Read maale ቴስሎንቄ ዓሶም 1 2 Bible Online

ቴስሎንቄ ዓሶም 1 2 - maale bible

ቴስሎንቄ ዓሶም 1 2

¹ታ ዒሾንሦ! ታ ሚሾንሦ! ኑኡኮ ዒንሢ ኮራ ሙኪፃ ጉሪ ዓቲባኣያ ማዔሢ ዒንሢ ዒ'ንሢ ቶኦኪና ዔራኔ።

²ዒንሢ ዔራ ጎይፆ ሓያኮ ቤርታ ፒልጲሲዮሴይዳ ኑ ዓኣ ዎዶ''ና ሜቶና ጫሺና ኑና ሄሌ''ኔ፤ ጋዓንቴ ዎዚ ዼኤፒ ዒፂሢ ኑና ሄሌ''ቴያ ፆኦሲኮ ኮዦ ሓይሶ ኑ ኬኤዛንዳጉዲ ዒዚ ኑም ጫርሹሞ ዒንጌኔ።

³ኑኡኒ ዒንሢ ዞሬሢ፦ ዻቢንቲና ሃሣ ፑርታ ማሊሢና ዔቂቱዋሴ፤ ሓሣ ኑ ዒንሢ ጌሻኒ ማዼ ባኣዚ'' ፔቴ''ታዖ ባኣሴ።

⁴ባሼና ኮዦ ሓይሶ ቃኣሎ'' ኑ ኬኤዛንዳጉዲ ፆኦሲ ኑም ዒንጌሢ ኑ «ዳንዳዓንዳኔ» ጌይ ጉሙርቂታሢሮ ኑ ኬኤዛኔ፤ ዬያ ኑ ማዻሢ' ኑኡኮ ዒኖ ዛጊ ዔራ፥ ፆኦዛሢ ዎዛሳኒ ጌይ ማዓንዳኣፓዓቴም ዓሲ ዎዛሳኒቱዋሴ።

⁵ዒንሢ ኑ ጌሺ ሓሣ ሚኢሼ ዴንቃኒ ኬኤዚ ሃንቲባኣሢ ዒንሢ ዒ'ንሢ ቶኦኪና ዔራኔ፤ ፆኦሲያ ኑኡኮ ማርካኬ።

⁶ኑኡኒ ኪሪስቶሴም ዳኪንቲ ማዻያ ማዔ ጎይፆና ኑ ዒንሢ ቢያ ባኣዚ'' ዖኦጫኒ ዳንዳዓያታዖ ዒንሢዳፓ ማዔቴያ ሜሌ'' ዖ ጊዳፓኣ ቦንቾ ኑ ኮይባኣሴ።

⁷ጋዓንቴ ፔኤኮ ዲቻ ናኣቶ''ም ማላ ዒንዴሎጉዲ ዒንሢም ኑ ሚጪንታያ ማዔኔ።

⁸ሓሣ ኑ ዒንሢ ሚርጌና ናሽካሢሮ ዼኤፖ ናሹማፓ ዔቄያና ፆኦሲኮ ኮዦ ሓይሶ ቃኣሎ'' ኬኤዚፆ ሌሊቱዋንቴ ዒንሢ ዛሎ'' ሓይቃኒታዖ ኑ ጊኢጊንቴንቴኬ።

⁹ታ ዒሾንሦ! ታ ሚሾንሦ! ኑኡኒ ዎማዺ ማዼቴያ ሃሣ ላቤ''ቴያ ዒንሢ ዔራኔ፤ ፆኦሲኮ ኮዦ ሓይሶ ዒንሢም ኑ ኬኤዛ ዎዶ''ና ዒንሢዳፓ ፔቴ'' ዓሲምታዖ ኑ ኬዲ ማዑዋጉዲ ዋንቴና ሮኦሪና ኑ ዎይፆሮ ማዺ ማዺ ኑ ላቤ''ኔ።

¹⁰ዒንሢ፥ ኪሪስቶሴ ጉሙርቃ ዓሶ ባኣካ'' ኑ ናንጌ ዎዶ''ና ዎይቲ ኑ ፆኦሲም ዱማዼያና ፂሎ'' ማዒ ሃሣ ዒኢሳ ባኣዚ'' ባኣያ ማዒ ናንጌቴ ዒንሢ ዒንሢ ቶኦኪና ዔራኔ፤ ሃሣ ፆኦሲያ ዬያኮ ማርካኬ።

¹¹ዓዴ ፔኤኮ ናኣቶ''ም ማዻሢ ጎይፆ ኑኡኒያ ዒንሢ ፔቴ'' ፔቴ''ሢም ዎማይዲ ማዼቴያ ዒንሢ ዔራኔ፤

¹²ቢያ ዎዴ ኑ ዒንሢ ዞሪ ዞሪ ሓሣ ዶዲሺ ዶዲሺ ፔኤኮ ካኣቱሞና ቦንቾናይዳ ዒንሢ ጌላንዳጉዲ ዒ'ንሢ ዔኤሌ''፥ ፆኦዛሢ ዎዛሳ ጎይሢ ናንጉዋቴ ጌይ ኑ ዒንሢ ሺኢቄሢ ዒንሢ ዔራኔ።

¹³ሓሣ ኑ ዒንሢ ዛሎ'' ቢያ ዎዴ ፆኦሲ ጋላታ ባኣዚ'' ዓኣኔ፤ ዬይያ፦ ዒንሢ ኑ ጊዳ''ፓ ዋይዜ ፆኦሲ ቃኣሎ'' ጉሙርቂ ዔኬ ዎዶ''ና ኪሪስቶሴ ጉሙርቃ ዓሶይዳ ማዻ፥ ዬያ ቃኣሎ'' ጉሙርቂ ዒንሢ ዔኬሢ' ዓሲ ሓይሴ ማሂቱዋንቴ ፆኦሲ ቃኣላ ማሂኬ፤ ጎኔና ዬይ ፆኦሲ ቃኣላኬ።

¹⁴ታ ዒሾንሦ! ታ ሚሾንሦ! ዒንሢ ዪሁዳ ዓጮ''ይዳ ዬሱስ ኪሪስቶሴና ዓኣ ፆኦሲ ጉሙርቃ ሺኢጲፆ ማኣሮ ዓሶጉዲ ማዔኔ፤ ዎይቲ ጌዔቴ ዔያቶ ዪሁዳ ዓጮ''ይዳ ዓይሁዶ ዓሳ ሜታሴሢጉዲ ዒንሢያ ዒ'ንሢ ዒጊና ሜታሴኔ።

¹⁵ዓይሁዶ ዓሳ' ጎዳ ዬሱሴና ፆኦሲ ማሊፆ ኬኤዛ ዓሶና ዎዼያ፤ ሃሣ ኑናኣ ዒፂ ዳኪ ፔ ዓጫ''ፓ ኬሴ''ዞንሢኬ፤ ዔያታ ፆኦሲ ዖዪሳያ ሃሣ ዓሲያ ዒፃያኬ፤

¹⁶ዔያታ ዓይሁዴ ማዒባኣ ዓሳ ዋይዚ ዻቃንዳ ቃኣሎ'' ኑ ኬኤዙዋጉዲ ላኣጋኔ፤ ዬያይዲፆና ዔያታ ጎሜይዳ ጎሜ ቃሲ'' ቃሲ'' ዓኣዻኔ፤ ዬያሮ ሃሢ ጋፒንፆይዳ ፆኦሲኮ ጎሪ''ንታ ዶዲ ዔያቶ ሄሌ''ኔ።

¹⁷ጋዓንቴ ታ ዒሾንሦ! ታ ሚሾንሦ! ዓያናናቱዋንቴ ዓሽኪና ዻካ'' ዎዴ ኑ ዒንሢፓ ዱማዼቴያ ሃሢ ኑ ዒንሢ ሚርጌና ጶቂሤሢሮ ሙኪ ዒንሢ ዛጋኒ ዺቢ ካራ ኑ ኮዔኔ።

¹⁸ዬያይዲ ዒንሢ ባንሢ ኑ ሙካኒ ማሌንቴኬ፤ ባሼ ታኣኒ፥ ጳውሎሴ ዒንሢ ባንሢ ሙካኒ ላሚ ላሚ ኮዔንቴ ፃላሄ ኑና ሙኮ ላኣጊ ቃዜኔ።

¹⁹ማዔቴያ ኑ ጎዳሢ ዬሱሴ ሙኬ ዎዶ''ና ዒዛ ቤርቶይዳ ኑኡኮ ሃጊ ማዓንዳ ዎዞ'' ማዓንዳሢ፤ ሃሣ ኑኡኮ ቦንቺንታኣ ዖኦናዳይ? ዒንሢናቱዋዓዳ?

²⁰ጎኔና ኑኡኮ ቦንቾና ዎዛ''ኣ ዒንሢናኬ።