋኣፆና ማስቲ ፒልጶሴና ዎላ'' ፔቴ'' ማዔኔ፤ ሓሣ ዒዚ ፆኦሲ ዎልቆና ማዺንታ ዓኮ ባኮንታ ማላቶንታ ዛጊ ዛጊ ዲቃቲ ሄርሻኔ።

¹⁴ዬሩሳላሜይዳ ዓኣ ዳኪንቴዞንሢ ሳማሪያ ዓጮ'' ዓሳ ፆኦሲ ቃኣሎ'' ጎናሲ ዔኬሢ ዋይዛዖ ጴፂሮሴና ዮሓኒሴና ሳማሪያ ዓጮ'' ዳኬኔ።

¹⁵ዬያሮ ሳማሪያ ዓጮ'' ዓሳ ዓያና ጌኤሺ ዔካንዳጉዲ ጴፂሮሴና ዮሓኒሴና ዓኣዺ ዔያቶም ሺኢቄኔ።

¹⁶ዓይጎሮ ጌዔቶ ሳማሪያ ዓጮ'' ዓሳ ጎዳ ዬሱሴ ሱ'ንፆና ዋኣፆ ማስቴያፓዓቴም ዓያና ጌኤሺ ሓጊ ፔቴ''' ዓሲዳታዖ ኬዲ''ባኣሴ።

¹⁷ዬያሮ ጴፂሮሴና ዮሓኒሴና ዔያቶ ዑፃ ኩጮ ጌሣዛ ዓሳ ዓያና ጌኤሺ ዔኬኔ።

¹⁸ዳኪንቴዞንሢ ፔኤኮ ኩጮ ዓሶ ዑፃ ጌሣዛ ዓያና ጌኤሺ ዓሶም ዒንጊንቴሢ ሲሞኦኔ ዛጋዖ ዳኪንቴዞንሢም ሚኢሼ ዔኪ ሙኪ፦

¹⁹«ታኣኒያ ኩጮ ጌሣዛ ዓሳ ቢያ ዓያና ጌኤሺ ዔካንዳጉዲ ሓኖ' ቢታንቶ ታኣም ዒንጉዋቴራ» ጌዔኔ።

²⁰ጴፂሮሴ ጋዓንቴ ዒዛም፦ «ፆኦሲኮ ዒንጊፆ ኔኤኒ ሚኢሼና ዔካኒ ማሌሢሮ ኔናንታ ኔ ሚኢሾንታ ዎላ'' ባይቁዋቴ!

²¹ዒና'' ኔኤኮ ፆኦሲ ቤርቶይዳ ፒዜ ማዒባኣሢሮ ኑ ማዾ''ይዳ ኔኤኮ ቤሲያ ባኣሴ።

²²ዬያሮ ሓያ ኔኤኮ ፑርቱሞ ዻቢንቶ ጎማፓ ማዔ፤ ጎዖንቴ ፆኦሲ ኔኤኮ ዒኖ ማሊፆ ዓቶም ጋዓንዳቴ ዒዛ ሺኢቄ፤

²³ዓይጎሮ ጌዔቶ ኔኤኒ ባይዛ ቂኢሩሞ ማሊሢና ኩሜያ ሃሣ ጎሜና ቱኡቴ ዓሲ ማዔሢ ታ ዛጋኔ» ጌዔኔ።

²⁴ሲሞኦኔያ፦ «ዒንሢ ሓሢ ጌዔ ባኮይዳፓ ፔቴ'' ባኣዚ''ታዖ ታና ሄሉ''ዋጉዲ ዒንሢ ዒንሢሮ ጎዳሢ ታኣም ሺኢቁዋቴ» ጌዔኔ።

²⁵ጴፂሮሴና ዮሓኒሴና ዬሱሴ ዛሎ'' ዔራ ባኮ ማርካዺ፥ ጎዳኮዋ ቃኣሎ'' ኬኤዜስካፓ ሚርጌ ሳማሪያ ዓጮ'' ጉርዶይዳ ኮዦ ሓይሶ ኬኤዚ ኬኤዚ ዬሩሳላሜ ባንሢ ማዔኔ።

²⁶ፆኦሲኮ ኪኢታንቻ ፒልጶሴ ኮራ፦ «ዔቂ ዬሩሳላሜይዳፓ ጋኣዛ ዴንዳ ጎይፆና ሊካ ዴንዴ» ጌዔኔ፤ ዬና ጎይፃ፦ ዓሲ ናንጉዋ ዳውሌ''ይዴና ዓኣዻያኬ።

²⁷ዒዚ ዔቂ ዴንዴኔ። ዒማ''ና ፔቴ'' ዒቶጲያ ዓጮ''ኮ ካኣቶ'' ማኣራ ዓሽቲንቂ ማዻ ዒቶጲያ ዓጪ ዓሲስኬያ ፆኦሲም ዚጊ ካኣሽካኒ ዬሩሳላሜ ዴንዲ ዒኢካ ዓኣኔ፤ ዬይ ዓሢ ሂንዴኬ ጌይንታ ዒቶጲያ ዓጮ'' ካኣቴሎና ዎላ'' ቢታንቶ ዓኣያ ማዒ ማዻያ ሓሣ ሚኢሾ ዒዞኮ ቢያ ዛጊ ዓርቂ ቆላያኬ።

²⁸ዬይ ዓሢ ፓራሢ ጎቻ ሳርጌሎ ዖይቶይዳ ዴዒ ፔ ዓጮ'' ባንሢ ማዒ ዴንዲቤቃ ፆኦሲ ማሊፆ ኬኤዛ ዒሲያሴ ማፃኣፖ ናባባኔ።

²⁹ዬማና ዓያኖ ጌኤዣ ፒልጶሴም፦ «ዴንዲ ሓሴኬ ሳርጌሎ ዖይቶ ባንሢ ዑኬ» ጌዔኔ።

³⁰ዬያሮ ፒልጶሴ ጳሽኪ ዬያ ባንሢ ዴንዳዖ ዒቶጲያ ዓጮ'' ዓሢ ፆኦሲ ማሊፆ ኬኤዛ ዒሲያሴ ማፃኣፖ ናባባንቴ ዋይዚ፦ «ኔ ናባባሢኮ ቡሊ''ፃ ኔኤም ጌላ?» ጌዒ ዖኦጬኔ።

³¹ዒቶጲያ ዓጮ'' ዓሢ ማሓዖ፦ «ቡሊ'' ኬኤዛ ዓሲ ባኣንቴ ዎዲ'' ታኣም ጌላንዳይ?» ጋዓዖ፥ ፒልጶሴም፦ «ሳርጌሎ ዖይቶይዳ ኬስኪ ታኣና ዎላ'' ዴዔ» ጌዔኔ።

³²ዬይ ዒቶጲያ ዓጮ'' ዼኤፖ ዓሢ ናባባ ማፃኣፓ፦ «ሹኪንታኒ ዒሺንታ ማራይጉዲ ማዔኔ፤ ዑፃፓ ጋፓኖ ታይዛ ዓሳ ታይዛኣና ዚቲ ጋዓ ማራይጉዲ ዒዚ ዻንጎ ፔኤሲ'' ቡሊ''ባኣሴ።

³³ዒዚ ቦሂንቴኔ፤ ፒዜ ዎጌያ ዒዛም ዎጊንቲባኣሴ፤ ሼምፓሢ ዒዛኮ ሳዖይዳፓ ባይቄኔ፤ ዒዛኮ ሾይንቶ ዛሎ'' ዖኦኒ ኬኤዛኒ ዳንዳዓይ?» ሂዚ ጋዓ ቤዞኬ።

³⁴ዬይ ካኣቶ'' ማኣራ ዼኤፒ ዓሲ ማዒ ማዻ ዓሢ ፒልጶሴ ኮራ፦ «ፆኦሲ ማሊፆ ኬኤዛሢ ሓኖ' ጌዔሢ ዖ ዛላዳይ? ፔ ዛላሞ? ሜሌ'' ዓሲ ዛላዳይ? ሓዳራ ታኣም ኬኤዜ» ጌዔኔ።

³⁵ፒልጶሴያ ዬኖ ማፃኣፖ ቤዞይዳፓ ዓርቃዖ ዬሱሴ ዛሎ'' ኮዦ ሓይሶ ዒዛም ኬኤዜኔ።

³⁶ዔያታ ዴንዲቤቃ ዋኣሢ ዓኣ ቤሲ ሄላ''ዛ፥ ካኣቶ'' ማኣራ ማዻ ዼኤፖ ዓሢ ፒልጶሴ ኮራ፦ «ሓይሾ ሓካ ዋኣሢ ዓኣኔ፤ ታኣኒ ማስቱዋጉዲ ታና ላኣጋሢ ዓይጎዳይ?» ጌዔኔ። [

³⁷ፒልጶሴያ፦ «ጉቤ ዒናፓ ኔ ጉሙርቄቶ ዋኣፆ ማስታኒ ዳንዳዓኔ» ዒዛም ጌዔኔ። ካኣቶ'' ማኣራ ማዻ ዼኤፖ ዓሢያ፦ «ዬሱስ ኪሪስቶሴ ፆኦሲ ናኣዚ'' ማዔሢ ታ ጉሙርቃኔ» ጌዔኔ።][2]

³⁸ካኣቶ'' ማኣራ ማዻ ዼኤፖ ዓሢ ሳርጌሎ ዖይቶ ዔቂሴኔ፤ ዬካፓ ላምዓሢ ዋኣፆይዳ ኬዳ''ዛ ፒልጶሴ ዬያ ዓሢ ማስኬኔ።

³⁹ዋኣፆይዳፓ ዔያታ ኬስኬስካፓ ፆኦሲኮ ዓያና'' ፒልጶሴ ዔኬኔ፤ ካኣቶ'' ማኣራ ማዻ ዼኤፖ ዓሢ ላሚ ዒዛ ዴንቂባኣሴ። ዒዚያ ዎዛዺ ዎዛዺ ፔኤኮ ጎይፆ ዓኣዼኔ።

⁴⁰ፒልጶሴ ዒማ''ና ጋዓንቴ ዓዛፆሴ ጎዖ ቤሲዳ ጴዼኔ፤ ዒዚ ቂሳሪያ ዓጮ'' ማዒ ሙካንዳያ ሄላ''ንዳኣና ካታሞ ቢያ ሓንቲ ሓንቲ ኮዦ ሓይሶ ኬኤዜኔ።