Read maale ሮሜ ዓጮ'' ዓሶም 4 Bible Online

ሮሜ ዓጮ'' ዓሶም 4 - maale bible

ሮሜ ዓጮ'' ዓሶም 4

¹ዓካሪ፡ ኑኡኮ ዓዳሢ፥ ዓብራሃሜ «ዴንቄኔ» ኑ ጋዓሢ ዓይጌንዴዳይ?

²ዓብራሃሜ ዎንዴ ፂሌ''ሢ ማዾና ማዔያታቴ ዒ ሄርሺንታንዳ ባኣዚ'' ዴንቃንዳዖኬ፤ ጋዓንቴ ዒ ፆኦሲ ቤርታ ሄርሺንታኒ ዳንዳዑዋሴ።

³ዓይጎሮ ጌዔቴ፦ «ዓብራሃሜ ፆኦሲ ጉሙርቄሢሮ ጉሙርቂፃ ዒዛኮ ፂሉ''ሞ ማዒ ፓይዲንቴኔ» ጌይንቲ ፃኣፒንቴኔ።

⁴ማዾ ማዻ ዓሲም ማዾ'' ዛሎ'' ዒንጊንታ ባካ ዒዛኮ ዎልቆ ዛሎ''ኬ፤ ጉሪ ዒንጎያቱዋሴ።

⁵ዓሲ ኮሺ ባኣዚ'' ማዺባኣያ ማዔቴያ ጎሞ ዓሶ ፂሊ''ሳ ፆኦዛሢ ጉሙርቄቶ ጉሙርቂፃ ፂሉ''ሞ ማዒ ዒዛም ፓይዲንታንዳኔ።

⁶ዓሲ ኮሺ ማዼ ዛላሮቱዋንቴ ፆኦሲ ጉሪ ፂሊ''ሳ ዓሲ ዓንጂንቴያ ማዒፆ ዳውቴ ዔርዛዖ፦

⁷«ዻቢንታ ዓቶም ጌይንቴዞንሢና ጎሞዋ ሓሾ''ና ዓሳ ዓንጂንቴያኬ!

⁸ፆኦሲ ጎሞ ዒዛኮ ዓርቂባኣ ዓሢ ዓንጂንቴያኬ!» ጌዔኔ።

⁹ዓካሪ ዬይ፥ ዳውቴ ኬኤዜ፥ ዓንጃ ዓቲንቶ ቤርቶ ቲቂንቴ ዓሶም ሌሊሞ? ቲቂንቲባኣ ዓሶማኣ ኬኤዜይ? ቲቂንቲባኣዞንሢማኣ ኬኤዜኔ። ዓይጎሮ ጌዔቴ፦ «ዓብራሃሜ ፆኦሲ ጉሙርቄሢሮ ጉሙርቂፃ ዒዛኮ ፂሉ''ሞ ማዒ ዒዛም ፓይዲንቴኔ» ኑ ጌዔኔ።

¹⁰ዓብራሃሜኮ ጉሙርቂፃ ፂሉ''ሞ ማዒ ፓይዲንቴሢ ዓይዴዳይ? ዓቲንቶ ቤርቶ ቲቂንቶኮ ቤርታሞ? ጊንፃኣዳይ? ዓቲንቶ ቤርቶ ቲቂፆኮ ቤርታኬ፥ ጊንፃኣቱዋሴ።

¹¹ዓብራሃሜ ዓቲንቶ ቤርቶ ቲቂንታንዳሢኮ ቤርታ ዒዛኮ ጉሙርቂፃ ፂሉ''ሞ ማዒ ዒዛም ፓይዲንቴሢ ዔርዛንዳ ማላታ ማዓንዳጉዲ ዓቲንቶ ቤርቶ ዒ ቲቂንቴኔ፤ ዬያሮ ዓብራሃሜ ዓቲንቶ ቤርቶ ቲቂንቱዋዖ ጉሙርቃዞንሢና ጉሙርቂፃኣ ፂሉ''ሞ ማዒ ፓይዲንታዞንሢኮ ቢያ ዓዶኬ።

¹²ዬያጉዲ ሃሣ ዓብራሃሜ ዓቲንቶ ቤርታ ቲቂንቴዞንሢኮዋ ዓዶኬ፤ ዓቲንቶ ቤርቶ ቲቂንቴዞንሢኮ ዓዶ ማዔ ጎይፃ ዔያቶኮ ዓቲንቶ ቤርቶ ቲቂንቶና ሌሊቱዋንቴ ዒዚ ዓቲንቶ ቤርቶ ቲቂንቶኮ ቤርታ ዓኣ ዒዛኮ ጉሙርቂፆጉዴያ ዔያታ ጉሙርቄሢሮኬ።

¹³ዓብራሃሜ ፔ ዜርፆና ዓጮ'' ዻካላንዳያታሢ ፆኦሲ ዒዛም ሃጊ ማዓንዳ ዎዛ ዒንጌኔ፤ ዬይ ዎዛ'' ጴዼሢ' ዓብራሃሜ ዎጎ ኩንሤሢሮቱዋንቴ ጉሙርቄሢሮና ጉሙርቂፃኣ ዒዛም ፂሉ''ሞ ማዒ ፓይዲንቴሢሮኬ።

¹⁴ዬያ ሓጊ ማዓንዳ ዎዞ'' ዴንቃንዳዞንሢ ዎጎ ካፓ ዓሶ ማዔቴ ጉሙርቂሢ ፓሡዋ ባኣዚ'' ማዓኔ፤ ዒንጊንቴ ዎዛ''ኣ ጉሪ ማዓኔ ጌይሢኬ።

¹⁵ዎጌ ፆኦሲ ጎሪ''ንቲ ዔኪ ዬዓኔ፤ ዎጌባኣያ ማዔቶ ጋዓንቴ ዎጌኮ ዑሣ ዓኣዺ ዻቦ ዻቢንቲ ባኣያ ማዓንዳኔ።

¹⁶ሃጊ ማዓ ዎዞ''ኮ ዓይፃ ጉሙርቂሢኬ፤ ዬያሮ ዓብራሃሜ ዜርፃ ቢያ ዬያ ዔርቴ ዎዞ'' ፆኦሲኮ ኮሹሞ ዒንጊፆና ዴንቃንዳኔ፤ ዬይያ፦ ዎጎ ዛሎ''ና ፂላ''ዞንሢም ሌሊቱዋንቴ ዓብራሃሜጉዲ ጉሙርቂፆና ፂላ''ንዳዞንሢማኣ ማዓንዳኔ፤ ዓብራሃሜ ጉሙርቂፆ ዛሎ''ና ኑና ቢያሢኮ ዓዶ ማዔሢሮኬ።

¹⁷ዬይ ያዺ ማዔሢ፦ «ሚርጌ ዴሬኮ ታ ኔና ዓዶ ማሄኔ» ጌይንቲ ፃኣፒንቴ ጎይፆናኬ። ዬያሮ ዓብራሃሜ ጉሙርቄ ፆኦዛሢ፥ ሓይቄሢያ ዔቂሳሢና ባኣ ባኮዋ ዓኣያ ማዓንዳጉዲ ማሃ ፆኦዛሢኮ ቤርታ ሃጊ ማዓ ዎዛ'' ዒዛኮ ዶዲኬ።

¹⁸ዓብራሃሜ ጉሙርቂሢና ሃጊ ማዓ ዎዛ ጌሤሢ' ዓይጎ ባኣዚ''ያ ሃጊ ማዓ ዎዛ ማሆንዶ ባኣዚ'' ባኣያይዳኬ፤ ዬያሮ፦ «ዜርፃ ኔኤኮ ዬያጉዲ ሚርጋንዳኔ» ጌይንቲ ፃኣፒንቴ ጎይፆና ሚርጌ ዴሬኮ ዒ ዓዶ ማዔኔ።

¹⁹ሌዓ ዒዛኮ ፄኤታ ሄላ''ያ ማዔ፥ ጋርቼ ዓሲታዖ ዒዛንታ ማቾ ሳኣራንታ ጋርቺ ሾዓኒ ዳንዳዑዋኣሢ ዔሬቴያ ፆኦሲ ጉሙርቂፆ ዒ ሼሌዒሲባኣሴ።

²⁰ጉሙርቂፆና ዒዚ ዶዲ ፆኦሲ ቦንቼያፓዓቴም ፆኦሲ ዒንጌ ሃጊ ማዓ ዎዛ''፦ «ማዓያሞ ማዑዋያዳይ?» ጌይ ማሊባኣሴ።

²¹ዓይጎሮ ጌዔቴ ፆኦሲ ዒዛም ዒንጌ ዎዞ'' ኩንሣኒ ዳንዳዓሢ ዒ ዔሬሢሮኬ።

²²ዓብራሃሜኮ ጉሙርቂፃ ፂሉ''ሞ ማዒ ፓይዲንቴሢ ዬያናኬ።

²³ጋዓንቴ፦ «ፂሉ''ሞ ማዒ ዒዛም ፓይዲንቴኔ» ጋዓ ቃኣላ'' ፃኣፒንቴሢ ዓብራሃሜም ሌሊቱዋንቴ፥

²⁴ኑማኣ ማዓያኬ፤ ጎዳ ዬሱሴ ሃይባ''ፓ ዔቂሴ ፆኦዛሢ ኑ ጉሙርቃሢሮ ኑማኣ ኑ ጉሙርቂፃ ፂሉ''ሞ ማዒ ፓይዲንታንዳኔ።

²⁵ዬይ፡ ኑ ጎዳሢ፥ ዬሱሴ ኑ ጎሞሮ ሃይቢም ዓኣሢንቲ ዒንጊንቴሢና ኑናኣ ፂሊ''ሳኒ ሃይባ''ፓ ዔቄሢኬ።