Read maale ዔብሬ ዓሶም ዳኪንቴ ኪኢታ 5 Bible Online

ዔብሬ ዓሶም ዳኪንቴ ኪኢታ 5 - maale bible

ዔብሬ ዓሶም ዳኪንቴ ኪኢታ 5

¹ቄኤሶኮ ቢያ ዑሢ ማዓ ፔቴ'' ፔቴ'' ዓሳ ፔ ዓሶ ባኣካ''ፓ ዶኦሪንታኔ፤ ዬያታ ፆኦሲም ማዺንታ ባኮና ዓሲ ዛላ ዔቂ ጎሜ ዓቶም ጌይሳ ዒንጊፆ ዒንጋኒ ዶኦሪንታኔ።

²ዒዚ ፔ ቶኦኪና ላቢ''ንታያ ማዔሢሮ ዔሩዋ ዓሶና ላቢ''ንታ ዓሶናም ሚጪንቲ ማኣዳ''ኒ ዳንዳዓኔ።

³ዒዚ ፔ ጎሞና ሜሌ'' ዓሶ ጎሞና ዛሎ'' ዒንጎ ባኮ ዒንጋኒ ዒዛ ኮይሴሢ ዬያ ዛሎ''ናኬ።

⁴ዓኣሮኔጉዲ ፆኦሲ ዔኤሊ''ባኣያ ማዔቴ ዖኦኒያ ዬያ ቦንቾ ፔኤሮ ዴንቃ ዓሲ ባኣሴ፤

⁵ዬያጉዲ ኪሪስቶሴ ቄኤሶኮ ቢያ ዑሢ ማሃ፥ ቦንቾ ፔኤሮ ዔኪ ቦንቺንቲባኣሴ፤ ጋዓንቴ ዒዚ ቄኤሶኮ ቢያ ዑሢ ማሃ ቦንቾ ዔኬሢ፦ «ኔኤኒ ታኣኮ ናዓሢኬ፤ ታኣኒ ኔኤኮ ሃኖ'' ዓዶ ማዔኔ» ጌዔ ፆኦዛሢዳፓኬ።

⁶ዬያጉዲ ሃሣ ሜሌ'' ቤስካ ፆኦሲ፦ «ሜልኬፃዲቄ ቄኤሴ ማዒ ዶኦሪንቴሢጉዲ ኔኤኒ ናንጊና ናንጋንዳ ቄኤሴኬ» ጋዓኔ።

⁷ዬሱሴ ዓሲ ማዒ ሃያ ሳዖይዳ ናንጌ ዎዶ''ና ሓይቢዳፓ ዒዛ ዻቂሻንዳ ፆኦዛሢ፡ ዼኤፒ ዒላቲና ሃሣ ዬኤኪ ዬኤኪ ፔ ማሊፆ ኬኤዚ ሺኢቄኔ፤ ዒዚ ሼሌዑሞና ዓይሢንቴሢሮ ፆኦሲ ዒዛኮ ዒማ''ና ሺኢጲፆ ዋይዜኔ።

⁸ዎዚ ዒ ፆኦሲ ናይ ማዔቴያ ዒዛ ሄሌ'' ሜታሢ ዛሎ''ና ዓይሢንቲሢ ዒ ዔሬኔ።

⁹ዬያና ዒ ጊኢጌያ ማዒ ጴዼስካፓ፥ ዓይሢንታዞንሢም ቢያ ናንጊና ዻቂንታኮ ካራ ማዔኔ።

¹⁰ሜልኬፃዲቄ ዶኦሪንቴሢጉዲ ፆኦሲ ዒዛ ቄኤሶኮ ቢያ ዑፃሢ ማሂ ዶኦሬኔ።

¹¹ዬያ ዛሎ'' ሚርጌ ኑ ኬኤዛንዳ ባኣዚ'' ናንጊታንቴ ዑኬ ዒንሢም ዔኤቢ ጌሉዋኣሢሮ ዒንሢም ኬኤዚ ዔርዛኒ ሜቶኬ።

¹²ሄኤዶ ሄሊ'' ዒንሢ ናንጌ ጎይፆና ሴካ ዓሲ ዔዔርዛንዳያታዖ ፆኦሲ ቃኣሎ''ኮ ዓይፆ ካሮ'' ሜሌ'' ዓሲ ሃጊ ዒንሢ ዔርዛንዳያ ኮይሳኔ፤ ዬይ ዒንሢም ኮይሳሢያ ዲኢቂ ማዓንዳኣፓዓቴም ዶዲ ሙኡዚቱዋሴ።

¹³ዓይጎሮ ጌዔቴ ዲኢቂ ሺሺንቂ ዑሾ''ሢ ቢያ ናይ ማዔሢሮ ፂሉ''ሞ ዛላ ዔራቶ ባኣዚ'' ሃጊ ዔሪባኣያኬ።

¹⁴ዶዲ ሙኡዚ'' ኮይሳሢ ጋዓንቴ ኮዦና ፑርቶና ዱማሲ ዛጊ ዔሬ ዒናዼ ዓሲምኬ።