Read maale ሮሜ ዓጮ'' ዓሶም 15 Bible Online

ሮሜ ዓጮ'' ዓሶም 15 - maale bible

ሮሜ ዓጮ'' ዓሶም 15

¹ኑኡኒ ኪሪስቶሴ ጉሙርቂፆና ዶዲ ማዔ ዓሳ ጉሙርቂፆና ላቤ'' ዓሶኮ ላቢ''ፆ ዔሪ ማኣዳ''ያ ማዓንዳኣፓዓቴም ኑና ኑ ዎዛሳያ ማዓኒ ኮይሱዋሴ፤

²ኑኡኒ ፔቴ'' ፔቴ''ሢ ሜሌ''ሢ ፆኦሲ ጉሙርቂፆና ዶዳንዳጉዲ ሜሌ'' ዓሢ ማኣዳ''ኒ ዒዛ ዎዛሳ ባኣዚ'' ኑ ማዾም።

³ዓይጎሮ ጌዔቴ ኪሪስቶሴ ፔና ዎዛሲባኣሴ፤ ጋዓንቴ «ኔና ጫሽኮና ጫዣ ታና ሄሌ''ኔ» ጌይንቲ ፃኣፒንቴሢ ዒዛይዳ ማዔኔ።

⁴ጌኤዦ ማፃኣፓፓ ኑ ዴንቃ ጊቢ'' ዳንዳዒፆና ዶዲፆና ሃጊ ማዓንዳ ዎዛ ኑኡኮ ዓኣያ ኑና ማሃንዳጉዲ ቤርታዺ ፃኣፒንቴ ባካ ቢያ ዔራቶ ኑ ዴንቃንዳጉዲ ኑም ፃኣፒንቴኔ።

⁵ዒንሢ ዬሱስ ኪሪስቶሴ ጊንፆ ሃንታዞንሢ ማዔሢሮ ጊቢ'' ዳንዳዓሢና ዶዲሢና ዒንጋ፥ ጎዳ ፔቱሞ ዓያና ዒንሢም ዒንጎንጎ።

⁶ዬይ ኑ ጎዳ ዬሱስ ኪሪስቶሴኮ ዓዶ ማዔ ፆኦዛሢ[2] ፔቴ'' ዒናና ፔቴ'' ዑኡሲና ዒንሢ ዒዛ ቦንቻንዳጉዲ ማሆንጎ።

⁷ኪሪስቶሴ ዒንሢ ቦንቺ ዔኬሢጉዲ ዒንሢያ ዎሊ ፆኦሲ ቦንቾም ጌዒ ቦንቹዋቴ።

⁸ሓይ ታ ኬኤዛሢ ቤርታ ኑ ዓዶንሢም ዒንጊንቴ ሃጊ ማዓንዳ ዎዛ'' ኩማንዳጉዲና ፆኦሲኮዋ ጉሙርቂንቲፃ ዔርታንዳጉዲ ኪሪስቶሴ ዓይሁዴ ማዒባኣ ዓሶም ማዻያ ማዔኔ ጌይኬ።

⁹ኪሪስቶሴ ዓይሁዴ ማዒባኣ ዓሶም ማዻያ ማዔ ሜሌ'' ጎይፃ ዓይሁዴ ማዒባኣ ዓሳ ፆኦሲኮ ማኣሪፆ ዛሎ'' ጋላታንዳጉዲኬ፤ ዬይያ፦ «ዓይሁዴ ማዒባኣ ዓሶ ባኣካ'' ታ ኔና ጋላታኔ፤ ኔ ሱንፆዋ ዓይኑሞና ታ ጋላታኔ» ጌይንቲ ፃኣፒንቴሢጉዲኬ።

¹⁰ሓሣ፦ «ዒንሢ ዓይሁዴ ማዒባኣ ዓሳ ፆኦሲ ዶኦሬ ዴሮ''ና ዎላ'' ዎዛዹዋቴ» ጌይንቲ ፃኣፒንቴኔ።

¹¹ላሚ ሃሣ፦ «ዓይሁዴ ማዒባኣ ዓሳ ቢያ ፆኦሲ ጋላቱዋቴ፤ ዴራ''ኣ ቢያ ፆኦሲ ጋላቱዋቴ» ጌይንቲ ፃኣፒንቴኔ።

¹²ዬያጉዲ ዒሲያሴ፦ «ዴሮ'' ቢያ ዑፃ ካኣታዻንዳያ ዒሴዬ ዜርፃፓ ሾይንታንዳኔ፤ ዒዛይዳ ዓይሁዴ ማዒባኣ ዓሳ ሃጊ ማዓንዳ ዎዛ ጌሣንዳኔ» ጌዔኔ።

¹³ዒንሢኮ ሃጊ ማዓንዳ ዎዛ'' ዓያኖ ጌኤዦ ዎልቆና ዲጪ ዲጪ ዓኣዻንዳጉዲ ሃጊ ማዓንዳ ዎዞ ዒንጋ፥ ጎዳ ዒንሢ ጉሙርቄሢሮ ዎዛና ኮሹሞና ሚርጊሺ ዒንሢም ዒንጎም።

¹⁴ታ ዒሾንሦ! ታ ሚሾንሦ! ሚርጌና ዒንሢ ኮሺ ማዔሢ ሃሣ ሚርጌና ዒንሢ ዔራያ ማዔሢና ፔቴ'' ፔቴ''ሢ ሜሌ''ሢ ዞራኒ ዳንዳዓያ ማዔሢ ጎኔና ታ ዔሬኔ።

¹⁵ፔቴ'' ፔቴ'' ባኣዚ'' ታ ዒንሢም ጶቂሣኒ ኮዒ ሃያ ኪኢቶ'' ጫርቂ ታ ዒንሢም ፃኣፔሢ' ፆኦሲ ታኣም ፔ ኮሹሞና ዒንጌ ጎይፆናኬ።

¹⁶ዬይ ኮሹሞ ዒንጊፃ ታኣም ዒንጊንቴሢ ፆኦሲኮ ኮዦ ሓይሶ ዓይሁዴ ማዒባኣ ዓሶም ቄኤሴ ማዒ ኬኤዚ፥ ዬሱስ ኪሪስቶሴም ማዻንዳጉዲኬ፤ ዬያሮ ዓይሁዴ ማዒባኣ ዓሳ ዓያና ጌኤሺና ፆኦሲም ዱማዼያ ሃሣ ፆኦሲ ዎዛሳያ ማዓ ፆኦሲም ዒንጎ ባኣዚ'' ማዒ ዒንጊንታንዳጉዲ ታ ማዻኔ።

¹⁷ታኣኒ ዬሱስ ኪሪስቶሴና ማዒ ፆኦሲም ማዻኒ ዳንዳዒፆና ዖቶርቃኔ።

¹⁸ታኣኒ ዖቶርቃሢ ታ ኬኤዛ ባኮና ማዻ ማዾ'' ዛሎ''ና ዓይሁዴ ማዒባኣ ዓሳ ፆኦሲም ዓይሢንታንዳጉዲ ኪሪስቶሴ ማሄሢሮ ሌሊኬ፤

¹⁹ዬያጉዲ ሃሣ ኪሪስቶሴ ፆኦሲ ዎልቄና ማዺንታ ዓኪ ማዾንታ ዲቃሣ ማዾዋ ዓያኖ ጌኤዦ ዎልቆና ማዺ ዓይሁዴ ማዒባኣ ዓሳ ዓይሢንታንዳጉዲ ማሄሢሮ ታ ዖቶርቃኔ፤ ዬያይዲፆና ዬሩሳላሜይዳፓ ዴንዲ ዔልዋሪቆኔ ሄላ''ንዳኣና ሓንቲ ሓንቲ ኪሪስቶሴኮ ኮዦ ሓይሶ ታ ኬኤዜኔ።

²⁰ቢያ ኬሊ'' ታ ማላሢ ሜሌ'' ዓሲ ቦኦኮልቄያይዳ ማዢሢ ማዒባኣንቴ ኪሪስቶሴኮ ሱ'ንፃ ዋይዚንቲባኣ ቤስካ ቢያ ኮዦ ሓይሶ ኬኤዛኒኬ።

²¹ዬያ ታ ማዻሢ፦ «ዒዛ ዛሎ'' ኬኤዚንቲ ቤቂባኣ ዓሳ፥ ዒዛ ዛጋንዳኔ፤ ዒዛ ዛሎ'' ዋይዚ ቤቂባኣ ዓሳኣ ጶቂሢ ዔራንዳኔ» ጌይንቲ ፃኣፒንቴ ጎይፆናኬ።

²²ሃኖ'' ሄላ''ንዳኣና ዒንሢ ኮይላ'' ታ ሙካኒ ዳንዳዒባኣሢ ታ ዒንሢም ኬኤዜ ጎይፆና ጊኢጊባኣሢሮኬ።

²³ሓሢ ታ ሃካ ዓኣ ማዾ'' ኩርሴሢሮ ሃሣ ሚርጌ ሌዔፓ ዓርቂ ዒንሢ ዛጋኒ ሚርጌና ታ ኮዓሢሮ፥

²⁴ዒስፔኔ ዓጮ'' ታ ዴንዳዖ ዒንሢያ ዒኢና ዛጊ ዓኣዻኒ ማሌኔ። ዒኢካ ዻካ'' ዒንሢና ዎላ'' ታ ዴዔስካፓ ጎይፆ ታ ዓኣዻንዳጉዲ ታኣም ኮይሳ ማኣዶ ዒንሢ ማኣዳ''ንዳሢ ታ ጉሙርቃኔ።

²⁵ሓሢ ጋዓንቴ ኪሪስቶሴ ጉሙርቃ ዓሶም ዒንጊንታ፥ ማኣዶ ሚኢሼ ዔኪ ዬሩሳላሜ ታ ዴንዳኔ፤

²⁶ዓይጎሮ ጌዔቴ ሜቄዶኒያና ዓካይያ ጌይንታ ዓጮ''ይዳ ዓኣ ኪሪስቶሴ ጉሙርቃ ዓሳ ዬሩሳላሜይዳ ዓኣ ኪሪስቶሴ ጉሙርቃ ዓሶ ባኣካ'' ዓኣ ማንቆ ዓሶም ሚኢሼ ማኣዶ ዳካኒ ማሌሢሮኬ።

²⁷ሓያ ማኣዳሢ ዔያታ ፔ ማሊሢና ዒንጌሢ' ዔያቶ ኮይሳያ ማዔምኬ፤ ዎይቲ ጌዔቴ ዓይሁዴ ማዒባኣ ዓሳ ዓይሁዴ ዓሶና ዎላ'' ዓያኖ ዓንጆ ዴንቃያ ማዔሢሮ ዓይሁዴ ማዒባኣ ዓሳ ሳዖ ዓንጆ ዒንጊ ዓይሁዴ ዓሶ ማኣዳ''ኒ ኮይሳሢሮኬ።

²⁸ዬያሮ ሃያ፥ ቡኩሶና ማኣዳሢ ሚኢሾ ዬሩሳላሜ ዔኪ ዓኣዺ ታ ዒንጌሢኮ ጊንፃ ዒስፔኔ ዓጮ'' ዴንዳዖ ዒንሢ ዬማና ታ ዛጋንዳኔ።

²⁹ዒንሢ ኮይላ'' ታ ሙካኣና ኪሪስቶሴ ዛሎ''ና ማዓ ዓንጆ ሚርጌና ታ ዒንሢም ዔኪ ሙካንዳሢ ጉሙርቃኔ።

³⁰ታ ዒሾንሦ! ታ ሚሾንሦ! ታ ዛሎ'' ታኣና ዎላ'' ዶዲ ፆኦሲ ሺኢጲሢና ታና ዒንሢ ማኣዳ''ንዳጉዲ ኑ ጎዳሢ ዬሱስ ኪሪስቶሴና ዓያኖ ጌኤዦናኮ ናሹሞና ታ ዒንሢ ሺኢቃኔ።

³¹ዒንሢ ታኣም ሺኢቃንዳሢ' ዪሁዳ ዓጮ''ይዳ ዓኣ ኪሪስቶሴ ጉሙርቁዋ ዓሶይዳፓ ፆኦሲ ታና ካፓንዳጉዲና ዬሩሳላሜይዳ ታ ማዻንዳ ማዻ'' ኪሪስቶሴ ጉሙርቃ ዓሶ ዎዛሳንዳጉዲኬ።

³²ሓሣ ያዺ ማዔሢኮ ጊንፃ ፆኦሲ ማሊሢ ማዔም ዒንሢ ኮይላ'' ታ ዎዛና ዬዒ፥ ዒንሢና ዎላ'' ዴዒ ሃውሻንዳጉዲኬ።

³³ኮሹሞ ዒንጋ፥ ፆኦዛሢ ዒንሢ ቢያሢና ዎላ'' ማዖንጎ፤ ዓኣሜን።