Read maale ዔብሬ ዓሶም ዳኪንቴ ኪኢታ 12 Bible Online

ዔብሬ ዓሶም ዳኪንቴ ኪኢታ 12 - maale bible

ዔብሬ ዓሶም ዳኪንቴ ኪኢታ 12

¹ዬያጉዴ ሻኣሬ ማዔ፥ ሚርጌ ማርካ ኑኡኮ ዓኣሢሮ ኑኡኒያ ኬዲ ኑም ማዔ ባኮ ቢያ፤ ሃሣ ኑና ቱኪ'' ዓርቄ ጎሞይዳፓ ዱማዺ ኑኡኮ ቤርታ ዓኣ ጳዦ ጊቢ'' ዳንዳዒሢና ዶዲ ኑ ጳሽኮም።

²ኑ ጳሽካንዳሢያ፦ ኑኡኮ ጉሙርቂፆኮ ካራ ማዔሢና ኩንሣያ ማዔ፥ ዬሱሴ ዛጊኬ፤ ሃጊ ዒ ዴንቃንዳ ዎዞ''ሮ ፑርቶ ዓሶ ሱፆ ሚፆይዳ ዓኣ ዻውሲንቶ ሃይቦ'' ዔኤቢ ማሂ ዛጉዋዖ ሃሣ ዒኢካ ዒ ሃይቄ ሃይቦ''ና ሜታሢና ጉቤ ዳንዳዒ ፆኦሲኮ ካኣቱሞ ዖይቶ ኬስኪ፥ ዒዛኮ ሚዛቆ ዛላ'' ቦንቾና ዴዔኔ።

³ዓካሪ ዒንሢ ቶኦዛዹዋያ ሃሣ ሃጊ ማዓንዳ ዎዛባኣ ዓሲጉዲያ ማዒፖቴ፤ ጋዓንቴ ዬያ ቢያ ጎሞ ዓሳ ዒዛ ዒፂ ማዼ ባኮ ጊቢ'' ዳንዳዔ፥ ዬሱሴ ዛጉዋቴ።

⁴ዒንሢ ጎሜ ዒፂ፥ ሃይቢ ሄላ''ንዳኣና ማሹምቦ ዓርቂባኣሴ።

⁵ፆኦሲ ዒንሢ ፔኤኮ ናኣቶ'' ማሂ፦ «ታ ናዓሢዮ! ጎዳ ጎራ'' ጎሮ'' ቦሂፖ፤ ዒ ኔና ሜቶና ጎራ'' ዎዶ''ና ሃጋኣ ዎዛ ባኣያ ማዒፖ፤

⁶ዓይጎሮ ጌዔቴ፦ ጎዳ ፔ ናሽካሢ ጎራ''ኔ፤ ፔ ናይ ማሂ ዛጋሢያ ዒ ፁንቃኔ» ጌዒ ዞሬ ዞሮ'' ዒንሢ ዋሌ''ኔ።

⁷ፆኦሲ ዒንሢ ፔኤኮ ናይ ማሂ ዛጋሢሮ ዒዚ ሜቶና ዒንሢ ጎራ'' ዎዶ''ና ጊቢ'' ዳንዳዑዋቴ፤ ዓዴ ጎሪ'' ጳርቁዋ ናይ ዓኣ?

⁸ናኣቶ'' ማዔዞንሢ ዔካ ሜታሢ ዒንሢ ዔኩዋያ ማዔቴ ዓሌ'' ናይ ዒንሢ ማዓንዳኣፓዓቴም ሾዖና ናይቱዋሴ።

⁹ዬይ ዓታዛ፡ ኑና ቢያሢ ጎሪ'' ፁንቃ፥ ኑና ሾዔ ዓዶንሢ ዓኣኔ፤ ያዺ ማዔቴያ ኑ ዔያቶ ቦንቻኔ። ዓካሪ ሼምፖና ናንጋኒ ኑኡኮ ዓያኖ ዓዳሢም ባሼ ዓይሢንታንዳያ ኑም ኮይሱዋዓዳ?

¹⁰ኑ ዓዶንሢ፡ ዔያቶም ኮሺ ማዒ ጴዼ ጎይፆ ዻካ'' ዎዴም ኑና ጎሪ'' ፁንቃኔ፤ ፆኦሲ ጋዓንቴ ዒዛና ዎላ'' ኑ ጌኤሺ ማዓንዳጉዲ፥ ኑና ማኣዳ'' ባኣዚ''ሮ ሜቶና ኑና ፁንቃኔ።

¹¹ጎሪ'' ፁንቆ ፁንቃ ቢያ ዒማ''ና ዖዪሳያኬ፥ ዎዛሳያቱዋሴ፤ ጊንፃፓ ጋዓንቴ ጊቢ'' ዳንዳዒ ዔሬ ዓሶም ኮሹሞ ኩሜ፥ ፂሉ''ሞ ናንጊ ጴዺሻኔ።

¹²ዬያሮ ዒንሢ ዓያኖ ዛሎ''ና ላቤ'' ላቢፃፓ ዶዱዋቴ።

¹³ዎቦ'' ማዔሢ ዻቂ ፒዛንዳጉዲ ማዓንዳኣፓዓቴም ፔቶ ዣኣሉዋጉዲ ዒኖ'' ዒንሢኮ ፒዜ ጎይሢ ዔኪ ዓኣዹዋቴ።

¹⁴ዓሲ ቢያና ኮሺ ናንጋኒ ማሉዋቴ፤ ፆኦሲም ዱማዼያ ማዓኒያ ዶዱዋቴ፤ ዓይጎሮ ጌዔቴ ፆኦሲም ዱማዺባኣዖ ዖኦኒያ ዒዛ ዛጋኒ ዳንዳዑዋኣሢሮኬ።

¹⁵ዒንሢዳፓ ዖጊዳኣ ፆኦሲ ኮሹሞና ዒንጋ ዒንጊፃ ፓጪ ጴዹዋጉዲ ዒንሢና ዔሩዋቴ፤ ዬያጉዲ ሃሣ ዓይጎ ዓሲያ ዒንሢ ባኣካ'' ጫንቃ ሚሢጉዲ ማዒ ኬስኪ ዒንሢ ሜታሱዋጉዲና ሚርጌሢ ፑርቲሱዋጉዲ ዒንሢና ዔሩዋቴ።

¹⁶ዒንሢ ባኣካ'' ፔቴ''ና ሙዖ ሙኡዚ''ሮ ጌዒ ቶይዱሞ ሻንቼ፥ ዔኤሳዎጉዲ ዻቢንታያ ሃሣ ጊንሣ ፆኦሲ ቦንቺሱዋያ ማዔ ዓሲ ጴዹዋጉዲ ዒንሢና ዔሩዋቴ።

¹⁷ጊንፃፓ ዔኤሳዎ ዓንጆ ዔካኒ ኮዔ ዎዶ''ና ዓንጆ ዒዚ ላኣጊንቴሢ ዒንሢ ዔራኔ፤ ዎዚ ዒ ዬኤኪ ዬኤኪ ዬኖ ዓንጆ ዶዲ ኮዔቴያ ዴንቃኒ ዒ ዳንዳዒባኣሴ፤ ዓይጎሮ ጌዔቴ ዒ ቤርታ ዻቤ ዻቢንቶ ቡኡፆንዶ ካራ ዒዛም ጴዺባኣሢሮኬ።

¹⁸ዒንሢ ኩቻ ዓርቂንታኒ ዳንዳዑዋያ ሃሣ ጊንሣ ታማ'' ዔኤታ'' ሲና ዹኮ'' ሄሊ''ባኣሴ፤ ጌይፃ፦ ቃኣያሢ ቤዞ፥ ዹሞ ቤዞ፥ ዓልጋሢ ዔቄ ቤዞ፥

¹⁹ዛዮ ዑኡዛ ጊንሣ ሃሣ ጌይንታ ባካ ዋይዚንታ ዑኡዛ ዓኣ ቤዞ ባንሢ ዒንሢ ሄሊ''ባኣሴ፤ ዬያ ባኮ ዋይዜ ዓሳ፦ «ሓይፓ ሴካ ሜሌ'' ባኣዚ'' ኑም ኬኤዚንቶፓ» ጌይ ሺኢቄኔ።

²⁰ዓይጎሮ ጌዔቴ፦ «ዹኮ'' ቆልሞ ሄሌ''ቴታዖ ሹቺና ዹይንቲ ሃይቆንጎ» ጋዓ ዓይሢፃ ዔያቶም ዴኤፄሢሮ ዔካኒ ዔያታ ዳንዳዒባኣሢሮኬ።

²¹ዬካ ጴዻ ባካ ሚርጌ ዒጊቻያ ማዔሢሮ ሙሴታዖ «ታ ዒጊጪ፥ ጎጋይቄኔ» ጌዔኔ።

²²ዒንሢ ጋዓንቴ ፂዮኔ ዹኮ'' ባንሢ ሙኬኔ፤ ዬይያ፦ ባይቁዋ ፆኦዛሢ ካታሞ ማዔ፥ ጫሪንጮ ዬሩሳላሜኬ፤ ዒኢካ ዎዛና ቡኪንቴ፥ ፓይዲንቱዋ ዺቦ'' ኪኢታንቾ ባንሢ ዒንሢ ሙኬኔ።

²³ሃሣ ሱ'ንፃ ዔያቶኮ ጫሪጮይዳ ፃኣፒንቴ፥ ኪሪስቶሴ ጉሙርቃ ሺኢጲፆ ማኣሮ ዓሶኮ ቶይዶ ማዔ፥ ኪሪስቶሴ ጉሙርቃ ዓሶ ቡኪንቶ ባንሢ ጊንሣ ሃሣ ቢያሢም ዎጋያ ማዔ፥ ፆኦዛሢና ፆኦሲ ዔያቶ ማዖም ጌዔ ጎይፆ ማዔ፥ ኮዦ ዓሶ ዓያኖና ባንሢ ዒንሢ ሙኬኔ፤

²⁴ሃሣ ፆኦሲና ዓሲናኮ ባኣካ'' ዓኣ ዓኮ ጫኣቁሞ ጊኢጊሼ፥ ዬሱሴ ባንሢ፤ ዬያጉዲ ሃሣ ዓኣቤኤሌ ሱጉፃፓ ባሼ ኬኤዛ፥ ጎሜ ጌኤሻኒ ፑጪንቴ ዒዛኮ ሱጉፆ ባንሢ ዒንሢ ሙኬኔ።

²⁵ዬያ ኬኤዛ ባኮ ዒንሢ ዒፁዋጉዲ ዒንሢና ዔሩዋቴ፤ ዓይጎሮ ጌዔቴ ዬያታ ሳዓፓ ዔያቶም ኬኤዛ ዎዶ''ና ዒፂ ዔያታ ቶሊ'' ዓቲባኣያ ማዔቴ፥ ጫሪንጫፓ ኑም ኬኤዛሢዳፓ ኑ ሃኬቴ ዎይቲ ኑ ቶላ''ንዳይ!

²⁶ዒማ''ና ዒዛኮ ዑኡዛ ሳዖ ዓጊሤኔ፤ ሃሢ ጋዓንቴ፦ «ሳዖ ሌሊቱዋንቴ ፔቴ''ና ላሚ ጫሪንጮንታ ዎላ'' ታ ዓጊሣንዳኔ» ጌዒ ጫኣቄኔ።

²⁷ዬይ «ፔቴ''ና ላሚ» ጌይንቴ ባካ ዔርዛሢ ዓጊፁዋ ባካ ዶዲ ናንጋንዳጉዲ ሃሣ ዓጊፃያ ማዔ፥ ማዢንቴ ባካ ባይቃንዳያ ማዔሢኬ።

²⁸ዓካሪ ኑኡኒ ዓጊፁዋ ቤዞ፥ ፆኦሲ ዎይሣሢዳ ጌላንዳሢሮ ዒዛ ኑ ጋላቶም፤ ሓሣ ዒ ዎዛዻ ጎይሢ ዒዛ ቦንቺሢና ዒጊጪሢና ዒዛ ኑ ካኣሽኮም።

²⁹ዓይጎሮ ጌዔቴ ኑ ፆኦዛሢ ሚቺ ባይዛ ታሚ ማዔሢሮኬ።