Read maale ፂሞቴዎሴም 2 1 Bible Online

ፂሞቴዎሴም 2 1 - maale bible

ፂሞቴዎሴም 2 1

¹ዬሱስ ኪሪስቶሴና ጴዼ ናንጎኮ ሃጊ ማዓንዳ ዎዞ'' ጎይፆ ፆኦሲ ማሊሢና ዬሱስ ኪሪስቶሴ ማዾ''ም ዳኪንቴያ ማዔ፥ ጳውሎሴይዳፓ ዳኪንቴ ኪኢታ፦

²ታኣኒ ናሽካ ናዓሢ፥ ፂሞቴዎሴም፤ ፆኦሲ፥ ዓዳሢና ኑ ጎዳሢ፥ ዬሱስ ኪሪስቶሴኮ ኮሹሞ ዒንጊፆና ማኣሪፆና ሃሣ ዎዞ''ና ኔኤም ማዖንጎ።

³ቢያ ዎዴ ዋንቴና ሮኦሪና ኔ ዛሎ'' ማሊ ማሊ ታ ሺኢቃኣና ቤርታኣ፥ ታ ዓዶንሢጉዲ ጌኤሺ ዒናፓ ታ ካኣሽካ ፆኦዛሢ ታ ጋላታኔ።

⁴ኔ ዬኤኪ ዓቢቴ ዓቢፆ ታ ዋሊ''ባኣሴ፤ ዬያሮ ሚርጌና ዒና'' ታኣኮ ዎዛዻንዳጉዲ ኔና ዛጋኒ ታ ኮዓኔ።

⁵ኔኤኮ ዓኣ ጎኔ፥ ፆኦሲ ጉሙርቂፆ ታ ጶቂሣኔ፤ ዬያጉዴ ጉሙርቂፃ ቤርታ ኔ ዓሆ ሎይዴይዳ ሃሣ ኔ ዒንዶ ዔዌንቄይዳ ዓኣያኬ፤ ሃሢ ኔኤኮዋ ዬያጉዲ ዓኣሢ ታ ዔሬኔ።

⁶ዬያሮ ታ ኔ ዑፃ ኩጮ ጌሤም ኔ ዔኬ፥ ኔ ጊዳ'' ዓኣ ፆኦሲኮ ዒንጊፆ ማዾይዳ ፔኤሺ'' ኔ ዲቻንዳጉዲ ታ ኔኤም ኬኤዛኔ።

⁷ዓይጎሮ ጌዔቴ ፆኦሲ ኑም ዒንጌሢ' ዎልቄንታ ናሹሞንታ ዒንጋያ፤ ሃሣ ኑና ኑ ዔሪ ዎይሣንዳ ዓያና ማዓንዳኣፓዓቴም ዒጊቹሞ ዓያናቱዋሴ።

⁸ዓካሪ ኑ ጎዳሢ ዛሎ'' ዓሶም ማርካዻኒ ሴልቂፖ፤ ሃሣ ዒዛ ዛሎ''ሮ ቱኡቴ፥ ታ ዛሎ''ሮዋ ሴልቂፖ፤ ፆኦሲ ኔኤም ዒንጋ ዎልቆና ኮዦ ሃይሶ ዛሎ''ሮ ታኣና ዎላ'' ሜታዼ።

⁹ዒዚ ኑኡኒ ማዼ ኮዦ ማዾሮቱዋንቴ ፔ ማሊፆና ፔኤኮ ኮሹሞ ዒንጊፆና ዻቂሺ፥ ፆኦሲም ዱማዼያ ማዒ ናንጋንዳጉዲ ኑና ዔኤሌ''ኔ፤ ዬያ ኮሹሞ ዒንጊፆ ሚርጌ ዎዴኮ ቤርታ ዬሱስ ኪሪስቶሴ ዛሎ''ና ኑም ዒንጌኔ።

¹⁰ዬይ ፆኦሲኮ ኮሹሞ ዒንጊፃ ኑና ዻቂሼ፥ ዬሱስ ኪሪስቶኮ ሙኪፆና ሃሢ ፔጋዺ ዔርቴኔ። ዒዚ ሃይቢኮ ዎልቄ ባይዚ ኮዦ ሃይሶ ዛሎ''ና ሃይቢባኣ፥ ናንጊና ናንጊ ኑም ዻዌኔ።

¹¹ታኣኒያ ዬያ ኮዦ ሃይሶ ኬኤዛያ፤ ዬያ ማዾ''ም ዳኪንቴያ ሃሣ ዔርዛያ ማዒ ዶኦሪንቴኔ።

¹²ሓያ ታ ሜታሢ ዔካሢ ዬያሮኬ፤ ጋዓንቴ ታኣኒ ሃያ ሜቶ ዔኪፆና ሴልቁዋሴ፤ ዓይጎሮ ጌዔቴ ዖና ጉሙርቃቴያ ታ ዔራኔ፤ ታ ዒዛም ሃዳርሲ ዒንጌ ባኮ ዬኖ ኬሎ'' ሄላ''ንዳኣና ዒ ካፓኒ ዳንዳዓሢ ታ ጉሙርቃኔ።

¹³ታ ጊዳ''ፓ ኔ ዋይዚ ዔሬ ቃኣሎ'' ማላታ ማሂ ዬሱስ ኪሪስቶሴና ኑኡኮ ዓኣ ፔቱሞ ዛሎ''ና ጴዻ ጉሙርቂፆና ኮሹሞና ዶዲሺ ዓርቄ።

¹⁴ኑ ጊዳ'' ዓኣ ዓያኖ ጌኤዦ ዛሎ''ና ኔና ጉሙርቂ ኔኤም ዒንጊንቴ ባኮ ካፔ።

¹⁵ዒሲያይዳ ዓኣ ዓሳ ቢያ ታና ሃሼ''ሢ ኔ ዔራኔ፤ ዔያቶ ባኣካ'' ፔጌሎሴና ሄርሞጌኔሴና ዓኣኔ።

¹⁶ጎዳ፡ ዖኔስፖሬ ማኣሮ ዓሶ ማኣዶ''ንጎ፤ ዓይጎሮ ጌዔቴ ዔያታ ሚርጌ ዎዴ ታና ዖኦጪ ዶዲሼኔ፤ ሃሣ ታ ቱኪ''ንቴሢሮ ሙኪ ታና ዖኦጪፆዋ ሴልቂ ሃሺ''ባኣሴ።

¹⁷ዒዚ ሮሜ ዓጮ'' ሙካዖ ሚርጌና ኮይ ታና ዴንቄኔ፤

¹⁸ጋፒንፆ ኬሎ''ና ጎዳ ዒዛም ኮሺ ማዾንጎ፤ ቤርታ ታ ዔፕሶኔይዳ ዓኣና ዒ ዎማይዲ ታኣም ማዼቴያ ኔ ኮሺ'' ዔራኔ።