Read maale ሮሜ ዓጮ'' ዓሶም 7 Bible Online

ሮሜ ዓጮ'' ዓሶም 7 - maale bible

ሮሜ ዓጮ'' ዓሶም 7

¹ታ ዒሾንሦ! ታ ሚሾንሦ! ቢያሢ ዒንሢ ዎጌ ዔራያታሢሮ ዎጌ ዓሲዳ ቢታንቶ ዴንቃሢ ዓሲ ሼምፖና ዓኣ ዎዶ''ማና ሌሊታሢ ዒንሢ ዔራኔ።

²ኮኦኪንሢና፦ ፔቴ'' ሎዔ ላኣሊ ዓኒና ዎላ'' ሼምፔና ናንጋ ዎዶ''ይዳ ዒዛና ዎላ'' ዎጌና ቱኡቴ''ያኬ፤ ዓኒ ዒዞኮ ሃይቄቶ ጋዓንቴ ዒዛ ቱኡቴ'' ዎጎይዳፓ ኬስኬያ ማዓኔ።

³ዬያሮ ዓኒ ዒዞኮ ሼምፔና ዓኣንቴ ሜሌ'' ዓቲንቄም ዒዛ ሎዔቴ ዓኒ ማዒባኣያና ላሄኔ ጌይንታኔ፤ ዓኒ ሃይቄቶ ጋዓንቴ ዒዛና ዎላ'' ዒዛ ቱኡቴ'' ዎጎይዳፓ ኬስኬያኬ፤ ሜሌ'' ዓሲም ዒዛ ሎዔቴ ዓኒ ማዒባኣያና ላሄኔ ጌይንታዓኬ።

⁴ዒሾንሢዮቴ! ዒንሢ ባካ ዬያጉዴያኬ፤ ዒንሢ ኪሪስቶሴ ዑፆኮ ዱማ ዱማ ቤዞ ማዔሢሮ ሓይቢና ዱማዾሢጉዲ ሙሴ ዎጋ''ፓ ዒንሢ ዱማዼኔ። ዬያሮ ፆኦሲ ማዾ''ም ዓኣፒ ኑ ዓኣፓንዳጉዲ ሃይቦ''ይዳፓ ዔቄ፥ ኪሪስቶሴሮ ዒንሢ ማዔኔ።

⁵ዎይቲ ጌዔቴ ጎሞ ማሊፆና ኑ ናንጋ ዎዶ''ና ዎጎ ዛሎ''ና ማዺንታ ፑርቶ ማሊፃ ሓይቢ ዓኣፒ ኑ ዓኣፓንዳጉዲ ኑኡኮ ዱማ ዱማ ዑፆይዳ ማዻኔ።

⁶ሓሢ ጋዓንቴ ቤርታ ቱኪ'' ኑና ዓኣ ዎጎይዳፓ ሓይቢና ዱማዺሢጉዲ ኑ ዱማዼያ ማዔሢሮ ዎጎ ቱኡዛፓ ኑ ኬስኬኔ። ዬያሮ ሃካፓ ሴካ ኑኡኒ ማዻሢ ዓኪ ማዔ ዓያኖ ዓይሢፆጉዲኬ፤ ሚና ቤርታ ፃኣፒንቴ ጪንቄ ዎጋ'' ዓይሣሢ ጎይፆቱዋሴ።

⁷ዓካሪ ኑ ዎዚ ጎዖንዶይ? ዎጌ ፔ ቶኦኪና ጎሜኬ ጌይሢዳ? ፔቴ''ታዖ ያዺቱዋሴ! ጋዓንቴ ጎሜ ዓይጎ ማዔቴያ ታ ዔራንዳጉዲ ማሄሢ ዎጌኬ። ዎይቲ ጌዔቴ ዎጋ''፦ «ዓሲሮ ዛጊ ሱኡካዺፖ» ጌዒባኣያታቴ፥ «ሱኡካዺሢ» ዓይጎታቴያ ታ ዔሪንዱዋያታንቴኬ።

⁸ጎሜ' ሱኡኬ ቢያ ታ ሱኡካዻንዳጉዲ ማሄሢ ዎጌይዳፓ ሙኬ ዓይሢፆ ዛሎ''ናኬ፤ ዎጌባኣቶ ጋዓንቴ ጎሜ ሓይቄ ባኣዚ''ኬ።

⁹ዎጌ ታ ናንጎይዳ ሓጊ ቢታንቶ ዴንቂባኣንቴ ዎጎኮ ዓይሢፆ ታ ዔራዛ ጎሜ ሼምፖ ዴንቄኔ፤

¹⁰ታኣኒ ሓይቄኔ፤ ናንጊና ናንጊ ዒንጋንዳጉዲ ዒንጊንቴ ዎጎኮ ዓይሢፃ ታኣም ሓይቢ ዔኪ ሙኬኔ።

¹¹ዎይቲ ጌዔቴ ዎጌኮ ዓይሢፆ ዛሎ''ና ጎሜ ካራ ዴንቂ ታና ጌሺ ዓይሥሢና ዎዼኔ።

¹²ዬያሮ ዎጌ ፆኦሲም ዱማዼያኬ፤ ዓይሥሢያ ዱማዼያ፥ ጌኤሺ ሓሣ ኮሺኬ።

¹³ሂዳዖ ዬይ ኮዦ ባካ ታኣም ሃይቢ ዔኪ ሙኬኔ ጌይሢዳ? ያዺቱዋሴ! ሓይቢ ታኣም ዔኪ ሙኬ ባካ ጎሜኬ። ጎሜ ዓይጎታቴያ ዔርታንዳጉዲ ኮሺ ማዔ ባኬሎ ካራ ማሂ ዬይ ሃይቢ ታኣም ዔኪ ሙኬኔ። ዬያሮ ጎሞኮ ፑርቱማ ዔርታሢ ዎጌኮ ዓይሢፆ ዛሎ''ናኬ።

¹⁴ዓካሪ ዎጌ ዓያና ባኣዚ'' ማዔሢ ኑ ዔራኔ፤ ታኣኒ ጋዓንቴ ጎሜኮ ካራሚ ማዓኒ ሻንቺንቴያ፥ ጎሜ ማሊሢ ታና ዎይሣያኬ።

¹⁵ታኣኒ ማዻ ባኮ ታ ዔሩዋሴ፤ ዓይጎሮ ጌዔቴ ናሽካ ባኮ ታ ሓሺ''፥ ታ ዒፃ ባኮ ማዻኔ፤

¹⁶ዓካሪ፤ ታኣኒ ማዻሢ ታ ኮዑዋ ባኣዚ'' ማዔቴ ዎጌ ኮሺ ማዔሢ ታ ማርካዻኔ።

¹⁷ታ ማዻኒ ኮይሱዋ ባኮ ማዻሢ ታ ጊዶይዳ ዓኣ ጎሞ ማዓንዳኣፓዓቴም ታናቱዋሴ።

¹⁸ታ ጊዶይዳ ሓሣ ታኣኮ ጎሞ ማሊፆይዳ ዓይጌያ ኮሺ ባኣዚ'' ባኣሢ ታ ዔራኔ፤ ዓይጎሮ ጌዔቴ ዓይጎ ኮሺ ባኣዚ'' ታ ማዻኒ ማላቶዋ ዬኖ ኮዦ ማዼ''ሎ ታ ማዻኒ ዳንዳዑዋኣሢሮኬ።

¹⁹ማዻኒ ታኣም ኮይሳ ኮዦ ማዾ'' ታ ማዹዋሴ፤ ጋዓንቴ ታ ኮዑዋ ፑርታ ማዾ ታ ማዻኔ።

²⁰ዓካሪ ማዻኒ ታኣም ኮይሱዋ ፑርቶ ማዾ'' ማዻያ ታ ማዔቴ ዬያ ማዻሢ ታ ጊዶይዳ ዓኣ ጎሞ ማዓንዳኣፓዓቴም ታናቱዋሴ ጌይሢኬ።

²¹ዬያሮ ፔቴ'' ዎጌ ማዺ ማዺ ዓኣሢ ታ ዛጋኔ፤ ዎይቲ ጌዔቴ ታ ኮሺ ባኣዚ'' ማዻኒ ኮዓ ዎዶ''ና ፑርታ ባኣዚ'' ሌሊ ማዺንታኔ።

²²ታኣኮ ጋሮ ዒና'' ጋዓንቴ ፆኦሲ ዎጎና ዎዛዻኔ።

²³ማዔቴያ ታኣኮ ማሊፆ ዎጎና ዎላ'' ካኣሞ ዒፂ፥ ታኣኮ ዱማ ዱማ ዑፆይዳ ማዻ ጎሞ ዎጎና ዲዒንቴያ ታና ማሃ ሜሌ'' ዎጌ ታ ጋራ ዓኣሢ ታ ዛጋኔ።

²⁴ዬያሮ ታ ዎዚጉዴ ላኣፓ ዓሲዳይ! ሓያ ታና ሓይቢም ዔኪ ዴንዳ ዓሽኮይዳፓ ዖ ታና ዓውሳንዳይ?

²⁵ፆኦሲም ጋላታ! ዬሱስ ኪሪስቶሴ ዛሎ''ና ዬያ ዒ ማዼሢሮ። ዓካሪ ታኣኒ ማሊፆና ፆኦሲ ዎጌም ዎርቃያ ማዓዛ፥ ጎሞ ማሊፆና ጋዓንቴ ጎሜ ዎጌም ዎርቃያ ታ ማዓኔ።