Read maale ዔብሬ ዓሶም ዳኪንቴ ኪኢታ 11 Bible Online

ዔብሬ ዓሶም ዳኪንቴ ኪኢታ 11 - maale bible

ዔብሬ ዓሶም ዳኪንቴ ኪኢታ 11

¹ጉሙርቂሢ ጌይሢ ሃጊ ማዓንዳ ዎዛ ጌሢ ኑ ካፓ ባኮ ኑ ዴንቃንዳያታሢ ዔሪሢ፤ ሃሣ ኑ ዛጊባኣ ባኮ ዓኣያ ማሂ ዛጊሢኬ።

²ቤርታኣ ዓሶም ማርካዺንቴሢ' ዔያታ ጉሙርቄሢሮኬ።

³ሳዖንታ ጫሪንጮንታ ጊዳ'' ዓኣ ባካ ቢያ ፆኦሲ «ማዖንጎ» ጌዔሢና ማዢንቴያ ማዔሢ ኑ ዔራሢ ጉሙርቂሢናኬ፤ ዬያሮ ኑም ሃሢ ጴዻ ባካ ቢያ ጴዹዋ ባኣዚ''ዳፓ ማዢንቴሢ ዬያና ኑ ዔራኔ።

⁴ዓኣቤኤሌ፡ ቃኣዔኤሌ ፆኦሲም ዒንጌ ዒንጊፆይዳፓ ባሻያ ፆኦሲም ዒንጌሢ ጉሙርቂሢናኬ፤ ፆኦሲ ዓኣቤኤሌ ዒንጌ ዒንጊፆ ዎዛና ዔኬ ዎዶ''ና ዓኣቤኤሌ ጉሙርቂፆና ፂሎ'' ማዔሢ ማርካዺንቴኔ፤ ዓኣቤኤሌ ሓይቄያ ማዔቴያ ሃኖ'' ሄላ''ንዳኣና ዒዛኮ ጉሙርቂፆ ዛሎ''ና ዒ ኬኤዚ ኬኤዚ ዓኣኔ።

⁵ሄኖኬ ሃይቢ ሃይቁዋጉዲ ሌካ ጫሪንጮ ዔውቴሢ ዒ ጉሙርቄሢሮኬ፤ ፆኦሲ ዒዛ ዔኬሢሮ ዒ ጴዺባኣሴ፤ ዒ ዔውታንዳሢኮ ቤርታ ፆኦሲ ዒ ዎዛሴያ ማዔሢ ማርካዺንቴኔ።

⁶ጉሙርቂሢ ባኣንቴ ፆኦሲ ዎዛሳኒ ዳንዳዒንቱዋሴ፤ ዓይጎሮ ጌዔቴ ፆኦሲ ባንሢ ሙካሢ ፆኦሲ ዓኣያ ማዔሢና ዒዛ ዒናፓ ኮዓዞንሢም ዒ ዒንጋንዳ ባኣዚ'' ዓኣሢ ጉሙርቃንዳያ ኮይሳሢሮኬ።

⁷ሃጊ ጴዺባኣ ባኮሮ ፆኦሲ ላቲ'' ዒዛም ኬኤዜ ዎዶ''ና ኖሄ ፆኦሲ ዒጊጪሢና ማኣሮ ዓሶ ዻቂሻኒ ዋኣፆ ካኣሚሎ ኮሼ''ሢ ጉሙርቂሢናኬ፤ ዬያ ጉሙርቂፆና ዓጮ'' ዓሶ ቢያ ዻቢንቴያ ማሂ ዒዚ ሃሼ''ኔ፤ ጉሙርቂፆና ጴዻ ፂሉ''ሞዋ ዒ ዴንቄኔ።

⁸ዓብራሃሜ ፔ ዓጪ ማሂ ዔካንዳ ቤዞ ዓኣዻንዳጉዲ ፆኦሲ ዒዛ ዔኤሌ'' ዎዶ''ና ዓንኮ ዓኣዻቴያ ዔሪባኣያታዖ «ዔኤዔ» ጌዒ ዓይሢንቲ ዓኣዼሢ ጉሙርቂሢናኬ።

⁹ሓሣ ዒዛጉዲ ሃጊ ማዓንዳ ዎዞ'' ዴንቃንዳ፥ ዪሳኣቄና ያይቆኦቤና ዎላ'' ሃጋኣ ዎዛ ማሂ ዒንጎና ዓጬ''ሎይዳ ሙኬ ዓሲ ማዒ፥ ዓፒላና ማዢንቴ ማኣሮይዳ ዒ ናንጌሢ ጉሙርቂሢናኬ።

¹⁰ዓይጎሮ ጌዔቴ ዶዲ ቦኦኮሎና ማዢንቴ፥ ፆኦሲ ማዣኒ ዓርቂ ማዤ ካታሞ ዒ ካፓያታሢሮኬ።

¹¹ዓብራሃሜ ዎዚ ጋርቼያ ማዔቴያ ሃሣ ሳኣራ ዞኦኮ ማዔቴያ ሃጊ ማዓንዳ ዎዞ'' ዒንጌሢ ጉሙርቂንታያ ማሂ ዒ ዛጌሢሮ ጉሙርቂሢና ናይ ዓዶ ማዔኔ።

¹²ዬያሮ ዬያ ሃይቄያጉዲ ማዔ፥ ዓብራሃሜይዳፓ ጫሪንጮ ዦኦጋሢጉዲ ሚርጌያ ሃሣ ባዞ'' ዓጫ ዓኣ ፓይዲንቱዋ ማኣሻሎጉዴ ዺቢ ዜርሢ ዒዛይዳፓ ኬስኬኔ።

¹³ዬያታ ቢያ ሓይቄሢ ጉሙርቃ ጎይሣ ዓኣዖኬ፤ ፆኦሲ ዔያቶም ዒንጋኒ ጫኣቄ ጫኣቁሞ ባኮዋ ዔያታ ዴንቂባኣሴ፤ ጋዓንቴ ሃኬና ዛጊ፥ ዓዳ'' ዴንቄያ ማሂ ዔያታ ዎዛዼኔ፤ ሳዖይዳኣ ሾኦቺ ሃሣ ሙኬ ዓሲ ማዔያታሢያ ዔያታ ዔሪ ማርካዼኔ።

¹⁴ያዺ ጌዒ ማላ ዓሳ ዔያቶም ማዓ ዓጪ ዓኣያ ማዔም ዔያታ ካፓያታሢ ዔርታኔ።

¹⁵ዬኖ፥ ዔያታ ዎንዴ ሃሺ'' ኬስኬ ዓጬሎ ሄኤዶ ጶቂሢ ማላያታቴ ዒዞ ባንሢ ማዒ ዴንዳንዳያታዖኬ።

¹⁶ሃሢ ጋዓንቴ ባሼ ማዔያ፤ ሃሣ ጫሪንጮይዳ ዓኣ ዓጮ'' ዔያታ ጶቂሢ ማላኔ፤ ዬያፓ ዔቄያና ፆኦሲ ዔያቶም ካታማ ጊኢጊሼሢሮ «ኑ ፆኦዛሢ» ጌዒ ዔያታ ዔኤሌ''ቴ ዒዛ ቦርሳያቱዋሴ።

¹⁷ዓብራሃሜ፡ ዎይታቴያ ዛጋኒ ፆኦሲ ማዼ ዎዶ''ና ዒዚ ዪሳኣቄ ፆኦሲም ዒንጎ ባኣዚ'' ማሂ ዒንጌሢ ጉሙርቂሢናኬ፤ ሃጊ ማዓንዳ ዎዞ'' ዴንቄ፥ ዓብራሃሜ ፔኤኮ ፔቴ'' ናዓሢ ጎኔ ሹካኒ ዒማ''ና ጊኢጌኔ።

¹⁸ዬይ ናዓሢ «ኔ ዜርፃ ዪሳኣቄ ሱ'ንፆና ዔኤሊ''ንታንዳኔ» ፆኦሲ ዒዛም ጌዔሢኬ።

¹⁹ፆኦሲ ሃይቄ ዓሶ ሃይቢዳፓ ዔቂሳኒ ዳንዳዓሢ ዓብራሃሜ ጉሙርቄሢሮ ዒማ''ና ዪሳኣቄ ሃይቢዳፓ ዔቄያ ማሂ ዒ ዛጌኔ።

²⁰ዪሳኣቄ ሃጊ ማዓንዳ ባኮ ማሊ ያይቆኦቤና ዔኤሳዎና ዓንጄሢ ጉሙርቂሢናኬ።

²¹ያይቆኦቤ ሓይቃኒ ዑካዖ ዮሴፔ ናኣቶ''፥ ፔቴ'' ፔቴ''ሢ ዓንጄሢ ሃሣ ዒ ኮኦላ''ዺ ሃንታ ኮኦሎ''ና ዔቂ ፆኦሲም ዚጌሢያ ጉሙርቂሢናኬ።

²²ዮሴፔ ሃሣ ሓይቃኒ ዑካዖ ዒስራዔኤሌ ዓሶም ዔያታ ጊብፄ ዓጮ''ይዳፓ ኬስካንዳያ ማዒፆ ኬኤዜሢ ሃሣ ዒዛኮ ሜጌፆ ዔያታ ዎዳ''ንዳቴያ ዓይሤሢ ጉሙርቂሢናኬ።

²³ሙሴ ሾዔ ዓሳ፡ ዒ ሾይንቴ ዎዶ''ና ሚዛጲ ናይ ማዔሢ ዛጋዖ፥ ካኣቲ ዓይሤ ዓይሢፆ ዒጊጩዋዖ ሃይሦ ዓጊኒ ዒዛ ዓኣቼሢ ጉሙርቂሢናኬ።

²⁴ሙሴ ዒማ''ና ዲጬሢኮ ጊንፃ፦ «ጊብፄ ዓጮ'' ካኣቲኮ ናዎ ናኣዚ''» ጌይንቲ ዔኤሊ''ንቲፆ ዒፄሢ ጉሙርቂሢናኬ።

²⁵ዒዚ ዻካ'' ዎዴሮ ጎሜ ማዺ ማዺ ዴንቆ ዎዞ''ይዳፓ ባሼ ፆኦሲ ዴሮ''ና ዎላ'' ሜቶ ዔካኒ ኮዔኔ።

²⁶ሓጊ ዒዛም ዒንጊንታንዳ ባኮ ዒ ዔሬሢሮ ጊብፄ ዓጮ'' ቆሎ''ይዳፓ ባሼ ሜሲሔ ዛሎ''ሮ ቦሂንቲፃ ባሼ ቆሎ ማዔሢ ዒ ዛጌኔ።

²⁷ዒዚ ሃሣ ካኣቲኮ ጎሪ''ንቶ ዒጊጩዋዖ ጊብፄ ዓጮ''ይዳፓ ኬስኬሢ ጉሙርቂሢናኬ፤ ጴዹዋ ፆኦዛሢ ዴንቄያ ማሂ፥ ዒ ፔ ማሊፆና ዶዴኔ።

²⁸ቶይዶ ናኣቶ'' ዎዻንዳጉዲ ዒማ''ና ዓይሢንቴ ኪኢታንቻሢ ዒስራዔኤሌ ዓሶኮ ቶይዶ ናኣቶ'' ዎዹዋጉዲ ዑሣ ዓኣዺፆ ዎጎና ካሮ'' ዑፃ ሱጉፆ ፑጪፆ ዎጎዋ ዒ ኩንሤሢ ጉሙርቂሢናኬ።

²⁹ዒስራዔኤሌ ናኣታ'' ፃኣዺ ሳዓይዳ ሃንቶጉዲ ሃንቲ ዞቄ ባዞ''ና ፒንቄሢ ጉሙርቂሢናኬ፤ ጊብፄ ዓሳ ጋዓንቴ ዔያቶጉዲ ፒንቃኒ ማሌ ዎዶ''ና ቢያሢ ዋኣፆና ሙይንቴኔ።

³⁰ዒስራዔኤሌ ዓሳ ዒያርኮ ካታሞኮ ሹጮና ኬልቂ ዲርቆና ዲሮ ዙሎ'' ላንካይ ኬሊ'' ሺሬሢኮ ጊንፃ ዬያ ዲሮ ዔያታ ዶይሴሢ ጉሙርቂሢናኬ።

³¹ዞኦዛ ኮኦማ፥ ሬዓባ ጎዖዛ፡ ዒስራዔኤሌይዳፓ ሙሮ'' ሙኬ ዓሶ ሾኦቺንሢ ዔኪፆና ፆኦሲም ዓይሢንቱዋ ዓሶና ዎላ'' ሓይቁዋዖ ዓቴ''ሢ ጉሙርቂሢናኬ።

³²ዓካሪ ዬካፓ ዑሣ ታ ዎዚ ጎዖንዶይ! ጌዲዮኔ፥ ባርቄ፥ ሶምሶሜ፥ ዮፕታኣሄ፥ ዳውቴ፥ ሳሙዔኤሌንታ ፆኦሲ ማሊፆ ኬኤዛ ዓሶንታ ዛሎ'' ታ ኬኤዚ ጋፒሳኒ ዳንዳዑዋሴ።

³³ዔያታ ጉሙርቂሢና ካኣቶ'' ዖልዚና ባሼኔ፥ ፒዜ ዎጊሢና ዓሶ ዎይሤኔ፥ ፆኦሲ ዔያቶም ዒንጌ ሃጊ ማዓንዳ ዎዞ'' ባኮዋ ዴንቄኔ፥ ዞቦኮዋ ዻንጎ ዓይሤኔ፤

³⁴ታሚ ዎልቄያ ባሼኔ፥ ጬንቾ ዓፓሮና ሓይቂፆይዳፓ ቶሌ''ኔ፥ ላቢ''ፃፓ ዶዴኔ፥ ዖልዚና ዔርቴያ ማዔኔ፥ ዔያቶ ዖላኒ ሙኬ ሞርኮኮ ፖኦሊሶ ዳውሴኔ፤

³⁵ላኣላ ፔኤኮ ሓይቄ ዒጊኖ ሓይባፓ ዔቄም ዴንቄኔ። ሜሌ'' ዓሳ ሃይቢፓ ዔቂ ባሼ ናንጊ ዴንቃንዳኔ ጌዒ ዱማ ዱማ ሜቶ ዔኬኔ፤ ዬያይዳፓ ቶሊ'' ሜታ ባኣያ ናንጋኒያ ኮይባኣሴ።

³⁶ፔቴ'' ፔቴ'' ዓሳ ዓሲኮ ዓማሊ'' ማዒ ዢራፓና ጳርቂንቴኔ፤ ሃንጎዋታ ሃሣ ዓንጊ ዱፄና ቱኡቲ ቱኡሲ ማኣሪ ጌሌኔ፤

³⁷ሹቺናኣ ዹይንቴኔ፥ ማጋዜ ጌይንታ ዓንጎና ሄኮ ጳሊ''ንቴኔ፥ ጬንቾ ዓፓሮናኣ ጫርጊንቲ ሃይቄኔ፥ ማራይና ዋኣሪናኮ ዒልዒ ማይንቲ ሜታዺ ሃንቴኔ፥ ማንቆ ሃሣ ቤሲባኣ ዓሲያ ማዒ ሃንቴኔ፤

³⁸ዓሲ ናንጉዋ ዳውሎ''ይዳ፥ ዹኮ''ይዳ ሃሣ ዴኔ ዔቴንታ ዛሬንታይዳ ዎርቂ ዎርቂ ሃንቴኔ፤ ዬያሮ ዓጫ'' ዔያቶም ኮይሳ ቤሲ ማዒ ጴዺባኣሴ።

³⁹ዬያታ ቢያ ፔ ጉሙርቂፆና ማርካዺንቴያታቴያ ዔያቶም ዒንጊንቴ ሃጊ ማዔ ዎዞ'' ጋዓንቴ ዔያቶይዳ ዴንቄይ ባኣሴ።

⁴⁰ፆኦሲ ኑም ዑሣ ዓኣዼ ኮሺ ማዔ ባኣዚ'' ጊኢጊሼሢሮ ዔያታ ኑኡና ዎላ'' ማዓንዳኣፓዓቴም ዔያቶና ሌሊ ፆኦሲ ማሊፃ ኩማያቱዋሴ።