Read maale ቆሮንቶሴ ዓሶም 2 11 Bible Online

ቆሮንቶሴ ዓሶም 2 11 - maale bible

ቆሮንቶሴ ዓሶም 2 11

¹ዻካ'' ዔኤያቶና ታ ጌስታ ባኮ ዒንሢ ጊቢ'' ዳንዳዓንዳጉዲ ታ ኮዓኔ፤ ጎኔኬ፥ ዒንሢ ዳንዳዒ ዳንዳዒኬ።

²ፆኦሲ ዒንሢ ናሽኪ፥ ዒዛም ሌሊ ዒንሢ ማዓንዳጉዲ ኮዓሢጉዲ ታኣኒያ ዒማዺ ማላኔ፤ ታ ያዺዲ ማላሢ' ፔቴ'' ኩሙሢ ዉዱሮ ናይጉዲ ፔቴ'' ዓቲንቄም ታ ዒንሢ ዖኦጬሢሮኬ፤ ዬይ ዓሢያ ኪሪስቶሴኬ።

³ሾኦሺ ሂዋኣኖ ጪንጩሞና ጌሺ ዻቢሴሢጉዲ ጎዖንቴ ዒንሢኮዋ ማሊፃ ፑርቴም ኪሪስቶሴም ዒንሢኮ ዓኣ ፒዙሞና ጌኤሹሞና ዒንሢ ሃሻ''ንዳያናንዳኔ ጌይ ታ ሂርጋኔ።

⁴ዓይጎሮ ጌዔቴ ፔቴ'' ዓሲ ዒንሢ ኮይላ'' ሙኪ ኑኡኒ ዒንሢም ኬኤዜ ዬሱሴቱዋንቴ ሜሌ'' ዬሱሴ ዒንሢም ኬኤዜቴ ሃሣ ዒንሢ ቤርታ ዔኬ ዓያኖይዳፓ ሜሌ'' ዓያና ዒንሢ ዔኬቴ ጊንሣ ሃሣ ቤርታ ዒንሢ ዋይዚ ዔኬ ኮዦ ሃይሶይዳፓ ሜሌ'' ዋይዚ ዒንሢ ዔኬቴያ ዬያ ዒንሢ ዚቲዮ ጌይ ዛዛጋኔ።

⁵ጋዓንቴ ታኣኒ ዬንሢ «ፆኦሲ ማዾ''ም ዳኪንቴ ዼኤፖ ዓሶ» ጌይንታ ዓሶይዳፓ ዓይጎናኣ ሃታያ ታኣም ማሉዋሴ።

⁶ዬና ዓሳ ጌኤታ''ሢጉዲ ሃይሴ ማዢ ታ ጌስቲባኣቴያ ዔራቶ ታኣኮ ናንጊኬ፤ ዬያ ሚርጌ ዎዴ፥ ሚርጌ ባኣዚ''ና ፔጋሲ ኑ ዒንሢም ዻዌኔ።

⁷ታኣኒ ፆኦሲኮ ኮዦ ሃይሶ ሚኢሼ ዔኩዋኣዖ ዒንሢም ኬኤዚፆና፥ ሃሣ ዒንሢ ዼ'ጊዳኒ ታ ቶኦኮ'' ሂርኪሲፃ ታኣኮ ጎሜ ማዔኔ ጌይሢዳ?

⁸ዒንሢም ማዻኒ ኪሪስቶሴ ጉሙርቃ ሃንጎ ሺኢጲፆ ማኣሮ ዓሶይዳፓ ማኣዳሢ ታ ዔኪፆና ታ ዔያቶ ቡሬኔ።

⁹ዒንሢና ዎላ'' ታ ዓኣንቴ ሜታሢ ታና ሄሌ'' ዎዶ''ና ሜቄዶኒያፓ ሙኬ ዒሾንሢ ታኣም ኮይሳ ባኮ ዒንጊ ማኣዳ''ያ ማዔሢሮ ዖናኣ ታ ሜታሲባኣሴ፤ ሃኖ'' ሄላ''ንዳኣና ዓይጎ ባኣዚ''ናኣ ታ ዒንሢ ሜታሲባኣሴ፤ ሴካ ሃጋ ቤርታኣ ታ ዒንሢ ሜታሲንዱዋሴ።

¹⁰ኪሪስቶሴኮ ጎኑማ ታጊዳ ዓኣሢሮ ታ ጫርቂ ጌስቱዋጉዲ ዓካይያ ዓጮ''ይዳ ታና ላኣጋኒ ዳንዳዓይ ዖኦኒያ ባኣሴ።

¹¹ዬያ ታ ጋዓሢ ዓይጎሮዳይ? ታ ዒንሢ ናሽኩዋኣሢሮዳ? ፆኦሲ ዔራሢጉዲ ታ ዒንሢ ናሽካኔ።

¹²ዬያታ ሓንጎ ፆኦሲ ማዾ''ም ዳኪንቴ ዓሳ፦ «ኑኡኒያ ጳውሎሴንሢጉዲ ማዻኔ» ጌይ ጌይ ሄርሺንታ ባኮ ዔያቶ ሃሺ''ሳኒ ሃሢ ታ ማዻ ጎይፆ ሃጊ ሴካኣ ማዻንዳኔ።

¹³ዬኖጉዴ ዓሳ ኪሪስቶሴ ማዾ''ም ዳኪንቴያ ፔና ማሊሻኒ ኮዓያ፥ ሉኡዙሞና ፆኦሲ ማዾ''ም ዳኪንቴያ ማላ ጌሺ ማዻ ዓሲኬ።

¹⁴ዬይ ዲቃሢ ሄርሺሳ ባኣዚ''ቱዋሴ፤ ዎይቲ ጌዔቴ ፃላሄታዖ ፔና ፖዖ ኪኢታንቾ ማሃኒ ዱማ ዱማ ጎይሢና ፔና ላኣማኔ።

¹⁵ዬያሮ ፃላሄም ማዻ ዓሳ ፂሉ''ሞና ማዻያ ማሊሲ ፔና ዱማ ዱማ ጎይሢና ላኣሜቴያ ዲቃሢ ሄርሺሳያቱዋሴ፤ ጋፒንፃ ዔያታ ማዼ ማዾ'' ዛሎ'' ፔኤኮ ዴንቃንዳኔ።

¹⁶«ዓይጎ ዓሲያ ታና ዔኤያኬ ጎዖፓ» ጌይ ላሚ ታ ኬኤዛኔ። ታ ዒንሢም ዔኤያ ማሊ ጴዼቴያ ዻካ'' ታ ጫርቂ ጌስታንዳጉዲ ዔኤያ ማሂ ታና ፓይዱዋቴ።

¹⁷ሓያይዲ ታ ጫርቂ ጌስታሢ ጎዳ ማሊፆጉዲቱዋንቴ ዔኤያ ማዒኬ።

¹⁸ሚርጌሢ' ሃያ ሳዖ ባኣዚ''ና ሄርሺንታሢሮ ታኣኒያ ሄርሺንታንዳኔ።

¹⁹ዒንሢ ጪንጫ ማዔሢሮ ዔኤዮ ዓሶ ባኮ ዛጌዖ ጊባ''ኔ።

²⁰ዬያጉዲ ዖኦኒያ ዒንሢ ዓይሌ'' ማሄቶ፥ ቡሪ ዒንሢ ባኮ ዔኬቴ፥ ዒንሢ ጌሼቴ፥ ዒንሢዳ ዖቶርቂ ጌስቴቴ፥ ዖኦኒያ ዒንሢ ባዔቴ ዚቲ ጌዒ ጊቢ'' ዒንሢ ዳንዳዓንዳኔ።

²¹ዎዚ ታና ቦርሳያ ማዔቴያ ዒንሢጉዲ ጊቢ'' ዳንዳዒፆና ኑ ዶዲ ማዒባኣሢ ታ ዒንሢም ኬኤዛኔ። ጋዓንቴ ዖኦኒያ ሄርሺንታኒ ጫርቃቶ ታኣኒያ ዒዛጉዲ ጫርቂ ሄርሺንታንዳኔ፤ [ዬያ ታ ጋዓሢ ሃሢ ዔኤያጉዲ ማዒኬ።]

²²ዔያታ፥ ዬና ዓሳ፡ ዔብሬ ዓሲዳ? ታኣኒያ ዔያቶጉዲኬ፤ ዔያታ ዒስራዔኤሌ ዓሲዳ? ታኣኒያ ዔያቶጉዲኬ፤ ዔያታ ዓብራሃሜ ዜርሢዳ? ታኣኒያ ዔያቶጉዲኬ።

²³ዔያታ ኪሪስቶሴም ማዻ ዓሶዳ? ታኣኒ ዔያቶይዳፓ ባሼ ኪሪስቶሴም ማዻያኬ፤ [ዬያ ታ ጋዓሢ ዣኣሹሞጉዲኬ።] ታኣኒ ሚርጌ ዎዴ ማዾና ላቤ''ኔ፥ ሚርጌ ዎዴ ታ ቱኡቴኔ፥ ሚርጌ ዎዴ ዢራፓናኣ ታ ጳርቂንቴኔ፥ ሚርጌ ዎዴ ሃሣ ታ ሃይቄዖ ዓቲ'' ዓቲ'' ዓኣሤኔ።

²⁴ዓይሁዶ ዓሳ ዢራፓና ሃይሢታሚ'' ታዞጳ ጳዺ ዶንጎ ማይንቲ ታና ጳርቄኔ፤

²⁵ሓይሢ ማይንቲ ኮኦሎ''ና ታ ጳዺንቴኔ፥ ፔቴ''ና ሹቻ ታ ዹይንቴኔ፥ ሃይሢ ማይንቲ ዋኣሢ ካኣሚሌይዳ ሜታ ታና ሄሌ''ኔ፥ ፔቴ'' ኬሊ'' ዹሚና ሮኦሪና ቢያ ዋኣሢዳ ታ ዎርቂ ፔኤቄኔ፤

²⁶ሚርጌ ዎዴ ታ ጎይሢ ሃንቲሢና ሜታዼኔ፤ ዬያይዳ ዎርዚ ኩሚ ታና ሙዔዖ ዓቴ''ኔ፥ ሱላንታ ታ ዒጊኖ ዓይሁዶ ዓሶንታ ዓይሁዶ ማዒባኣ ዓሳኣ ታና ዎዼዖ ዓቴ''ኔ፥ ካታሞና ካዮና ዼኤፖ ባዞ''ናይዳ ታ ሃይቄዖ ዓቴ''ኔ፤ ሃሣ ሉኡዙሞና ኪሪስቶሴ ጉሙርቃኔ ጋዓ ዓሳ ታና ዎዼዖ ዓቴ''ኔ።

²⁷ሚርጌ ታ ላቢ'' ማዺ ሜቶ ዛጌኔ፥ ሚርጌ ዎዴ ጊንዖ ታ ዓቴ''ኔ፥ ናይዚና ዋኣሢ ዼኤቢ''ና ታና ሜታሴኔ፥ ሚርጌ ዎዴ ሙኡዚ'' ባይቄም ታ ሜታዼኔ፥ ሚርጌ ዎዴ ጪኢሺና ካሉ''ሞና ታና ሜታሴኔ።

²⁸ጋዓንቴ ሜሌ'' ዓቴ'' ባኮይዳፓ ባሼ ቢያ ኬሊ'' ታና ሜታሴሢ ኪሪስቶሴ ጉሙርቃ ሺኢጲፆ ማኣሮ ዓሶ ዛሎ''ኬ።

²⁹ፔቴ'' ዓሲ ላባ''ኣና ታ ዒዛና ዎላ'' ላባ''ኔ፤ ሃሣ ፔቴ'' ዓሲ ባጋሢ ዻቢሲ ጎሜይዳ ጌልዜቴ ሚርጌና ታ ዻጋዻኔ።

³⁰ሄርሺንቲ ጌስቲሢ ኮይሳያ ማዔቴ ታኣኒ ሄርሺንታሢ ታ ላቤ''ያ ማዒፆ ዻዋ ባኮንሢናኬ።

³¹ኑ ጎዳሢ፥ ዬሱስ ኪሪስቶሴኮ ዓዶ ማዔ ፆኦዛሢ ናንጊና ጋላቲንቴያ ማዖም፤ ታ ሉኡቂ ኬኤዙዋኣሢ ዒ ዔራኔ።

³²ዴማስቆ ካታሞይዳ ታ ዓኣ ዎዶ''ና ካኣቲ ዓሬታሴኮ ዴማ'' ማዒ ዴሮ'' ዎይሣሢ ታና ዓርቃኒ ኮዒ ካታሞ ጌላ ካሮ'' ካሮ'' ካፓ ዓሶና ካፒሳኔ።

³³ጋዓንቴ ሹጮና ኬልቂ ኮሾ''ና ዲሮኮ ፑልታና ዓሳ ታና ሮኦጬና ኬይሴም ታ ዒዛይዳፓ ቶሊ'' ዓቴ''ኔ።