Read maale ዔፕሶኔ ዓሶም 3 Bible Online

ዔፕሶኔ ዓሶም 3 - maale bible

ዔፕሶኔ ዓሶም 3

¹ዬያሮ፡ ዒንሢ፥ ዓይሁዴ ማዒባኣ ዓሶም ዬሱስ ኪሪስቶሴ ዛሎ''ና ማዻሢሮ ቱኡቲ ዓኣ፥ ታኣኒ ጳውሎሴ' ፆኦሲ ሺኢቃኔ።

²ዒንሢም ታ ማኣዳ''ንዳ ማዾ'' ኮሹሞ ዒንጊፆና ፆኦሲ ታኣም ዒንጌሢ ዒንሢ ዋይዜኔ።

³ቤርታ ታ ዒንሢም ዻካ''ና ፃኣፔሢጉዲ ፆኦሲ ዓኣሺንቴ ባኣዚ'' ታና ፔጋሲ ዻዌኔ።

⁴ሃሢ ታ ዒንሢም ፃኣፔሢ ዒንሢ ናባቤቶ ኪሪስቶሴ ዛሎ'' ዓኣሺንቴ ባኮ ታ ዔሬያ ማዔሢ ዒንሢም ጴዻንዳኔ።

⁵ዬይ ዓኣሺንቴ ባካ ፆኦሲ ዓያኖ ዛሎ''ና ፆኦሲም ዱማዼ፥ ዒዛ ማዾ''ም ዳኪንቴዞንሢና ዒዛኮ ማሊፆ ኬኤዛዞንሢም ሃሢ ጴዼ ጎይፆ ሚናኣ ዎዶ''ና ዓኣ ዓሶም ጴዺባኣሴ።

⁶ዬይያ፦ ኮዦ ሃይሶ ዛሎ''ና ዓይሁዴ ማዒባኣ ዓሳ ዓይሁዶ ዓሶና ዎላ'' ፆኦሲ ዒንጋ ዓንጆ ዔካያ፥ ፔቴ'' ዑሢኮ ዱማ ዱማ ቤዞጉዲ ማዓያ ሃሣ ፆኦሲ ዬሱስ ኪሪስቶሴ ዛሎ''ና ዒንጌ ሃጊ ማዓንዳ ዎዞ'' ዎላ'' ዔካያ ማዔሢ ዔያቶም ጴዺባኣሴ ጌይሢኬ።

⁷ፆኦሲ ፔ ዎልቆና ማዻ ጎይፆ ታኣም ዒንጌ ኮሹሞ ዒንጊፆና ሓያ ኮዦ ሃይሶ ማዾ'' ታ ማዻያ ማዔኔ።

⁸ዎዚ ታኣኒ ፆኦሲም ዱማዼ ዓሶይዳፓ ላኣፓ ማዔቴያ ዛጳባኣ ኪሪስቶሴኮ ዖርጎቹሞ ዓይሁዴ ማዒባኣ ዓሶም ታ ኬኤዛንዳጉዲ ሃይ ኮሹሞ ዒንጊፆ ማዻ'' ታኣም ዒንጊንቴኔ።

⁹ዬያጉዲ ሃሣ ቢያ ባኮ ማዤ ፆኦዛሢ' ሓያኮ ቤርታኣ ዎዶ''ይዳ ዓኣቺ ጌሢ ዓኣ ዒዛኮ ማሊፃ ዓይጎ ማዔቴያ ቢያሢም ታ ዔርዛንዳጉዲ ሃይ ኮሹሞ ዒንጊፆ ማዻ'' ታኣም ዒንጊንቴኔ።

¹⁰ዬይ ማዔሢ' ሓሣኣ ዎዶ'' ሺኢጲፆ ማኣሮ ዓሶ ዛሎ''ና ጫሪንጫ ዓኣ ሱኡጎና ቢታንታ ዓኣ ማዢንቶና ፆኦሲኮ ዔራቶዋ ዱማ ዱማ ጎይሢና ዔራንዳጉዲኬ።

¹¹ኑ ጎዳ፥ ዬሱስ ኪሪቶስቶሴ ዛሎ''ና ፆኦሲ ዬያ ማዼሢ ቤርታፓ ዓርቃዖ ማዻኒ ማሌ ጎይፆናኬ።

¹²ኪሪስቶሴ ኑ ጉሙርቄ ጎይፆና ፆኦሲ ቤርቶ ዒጊቹሞ ባኣያ ዶዲ ኪሪስቶሴና ኑ ሙካኒ ዳንዳዓኔ።

¹³ዬያሮ ሓይ ታና ዒንሢ ዛሎ''ሮ ሄሌ'' ሜታሢ' ዒንሢኮ ቦንቾ ማዔሢሮ ሃጋኣ ዎዛ ባኣያ ዒንሢ ማዑዋጉዲ ታ ዒንሢ ሺኢቃኔ።

¹⁴ዓካሪ ፆኦሲ፥ ዓዳሢ ቤርታ ጉምዓቲ ታ ሺኢቃሢ ዬያ ዛሎ''ኬ።

¹⁵ጫሪንጮና ሳዖናይዳ ዓኣ ፔቴ'' ማኣሮ ዓሳ ሱ'ንፆ ዴንቃንዳሢ ፆኦሲዳፓኬ።

¹⁶ዒንሢኮ ጋሮ ዒኖ ዶዲሻ ዎልቄ፥ ዓያኖ ዛሎ''ና ፆኦሲ ፔኤኮ ቦንቾ ዼኤፑማፓ ዒንሢም ዒንጋንዳጉዲ ታ ሺኢቃኔ።

¹⁷ዬያጉዲ ሃሣ ዒንሢኮ ጉሙርቂፆና ኪሪስቶሴ ዒንሢ ዒና'' ናንጋንዳጉዲ፤ ሃሣ ዒንሢኮ ፃጶና ዓይፆና ናሹሞና ዶዲ ማዓንዳጉዲ ታ ሺኢቃኔ።

¹⁸ሃሣ ጊንሣ ኪሪስቶሴ ናሹሞኮ ዳልጉሞ፥ ዖዶሱሞ፥ ዼ'ጉሞ፥ ሊካ ዔታዺፃኣ ዎማዒታቴ ፆኦሲም ዱማዼዞንሢንታ ቢያ ዒንሢ ዔራንዳጉዲና፥

¹⁹ዔርታያፓ ዑሣ ዓኣዼ ማዔ፥ ኪሪስቶሴኮ ናሹሞ ዒንሢ ዔራንዳጉዲና ፆኦሲ ፓጬ ባኣዚ'' ባኣያ ማዔሢጉዲ ዒንሢያ ያዺ ማዓንዳጉዲ ፆኦሲ ታ ሺኢቃኔ።

²⁰ዬያሮ ኑጊዳ ማዻ ዎልቆ ዛሎ''ና ኑ ሺኢቃሢና ማላሢናይዳፓ ዑሣ ዓኣዼ ማዻኒ ዳንዳዓ ፆኦዛሢም፥

²¹ሺኢጲፆ ማኣሮ ዓሶና ዬሱስ ኪሪስቶሴ ዛሎ''ና ዎዶ'' ቢያይዳ ቦንቾ ዒዛም ማዖንጎ።