Read maale ዔብሬ ዓሶም ዳኪንቴ ኪኢታ 13 Bible Online

ዔብሬ ዓሶም ዳኪንቴ ኪኢታ 13 - maale bible

ዔብሬ ዓሶም ዳኪንቴ ኪኢታ 13

¹ቢያ ዎዴ ዎሊኮ ጌርሲ ሃሣ ጌሮጉዲ ናሽኪንቱዋቴ፤

²ሾኦቺ፡ ሾኦቺንሢ ዔኪሢ ዋሊ''ፖቴ፤ ዓይጎሮ ጌዔቴ ዬያጉዲ ሾኦቺ ሾኦቺንሣ ዓሳ ዔሩዋዖ ፆኦሲ ኪኢታንቾ ሾኦቺንሢ ዔኬኔ።

³ቱኡዞ ማኣራ ቱኡቴ ዓሶና ዎላ'' ዒንሢያ ቱኡቴ ዓሲ ማዒ ዔያቶም ማሉዋቴ፤ ሃሣ ዔያቶና ዎላ'' ሜታዻያ ማዒ ሜታሢዳ ዓኣ ዓሶም ማሉዋቴ።

⁴ላኣሊ ዔኪ ዎላ'' ናንጎ ናንጎ ቢያሢ ቦንቻያ ማዖንጎ፤ ዓኒና ማቾና ዎሊ ጉሙርቁዋያ ማዒ፥ ዎሊ ዔኪ ናንጎ ናንጎ ዒኢሶፓ፤ ዓይጎሮ ጌዔቴ ፆኦሲ፡ ዞኦስካ ኮኦማ ፑርቶ ሱኡኮና ዓኣ ዓሶንታ ዓኒ ሃሣ ማቾ ማዒባኣ ዓሶና ላሃ ዓሶዋ ፑርታና ዎጋንዳሢሮኬ።

⁵ሚኢሼ ፔቶ'' ናሽኪሢ ሃሹ''ዋቴ፤ ዒንሢኮ ዓኣ ባኮና ዎዛዺ ናንጉዋቴ፤ ዓይጎሮ ጌዔቴ ፆኦሲ፦ «ማሊ ታ ኔና ኬኤራዓኬ፤ ሃሻ''ዓኬ» ጌዔኔ።

⁶ዬያሮ ጉሙርቂ፦ «ጎዳ ታና ማኣዳ''ሢኬ፥ ታ ዒጊጫዓ፤ ዓሲ ታና ዓይጎ ዎኦታንዳይ?» ኑ ጋዓኔ።

⁷ቤርታ ዒንሢም ፆኦሲ ቃኣሎ'' ኬኤዜ፥ ዓርና ማዔ ዓሶ ዋሊ''ፖቴ፤ ዔያቶኮ ናንጎና ዔያታ ማዼ ማዾ''ኮ ዓኣፖ ጶቂሢ ሃሣ ዔያታ ጉሙርቄ ጎይፆ ጉሙርቁዋቴ።

⁸ዬሱስ ኪሪስቶሴ ዚጊኖዋ ሃኖዋ ሃጋ ናንጊና ዓኣ ጎይፆማኬ፤ ላኣሚንቱዋሴ።

⁹ዱማ ዱማ ዔርቲባኣ ዔርዞ ዔርዚሢና ዲዒንቲ ዔውቲፖቴ፤ ዒና'' ኑኡኮ ሙኡዚ'' ዳምቤ ካፒሢናቱዋንቴ ፆኦሲ ኮሹሞና ዒንጌ ዒንጊፆና ዶዴቴ ቃራኬ፤ ዓይጎሮ ጌዔቴ ዬያ ሙዖ ዳምቦ ካፔ ዓሶ ዬይ ዓይጎዋ ማኣዲ''ባኣሢሮኬ።

¹⁰ኑኡኮ ፆኦሲም ዒንጎ ባኮ ሺኢሾ ቤሲ ዓኣኔ፤ ጋዓንቴ ዓፒሎና ማዢንቴ ማኣሮኮ ጋሮይዳ ማዻ ቄኤሳ፡ ዬኖ ፆኦሲም ዒንጎ ቤዞይዳ ዓኣ ሙዖ ዔኪ ሙዓንዳጉዲ ዓይሢንቲባኣሴ።

¹¹ዓይሁዶ ዓሶ ቄኤሶኮ ዑፃሢ ጎሜ ጌኤሻ''፥ ቆልሞ ሱጉፆ ዔኪ ፆኦሲም ዑሣ ዓኣዼ ዱማዼ ቤዜሎ ጌላኔ፤ ቆልሞኮ ዓሽካ ጋዓንቴ ጉርዶ ዙላ'' ኬሲ'' ሚቺንታኔ።

¹²ዬያጉዲ ዬሱሴ ዴሮ''ኮ ፔ ሱጉፆና ጎሞ ጌኤሻ''ኒ ካታሞኮ ዙላ'' ሓይቦ'' ሜታሢ ዔኬኔ።

¹³ዬያሮ ኑኡኒ ጉርዳፓ ዙሎ'' ኬስኪ፥ ዒዛ ባንሢ ዴንዶም፤ ዒዛና ዎላ'' ቦሂንቲ፥ ቦሂንቲፆ ኑዋ ዔካያ ማዖም።

¹⁴ዓይጎሮ ጌዔቴ ኑ ሃጊ ሙካ ካታሞ ካፓኣፓዓቴም ሓይካ ሳዓ ባይቁዋዖ ዶዲ ናንጋ ካታማ ኑኡኮ ባኣሴ።

¹⁵ዓካሪ ዬሱስ ኪሪስቶሴ ዛሎ''ና ጋላታ ፆኦሲም ዒንጎ ባኣዚ'' ማሂ ቢያ ዎዴ ኑ ዒዛም ዒንጎም፤ ዬይያ ዒዛ ሱ'ንፆ ዛሎ'' ኑ ዻንጎና ኑ ማርካዻ ጋላቶኬ።

¹⁶ሃሣ ኮሺ ባኣዚ'' ማዺሢና ዒንሢኮ ዓኣ ባኮ ሜሌ'' ዓሶም ጊሽኪ ዒንጊሢ ዋሊ''ፖቴ፤ ዓይጎሮ ጌዔቴ ፆኦሲ ዎዛሳ ዒንጊፃ ዬያጉዴ ዒንጊፆ ማዔርሢሮኬ።

¹⁷ዒንሢኮ ዓርኖ ማዔ ዓሶም ዓይሢንቲ፥ ዔያቶም ዎርቃያ ማዑዋቴ፤ ዓይጎሮ ጌዔቴ ዔያታ ማዻ ማዾ'' ዛሎ'' ሚርጌና ዔያታ ዖኦጪንታንዳያ ማዔሢሮ ዒንሢ ሼምፖ ዛሎ'' ቢያ ዎዴ ዔያታ ዶዲ ማዻኔ፤ ዒንሢ ዔያቶም ዓይሢንታያ ማዔቴ ዔያታ ፔኤኮ ማዾ'' ዎዛና ማዻንዳኔ። ያዺ ማዒባኣያታቴ ማዻ'' ዔያቶኮ ዖዪሢና ማዓንዳኔ፤ ዬይ ዒንሢም ጊኢጋዓኬ።

¹⁸ኑም ሺኢቁዋቴ፤ ቢያ ጎይሢና ኮሺ ናንጊ ናንጋኒ ኮዓ፥ ጌኤሺ ማሊሢ ኑኡኮ ዓኣሢ ኑ ዔራኔ።

¹⁹ባሼ ዶዲ ዒንሢ ሺኢቃንዳጉዲ ታ ጋዓሢ ዑኬና ዒንሢ ኮይላ'' ታ ማዒ ሙካንዳጉዲኬ።

²⁰ናንጊና ናንጎ ጫኣቁሞ ሱጉፆና ማራቶኮ ዼኤፒ ሄንቃያ ማዔ ኑ ጎዳሢ ዬሱሴ ሓይባ''ፓ ዔቂሴ ኮሹሞኮ ፆኦዛሢ፥

²¹ዒዛ ማሊፆ ኩንሣያ ዒንሢ ማዓንዳጉዲ ኮሺ ባኣዚ'' ማዻያ ዒንሢ ማሆንጎ፤ ሃሣ ዒዛ ዎዛሳ ባኣዚ'' ዬሱስ ኪሪስቶሴ ዛሎ''ና ዒ ኑ ጊዳ'' ማዾንጎ፤ ዬሱስ ኪሪስቶሴም ናንጊና ቦንቾ ማዖንጎ፤ ዓኣሜን።

²²ታ ዒሾንሦ! ታ ሚሾንሦ! ሃይ ታ ዒንሢም ፃኣፔ ኪኢታ'' ዻካ'' ማዔሢሮ ሓያ ታኣኮ ዞሮ'' ሃይሶ ጊቢ'' ዳንዳዒ ዒንሢ ዔካንዳጉዲ ታ ዒንሢ ሺኢቃኔ።

²³ኑ ዒሻሢ፥ ፂሞቴዎሴ ቱኡዞ ማኣራፓ ቡሊ''ንቴሢ ዒንሢ ዔራንዳጉዲ ታ ኮዓኔ፤ ሃሢ ዑኬና ዒ ሃይካ ሙኬቶ ዒዛና ዎላ'' ሙኪ ታ ዒንሢ ዛጋንዳኔ።

²⁴ዒንሢኮ ዓርኖና ፆኦሲም ዱማዼ ዓሶናም ቢያ «ኮሺዳ?» ጋዓኔ፥ ጎዑዋቴ። ዒፃሊያ ዓጮ''ይዳፓ ሙኪ፥ ታኣና ዎላ'' ዓኣ ኪሪስቶሴ ጉሙርቃ ዓሳ «ኮሺዳ?» ዒንሢ ጋዓኔ።

²⁵ፆኦሲኮ ኮሹሞ ዒንጊፃ ዒንሢ ቢያሢና ዎላ'' ማዖንጎ።