Read maale ሮሜ ዓጮ'' ዓሶም 12 Bible Online

ሮሜ ዓጮ'' ዓሶም 12 - maale bible

ሮሜ ዓጮ'' ዓሶም 12

¹ዓካሪ ታ ዒሾንሦ! ታ ሚሾንሦ! ፆኦሲ ዎዛሳያ ሃሣ ናንጊና ባይቁዋ ዒንጎ ባኣዚ'' ማሂ ዒንሢ ፆኦሲም ዒ'ንሢ ዒንጋንዳጉዲ ዓቶም ጋዓ ፆኦዛሢ ሱ'ንፆና ታ ዒንሢ ሺኢቃኔ፤ ዬይ ዒንሢ ዒንጋኒ ኮይሳሢ' ፒዜ ማዔያ ጎኔና ፆኦሲ ካኣሽኪሢኬ።

²ኮሺ ሃሣ ዎዛሳያ፥ ፓጫ ባኣዚ''ያ ባኣያ ማዔ ፆኦሲ ማሊፆ ዒንሢ ዔራንዳጉዲ ዒንሢኮ ዒና'' ዓካዺ ላኣሚንቶንጎ፤ ጋዓንቴ ሓያ ዓጮ'' ዓሶኮ ፑርቶ ማሊፆጉዲ ማዺፖቴ።

³ሓሣ፦ «ዒንሢ ፔቴ'' ፔቴ''ሢም ፆኦሲ ዒንጌ ጉሙርቂፆጉዴያ ሼሌዑሞና ማላንዳፓዓቴም ዒንሢም ኮይሳሢዳፓ ዑሣ ዓኣሢ፥ ዒንሢ ዼ'ጊዲ ማሊፖቴ» ጌይ ፆኦሲ ታኣም ፔ ኮሹሞና ዒንጌ ጎይፆና ታ ዒንሢ ዞራኔ።

⁴ኑኡኮ ፔቴ'' ፔቴ''ሢኮ ዑፆይዳ ዱማ ዱማ ቤሲ ዓኣኔ፤ ዬያ ዱማ ዱማ ዑፆኮ ዱማ ዱማ ማዾ ዓኣኔ።

⁵ዬያጉዲ ኑኡኒ ሚርጌታዖ ኪሪስቶሴና ኑ ፔቴ'' ዑሢኬ፤ ፔቴ'' ዑፆኮ ዱማ ዱማ ቤዞ ኑ ማዔ ጎይፆና ዎላ'' ኑ ካኣማያኬ።

⁶ዬያሮ ፆኦሲ ፔ ኮሹሞ ዒንጊፆና ኑም ዒንጌ ዱማ ዱማ ዒንጊፆጉዴያ ኑ ማዾም፤ ኑም ዒንጊንቴሢ ፆኦሲ ማሊሢ ኬኤዚሢ ማዔቴ ፆኦሲ ጉሙርቃ ጎይፆማ ኑ ኬኤዞም።

⁷ኑም ዒንጊንቴሢ ሜሌ'' ዓሲም ማዺሢ ማዔቴ ዶዲ ኑ ማዾም፤ ኑም ዒንጊንቴሢ ዔርዚሢታቴ ኮይሳ ጎይፆ ኑ ዔርዞም፤

⁸ኑም ዒንጊንቴሢ ዓሲ ዞሪሢ ማዔቴ ኑ ዞሮም፤ ኑም ዒንጊንቴሢ ዓሲም ዔኤቢ ዒንጊሢ ማዔቴ ዒናፓ ኑ ዒንጎም፤ ኑም ዒንጊንቴሢ ዓሲ ዎይሥሢ ማዔቴ ዶዲ ኑ ዎይሦም፤ ኑም ዒንጊንቴሢ ሜሌ'' ዓሲ ሚጪንቲሢ ማዔቴ ዎዛና ኑ ሚጪንቶም፤

⁹ናሹማ ዒንሢኮ ዑሣ ማዒባኣ ናሹሞ ማዖንጎ፤ ፑርታ ባኣዚ'' ሻኣኪንቲ፥ ኮሺ ባኣዚ'' ዒናፓ ማዹዋቴ።

¹⁰ኪሪስቶሴ ዛሎ''ና ዒንሢ ዎሊኮ ጌርሲንሢ ሃሣ ጌሮንሢ ማዔሢሮ ዎሊ ዒናፓ ናሽኪንቱዋቴ፤ ሜሌ'' ዓሲ ዒንሢ ቦንቻስካፓ ባሼ ቦንቻኒ ኮዑዋቴ፤

¹¹ቤልፁሞ ሃሺ''፥ ጉቤ ዒናፓ ጎዳ ዬሱሴም ዶዲ ማዹዋቴ።

¹²ሓጊ ማዓንዳ ባኮና ዎዛዹዋቴ፤ ሜቶ ዎዴና ጊቢ'' ዳንዳዑዋቴ፤ ቢያ ዎዴና ሃሣ ሺኢቁዋቴ።

¹³ኪሪስቶሴ ጉሙርቃ፥ ዒንሢኮ ዒሾንሢ ሜቴቶ ማኣዱ''ዋቴ፤ ሾኦቺ ማዒ ሙካዞንሢያ ሾኦቺንሢ ዔኩዋቴ።

¹⁴ዒንሢ ዒፂ፥ ዳውሳዞንሢ ዓንጁዋቴ፤ ዓዓንጃንዳፓዓቴም ዔያቶም ጋዳንቂፖቴ።

¹⁵ዎዛዻ ዓሶና ዎላ'' ዎዛዹዋቴ፤ ዬኤካ ዓሶና ዎላ'' ዬኤኩዋቴ፤

¹⁶ዎላ'' ፔቴ'' ማሊሢና ጊኢጊ ናንጉዋቴ፤ ዒንሢ ቶኦኮ'' ዼ'ጊሲ ዖቶርቂሢ ሃሺ''፥ ማንቆ ዓሶና ዎላ'' ፔቴ'' ማዑዋቴ፤ [1] «ታጊዳፓ ሜሌ'' ዔሮ ባኣሴ» ጌይፖቴ።

¹⁷ዓሲ ቢያም ኮሺ ባኣዚ'' ማዹዋቴ፤ ዓሲ ፑርታ ባኣዚ'' ዒንሢም ማዼቴ ዒንሢያ ፑርታ ባኣዚ'' ማሂ ማዺፖቴ።

¹⁸ዒንሢም ዳንዳዒንታያ ማዔቴ ዓሲ ቢያና ኮሹሞና ናንጋኒ ዒንሢ ማዻንዳያ ኮይሳ ባኣዚ'' ቢያ ማዹዋቴ።

¹⁹ታ ዒሾንሦ! ታ ሚሾንሦ! ኮሜ ፆኦሲም ሃሹ''ዋቴ፤ ዒንሢሮ ኮሜ ዔኪፖቴ፤ ዓይጎሮ ጌዔቴ ፆኦሲ፦ «ኮሞ ማሃንዳሢ ታናኬ» ጋዓኔ ጌይንቲ ፃኣፒንቴሢሮኬ።

²⁰ዬያሮ ኮሜ ማሃሢዳፓ፦ «ኔኤኮ ሞርካሢ ናይዼቴ ዒዛ ሙኡዜ፤ ዼኤቤቴያ ዒዛ ዑሼ፤ ዬያ ኔ ሂዴቴ ዒ ማዼ ማዻ'' ዼኤፒ ዻቢንቲ ማዔሢ ዒዛም ዔርታንዳኔ።»

²¹ዬያሮ ፑርታ ማዾ ኮሹሞና ባባሼ፤ ፑርቱሞና ባሺንቲፖ።