Read maale ሮሜ ዓጮ'' ዓሶም 8 Bible Online

ሮሜ ዓጮ'' ዓሶም 8 - maale bible

ሮሜ ዓጮ'' ዓሶም 8

¹ዓካሪ ሃሢ ዬሱስ ኪሪስቶሴና ፔቱሞ ዓኣዞንሢ ናንጊና ፑርታ ዎጌና ዎጊሳ ባኣዚ'' ባኣሴ።

²ዓይጎሮ ጌዔቴ ዬሱስ ኪሪስቶሴ ዛሎ''ና ናንጊ ዒንጋ ዓያና ጌኤሺ ዎጌ፦ ጎሜና ሓይቢ ዎጌናኮ ዓይላቶይዳፓ ታና ኬሴ''ኔ።

³ዓሲኮ ላቤ'' ማሊፆይዳፓ ዔቄያና ዎጋ'' ኑና ፂሊ''ሳኒ ዳንዳዒባኣታንቴ ፆኦሲ ማዼኔ፤ ፆኦሲ ፔ ናዖ ኑና ጎሞ ዓሶ ማሊሲ ኑ ጎሞ ዛሎ'' ዳኪ ኑኡኮ ጎሞ ማሊፆ ናንጊና ዎጊ ባይዜኔ።

⁴ዬያ ዒ ማዼሢ ዓሲ ማሊሢናቱዋንቴ ዓያና ማሊሢና ሃንታ ዓሶ፥ ኑጊዳ ፒዜ ማዔ ዎጎ ዓይሢፃ ማዺንቲ ኩማንዳጉዲኬ።

⁵ዓሲ ማሊሢና ናንጋዞንሢ፦ ዓሲ ባኣዚ''፤ ዓያና ማሊሢና ናንጋዞንሢ ጋዓንቴ ዓያና ባኣዚ'' ማላኔ።

⁶ዓሲ ባኣዚ'' ማሊሢ ሓይቢ ዔኪ ሙካኔ፤ ዓያና ባኣዚ'' ማሊሢ ጋዓንቴ ሼምፖና ኮሹሞና ዒንጋኔ።

⁷ዓይጎሮ ጌዔቴ ዓሲ ባኣዚ'' ዛላ ማላ ዓሲ ፆኦሲ ዎጌም ዓይሢንቱዋያ ሓሣ ዓይሢንታኒያ ዳንዳዑዋያ፥ ፆኦሲኮ ሞርኬ ማዓኔ።

⁸ዓሲ ማሊሢ ማሊ ሃንታዞንሢ ፆኦሲ ዎዛሳኒ ዳንዳዑዋሴ።

⁹ዒንሢ ጋዓንቴ ፆኦሲኮ ዓያና'' ዒንሢዳ ዓኣቶ ዓያናና ማዓንዳፓዓቴም ዓሲ ማሊሢና ዒንሢ ናንጋዓኬ፤ ኪሪስቶሴ ዓያና'' ባኣ ዓሲ ኪሪስቶሴ ዓሲቱዋሴ።

¹⁰ኪሪስቶሴ ዒንሢ ጋራ ማዔቴ፥ ዎዚ ዒንሢኮ ዑፃ ጎሜ ዛላና ሓይቃያ ማዔቴያ ፆኦሲ ዒንሢ ፂሊ''ሴሢሮ ዓያና'' ዒንሢኮ ናንጊና ናንጋያኬ፤

¹¹ዬሱሴ ሓይባ''ፓ ዔቂሴ፥ ፆኦሲ ዓያና'' ዒንሢዳ ዓኣቶ ዬሱስ ኪሪስቶሴ ሓይባ''ፓ ዔቂሴ፥ ፆኦዛሢ ዒንሢዳ ናንጋ ዓያኖ ዛሎ''ና ዒንሢኮ ሓይቃ ዑፆም ሼምፖ ዒንጋንዳኔ።

¹²ዬያሮ ታ ዒሾንሦ! ታ ሚሾንሦ! ኑኡኒ ናንጋኒ ኮይሳ ጎይሢ ዓኣኔ፤ ዬና ኮይሳ ጎይፄላ ዓሲ ማሊሢና ኑ ናንጋንዳጉዲቱዋሴ።

¹³ዓሲ ማሊሢ ማሊ ዒንሢ ናንጋያታቴ ሓይቃንዳኔ፤ ዓያና ጌኤሺ ዎልቄና ዓሲ ማሊሢ ማዾ ዒንሢ ባሼቴ ጋዓንቴ ሼምፖና ዒንሢ ናንጋንዳኔ።

¹⁴ፆኦሲ ዓያና ዓይሣ ጎይፆ ዓኣዻዞንሢ ቢያ ፆኦሲ ናይኬ።

¹⁵ዬያሮ «ዓዴ» ጌይ ዒንሢ ዔኤላ''ንዳ ፆኦሲ ናይ ማሃ ዓያና ዒንሢ ዔኬኔ፤ ጊንሣ ዒጊቹሞና ናንጋኒ ካራሙሞ ዓያና ዒንሢ ዔኪባኣሴ።

¹⁶ፆኦሲ ዓያና'' ኑ ዓያኖና ዎላ'' ማዒ ፆኦሲ ናይ ኑኡኮ ማዒፆ ኑም ማርካዻኔ።

¹⁷ዓካሪ ኑኡኒ ፆኦሲ ናይ ማዔያታቴ ኪሪስቶሴና ዎላ'' ዬያ ሃጊ ማዓንዳ ዎዞ'' ቢያ ኑ ዴንቃንዳኔ፤ ሓሢ ኑ ኪሪስቶሴ ሜታዼ ሜቶ'' ዔካያ ማዔቴ ሃጊ ዒዛና ዎላ'' ኑ ቦንቺንታንዳኔ።

¹⁸ኑኡኮ ሓሣኣ ዎዶ'' ሜታሢ' ሃጊ ኑም ጴዻንዳ ቦንቾና ዎላ'' ቤቂሦዛ ኮሺ'' ዻካኬ ታ ጋዓኔ።

¹⁹ማዢንታ ቢያ ፆኦሲኮ ናኣታ'' ፔጋዺ ጴዻንዳሢ ዼኤፒ ማሊሢ ጌሢ ካፓኔ።

²⁰ማዢንታ ቢያ ዔኤቢ ፓሡዋ ባኣዚ'' ማዓንዳጉዲ ናንጊና ዔያቶይዳ ዎጊንቴኔ፤ ዬይያ፦ ማዢንታ ፔ ማሊሢናቱዋንቴ ፆኦሲ ማሊሢና ማዔኔ፤ ማዔቴያ ዬይ ሓጊ ማዓንዳ ዎዛ'' ዔያቶም ዓኣኔ፤

²¹ዬይ ሃጊ ማዓንዳ ዎዛ'' ማዢንታ ፔ ቶኦኪና ባይሲንታ ካራሙሞይዳፓ ኬስኪ፥ ፆኦሲ ናኣቶ''ና ዎላ'' ካራሙሞ ባኣያ ቦንቾ ናንጊ ናንጋንዳጉዲኬ።

²²ማዢንታ ቢያ ሓኖ'' ሄላ''ንዳኣና ሾይቺ ባኒሢ ሜታሳ ሜቶጉዴያና ሜታዺሢዳ ዓኣሢ ኑ ዔራኔ።

²³ጋዓንቴ ሜታዺፆይዳ ዓኣሢ ማዢንቶ ሌሊቱዋንቴ ቤርታዺ ዓያኖ ጌኤዣ ዒንጊንቴም ዔኬ ዓሳ፥ ኑኡኒያ ፆኦሲ ናይ ማዔሢ ዒዚ ፔጋሳንዳ ኬሎ'' ሃጊ ማዓንዳ ዎዛና ካፒ ካፒ ኑኡኮ ጋሮ ማሊፆና ኑ ሜታዺሢዳ ዓኣኔ፤ ዬካፓ ኑኡኮ ዓይሌ'' ማዒፃ ዓታንዳኔ።

²⁴ዓይጎሮ ጌዔቴ ኑኡኒ ዻቄሢ ዬያ ሃጊ ማዓንዳ ዎዞ''ናኬ። ጋዓንቴ ዬይ ዎዛ ኑ ማሄ ባካ ጴዻ ባኣዚ'' ማዔቴ ሃጊ ማዓንዳ ዎዛ'' ዎዛ ማዒፃ ዓቴ''ኔ ጌይሢኬ፤ ጴዻ ባኣዚ'' ዖኦኒ «ሃጊ ማዓንዳ ዎዛኬ» ጋዓንዳይ?

²⁵ጴዹዋ ባኣዚ'' ሃጊ ማዓንዳ ዎዛ ኑ ማሃያ ማዔቶ ጊቢ'' ዳንዳዓሢና ኑ ካፓንዳኔ።

²⁶ዎያይዲ ሺኢቃኒ ኑም ኮይሳቴያ ኑ ዔሩዋኣሢሮ ዓያና ጌኤሺ ኑ ላቤ'' ዎዶ''ና ኑና ማኣዳ''ኔ፤ ጊንሣ ሓሣ ሓያኬ ጌይ ኬኤዚንቱዋ ጎይሢና ሜታዺ ማሊ ኑ ሺኢጲፆ ፆኦሲም ሺኢሻኔ።

²⁷ዓሲኮ ዒና ዴንቃ ፆኦሲ፥ ዓያኖ ጌኤዦኮ ማሊፃ ዓይጎ ማዔቴያ ዔራኔ፤ ዎይቲ ጌዔቴ ዓያኖ ጌኤዣ ፆኦሲም ዱማዼ ዓሶኮ ሺኢጲፆ ፆኦሲም ሺኢሻሢ ፆኦሲ ማሊፆጉዴያታሢሮኬ።

²⁸ፆኦሲ ዒዛ ናሽካዞንሢና ዒዛኮ ማሊፆጉዴያ ዔኤሊ''ንቴ ዓሶም ፆኦሲ ቢያ ባኣዚ'' ኮይሳያ ማሂ ማዻሢ ኑ ዔራኔ።

²⁹ዓይጎሮ ጌዔቴ ፆኦሲ ናዓሢ ሚርጌ ጌርሲንሢኮ ባኣካ'' ቶይዲ ማዓንዳጉዲ ፆኦሲ ቤርታዺ ዶኦሬዞንሢ ዒዛኮ ናዓሢ ማላንዳጉዲ ጌዔሢሮኬ።

³⁰ቤርታዺ ዒዚ ማሌዞንሢ ዔኤሌ''ኔ፤ ዔኤሌ''ዞንሢ ሃሣ ፂሎ'' ማሂ ዛጌኔ፤ ፂሎ'' ማሂ ዒ ዛጌዞንሢ ቦንቺሴኔ።

³¹ዓካሪ ሃያ ባኮ ዛሎ'' ኑ ዎዚ ጎዖንዶይ? ፆኦሲ ኑኡና ዎላ'' ማዔቴ ዖ ኑና ዒፂ ማካኒ ዳንዳዓይ?

³²ፔኤኮ ፔቴ'' ናዓሢ ሚጪንቱዋዖ ኑ ዛሎ''ሮ ዓኣሢ ዒንጌ ፆኦዛሢ ቢያ ባኣዚ'' ኑም ዒንጋንዳሢ ዔርቴያኬ።

³³ፆኦሲ ዶኦሬዞንሢ ዖኦኒያ «ዻቤያኬ» ጋዓኒ ዳንዳዓይ? ፂሎ'' ማሂ ዛጋሢ ዒዛኬ።

³⁴ዬያሮ ዔያቶይዳ «ዔያታ ዻቤያኬ» ጌይ ዎጋንዳሢ ዖናዳይ? ዬሱስ ኪሪስቶሴ ዔያቶይዳ ዎጋንዳ? ዒዚ ዔያቶይዳ ዎጊንዱዋሴ፤ ዓይጎሮ ጌዔቴ ዒዚ ኑ ጋይቴ ሓይቂ፥ ሓይቢፓ ዔቂ ፆኦሲኮ ሚዛቆ ዛላ'' ዴዒ ኑ ሺኢጲፆ ፆኦሲም ሺኢሻሢሮኬ።

³⁵ዓካሪ ኪሪስቶሴ ናሹሞይዳፓ ዓይጌ ኑና ዱማሳንዳይ? ሜቶታቴያ፥ ኮሺ'' ዑሣ ዓኣዼ ሜቶታቴያ፥ ዒፂ ዳውሲሢታቴያ፥ ናይዚታቴያ፥ ካሉሞታቴያ፥ ዎዻንዳ ባኣዚ''ታቴያ፥ ጬንቻ ዓፓሮና ዎዾያታቴያ ኑና ዱማሲንዱዋሴ።

³⁶ዬይያ፦ «ኔ ጋይቴ ጌዒ ቢያ ኬሊ''ና ሓይቢና ኑ ዖልታኔ፤ ሹኪንታ ማራይጉዲ ኑ ማዔኔ» ጌይንቲ ፃኣፒንቴሢጉዲኬ።

³⁷ዓካሪ ኑና ናሽኬ፥ ኪሪስቶሴ ዛሎ''ና ዬንሢ ባኮንሢ ቢያ ባሺፆና ዎልቆሮንሢዳፓ ቢያ ኑ ባሻያኬ።

³⁸ዬያሮ ሓይቢ ማዔቴያ ናንጊ፥ ፆኦሲ ኪኢታንቾ ማዔቴያ ፑርታ ዓያና፥ ሓሢ ዓኣ ባኣዚ''ታቴያ ሓጊ ሙካንዳያ፥ ዓይጎ ዎልቄ ማዔቴያ፥

³⁹ዼጉሞ ማዔቴ ሂርኩሞ፥ ዓይጎ ማዢንቲ ማዖም ኑ ጎዳሢ ዬሱስ ኪሪስቶሴ ዛሎ''ና ኑም ጴዼ ፆኦሲ ናሹሞይዳፓ ኑና ዱማሳኒ ዳንዳዓ ዓይጎ ባኣዚ''ያ ባኣሢ ጎኔና ኑ ዔራኔ።