Read maale ዔፕሶኔ ዓሶም 4 Bible Online

ዔፕሶኔ ዓሶም 4 - maale bible

ዔፕሶኔ ዓሶም 4

¹ዓካሪ ፆኦሲ ዒንሢ ናንጎንጎ ጌዒ ዔኤሌ'' ናንጎ ዒንሢ ናንጋንዳጉዲ ጎዳ ማዾ'' ዛሎ''ሮ ቱኪ''ንቲ ዓኣሢ፥ ታኣኒ ዒንሢ ሺኢቃኔ።

²ቢያ ዎዴ ሴካና ሃንጋና ዎሊ ናሽኪሢና ሃሣ ሚጪንቲሢና ኮሹሞና ዳንዳዒሢና ዓኣያ ማዒ ናንጉዋቴ።

³ኮሹሞና ናንጊ ናንጊ ዓያኖ ጌኤዦ ዛሎ''ና ጴዻ ፔቱሞ ናንጎ ዶዲ ካፑዋቴ።

⁴ዒንሢ ፔቴ'' ሃጊ ማዓ ዎዛም ዔኤሊ''ንቴያ ማዔሢጉዲ ፔቴ'' ዑሢና ፔቴ'' ዓያናና ዒንሢኮ ዓኣኔ።

⁵ዬያጉዲ ሓሣ ፔቴ'' ጎዳ፥ ፔቴ'' ጉሙርቂሢና ፔቴ'' ዋኣሢ ማስቲሢና ዓኣኔ።

⁶ሃሣ ዬያ ቢያይዳፓ ዑሣ ማዔ፥ ቢያሢና ማዻ፥ ቢያሢና ናንጋ፥ ቢያሢኮ ዓዶ ማዔ፥ ፔቴ'' ፆኦሲ ዓኣኔ።

⁷ጋዓንቴ ኪሪስቶሴ ዒንጋኒ ማሌ ጎይፆ ኑና ፔቴ'' ፔቴ''ሢም ፆኦሲኮ ኮሹሞና ዒንጎ ዒንጊፃ ዒንጊንቴኔ።

⁸ዬይያ፦ «ሌካ ዒ ኬስኬ ዎዶ''ና ሚርጌ ዓሲ ዲዒ ዔኪ ዒ ዓኣዼኔ፤ ሚርጌ ዓሲማኣ ሚርጌ ዒንጊሢ ዒንጌኔ» ጌይንቴሢ ጉዲኬ።

⁹ዓካሪ «ሌካ ኬስኬኔ» ጌይፃ ሊካ ሳዖ ዴሞ'' ኬዴ''ያ ማዒባኣያታቴ ሜሌ'' ዓይጎ ዻዋይ?

¹⁰ዬይ ሊካ ዴሞ'' ኬዴ''ሢ ሳዖና ጫሪንጮና ዒኢካ ዓኣ ባኮ ቢያናይዳ ጴዻያ ማዓኒ ጫሪንጮኮ ቢያ ዑፆ ኬስኬሢኬ።

¹¹ዒዚ ፔቴ'' ፔቴ''ሢ ፆኦሲ ማዾ''ም ዳኪንቴዞንሢ፥ ፆኦሲ ማሊፆ ኬኤዛዞንሢ፥ ኮዦ ሓይሶ ኬኤዛዞንሢ፥ ፆኦሲ ዓሶ ሄንቃዞንሢና ዔርዛዞንሢ ማዓንዳጉዲ ዒንጊሢ ዒንጌኔ።

¹²ዬያ ዒ ማዼሢ ዒዛኮ ዑፆ ማዔ፥ ሺኢጲፆ ማኣሮ ዓሶ ዲቻኒና ዒዛ ጉሙርቃ ዓሶ ፆኦሲ ዓሲ' ማዻ ማዾ ማዻንዳጉዲ ጊኢጊሻኒኬ።

¹³ዬያጉዲ ሃሣ ፆኦሲ ናዓሢ ጉሙርቂሢና ዔሪሢ ዛላና ጴዻ ፔቱሞ ዴንቂ፥ ኪሪስቶሴ ፓጬ ባኣዚ'' ባኣያ ኩሙሢ ማዔሢጉዲ ኑኡኒ ኩሙሢ ዓሲ ማዓንዳጉዲኬ።

¹⁴ዓካሪ ሃካፓ ሴካ ዓሶኮ ዻቢሻ ጌሺፆ ዔርዚፆ ዢባሮና ሴካ ሃንጋ ጌዒ ጌዒ ናይ ኑ ማዓዓኬ።

¹⁵ዬያይዳፓ ጎኑሞ ናሹሞ ዓያናና ጌስቲ ጌስቲ ቶኦካ''ሢ ማዔ፥ ኪሪስቶሴ ማላኒ ቢያና ኑ ዲዲጫንዳኔ።

¹⁶ዑፆኮ ዱማ ዱማ ዓኣ ቤዛ ካኣማሢ ኪሪስቶሴናኬ፤ ዑፃ ቢያ ዎላ'' ዓርቂንቲ ዓኣሢ ዱማ ዱማ ካኣማ ካራናኬ፤ ዬያሮ ፔቴ'' ፔቴ'' ዑፆኮ ቤዛ ፔኤም ዒንጊንቴ ማዾ'' ማዻዛ፥ ዑፃ ቢያ ናሹሞና ዲጪ ዲጪ ዼኤፓኔ።

¹⁷«ሓይፓ ሴካ ፓሡዋ ማሊሢና ናንጋ፥ ዓይሁዴ ማዒባኣ ዓሶጉዲ ናንጊፖቴ» ጌዒ ጎዳ ሱ'ንፆና ታ ዒንሢም ላቲ'' ዞራኔ፤

¹⁸ዔያቶኮ ዒኖ ባይቂፆይዳፓ ዔቄያና ዔያታ ጶቂሡዋኣሢሮ ዒና'' ዔያቶኮ ዹሜኔ፤ ፆኦሲ ዒንጋ ናንጎይዳፓኣ ዔያታ ሃኬኔ።

¹⁹«ዓሲ ዎዚ ጋዓንዳይ» ጋዓ ማሊሢ ዔያቶኮ ባይቄሢሮ ፔና ፑርታ ማዾም ዓኣሢ ዒንጌኔ፤ ዬያሮ ቢያ ዎዴ ቦርሲሳ ባኣዚ'' ማዻኒ ኮሺ'' ዔያታ ኮዓኔ።

²⁰ዒንሢ ጋዓንቴ ኪሪስቶሴ ዛሎ''ና ዔሬሢ ያዺቱዋሴ፤

²¹ጎኔና ዒንሢ ዒዛ ዛሎ'' ዋይዜኔ፤ ጎኑሞ ዬሱሴና ዓኣሢያ ዒዛይዳፓ ዒንሢ ዔሬኔ።

²²ዬያሮ ጌሺ ዒንሢ ጎሜ ባንሢ ዔኪ ዓኣዻ ማሊፆና ፑርቴያ፥ ሚና ቤርታ ዒንሢ ናንጋ ናንጎ ሃሹ''ዋቴ።

²³ዒና'' ዒንሢኮ ላኣሚንቲ ዓኪ ማዖንጎ።

²⁴ጎኔ ፂሉ''ሞና ፆኦሲም ዱማዺሢና ፆኦሲ ማላኒ ማዢንቴ ዓኪ ዓሲ ማዑዋቴ።

²⁵ዬያሮ ሉኡዙሞ ጌስቲፖቴ! ቢያሢ ኑኡኒ ፔቴ'' ዑሢኮ ዱማ ዱማ ቤሲ ማዔሢሮ ሴካና ሃንጋና ጎኑሞ ኑ ጌስቶም።

²⁶ዒንሢ ዻጋዼያ ማዔቴያ ጎሜ ማዓንዳ ጎይሢ ዔኪ ዓኣዺፖቴ፤ ዻጎ ዒንሢኮ ዒንሢ ሃሹ''ዋንቴ ዓቢ ጌሎፓ፤

²⁷ሃሣ ፃላሄማኣ ቤሲ ጌሢፖቴ።

²⁸ዉኡቃያ ዓኣቴ ሃይፓ ሴካ ዉኡቆፓ፤ ዬያይዳፓ ሜታዼ ዓሲያ ማኣዳ''ንዳ ሚኢሼ ዴንቃኒ ፔ ኩቻ ዶዲ ማማዾንጎ።

²⁹ፔቴ''ታዖ ዒንሢኮ ዻንጋፓ ፑርታ ዑኡሲ ኬስኮፓ፤ ጋዓንቴ ዓሲ ዶዲሻያና ፓሣ ባኣዚ''ና ጌስቱዋቴ።

³⁰ዒንሢ ጋፒ ዓይላ''ቶፓ ሻንቂንቲ ኬስካንዳ ኬሎ'' ጎናሲ ዔርዛኒ ፆኦሲ ዒንሢም ዒንጌ፥ ጌኤዦ ዓያኖ ዖዪሲፖቴ።

³¹ዒንሢዳፓ ፑርቱሞ ማሊሢ፥ ዻጋ፥ ጎሪ''ንቲ፥ ዒላቲ''፥ ጫሺንታ ዓይጌያ ፑርታ ባኣዚ'' ቢያ ሃኮንጎ።

³²ዎላ'' ሴካና ሃንጋና ኮሺ ዓሲ ሃሣ ዎሊም ማላ ዓሲና ማዑዋቴ፤ ፆኦሲ' ኪሪስቶሴ ዛሎ''ና ዒንሢም ዓቶም ጌዔሢጉዲ ዒንሢያ ዎሊም ዓቶም ጋዓያ ማዑዋቴ።