Read maale ሮሜ ዓጮ'' ዓሶም 14 Bible Online

ሮሜ ዓጮ'' ዓሶም 14 - maale bible

ሮሜ ዓጮ'' ዓሶም 14

¹ዒንሢ ባኣኮ''ይዳ ኪሪስቶሴ ጉሙርቂፆና ዶዲቱዋ፥ ላቤ'' ዓሲ ዓኣቶ ናሹሞና ዒዛ ዓዓርቁዋቴ፤ ኮይሱዋ ጎይሢና ዒዛኮ ላቤ'' ማሊፆይዳ ዎጊፖቴ፤

²ፔቴ'' ዓሲኮ ጎሙርቂፃ፦ «ቢያ ባኣዚ'' ሙይንታኒ ኮይሳያኬ» ጋዓያ ማዓኒ ዳንዳዓኔ፤ ኪሪስቶሴ ጉሙርቂፆና ዶዲባኣሢ ጋዓንቴ ሙዓኒ ቱኮ''ናያ ሃሣ ዜርቆና ሳኣሚ ሌሊ ሙዓያ ናንዳኔ፤

³ዬያሮ ጉቤ ባኮ ሙዓሢ ሙዑዋኣሢ ቦሆፓ፤ ቱኮ'' ባኮ ሙዓሢ ጉቤ ባኮ ሙዓሢ ዑፃ ኮይሱዋ ጎይሢና «ዻቤኔ» ጌይ ዎጎፓ፤ ዎይቲ ጌዔቴ ዒዛሲያ ፆኦሲ «ኮሺኬ» ጌዔሢሮኬ።

⁴ዓካሪ ሜሌ'' ዓሲም ማዻሢ ዑፃ ዎጋንዳያ ኔኤም ኮይሱዋሴ፤ ዓይጎሮ ጌዔቴ ዒዚ ሎኦሜቴያ ዔቄቴያ ዒዛኮ ጎዳ ዔራፓኣዓቴም ኔ ባኣዚ''ቱዋሴ፤ ዒዛኮ ጎዳሢ ዒዛ ዔቂሳኒ ዳንዳዓሢሮ ዶዲ ዒ ዔቃንዳኔ።

⁵ዬያጉዲ ሃሣ፦ «ፔቴ'' ኬላ'' ባጎ ኬላ''ፓ ባሼ ቦንቺንታያኬ» ጌይ ማላይ ናንዳኔ፤ ባጋሢ ሓሣ፦ «ቢያ ኬላ'' ሄኮ ቦንቺንታኒ ኮይሳኔ» ጌይ ማላይ ናንዳኔ። ዓካሪ ዬያጉዴ ባኮ ቢያይዳ ፔቴ'' ፔቴ''ሢ ፔ ማሊፆ ዱማሲ ዔራንዳያ ኮይሳኔ።

⁶ፔቴ'' ኬሎ'' ሜሌ'' ኬላ''ፓ ባሼ ማሂ ቦንቻያ ዓኣቶ ዬያ ዒ ማዻሢ' ጎዳ ቦንቾም ጌዒኬ፤ ቢያ ባኮ ሙዓሢ ጎዳ ቦንቾም ጌዒ ሙዓኔ፤ ሙዓ ሙዖሮዋ ፆኦሲ ዒ ጋላታኔ። ቢያ ሙዖ ሙዑዋኣሢያ ፆኦሲ ቦንቾም ጌዒ ሙዑዋሴ፤ ዒ ሙዑዋዖ ሃሺ''ፆና ፆኦሲ ጋላታኔ።

⁷ኑጊዳፓ ዖና ማዔቴያ ፔኤሮ ናንጋያና ፔኤሮ ሓይቃይ ባኣሴ፤

⁸ኑኡኒ ናንጌቴያ ጎዳ ዬሱሴም፥ ሓይቄቴያ ጎዳ ዬሱሴምኬ፤ ዬያሮ ኑ ናንጌቴያ ሓይቄቴያ ጎዳ ዬሱሴሮኬ።

⁹ዓይጎሮ ጌዔቴ ኪሪስቶሴ ሓይቂ ሓይባ''ፓ ዔቄሢ' ሼምፖና ናንጋ ዓሶና ሓይቄቴያ ናንጊና ናንጋ ዓሶኮ ጎዳ ማዓኒኬ።

¹⁰ሂዴቴ ፔቴ''ይ ሜሌ''ሢ ዑፃ ዓይጎሮ ኮይሱዋ ጎይሢና ዎጋይ? ሃሣ ፔቴ''ሢ ባጋሢ ዓይጎሮ ቦሃይ? ኑኡኒ ቢያሢ ፆኦሲ' ዎጎ ዎጋ ቤዞ ሺኢካንዳኔ፤

¹¹ዎይቲ ጌዔቴ ጎዳ፦ «ታኣኒ ናንጊና ባይቁዋ ፆኦሲኬ፤ ዓሲ ቢያ ታ ቤርታ ጉምዓቲ ፔ ዻንጎና ታኣኒ ፆኦሲ ማዔሢ ማርካዻንዳኔ» ጋዓኔ ጌይንቲ ፃኣፒንቴሢሮኬ።

¹²ዬያሮ ኑ ፔቴ'' ፔቴ''ሢ ኑ ማዾ'' ዛሎ'' ፆኦሲ ቤርቶ ሺኢኪ ኬኤዛንዳኔ።

¹³ዓካሪ ኑጊዳፓ ፔቴ''ይ ባጋሢዳ ኮይሱዋ ጎይሢና ዎጊፆ ሃሾ''ንጎ፤ ሓሣ ዓሲ ዹቂሲ ጎማሲሳ ባኣዚ'' ማዺሢዳፓ ካፒንቶንጎ።

¹⁴ጎዳ ዬሱስ ኪሪስቶሴ ዓሲ ታ ማዔ ጎይፆና ሙኡዚዳ ሙይንታኒ ኮይሱዋ ሙኡዚ'' ባኣሢ ታ ዔሬኔ፤ ጋዓንቴ ፔቴ'' ዓሲ ፔቴ'' ባኣዚ'' «ሙይንታኒ ኮይሱዋ ባኣዚ''ኬ» ጌዒ ማላያ ማዔቴ ዬና'' ባኬላ ዒዛም ሙይንታኒ ኮይሱዋ ባኣዚ''ኬ።

¹⁵ሙኡዚ'' ዛላና ኔ ዒሻሢ ኔ ማሊሺ ዖዪሳያ ማዔቴ ናሹሞና ዒዛና ኔ ናንጋያቱዋሴ፤ ዬያሮ ኪሪስቶሴ ዒዛም ሓይቄ ዓሢ፥ ኔ ሙዓ ሙዖ ዛሎ''ና ጎማሲ ባይዚፖ።

¹⁶ዓካሪ ዒንሢም ኮሺ ማዔ ባኮ ሜሌ'' ዓሳ ቦሃንዳጉዲ ማሂፖቴ።

¹⁷ፆኦሲ ካኣቱማ ዓያና ጌኤሺ ዛሎ''ና ጴዻ ፂሉ''ሞ፥ ኮሹሞና ዎዛና ማዓንዳኣፓዓቴም ሙኡዚ''ና ዑሺና ዛላ ባኣዚ''ቱዋሴ።

¹⁸ዬያ ዱማሲ ዔሪ ኪሪስቶሴም ማዻ ዓሲ ፆኦሲ ዎዛሳንዳኔ፤ ዓሲ ቤርቲዳኣ ጋላቲንቴያ ማዓንዳኔ።

¹⁹ዬያሮ ኮሹሞ ጴዻያ፥ ሓሣ ዎሊያ ሴካና ሃንጋና ዶዲሻያ ማዔ ባኣዚ'' ኑ ማዾም።

²⁰ሙኡዚ'' ዛላና ፆኦሲ ማዾ'' ኑ ባይዚባኣቴ ኮሺኬ፤ ሙኡዚ'' ቢያ ሙይንታኒ ኮይሳያኬ፤ ጋዓንቴ ሜሌ'' ዓሲ ዹቂ ጎማሲሳ ሙኡዚ'' ሙዒሢ ዻቢንቲኬ።

²¹ዓሲ ዹቂ ዻቢሻ ባኣዚ'' ማዔቴ ዓሽኪ ሙዒሢንታ ዳጋሢ ዑሺንታ ሃሣ ዬያጉዴ ሜሌ'' ባኮዋ ሃሺ''ፃ ቃራኬ።

²²ዓካሪ፤ ዬያ ኔኤኮ ጉሙርቂፆ ኔኤና ፆኦሲና ሌሊ ዔራያ ማዖንጎ፤ ዓይጎሮ ጌዔቴ «ፒዜኬ» ጌይ ዒ ማዻ ባኮ ዒና'' ዒዛኮ «ኔ ዻቤኔ» ጎዑዋ ዓሲ ጋላቲንቴያኬ።

²³ሙኡዚ'' ዓልቲ ዓልቲ ሙዓ ዓሲ ጋዓንቴ ጉሙርቂሢና ዒ ሙዑዋኣሢሮ ፆኦሲ ዒዛይዳ ሜቶ ሄሊ''ሳንዳኔ፤ ዎይቲ ጌዔቴ ጉሙርቂሢና ማዺንቲባኣ ባኣዚ'' ቢያ ጎሜኬ።