Read maale ቆሮንቶሴ ዓሶም 2 5 Bible Online

ቆሮንቶሴ ዓሶም 2 5 - maale bible

ቆሮንቶሴ ዓሶም 2 5

¹ሓይ ዉልሻ ማላ፥ ዻካ'' ዎዴሮ ማዔ ዑፃ ኑኡኮ ባይቄቴያ ዓሲ ማዢባኣያ፥ ፆኦሲ ማዤ ናንጊና ናንጎ ማኣሪ ኑኡኮ ጫሪንጮይዳ ዓኣሢ ኑ ዔራኔ።

²ሃይካ ሳዖይዳ ኑ ዓኣዖ ጫሪንጮይዳ ዓኣ ማኣሮ ኑኡኮ ጌላኒ ኮዒ ሚርጌና ማሊ ኑ ሜታዻኔ።

³ዬያ ማኣሮይዳ ኑ ጌሌ ዎዶ''ና ማኣሪባኣያ ካሎ'' ኑ ማዓዓኬ።

⁴ሓያ ዉልሾጉዴ ማኣሮይዳ ኑ ናንጋ ናንጋ ዴኤፄም፥ ኑ ሚርጌና ማሊ ሜታዻኔ፤ ኑ ዬያይዲ ማሊ ሜታዻሢያ ኑኡኮ ሃይቃ ዑፃ ናንጎና ዔኤዺንቶም ጊዳ'' ቃቃሳኒ ማዓንዳፓዓቴም ኑፓ ሺኢሻኒቱዋሴ።

⁵ያዺ ማዓንዳጉዲ ኑና ጊኢጊሼሢ ፆኦሲኬ፤ ኑም ሃጊ ማዓንዳ ባኮኮ ቢያ ዓይሢ ባኣዚ'' ማዓንዳጉዲ ፔኤኮ ዓያኖዋ ኑም ዒንጌሢ ዒዛኬ።

⁶ኑኡኮ ሳዖይዳ ናንጎ ማኣሮ ማዔ ዑፆና ኑ ዓኣ ዎዶ''ማና ጎዳይዳፓ ኑ ሃኪ ናንጋሢ ዔራያ ማዔቴያ ቢያ ዎዴ ዒጊጩዋዖ ጎዳ ጉሙርቂ ኑ ናንጋኔ።

⁷ኑኡኒ ናንጋሢ ጎዳ ጉሙርቂሢና ማዓንዳኣፓዓቴም ዛጊሢናቱዋሴ።

⁸ሓያ ኑኡኮ ማኣሮ ማዔ ዑፆይዳፓ ዱማዺ ጎዳና ናንጋኒ ኑኡኒ ኮዓኔ፤ ጫርቂኬ ኑ ጌስታሢ።

⁹ዬያሮ ሓያ ኑኡኮ ዑፆና ኑ ዓኣቴያ ዱማዺ ኑ ናንጌቴያ ኑኡኮ ማሊፃ ጎዳ ዎዛሲሢኬ።

¹⁰ፔቴ'' ፔቴ''ሢ ፔ ናንጌ ዎዶ''ና ማዼማ ጉዴያ፥ ኮሺ ማዔቴያ ፑርታ ማዼ ማዾ'' ዛሎ'' ዒንጊንታ ባኮ ዔካኒ ኪሪስቶሴኮ ዎጎ ዎጎ ቤዞ ሺኢኪ ዔካንዳኔ።

¹¹ፆኦሲ ዒጊጪሢ ዎዚ ጌይሢታቴያ ኑ ዔራሢሮ ዓሳ ኑ ጋዓ ባኮ ጎኔኬ ጌይ ዔካንዳጉዲ ኑ ማዻኔ፤ ኑኡኒ ዖናንሢታቴያ ፆኦሲ ኑና ዔራኔ፤ ዒንሢያ ሃሣ ዒንሢ ዒኖና ኑኡኒ ዖናንሢታቴያ ዔራኔ ጌይ ታ ማላኔ።

¹²ጋርሲ ዒናይዳ ዓኣ ባኣዚ''ቱዋንቴ፥ ዙላ'' ዓሲም ጴዻ ባኣዚ''ና ሄርሺንታ ዓሶም ዒንሢ ማሂ ኬኤዛኒ ኑኡና ዒንሢ ሄርሺንታንዳጉዲ ማዓንዳኣፓዓቴም ላሚ ጊንሣ ኑኡኮ ዖኑሞ ዒንሢም ኑ ኬኤዛኒቱዋሴ።

¹³ኑ ዣኣሽካ ዓሲ ማዔቴያ ፆኦሲሮ ጌይኬ፤ ሃሣ ዒናና ዓኣ ዓሲ ኑ ማዔቴ ዒንሢሮ ጌይኬ።

¹⁴ኪሪስቶሴኮ ናሹማ ኑና ዬያ ማዺሻኔ፤ ፔቴ''ሢ ቢያሢ ዛሎ'' ሃይቄሢሮ ቢያሢ ዒዛና ዎላ'' ሃይቄያ ማዔሢ ኑ ዔራኔ።

¹⁵ሼምፔና ዓኣዞንሢ ቢያ ዔያቶ ጋይቴ ሓይቂ ሓይባ''ፓ ዔቄሢም ናንጋንዳኣፓዓቴም ሃይካፓ ሴካ ፔኤም ጌዒ ናንጉዋጉዲ ኪሪስቶሴ ቢያሢም ሓይቄኔ።

¹⁶ዬያሮ ሃይፓ ሴካ ዖናኣ ኑ ዓሲ ዛጋ ዓኣፒና ዛጋዓኬ፤ ሃያኮ ቤርታ ኪሪስቶሴ ኑ ዛጌሢ ዓሲ ዛጋ ዓኣፒና ማዔቴያ ሃካፓ ሴካ ጋዓንቴ ኑ ዛጋንዳሢ ዬያ ጎይፆቱዋሴ።

¹⁷ዬያሮ ዖኦኒያ ኪሪስቶሴና ዎላ'' ፔቴ'' ማዔቴ ዓኪ ማዢንቲኬ፤ ቤርታኣ ባካ ዓኣዼኔ፤ ዬያ ቤዞ ዓኪ ባኣዚ'' ዓርቄኔ ጌይሢኬ።

¹⁸ዬይ ቢያ ያዺ ማዔሢ ኑና ፔኤና ዎላ'' ኪሪስቶሴ ዛሎ''ና ጊኢጊሼሢና፥ ጊኢጊሺፆ ማዾ''ዋ ኑም ዒንጌ ፆኦዛሢ ዛሎ''ናኬ።

¹⁹ዬይያ ፆኦሲ' ኪሪስቶሴ ዛሎ''ና ዓሶ ቢያ ፔኤና ዎላ'' ጊኢጊሼኔ ጌይሢኬ፤ ሃሣ ዻቢንቶዋ ዔያቶኮ ዓርቂባኣሴ፤ ኑኡማኣ ዬያ ዓሶ ጊኢጊሻ ቃኣሎ'' ዒንጌኔ።

²⁰ፆኦሲ' ዓሶ ፔ ባንሢ ኑ ዛሎ''ና ዔኤላ''ሢሮ ኑኡኒ ኪሪስቶሴ ዛሎ'' ማዒ ጌስታያኬ፤ ዬያሮ፦ «ፆኦሲና ዎላ'' ጊኢጉዋቴ» ጌዒ ኪሪስቶሴ ሱ'ንፆና ኑ ዒንሢ ሺኢቃኔ።

²¹ኑኡኒ ኪሪስቶሴና ዎላ'' ፔቴ'' ማዒ ፆኦሲ ፂሉ''ሞ ዴንቃንዳጉዲ ጎሜባኣ ኪሪስቶሴ ኑኡኮ ጎሞ ኬዳንዳጉዲ ፆኦሲ ማሄኔ።